ନୂଆଦିଲ୍ଲୀ: ଆଗାମୀ ମାସଗୁଡ଼ିକରେ ପିଆଜର ପର୍ଯ୍ୟାପ୍ତ ଉପଲବ୍ଧତା ଲାଗି ସରକାର ସକ୍ରିୟ ପଦକ୍ଷେପ ଗ୍ରହଣ କରୁଛନ୍ତି। ମଧ୍ୟବର୍ତ୍ତୀ ଋତୁକାଳୀନ ଦରବୃଦ୍ଧି ନିୟନ୍ତ୍ରଣ ଲାଗି ସରକାର ବଫର ଷ୍ଟକରୁ ପିଆଜ ବଜାରକୁ ଛାଡ଼ିବା ଆରମ୍ଭ କରିଛନ୍ତି। ପରିମାଣ ଏବଂ ଲକ୍ଷ୍ୟ ଆଧାରିତ ପଦକ୍ଷେପ ସହିତ ବଜାରରେ ପିଆଜର ଯଥେଷ୍ଟ ଉପଲବ୍ଧତା ସୁନିଶ୍ଚିତ କରାଯାଉଛି। ରେଳ ରେକ୍ ଏବଂ ସଡ଼କ ପରିବହନର ହାଇବ୍ରିଡ୍ ମଡେଲ୍ ମାଧ୍ୟମରେ ଏହି ହସ୍ତକ୍ଷେପ କରାଯାଇଛି। ପ୍ରଚଳିତ ବଜାର ପରିସ୍ଥିତି ଏବଂ ମୂଲ୍ୟ ଧାରା ଆଧାରରେ ପ୍ରମୁଖ ଚାହିଦା ଥିବା କେନ୍ଦ୍ରଗୁଡ଼ିକୁ ଯଥେଷ୍ଟ ପରିମାଣରେ ପିଆଜ ଯୋଗାଣ କରାଯାଉଛି।
ଆଗାମୀ ମାସଗୁଡ଼ିକରେ ଘରୋଇ ଚାହିଦା ପୂରଣ କରିବା ପାଇଁ ପିଆଜର ଉପଲବ୍ଧତା ପର୍ଯ୍ୟାନ୍ତ ରହିଛି। ଏହା ୨୦୨୫-୨୬ରେ ୩୦୭.୩୭ ଲକ୍ଷ ମେଟ୍ରିକ ଟନ୍ ଆନୁମାନିକ ଉତ୍ପାଦନ ଦ୍ୱାରା ସମର୍ଥିତ। ଏହି ପରିମାଣର ପୂର୍ବ ବର୍ଷର ୩୦୭.୬୭ ଏଲ୍ଏମଟି ଉତ୍ପାଦନ ସହିତ ସମାନ। ଦୃଢ଼ ଉତ୍ପାଦନ, ବଫର ଷ୍ଟକର ଉପଲବ୍ଧତା ଏବଂ ସକ୍ରିୟ ବଜାର ହସ୍ତକ୍ଷେପ ଆଗାମୀ ମାସଗୁଡ଼ିକରେ ପର୍ଯ୍ୟାପ୍ତ ଯୋଗାଣ ଏବଂ ମଧ୍ୟମ ଋତୁକାଳୀନ ମୂଲ୍ୟ ଚାପ ସୁନିଶ୍ଚିତ କରିବ ବୋଲି ଆଶା କରାଯାଉଛି। ସ୍ୱାଭାବିକ ଉତ୍ପାଦନ ସମ୍ଭାବନାକୁ ଦୃଷ୍ଟିରେ ରଖି, ସରକାର ୨୦୨୬-୨୭ ବର୍ଷରେ ମୂଲ୍ୟ ସ୍ଥିରୀକରଣ ପାଣ୍ଠି (ପିଏସଏଫ) ବଫର ପାଇଁ ୨.୦୦ ଏଲ୍ଏମଟି ରବି ପିଆଜର କ୍ରୟ ଲକ୍ଷ୍ୟ ଧାର୍ଯ୍ୟ କରିଥିଲେ। ୧୫ ମେ ୨୦୨୬ରେ ନାଫେଡ୍ ଏବଂ ଏନସିସିଏଫ ମାଧ୍ୟମରେ କ୍ରୟ କାର୍ଯ୍ୟ ଆରମ୍ଭ ହୋଇଥିଲା। ବଫର ପାଇଁ ପ୍ରାୟ ୧.୨୧ ଏଲ୍ଏମଟି ପିଆଜ କ୍ରୟ କରାଯାଇଛି।
