ନୂଆଦିଲ୍ଲୀ: ୨୦୨୬ ଟି-୨୦ ବିଶ୍ଵକପର ସୁପର-୮ ରେ ଟିମ ଇଣ୍ଡିଆର ଲଜ୍ଜାଜନକ ପରାଜୟ। ଦକ୍ଷିଣ ଆଫ୍ରିକାଠାରୁ ଭାରତ ୭୬ ରନରେ ପରାସ୍ତ ହୋଇଛି। ଏତେ ବଡ ବ୍ୟବଧାନରେ ପରାଜୟ ଟିମ ଇଣ୍ଡିଆକୁ ସେମିଫାଇନାଲ ଯୋଗ୍ୟତା ପାଇଁ ସମସ୍ୟା ସୃଷ୍ଟି କରିଛି। ଏବେ ଟିମ ଇଣ୍ଡିଆକୁ ପରବର୍ତ୍ତୀ ଦୁଇଟି ମ୍ୟାଚରେ ଭଲ ରନ ରେଟରେ ଜିତିବାକୁ ପଡ଼ିବ।
ତେବେ ଆଜି ସୁପର-୮ ପର୍ଯ୍ୟାୟର ପ୍ରଥମ ମ୍ୟାଚରେ ଦକ୍ଷିଣ ଆଫ୍ରିକା ପ୍ରଥମେ ବ୍ୟାଟିଂ କରି ଭାରତକୁ ୧୮୮ ରନର ଟାର୍ଗେଟ ଦେଇଥିଲା। ଜବାବରେ ଭାରତୀୟ ଦଳ ମାତ୍ର ୧୧୧ ରନରେ ସମସ୍ତ ୱିକେଟ ହରାଇଥିଲା। ଦକ୍ଷିଣ ଆଫ୍ରିକାର ଆରମ୍ଭ ଖରାପ ଥିଲେ ମଧ୍ୟ ଡେଭିଡ ମିଲର, ବ୍ରେଭିସ ଏବଂ ଷ୍ଟବ୍ସ ବିସ୍ଫୋରକ ପାଳି ଖେଳିଥିଲେ। ଡେଭିଡ ମିଲର ୩୫ ବଲରେ ୬୩ ରନ କରିଥିବା ବେଳେ ବ୍ରେଭିସ ୨୯ ବଲରେ ୪୫ ରନ ଏବଂ ଷ୍ଟବ୍ସ ୨୪ ବଲରେ ଅପରାଜିତ ୪୪ ରନ କରିଥିଲେ। ଏହିପରି ଦକ୍ଷିଣ ଆଫ୍ରିକା ୨୦ ଓଭରରେ ୧୮୭ ରନ କରିବାରେ ସଫଳ ହୋଇଥିଲା।
ଭାରତୀୟ ଦଳ ପକ୍ଷରୁ ଜସପ୍ରିତ ବୁମରା ସଫଳ ବୋଲର ଭାବରେ ୪ ଓଭରରେ ବୋଲିଂ କରି ମାତ୍ର ୧୫ ରନ ଦେଇଥିଲେ ଏବଂ ୩ ଟି ୱିକେଟ ନେଇଥିଲେ। ସେହିଭଳି ବ୍ୟାଟିଂରେ ଶିବମ ଦୁବେ ଶେଷ ପର୍ଯ୍ୟନ୍ତ ଲଢି ୪୨ ରନ କରିଥିବା ବେଳେ ଅଧିନାୟକ ସୂର୍ଯ୍ୟ କୁମାର ୧୮ ଏବଂ ହାର୍ଦ୍ଦିକ ପାଣ୍ଡ୍ୟା ୧୮ ରନ କରିଥିଲେ।
ଦକ୍ଷିଣ ଆଫ୍ରିକାର ସମସ୍ତ ବୋଲର ଚମତ୍କାର ବୋଲିଂ କରିଥିଲେ। ମାର୍କୋ ଜାନସେନ ୩.୫ ଓଭରରେ ୨୨ ରନ ଦେଇ ସର୍ବାଧିକ ୪ ଟି ୱିକେଟ ନେଇଥିବା ବେଳେ କେଶବ ମହାରାଜ ୩ ଓଭରରେ ୨୪ ରନ ଦେଇ ୩ ଟି ୱିକେଟ ନେଇଥିଲେ ଏବଂ କର୍ବିନ ବୋଶ ୩ ଓଭରରେ ୧୨ ରନ ଦେଇ ୨ ଟି ୱିକେଟ ନେଇଥିଲେ।