ବାଣପୁର: ଆଜି ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି) ବାଣପୁର ପକ୍ଷରୁ ସ୍ଥାନୀୟ କାର୍ଯ୍ୟକର୍ତ୍ତାମାନଙ୍କ ମିଳିତ ସହଯୋଗ ଓ ଉଦ୍ୟମରେ ଛୋଟ ଛୋଟ ପିଲାମାନଙ୍କ ଉଜ୍ଜ୍ୱଳ ଭବିଷ୍ୟତ, ଶିକ୍ଷା ଓ ନୈତିକ ସଂସ୍କାରର ମହତ୍ ଉଦ୍ଦେଶ୍ୟ ନେଇ ଏକ ‘ଗୋଦାବରୀଶ ସଂସ୍କାର କେନ୍ଦ୍ର’ର ଶୁଭ ଉଦ୍ଘାଟନ ଭେଟେଶ୍ୱର ପଞ୍ଚାୟତ ଅନ୍ତର୍ଗତ ବେତୁଲୀ ଗ୍ରାମରେ ହୋଇଯାଇଛି। ଉକ୍ତ ସଂସ୍କାର କେନ୍ଦ୍ରରେ ପ୍ରତି ସପ୍ତାହରେ ଗୋଟିଏ ଦିନ ବିଦ୍ୟାର୍ଥୀ ପରିଷଦର କାର୍ଯ୍ୟକର୍ତ୍ତାମାନେ ଛୋଟ ଛୋଟ ଶିଶୁମାନଙ୍କୁ ନିଃଶୁଳ୍କ ଶିକ୍ଷାଦାନ ଦେବେ। ପିଲାମାନଙ୍କୁ କେବଳ ପାଠପଢ଼ାରେ ନୁହେଁ, ବରଂ ଉତ୍ତମ ଚିନ୍ତାଧାରା, ଶୃଙ୍ଖଳା, ଶିଷ୍ଟାଚାର, ଗୁରୁଜନଙ୍କ ପ୍ରତି ସମ୍ମାନ ଓ ଦେଶପ୍ରେମ ଭଳି ମହତ୍ ଗୁଣରେ ସମୃଦ୍ଧ କରିବା ଲକ୍ଷରେ ଉକ୍ତ ମହତ ପ୍ରୟାସ ହାତକୁ ନେଇଛି ଏବିଭିପି।
ଉକ୍ତ କେନ୍ଦ୍ରର ଶୁଭାରମ୍ଭ ଅବସରରେ ସ୍ଥାନୀୟ ଜନ ପ୍ରତିନିଧି ଅମୂଲ୍ୟ ନାୟକ, ଗୋଦାବରୀଶ ମହାବିଦ୍ୟାଳୟ ଛାତ୍ର ସଂସଦ ସଭାପତି ସ୍ୱୟଂ ଶଙ୍କର ସୁପକାର, ସମ୍ପାଦକ ବିଶ୍ୱଜିତ ବରାଳ, ଡ଼ିଏସଏ ସମ୍ପାଦକ ଲୋକନାଥ ତରାଇ, ଛାତ୍ରୀ ସାଧାରଣ କକ୍ଷ ସହ ସମ୍ପାଦିକା ପ୍ରିୟଙ୍କା ସ୍ୱାଇଁ, ଓଡ଼ିଆ ସାହିତ୍ୟ ସଂସଦ ସହ ସମ୍ପାଦିକା ଶୁଭଶ୍ରୀ ସୁବୁଦ୍ଧି, ବାଲୁଗାଁ ମହାବିଦ୍ୟାଳୟ ଛାତ୍ର ସଂସଦ ସଭାପତି ପୂଜା ଦିହୁଡି, ସମ୍ପାଦକ ରବିନାରାୟଣ ବେହେରା, ତୁଷାର ମଲ୍ଲିକ, ଆକାଶ ରଣା, ଶ୍ୟାମସୁନ୍ଦର ପଲାଇ, ଅମର ପାଟଶାଣୀ ଓ ପୁରାତନ କାର୍ଯ୍ୟକର୍ତ୍ତା ସୁନୀଲ ବାରିକ ପ୍ରମୁଖ ଉପସ୍ଥିତ ଥିଲେ।


