ନୂଆଦିଲ୍ଲୀ: ଗୃହମନ୍ତ୍ରୀ ଅମିତ ଶାହା କହିଛନ୍ତି ଯେ, ମୋଦୀ ସରକାର ସଂସଦରେ ପ୍ରତ୍ୟେକ ପ୍ରସଙ୍ଗରେ ଆଲୋଚନା ପାଇଁ ପ୍ରସ୍ତୁତ। ଭୋଟର ତାଲିକା ପୁନରୀକ୍ଷଣ (SIR) ପ୍ରସଙ୍ଗରେ ମଧ୍ୟ ସରକାର ଚର୍ଚ୍ଚା ପାଇଁ ପ୍ରସ୍ତୁତ। ଏହା ସହ ସେ ରାହୁଲ ଗାନ୍ଧୀଙ୍କୁ ବିତର୍କ ପାଇଁ ଚ୍ୟାଲେଞ୍ଜ ଦେଇଛନ୍ତି।
ଛତିଶଗଡ଼ର ନୂଆ ରାୟପୁର ଅଟଳ ନଗରର କାୟାବାନ୍ଧାଠାରେ ବିକଶିତ ଭାରତ ସଙ୍କଳ୍ପ ପାର୍କର ଲୋକାର୍ପଣ ଅବସରରେ ଶାହା କଂଗ୍ରେସକୁ ଟାର୍ଗେଟ କରିଛନ୍ତି। ଶାହା କହିଛନ୍ତି ଯେ, “କଂଗ୍ରେସ ସବୁବେଳେ ଅସାମ୍ବିଧାନିକ ସରକାରକୁ ସମର୍ଥନ କରିଛି। ସେଠାରେ ଜନତା କୌଣସି ସରକାର ଚୟନ କରିନଥିଲେ। ନକ୍ସଲମାନଙ୍କର ନିଜର ଗୃହମନ୍ତ୍ରୀ, ମୁଖ୍ୟମନ୍ତ୍ରୀ ଓ ଅର୍ଥମନ୍ତ୍ରୀ ଥିଲେ। ରାହୁଲ ଗାନ୍ଧୀ ସଂସଦରେ ମଧ୍ୟ ଏହାକୁ ସମର୍ଥନ କରନ୍ତି।”
“ଅଟଳଜୀ ଛତିଶଗଡ଼ ଗଢ଼ିଲେ, ମୋଦୀଜୀ ନକ୍ସଲମୁକ୍ତ କଲେ”
ଗୃହମନ୍ତ୍ରୀ କହିଛନ୍ତି ଯେ, ଅଟଳ ବିହାରୀ ବାଜପେୟୀ ଛତିଶଗଡ଼ ରାଜ୍ୟ ଗଠନ କରିଥିଲେ ଓ ମୋଦୀ ଏହାକୁ ନକ୍ସଲମୁକ୍ତ କରି ବିକାଶ ରାସ୍ତାରେ ଆଣିଛନ୍ତି। “ଯେଉଁ ଜଙ୍ଗଲରେ ମହୁଆ ଓ ଲୋକଗୀତ ବାହାରିବା କଥା, ସେଠାରେ ବାରୁଦି ସୁଡ଼ଙ୍ଗ ତିଆରି କରାଗଲା। ଯେଉଁଠି ସ୍କୁଲ ପିଲା ହାତରେ ବସ୍ତାନୀ ଥିବା କଥା, ସେଠି ବନ୍ଧୁକ ଧରାଗଲା।”
ଶାହା ଆହୁରି କହିଛନ୍ତି ଯେ, କଂଗ୍ରେସ ସବୁବେଳେ ନକ୍ସଲବାଦକୁ ସମର୍ଥନ କରିଛି।