ଭୁବନେଶ୍ବର: ୱାକଫ ବିଲକୁ ନେଇ ମୁସଲିମ ସଂପ୍ରଦାୟ ତାତି ଉଠିଥିବା ବେଳେ ଏପଟେ ବିଜେଡି ମଧ୍ୟରେ ଆରମ୍ଭ ହୋଇଛି ବିଦ୍ରୋହ। ସସ୍ମିତ ପାତ୍ର କାହିଁକି ବିବେକ ଅନୁସାରେ ଭୋଟ ଦେବା ପାଇଁ ସାଂସଦମାନଙ୍କୁ କହିଲେ ତାହାକୁ ନେଇ ବିଜେଡି ନେତାଙ୍କ ରାଗ ପଞ୍ଚମ। ଏହାକୁ ନେଇ ବିଜେଡି ନେତା ପ୍ରଫୁଲ ମଲ୍ଲିକ କୁଆଡେ ନବୀନ ପଟ୍ଟନାୟକଙ୍କୁ ଚିଠି ଲେଖିଛନ୍ତି। ସେ କହିଛନ୍ତି ସାଂସଦ ସସ୍ମିତ ପାତ୍ରଙ୍କ ବିରୋଧରେ କାର୍ଯ୍ୟାନୁଷ୍ଠନ ଗ୍ରହଣ କରାଯାଉ। ଅଭିଯୋଗ, ସେ କାହିଁକି ବିବେକ ଅନୁସାରେ ଭୋଟ ଦେବାକୁ କହିଲେ।
ସେତିକି ନୁହେଁ ରାତିରାତି ବିଜେଡି ନେତାମାନେ ନବୀନ ନିବାସ ଯାଇ ସଭାପତିଙ୍କ ପାଖରେ ଫେରଦ ହେଲେ। କହିଲେ ଏପରି କାହିଁକି ହେଲା ନବୀନବାବୁ ବୁଝନ୍ତୁ। ସେମାନେ ବଡ ରାଗ ତମତମ ହୋଇଯାଇଥିଲେ। ହେଲେ ଫେରିବା ପରେ ଶାନ୍ତ ପଡିଗଲେ। କହିଲେ ଆମେ ସଭାପତି ନବୀନ ପଟ୍ଟନାୟକଙ୍କ ପାଖେ ଅଭିଯୋଗ କରିଛୁ। ପ୍ରଥମେ ନିଷ୍ପତି ହେଲା ବିଲ୍ କୁ ବିରୋଧ କରିବୁ। ହଠାତ ଏହି ନିଷ୍ପତିକୁ କିଏ କାହିଁକି ପରିବର୍ତ୍ତନ କଲା ସେ ନେଇ ଅଭିଯୋଗ କରି ଆସିଲୁ।
ତେବେ ଏଠାରେ ପ୍ରଶ୍ନ ଉଠିଛି ଯେ, ସସ୍ମିତ ପାତ୍ର କଣ ତାଙ୍କ ମନରୁ ଏପରି ନିଷ୍ପତି ନେଇଗଲେ କି ? ପୂର୍ବରୁ ସେ କେବେ ଏପରି ନିଷ୍ପତି ଗ୍ରହଣ କରିଛନ୍ତି କି? ସସ୍ମିତ ପାତ୍ର ଯେପରି ନେତା ସେ କେବେ ନବୀନ ନିବାସ ନିଷ୍ପତି ବିରୋଧରେ ଯାଇ ପାରିବେ ନାହିଁ। ସେ ନବୀନ ନିବାସର ଜଣେ ବଡ ଆଜ୍ଞାଧିନ ନେତା। ସସ୍ମିତଙ୍କ ସେପରି ଦମ ନାହିଁ ଯେ, ସେ ନବୀନ ପଟ୍ଟନାୟକ ଏବଂ ପାଣ୍ଡିଆନଙ୍କ ନିଷ୍ପତି ବିରୋଧରେ ଯିବେ।
ତେବେ ଘଟଣାଟି ହେଲା ଯେ, ସସ୍ମିତ ଯାହାକିଛି ଘୋଷଣା କରିଛନ୍ତି ତାହା ନବୀନ ନିବାସର ନିଷ୍ପତି। ତାଙ୍କୁ କୁହାଗଲା ବିରୋଧ କରିବା ବୋଲି କୁହ, ସେ କହିଲେ। ତାଙ୍କୁ କୁହାଗଲା ବିବେକ ଅନୁସାରେ ଭୋଟ ଦେବାକୁ ଟୁଇଟ କର, ସେ ଟୁଇଟ କଲେ। ତେଣୁ ଏହି ଘଟଣାରେ ସସ୍ମିତ ପାତ୍ରଙ୍କୁ ଏକ ମୋହରା ବନାଇ ଦିଆଗଲା। ପ୍ରକୃତରେ ବିଜେଡି ବିଲ୍ କୁ ବିରୋଧ କରିବାକୁ ନିଷ୍ପତି କରିଥିଲା। ହେଲେ ପରବର୍ତ୍ତି ସମୟରେ ଦିଲ୍ଲୀରୁ ଗୋଟିଏ ଫୋନ ଆସିବା ପରେ ନିଷ୍ପତି ବଦଳିଗଲା।
ତେବେ ଏପରି ଘଟଣା ବିଜେଡିରେ ପୂର୍ବରୁ ବହୁ ଥର ହୋଇଛି। ଯାହାକୁ କୁହାଯାଏ ଦୁଇଟି ଡଙ୍ଗାରେ ଗୋଡ ଦେଲେ ଯାହା ହେବ ତାହା ହିଁ ବିଜେଡି ଦଳରେ ଘଟୁଛି। ନେତାମାନଙ୍କୁ ସବୁ ମୋହରା ବନାଯାଉଛି। ସେମାନେ ମେଣ୍ଡାପଲ ପରି ହେଉଛନ୍ତି। ତାଙ୍କ ଆଖିରେ ଅନ୍ଧ ପୁଟୁଳି ବାନ୍ଧି ଦିଆଯାଇଛି। ଏମିତି କେମିତି ଘଟୁଛି ତାହା ସମସ୍ତ ବିଜେଡି ନେତାଙ୍କୁ ଜଣା। ହେଲେ କଣ ପାଇଁ ସେମାନେ ଜାଣି କିଛି ନ ଜାଣିବା ପରି ହେଉଛନ୍ତି ତାହା ସନ୍ଦେହ ଘେରରେ ରହିଛି।