ରଥଯାତ୍ରା ଭିଡ଼ ପରିଚାଳନା ପାଇଁ ଚଳିତ ବର୍ଷ ପୁରୀକୁ ନିୟମିତ ଚାଲୁଛି ୧୧୬ଟି ଟ୍ରେନ: ଅଶ୍ୱିନୀ ବୈଷ୍ଣବ

ନୂଆଦିଲ୍ଲୀ: ପୁରୀ ରଥଯାତ୍ରା ଏବଂ ଅନ୍ୟାନ୍ୟ ପ୍ରମୁଖ ପର୍ବପର୍ବାଣି ସମୟରେ ଯାତ୍ରୀଙ୍କ ସୁବିଧା ପାଇଁ ଭାରତୀୟ ରେଳ ପକ୍ଷରୁ ସ୍ୱତନ୍ତ୍ର ଟ୍ରେନ୍ ପରିଚାଳନା, ବର୍ତ୍ତମାନର ଟ୍ରେନ୍‌ରେ ଅତିରିକ୍ତ କୋଚ୍ ସଂଯୋଜନ ଏବଂ ସେବାର ସମ୍ପ୍ରସାରଣ କରାଯାଉଛି। ବର୍ତ୍ତମାନ ପୁରୀକୁ ୧୧୬ଟି ନିୟମିତ ଟ୍ରେନ୍ ସେବା ଉପଲବ୍ଧ ରହିଥିବା ବେଳେ ଚଳିତ ବର୍ଷ ରଥଯାତ୍ରା ଅବସରରେ ୧୫ରୁ ୨୮ ଜୁଲାଇ ପର୍ଯ୍ୟନ୍ତ ୧୪ ଦିନ ମଧ୍ୟରେ ସ୍ୱତନ୍ତ୍ର ଟ୍ରେନ୍ ଯାତ୍ରୀଙ୍କ ସେବାରେ ନିୟୋଜିତ କରାଯାଇଛି।

ରାଜ୍ୟସଭା ସାଂସଦ ଶୁଭାଶୀଷ ଖୁଣ୍ଟିଆଙ୍କ ଏକ ପ୍ରଶ୍ନର ଉତ୍ତର ଦେଇ ଶ୍ରୀ ବୈଷ୍ରବ କହିଛନ୍ତି, ଯାତ୍ରୀଙ୍କ ଆବଶ୍ୟକତାକୁ ପୂରଣ କରିବା ପାଇଁ ଭାରତୀୟ ରେଳ ନିରନ୍ତର ପ୍ରୟାସ କରୁଛି। ଏହି ସମୟରେ ନୂଆ ସେବା ଆରମ୍ଭ କରାଯିବା ସହ ବିଦ୍ୟମାନ ଟ୍ରେନ୍ ସେବାର ସମ୍ପ୍ରସାରଣ ମଧ୍ୟ କରାଯାଇଥାଏ। ସେବାଗୁଡ଼ିକର ବାରମ୍ବାରତା ମଧ୍ୟ ବୃଦ୍ଧି କରାଯାଇଥାଏ ବୋଲି ସେ ସୂଚନା ଦେଇଛନ୍ତି। ଏହା ବ୍ୟତୀତ, ବିଦ୍ୟମାନ ଟ୍ରେନ୍ ସେବାର କୋଚ୍  ବୃଦ୍ଧି ମଧ୍ୟ କରାଯାଇଥାଏ। ଏହିକ୍ରମରେ ପୁରୀରେ ରେଳସେବା ଲାଗି ଯେଉଁ ନିୟମିତ ଟ୍ରେନ ସୁବିଧା ଯୋଗାଇ ଦିଆଯାଉଛି ତାହାର ଏକ ବିବରଣୀ ମଧ୍ୟ ମନ୍ତ୍ରୀ ବୈଷ୍ଣବ ରାଜ୍ୟସଭାରେ ପ୍ରଦାନ କରିଛନ୍ତି। ଏହି ତାଲିକା ନିମ୍ନରେ ପ୍ରଦାନ କରାଗଲା:

ଏହା ସହିତ, ପାର୍ବଣ ଋତୁ, ପର୍ବପର୍ବାଣି, ଧାର୍ମିକ ସମାବେଶ ଇତ୍ୟାଦି ସମୟରେ ଯାତ୍ରୀଙ୍କ ଅତିରିକ୍ତ ଭିଡ଼କୁ ଦୃଷ୍ଟିରେ ରଖି, ଟ୍ରାଫିକ୍‌ର ଧାରା, ବ୍ୟାବସାୟିକ ଯୌକ୍ତିକତା, ପରିଚାଳନାଗତ ସମ୍ଭାବନା ଏବଂ ସମ୍ବଳର ଉପଲବ୍ଧତାକୁ ଧ୍ୟାନରେ ରଖି ଭାରତୀୟ ରେଳବାଇ ସ୍ୱତନ୍ତ୍ର ଟ୍ରେନ୍ ଚଳାଚଳ କରେ ଏବଂ ବିଦ୍ୟମାନ ସେବାଗୁଡ଼ିକର କୋଚ୍ ବୃଦ୍ଧି କରିଥାଏ ବୋଲି ସେ ଗୃହରେ ସୂଚନା ଦେଇଛନ୍ତି।

ରଥଯାତ୍ରା ଉତ୍ସବ ସମୟରେ ଯାତ୍ରୀମାନଙ୍କୁ ସୁବିଧା ଯୋଗାଇଦେବା ପାଇଁ, ୨୦୨୨ ରୁ ୨୦୨୫ ବର୍ଷ ମଧ୍ୟରେ ଟ୍ରେନ ଚଳାଚଳ ସମ୍ପର୍କରେ ବିବରଣୀ ପ୍ରଦାନ କରି ଶ୍ରୀ ବୈଷ୍ଣବ କହିଛନ୍ତି, ଏହି ୫ ବର୍ଷ ଭିତରେ ହୋଇଥିବା ରଥଯାତ୍ରା ଭିଡ଼ ପରିଚାଳନା ଲାଗି  ପ୍ରାୟ ୧୦୭୫ ଟି ସ୍ୱତନ୍ତ୍ର ଟ୍ରେନ୍ ଟ୍ରିପ୍‍ କରିଥିଲା। ଏଥିରରୁ ୨୦୨୨ ମସିହାରେ ୧୯୨ଟି  ସ୍ୱତନ୍ତ୍ର ଟ୍ରେନ ଟ୍ରିପ କରିଥିବା ବେଳେ ୨୦୨୩ରେ ୧୯୪, ୨୦୨୪ରେ ୩୨୩ ଏବଂ ୨୦୨୫ରେ ୩୬୫ ସ୍ୱତନ୍ତ୍ର ଟ୍ରେନ ଟ୍ରିପ୍‍ କରିଥିଲା।