ନୂଆଦିଲ୍ଲୀ: ଦେଶରେ ଜନସଂଖ୍ୟା ହାରରେ ହେଉଥିବା ପରିବର୍ତ୍ତନର ଅଧ୍ୟୟନ ପାଇଁ ଗଠିତ ଉଚ୍ଚସ୍ତରୀୟ କମିଟି ବୁଧବାର କେନ୍ଦ୍ର ଗୃହ ଓ ସମବାୟ ମନ୍ତ୍ରୀ ଅମିତ ଶାହଙ୍କ ସହ ନୂଆଦିଲ୍ଲୀରେ ବୈଠକ କରି ଆଗାମୀ କାର୍ଯ୍ୟଯୋଜନା ଉପସ୍ଥାପନ କରିଛି। କମିଟି ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ଗସ୍ତ କରି ପ୍ରାଥମିକ ସ୍ତରରେ ତଥ୍ୟ ସଂଗ୍ରହ କରିବା ସହ କେନ୍ଦ୍ରର ବିଭିନ୍ନ ମନ୍ତ୍ରଣାଳୟ ସହ ଆଲୋଚନା କରିବ ବୋଲି ଜଣାଇଛି।
କମିଟି ପକ୍ଷରୁ ଗୃହମନ୍ତ୍ରୀଙ୍କୁ କୁହାଯାଇଛି ଯେ, ରାଜ୍ୟ ଗସ୍ତକୁ ଅଧିକ ଫଳପ୍ରଦ କରିବା ପାଇଁ ପୂର୍ବରୁ ତଥ୍ୟ ସଂଗ୍ରହ ନିମନ୍ତେ ଏକ ସମନ୍ୱିତ ଓ ବିସ୍ତୃତ ପ୍ରଶ୍ନାବଳୀ ପ୍ରସ୍ତୁତ କରାଯାଇଛି। ଏହା ଆଧାରରେ ରାଜ୍ୟ ସରକାର ଓ କେନ୍ଦ୍ରଶାସିତ ଅଞ୍ଚଳ ପ୍ରଶାସନ ସହ ବିସ୍ତୃତ ଆଲୋଚନା କରାଯିବ।
ଅମିତ ଶାହ କମିଟିର କାର୍ଯ୍ୟଯୋଜନାକୁ ପ୍ରଶଂସା କରି ଗୃହ ସଚିବଙ୍କୁ କମିଟିର କାର୍ଯ୍ୟ ଏବଂ ରାଜ୍ୟ ଗସ୍ତ ସମୟରେ ସମସ୍ତ ପ୍ରକାର ସହଯୋଗ ଯୋଗାଇବାକୁ ନିର୍ଦ୍ଦେଶ ଦେଇଛନ୍ତି। ସେ କମିଟିକୁ ଯଥାଶୀଘ୍ର ନିଜର ସୁପାରିଶ ସରକାରଙ୍କୁ ଦାଖଲ କରିବାକୁ ମଧ୍ୟ ପରାମର୍ଶ ଦେଇଛନ୍ତି।
ଉଲ୍ଲେଖଯୋଗ୍ୟ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୦୨୫ ଅଗଷ୍ଟ ୧୫ରେ ‘ଉଚ୍ଚ କ୍ଷମତା ସମ୍ପନ୍ନ ଜନସଂଖ୍ୟା ହାର ପରିବର୍ତ୍ତନ ସଂକ୍ରାନ୍ତୀୟ ମିଶନ’ ଘୋଷଣା କରିଥିଲେ। ଏହା ପରେ ବେଆଇନ ପ୍ରବାସ ଏବଂ ଅନ୍ୟାନ୍ୟ ଅସ୍ୱାଭାବିକ କାରଣ ଯୋଗୁଁ ହେଉଥିବା ଜନସଂଖ୍ୟା ପରିବର୍ତ୍ତନର ଅଧ୍ୟୟନ ପାଇଁ ଏହି ଉଚ୍ଚସ୍ତରୀୟ କମିଟି ଗଠନ କରାଯାଇଥିଲା। ଅବସରପ୍ରାପ୍ତ ବିଚାରପତି ପ୍ରକାଶ ପ୍ରଭାକର ନଭଲେକର କମିଟିର ଅଧ୍ୟକ୍ଷ ଥିବାବେଳେ ଦୁର୍ଗା ଶଙ୍କର ମିଶ୍ର, ବାଲାଜୀ ଶ୍ରୀବାସ୍ତବ, ଡ. ଶାମିକା ରବି ଏବଂ ଜନଗଣନା କମିଶନର ଏହାର ସଦସ୍ୟ ଅଛନ୍ତି। କମିଟି ଜନସଂଖ୍ୟା ପରିବର୍ତ୍ତନର କାରଣ ବିଶ୍ଳେଷଣ କରି ନୀତିଗତ, ବୈଧାନିକ ଓ ପ୍ରଶାସନିକ ପଦକ୍ଷେପ ସମ୍ପର୍କରେ ସରକାରଙ୍କୁ ସୁପାରିଶ କରିବ।