Demat Accounts Increase: ଭାରତୀୟ ପ୍ରତିଭୂତି ଏବଂ ବିନିମୟ ବୋର୍ଡ (SEBI)ର ଅଧ୍ୟକ୍ଷ ତୁହିନ କାନ୍ତ ପାଣ୍ଡେ ଦେଶର ପୁଞ୍ଜି ବଜାର ପ୍ରତି ଭାରତୀୟ ନିବେଶକଙ୍କ ବିଶ୍ୱାସ ବୃଦ୍ଧି ପାଇଛି ବୋଲି କହିଥିଲେ। ନୂଆଦିଲ୍ଲୀରେ ଆୟୋଜିତ ଭାରତ ଆନ୍ତର୍ଜାତୀୟ ବାଣିଜ୍ୟ ମେଳା 2025ରେ ଅଭିଭାଷଣ ଦେଇ ସେ ସୂଚାଇଲେ ଯେ ଅକ୍ଟୋବର 2025 ସୁଦ୍ଧା ଭାରତରେ ପ୍ରାୟ 13.6 କୋଟି ନିବେଶକ 21 କୋଟିରୁ ଅଧିକ ଡିମାଟ୍ ଆକାଉଣ୍ଟ ଖୋଲିଛନ୍ତି।
ଏହା ବଜାର ପ୍ରତି ଦୃଢ଼ ବିଶ୍ୱାସକୁ ପ୍ରତିପାଦିତ କରିଛି। ସେ ଏହା ମଧ୍ୟ ଉଲ୍ଲେଖ କରିଛନ୍ତି ଯେ ପ୍ରତିଦିନ ପ୍ରାୟ ଏକ ଲକ୍ଷ ନୂତନ ଡିମାଟ୍ ଆକାଉଣ୍ଟ ଖୋଲାଯାଉଛି, ଯାହା ବିଶେଷକରି ଖୁଚୁରା ନିବେଶକଙ୍କ ମଧ୍ୟରେ ବୃଦ୍ଧି ପାଉଥିବା ଆଗ୍ରହକୁ ଦର୍ଶାଉଛି। ଏହା ସହିତ ଶ୍ରୀ ପାଣ୍ଡେ ଉଲ୍ଲେଖ କରିଛନ୍ତି ଯେ ମ୍ୟୁଚୁଆଲ୍ ଫଣ୍ଡ ଶିଳ୍ପରେ 80 ଟ୍ରିଲିୟନ ଟଙ୍କାରୁ ଅଧିକ ନିବେଶ କରାଯାଇଛି। ଏହା ମାତ୍ର ଏକ ଦଶନ୍ଧି ମଧ୍ୟରେ ସାତ ଗୁଣରୁ ଅଧିକ ଅଭିବୃଦ୍ଧି ବୋଲି ସେ କହିଛନ୍ତି।