ନୂଆଦିଲ୍ଲୀ: କେନ୍ଦ୍ର ଶ୍ରମ ଓ ନିଯୁକ୍ତି ଏବଂ ଯୁବ ବ୍ୟାପାର ଏବଂ କ୍ରୀଡା ମନ୍ତ୍ରୀ ଡକ୍ଟର ମନସୁଖ ମାଣ୍ଡଭିୟ ଆଜି ନୂତନ ଶ୍ରମ ସଂହିତା ଅନୁଯାୟୀ ୪୦ ବର୍ଷ ଏବଂ ଅଧିକ ବୟସର ଶ୍ରମିକଙ୍କ ପାଇଁ ଏକ ଦେଶବ୍ୟାପୀ ବାର୍ଷିକ ସ୍ୱାସ୍ଥ୍ୟ ପରୀକ୍ଷା କାର୍ଯ୍ୟକ୍ରମର ଶୁଭାରମ୍ଭ କରିବେ। ଏହି କାର୍ଯ୍ୟକ୍ରମର ଆନୁଷ୍ଠାନିକ ଉଦଘାଟନ ନୂଆଦିଲ୍ଲୀର ବାସଇଦାରାପୁରସ୍ଥିତ କର୍ମଚାରୀ ରାଜ୍ୟ ବୀମା ନିଗମ (ଇଏସଆଇସି) ମେଡିକାଲ କଲେଜ ଏବଂ ହସ୍ପିଟାଲରେ ହେବ। ଏହି ଜାତୀୟ ସ୍ତରୀୟ କାର୍ଯ୍ୟକ୍ରମ ସମେତ ଦେଶର ଅନ୍ୟ ୧୧ଟି ଇଏସଆଇସି ହସ୍ପିଟାଲରେ ମଧ୍ୟ ଉଦ୍ଘାଟନ ଉତ୍ସବ ଆୟୋଜନ କରାଯିବ, ଯେଉଁଥିରେ ସମ୍ପୃକ୍ତ ରାଜ୍ୟର ଶ୍ରମ ମନ୍ତ୍ରୀ, ସାଂସଦ, ବିଧାୟକ ଏବଂ ଅନ୍ୟାନ୍ୟ ମାନ୍ୟଗଣ୍ୟ ବ୍ୟକ୍ତି ଯୋଗଦେବେ।
ଏହି ପଦକ୍ଷେପ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ବ୍ୟାପକ ‘ଶ୍ରମେବ ଜୟତେ’ ଦୃଷ୍ଟିକୋଣ ସହିତ ସମନ୍ୱିତ, ଯାହା ଶ୍ରମର ମର୍ଯ୍ୟାଦା ଏବଂ ଶ୍ରମିକମାନଙ୍କ ପାଇଁ ଦୃଢ଼ ସାମାଜିକ ସୁରକ୍ଷା ଉପରେ ଗୁରୁତ୍ୱାରୋପ କରେ। ଏହି ପଦକ୍ଷେପର କାର୍ଯ୍ୟାନ୍ୱୟନ ଚାରୋଟି ନୂତନ ଶ୍ରମ ସଂହିତା ମାଧ୍ୟମରେ ଗ୍ରହଣ କରାଯାଇଥିବା ପରିବର୍ତ୍ତନକାରୀ ସଂସ୍କାର ଉପରେ ଆଧାରିତ, ଯାହା ଚାରୋଟି ବ୍ୟାପକ ସ୍ତମ୍ଭ ଅଧୀନରେ ୨୯ଟି କେନ୍ଦ୍ରୀୟ ଶ୍ରମ ଆଇନକୁ ଏକୀକୃତ କରୁଛି। ଏହି ସଂସ୍କାରଗୁଡ଼ିକର ଉଦ୍ଦେଶ୍ୟ ହେଉଛି ଅନୁପାଳନକୁ ସରଳ କରିବା, ନିଯୁକ୍ତିକୁ ଆନୁଷ୍ଠାନିକ କରିବା ଏବଂ ସାମାଜିକ ସୁରକ୍ଷାର ପରିସରକୁ ବିସ୍ତାର କରିବା।
