ନୂଆଦିଲ୍ଲୀ: ଉତ୍ତରପ୍ରଦେଶରେ ଚାଲିଥିବା ବିଜେପିର ତଥାକଥିତ ଆଭ୍ୟନ୍ତରୀଣ ମତଭେଦ ମଧ୍ୟରେ ଦିଲ୍ଲୀରେ ବିଜେପିର ଏକ ଗୁରୁତ୍ୱପୂର୍ଣ୍ଣ ବୈଠକ ଚାଲିଛି। ଏହି ବୈଠକ ମଧ୍ୟରେ ସମାଜବାଦୀ ପାର୍ଟିର ନେତା ଏକ ବଡ ଦାବି କରିଛନ୍ତି, ଯାହା ୟୁପି ରାଜନୀତିକୁ ଗରମ କରିଛି। ଏସପି ନେତା ଆଇପି ସିଂ କହିଛନ୍ତି ଯେ, ୟୁପିରେ ଉଭୟ ଉପ-ମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ଏବଂ ବ୍ରଜେଶ ପାଠକଙ୍କୁ ପରିବର୍ତ୍ତନ କରାଯାଉଛି।
ସୋସିଆଲ ମିଡିଆରେ ଏସପି ନେତା ଆଇପି ସିଂ ଏକ ପୋଷ୍ଟ କରିଛନ୍ତି। ସେ ଲେଖିଛନ୍ତି ଯେ, ୨୦୨୭ରେ ସମାଜବାଦୀ ପାର୍ଟି ୩୦୦ ଅତିକ୍ରମ କରୁଛି, ଭାଜପା ୨୭ ଟି ଆସନରେ ସୀମିତ ରହୁଛି। ଉଭୟ ଉପ-ମୁଖ୍ୟମନ୍ତ୍ରୀ ନକଲି ନେତା ଅଟନ୍ତି, ଯିଏ ବିଜେପି ର ମଧ୍ୟ ନୁହନ୍ତି। କେଶବ ମୌର୍ଯ୍ୟଙ୍କୁ ଅମିତ ଶାହା ତଳୁ ଆଣି ଉପରେ ବସାଇଛନ୍ତି, ଯିଏ ଯୋଗ୍ୟ ନୁହଁନ୍ତି। ଦ୍ଵିତୀୟରେ ବ୍ରଜେଶ ପାଠକଙ୍କୁ କ୍ଷମତାର ଲଡୁ ଖୁଆଇବା ପାଇଁ ବିଏସପିରୁ ଆଣି ବିଜେପିରେ ସାମିଲ କରାଯାଇଛି। ସେପଟେ ବିଜେପିର ମୂଳ କାର୍ଯ୍ୟକର୍ତ୍ତା ଡାଃ ଦିନେଶ ଶର୍ମାକୁ ହଟାଇ ବ୍ରଜେଶ ପାଠକଙ୍କୁ ବସେଇଦିଆଯାଇଛି, ଯିଏ ନିଜର ଅସଲି ରଙ୍ଗ ଦେଖାଇଦେଇଛନ୍ତି। ଯାହା ଜଣାପଡୁଛି ସଂଘ ନିଜ ହାତକୁ ନେତୃତ୍ଵ ନେଇଛି, ବର୍ତ୍ତମାନ ସମସ୍ତେ ବୁଡୁଥିବା ଜାହାଜରୁ ଡେଇଁବା ପାଇଁ ଚେଷ୍ଟା କରୁଛନ୍ତି। ଏସପି କେବେ ବି ଏପରି ମୂର୍ଖ ନେତାଙ୍କୁ ସାମିଲ କରିବ ନାହିଁ।
ଏହା ସହ ଆଇପି ସିଂ ସୂତ୍ରରୁ ପ୍ରକାଶ ଯେ, ଲକ୍ଷ୍ମୀକାନ୍ତ ବାଜପେୟୀ ଏବଂ ସ୍ଵତନ୍ତ୍ର ଦେବ ସିଂ ୟୁପିର ପରବର୍ତ୍ତୀ ଉପମୁଖ୍ୟମନ୍ତ୍ରୀ ହୋଇପାରନ୍ତି। ସେ କହିଛନ୍ତି ଯେ, ଲକ୍ଷ୍ମୀକାନ୍ତ ବାଜପେୟୀ ଏବଂ ସ୍ଵତନ୍ତ୍ର ଦେବ ସିଂ ଉପ-ମୁଖ୍ୟମନ୍ତ୍ରୀ ବ୍ରଜେଶ ପାଠକ ଏବଂ କେଶବ ପ୍ରସାଦ ମୌର୍ଯ୍ୟଙ୍କ ସ୍ଥାନ ନେଇପାରନ୍ତି।
ପ୍ରକାଶ ଯେ, ଗତ କିଛି ଦିନ ହେବ ୟୁପି ବିଜେପିରେ ସବୁକିଛି ଠିକ୍ ଚାଲିନାହିଁ। ୟୁପି ବିଜେପିର କିଛି ନେତାଙ୍କ ମଧ୍ୟରେ ଆଭ୍ୟନ୍ତରୀଣ ମତଭେଦ ଚାଲିଛି ବୋଲି ବିଶ୍ୱାସ କରାଯାଉଛି। ତେବେ ଦିଲ୍ଲୀରେ ଆୟୋଜିତ ବିଜେପି ବୈଠକରେ ଏହି ବିବାଦ ବର୍ତ୍ତମାନ ଶେଷ ହୋଇପାରେ।