ଭଣ୍ଡାର ପରିଚାଳନା ଏବଂ କାର୍ଯ୍ୟକ୍ଷମ ଦକ୍ଷତାକୁ ସୁଦୃଢ଼ କରିବା ପାଇଁ କେନ୍ଦ୍ରୀୟ ଗୋଦାମ ନିଗମ (ସିଡବ୍ଲୁସି) ପ୍ରଥମ ଥର ୨୦୨୬-୨୭ ବର୍ଷ ଲାଗି ପିଏସଏଫ ପିଆଜ ବଫର ନିମନ୍ତେ ସଂରକ୍ଷଣ ସଂସ୍ଥା ଭାବରେ ନିୟୋଜିତ ହୋଇଛି। ଓଣମ୍, ଗଣେଶ ଚତୁର୍ଥୀ, ଦୁର୍ଗା ପୂଜା, ଦଶହରା, ଦୀପାବଳି ଓ ବିବାହ ଋତୁ ସମେତ ପାର୍ବଣ ଋତୁ ଆରମ୍ଭ ହେବା ସହିତ ଅଧିକ ଚାହିଦା ଏବଂ ଯୋଗାଣ-ଶୃଙ୍ଖଳ କାରଣ ଯୋଗୁଁ ପିଆଜ ମୂଲ୍ୟ ସାଧାରଣତଃ ଋତୁକାଳୀନ ବୃଦ୍ଧି ପାଇଥାଏ।
ପର୍ଯ୍ୟାପ୍ତ ଉପଲବ୍ଧତା ସୁନିଶ୍ଚିତ କରିବା ଏବଂ ଅଯଥା ମୂଲ୍ୟ ଅସ୍ଥିରତାକୁ ରୋକିବା ପାଇଁ ସରକାର ବଫର ଷ୍ଟକରୁ ପିଆଜର ପରିମାଣ ଏବଂ ଲକ୍ଷ୍ୟ ଆଧାରିତ ଭାବେ ବଜାରକୁ ଛାଡ଼ିବା ଆରମ୍ଭ କରିଛନ୍ତି। ପିଆଜର ମୁକ୍ତ ପରିବହନ ରେଳ ରେକ ଏବଂ ସଡ଼କ ପରିବହନକୁ ନେଇ ଏକ ହାଇବ୍ରିଡ୍ ମଡେଲ୍ ମାଧ୍ୟମରେ କରାଯିବ, ଯାହା ଦ୍ୱାରା ପ୍ରମୁଖ ବ୍ୟବହାର କେନ୍ଦ୍ରଗୁଡ଼ିକୁ ପିଆଜ ପରିବହନ ସମ୍ଭବ ହେବ। ପ୍ରଚଳିତ ବଜାର ପରିସ୍ଥିତି ଏବଂ ମୂଲ୍ୟ ଧାରା ଆଧାରରେ ପିଆଜ ମୁକ୍ତ କରିବାର ପରିମାଣ, କଭରେଜ୍ ଏବଂ ଚ୍ୟାନେଲଗୁଡ଼ିକୁ ଆହୁରି ବିସ୍ତାର କରାଯିବ।