ଉଲ୍ଲେଖନୀୟ ବିଷୟ ହେଉଛି ସାମାଜିକ ସୁରକ୍ଷା ସଂହିତା, ୨୦୨୦, ଅସଂଗଠିତ, ଗିଗ୍ ଏବଂ ପ୍ଲାଟଫର୍ମ କର୍ମଚାରୀମାନଙ୍କୁ ନିଜ ପରିସର ମଧ୍ୟରେ ଆଣେ, ଏକ ସାମାଜିକ ସୁରକ୍ଷା ପାଣ୍ଠି ସ୍ଥାପନ କରେ ଏବଂ ଇଏସଆଇସି ସୁବିଧାର ପରିସରକୁ ବିସ୍ତାର କରେ। ନୂତନ ଶ୍ରମ ଢାଞ୍ଚା ଅଧୀନରେ ଏକ ଗୁରୁତ୍ୱପୂର୍ଣ୍ଣ ବ୍ୟବସ୍ଥା ହେଉଛି ୪୦ ବର୍ଷ ଏବଂ ତଦୁର୍ଦ୍ଧ୍ୱ ବୟସର ଶ୍ରମିକଙ୍କ ପାଇଁ ବାଧ୍ୟତାମୂଳକ ବାର୍ଷିକ ସ୍ୱାସ୍ଥ୍ୟ ପରୀକ୍ଷା। ଇଏସଆଇ ଯୋଜନାର ହିତାଧିକାରୀମାନଙ୍କ ପାଇଁ, ଏହି ଯାଞ୍ଚଗୁଡ଼ିକ ଏହାର ବିସ୍ତୃତ ହସ୍ପିଟାଲ ନେଟୱାର୍କ ମାଧ୍ୟମରେ କରାଯିବ, ଯେଉଁଥିରେ ପ୍ରାରମ୍ଭିକ ରୋଗ ନିର୍ଣ୍ଣୟ, ପ୍ରତିରୋଧକ ସ୍ୱାସ୍ଥ୍ୟସେବା ଏବଂ ନିରନ୍ତର ସ୍ୱାସ୍ଥ୍ୟ ତଦାରଖ ଉପରେ ବିଶେଷ ଧ୍ୟାନ ଦିଆଯିବ।
ଗୁରୁତ୍ବପୂର୍ଣ୍ଣ କଥା ହେଉଛି ରାସାୟନିକ ପଦାର୍ଥ, ବିଷାକ୍ତ ପଦାର୍ଥ କିମ୍ବା ଭାରୀ ଯନ୍ତ୍ରପାତି ପରିଚାଳନା ସମେତ ବିପଦପୂର୍ଣ୍ଣ କିମ୍ବା ହାନୀକାରକ କାର୍ଯ୍ୟରେ ନିୟୋଜିତ ଶ୍ରମିକମାନଙ୍କ ପାଇଁ ଡାକ୍ତରୀ ପରୀକ୍ଷା ବାଧ୍ୟତାମୂଳକ କରାଯାଇଛି। କର୍ମଶକ୍ତିର ଦୀର୍ଘକାଳୀନ ସୁସ୍ଥତା ସୁନିଶ୍ଚିତ କରିବାକୁ ଏହି ପଦକ୍ଷେପ ମାଧ୍ୟମରେ ସ୍ୱାସ୍ଥ୍ୟ ରେକର୍ଡର ବ୍ୟବସ୍ଥିତ ରକ୍ଷଣାବେକ୍ଷଣ ଏବଂ ସମୟାନୁସାରେ ତଦାରଖ କରିବାର ବ୍ୟବସ୍ଥା କରାଯାଇଛି।
ଏହି ଦେଶବ୍ୟାପୀ ପଦକ୍ଷେପ ବୃତ୍ତିଗତ ସ୍ୱାସ୍ଥ୍ୟ ବ୍ୟବସ୍ଥାକୁ ସୁଦୃଢ଼ କରିବା, ଭାରତର କର୍ମଶକ୍ତି ପାଇଁ ବ୍ୟାପକ ସ୍ୱାସ୍ଥ୍ୟସେବା ଉପଲବ୍ଧତା ସୁନିଶ୍ଚିତ କରିବା ଏବଂ ‘ବିକଶିତ ଭାରତ ୨୦୪୭’ର ଦୃଷ୍ଟିକୋଣକୁ ଆଗକୁ ବଢାଇବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ।