ଭୁବନେଶ୍ବର: ପୁରୀ ପରି ମର୍ଯ୍ୟଦା ସଂପର୍ଣ୍ଣ ଲୋକସଭା ଆସନରେ କଂଗ୍ରେସ ପ୍ରାର୍ଥୀ ଯାହାକୁ କରିଛି ସେ ହେଉଛନ୍ତି ସୁଚରିତା ମହାନ୍ତି। 2014 ମସିହାରେ ମଧ୍ୟ ସେହି ପୁରୀ ଲୋକସଭା ଆସନରୁ ପ୍ରାର୍ଥୀ ହୋଇଥିଲେ। ହେଲେ ସେ ପ୍ରାୟ ଅଢେଇ ଲକ୍ଷରୁ ଉର୍ଦ୍ଧ ଭୋଟରେ ବିଜେଡିର ପିନାକୀ ମିଶ୍ରଙ୍କଠାରୁ ହାରିଥିଲେ। ଏହାପରେ 2019 ରେ କଂଗ୍ରେସ ତାଙ୍କୁ ଟିକେଟ ନ ଦେଇ ସତ୍ୟପ୍ରକାଶ ନାୟକଙ୍କୁ ପୁରୀରୁ ପ୍ରାର୍ଥୀ କରିଥିଲା। ସେ ମଧ୍ୟ ହାରିଥିଲେ।
ତେବେ ପ୍ରଶ୍ନ ଉଠିଛି ଯେ, କଂଗ୍ରେସ ପରି ଏକ ପୁରୁଣା ଦଳ ଆଉ ପୁରୀ ପରି ଏକ ମର୍ଯ୍ୟଦା ସଂପର୍ଣ୍ଣ ଆସନରେ କାହିଁକି ଏକ ଉପଯୁକ୍ତ ପ୍ରାର୍ଥୀ ଦେଉ ନାହିଁ। କାରଣ ସୁଚରିତା ମହାନ୍ତି ହେଉଛନ୍ତି ପୂର୍ବତନ ମନ୍ତ୍ରୀ ବ୍ରଜମୋହନ ମହାନ୍ତିଙ୍କ ଝିଅ। ହେଲେ ସେ ପରିବାର ସହିତ ଦିଲ୍ଲୀରେ ରୁହନ୍ତି। କେବଳ ଏହି ନିର୍ବାଚନ ବେଳେ ପୁରୀ ଆସି ବୁଲନ୍ତି, ନିର୍ବାଚନ ସରିଲେ ଦିଲ୍ଲୀ ଚାଲିଯାଆନ୍ତି।
ତେବେ ଆଉ ଏକ ଆଶ୍ଚର୍ଯ୍ୟର କଥା ହେଲା ଯେ, ପ୍ରଦେଶ କଂଗ୍ରେସ ଅନ୍ୟ କାହାକୁ ଛିଡା କରିବା ପାଇଁ ଇଚ୍ଛା ପ୍ରକାଶ କରୁଥିଲେ ମଧ୍ୟ ତାହା ହୋଇପାରୁ ନାହିଁ। ବିଶେଷ ସୁତ୍ର ଅନୁସାରେ ପ୍ରଦେଶ କଂଗ୍ରେସ କୁଆଡେ ସୁଚରିତା ପ୍ରାର୍ଥୀତ୍ବକୁ ବିରୋଧ କରୁଥିଲା। ହେଲେ ସେ ଦିଲ୍ଲୀରେ ରହୁଥିବାରୁ କୌଣସି ଏକ ଲବି ମାଧ୍ୟମରେ ପୁରୀ ଟିକେଟ ହାସଲ କରିବାରେ ସଫଳ ହୋଇଯାଉଛନ୍ତି।
ଏହାକୁ ନେଇ ପ୍ରଦେଶ କଂଗ୍ରେସରେ ଅସନ୍ତୋଷ ଥିଲେ ମଧ୍ୟ କେହି କିଛି କରିପାରୁ ନାହାଁନ୍ତି। ସୁଚରିତାଙ୍କର ସଂଗଠନ ନାହିଁ ବୋଲି ଦିଲ୍ଲୀ ନେତୃତ୍ବଙ୍କୁ ବୁଝାଇଲେ ମଧ୍ୟ ତାହା କାମ ଦେଉ ନାହିଁ। ସେଥିପାଇଁ ଚିଲିକାକୁ ବିଦେଶ ପକ୍ଷୀ ଆସିବା ପରି ସେ ଠିକ ନିର୍ବାଚନ ସମୟରେ ଆସି କିଛି ଦିନ ପ୍ରଚାର କରି ଦିଲ୍ଲୀ ଫେରିଯାଆନ୍ତି।
ଅନ୍ୟପକ୍ଷରେ ସୁଚରିତା ଭଲ ଭାବରେ ଜାଣନ୍ତି ଯେ, ସେ କେବେ ବି ପୁରୀରୁ ନିର୍ବାଚନ ଜିତିପାରିବେ ନାହିଁ। ପ୍ରଥମତଃ ତାଙ୍କର ନିଜସ୍ବ ସଂଗଠନ ନାହିଁ କି ଦଳର ମଧ୍ୟ ପୁରୀ ଲୋକସଭାରେ ସେପରି ସଂଗଠନ ନାହିଁ। ତଥାପି ସୁଚରିତା କଣ ପାଇଁ କଂଗ୍ରେସ ଟିକେଟ ଲବି କରି ଆଣୁଛନ୍ତି ତାହା ଖୋଦ କଂଗ୍ରେସ ନେତାଙ୍କୁ ମଧ୍ୟ ଆଶ୍ଚର୍ଯ୍ୟ କରିଛି।