ଏନସିସିଏଫ ଏବଂ ନାଫେଡ୍ ଜରିଆରେ କିଲୋ ପ୍ରତି ୩୫ ଟଙ୍କାରେ ପିଆଜ ଯୋଗାଇ ଦିଆଯାଉଛି। ସଫଲ ଏବଂ କେନ୍ଦ୍ରୀୟ ଭଣ୍ଡାର ଆଉଟଲେଟ୍ ଜରିଆରେ ମଧ୍ୟ ପିଆଜ ମିଳୁଛି। ଏନସିସିଏଫର ୯ଟି ଖୁଚୁରା ବିକ୍ରୟ କେନ୍ଦ୍ର ଓ ୪୦ଟି ମୋବାଇଲ ଭ୍ୟାନ, ନାଫେଡର ୧୩ଟି ଖୁଚୁରା ବିକ୍ରୟ କେନ୍ଦ୍ର ଓ ୫୦ଟି ମୋବାଇଲ ଭ୍ୟାସ୍ ଏବଂ କେନ୍ଦ୍ରୀୟ ଭଣ୍ଡାର ଆଉଟଲେଟ୍ ର ପ୍ରାୟ ୧୦୦ଟି ଖୁଚୁରା ବିକ୍ରୟ କେନ୍ଦ୍ର ଜରିଆରେ ପିଆଜ ବଜାରରେ ଉପଲବ୍ଧ ହେଉଛି।
ବଫର ଷ୍ଟକରୁ ପିଆଜକୁ ଉତ୍ପାଦନକାରୀ ଅଞ୍ଚଳରୁ ବ୍ୟବହାର କେନ୍ଦ୍ରକୁ ସ୍ଥାନାନ୍ତର କରିବା ପାଇଁ କାନ୍ଦା ଏକ୍ସପ୍ରେସ ଜରିଆରେ ବିଭିନ୍ନ ସ୍ଥାନକୁ ପିଆଜ ଯୋଗାଇ ଦିଆଯାଉଛି। ୨୦୨୪-୨୫ ମଧ୍ୟରେ ପିଆଜ ବଫର ଷ୍ଟକ୍ ୧୪ଟି ରେଳ ରେକ୍ ମାଧ୍ୟମରେ ପାଞ୍ଚଟି ସହରକୁ ପ୍ରାୟ ୧୨ ହଜାର ମେଟ୍ରିକ୍ ଟନ୍ ପିଆଜ ପରିବହନ କରାଯାଇଥିଲା। ୨୦୨୫-୨୬ ମଧ୍ୟରେ କାର୍ଯ୍ୟ ଯଥେଷ୍ଟ ବୃଦ୍ଧି ପାଇଥିଲା, ୮୬ଟି ରେଳ ରେକ୍ ଦେଶର ୧୬ଟି ସହରକୁ ପ୍ରାୟ ୮୮ ହଜାର ମେଟ୍ରିକ୍ ଟନ୍ ପିଆଜ ଯୋଗାଇ ଦିଆଯାଇଛି।
ଅନ୍ୟପକ୍ଷରେ ଉପଭୋକ୍ତା ବ୍ୟାପାର ବିଭାଗ ଦେଶବ୍ୟାପୀ ୫୭୯ କେନ୍ଦ୍ରରେ ପିଆଜ ସମେତ ୪୧ଟି ଅତ୍ୟାବଶ୍ୟକ ସାମଗ୍ରୀର ଦୈନିକ ମୂଲ୍ୟ ଉପରେ ନଜର ରଖିଛି। ସର୍ବଭାରତୀୟ ହାରାହାରୀ ଦର ଅନୁସାରେ ବର୍ତ୍ତମାନ ବିଲାତି କିଲୋ ପ୍ରତି ୩୮ ଟଙ୍କା ୩୩ ପଇସା, ଆଳ ୨୨ ଟଙ୍କା ୬୩ ପଇସା, ଚଣା ଡାଲି ୮୬ ଟଙ୍କା ୭୧ ପଇସା, ଅଟା ୪୦ ଟଙ୍କା ୪୮ ପଇସା, କ୍ଷୀର ଲିଟର ୬୦ ଟଙ୍କା ଏବଂ ପିଆଜ ୩୭ ଟଙ୍କା ୮୭ ପଇସାରେ ମିଳୁଛି।