ଭୁବନେଶ୍ୱର: ଓଡ଼ିଶାକୁ ଅଧିକରୁ ଅଧିକ ବିଦେଶୀ ପୁଞ୍ଜିନିବେଶ ଆଣିବା ଏବଂ ରାଜ୍ୟର ଶିଳ୍ପାୟନକୁ ନୂତନ ଗତି ଦେବା ଲକ୍ଷ୍ୟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ନେତୃତ୍ୱରେ ଏକ ଉଚ୍ଚସ୍ତରୀୟ ପ୍ରତିନିଧିମଣ୍ଡଳୀ ଆସନ୍ତା ସେପ୍ଟେମ୍ବର ୮ ତାରିଖରୁ ସଂଯୁକ୍ତ ଅରବ ଏମିରେଟ୍ସ (ୟୁଏଇ) ଗସ୍ତ କରିବେ। ସେପ୍ଟେମ୍ବର ୮ ଓ ୯ ତାରିଖରେ ଦୁବାଇଠାରେ ଦୁଇଦିନିଆ ବିଶାଳ ନିବେଶକ ସମ୍ମିଳନୀ ଏବଂ ରୋଡ୍ ଶୋ’ ଆୟୋଜନ କରାଯିବ। ଏହି ଗସ୍ତ କାର୍ଯ୍ୟକ୍ରମରେ ରାଜ୍ୟ ଶିଳ୍ପମନ୍ତ୍ରୀ ସମ୍ପଦ ଚନ୍ଦ୍ର ସ୍ୱାଇଁଙ୍କ ସମେତ ରାଜ୍ୟର ବରିଷ୍ଠ ଅଧିକାରୀ ଓ ଶିଳ୍ପ ପ୍ରତିନିଧିମାନେ ସାମିଲ ହୋଇ ବିଭିନ୍ନ ପ୍ରମୁଖ ଆନ୍ତର୍ଜାତୀୟ ଶିଳ୍ପପତି, ପୁଞ୍ଜିନିବେଶକ ଓ ବ୍ୟବସାୟିକ ପ୍ରତିନିଧିମାନଙ୍କ ସହ ସ୍ୱତନ୍ତ୍ର ପ୍ରତ୍ୟକ୍ଷ ଆଲୋଚନା କରିବେ।
ଏହି ଦୁଇଦିନିଆ ନିବେଶକ ସମ୍ମିଳନୀରେ ଓଡ଼ିଶାରେ ଉପଲବ୍ଧ ପ୍ରଚୁର ଶିଳ୍ପ ସମ୍ଭାବନା, ଉତ୍କୃଷ୍ଟ ଭିତ୍ତିଭୂମି, ସରକାରଙ୍କ ନିବେଶ ଅନୁକୂଳ ସୁଗମ ନୀତି ଏବଂ ନିଯୁକ୍ତି ସୁଯୋଗ ସମ୍ପର୍କରେ ସବିଶେଷ ସୂଚନା ଦିଆଯିବ। ବିଶେଷକରି ଧାତୁ ଓ ଡାଉନ୍ଷ୍ଟ୍ରିମ୍ ଶିଳ୍ପ, ପେଟ୍ରୋକେମିକାଲ୍ସ, ସବୁଜ ଶକ୍ତି, ଗ୍ରୀନ୍ ହାଇଡ୍ରୋଜେନ୍, ଖାଦ୍ୟ ପ୍ରକ୍ରିୟାକରଣ, ବୟନ ଶିଳ୍ପ, ଇଲେକ୍ଟ୍ରୋନିକ୍ସ, ବନ୍ଦର ଏବଂ ଲଜିଷ୍ଟିକ୍ସ ଭଳି ବିଭିନ୍ନ ଗୁରୁତ୍ୱପୂର୍ଣ୍ଣ କ୍ଷେତ୍ରରେ ବିଦେଶୀ ପ୍ରତ୍ୟକ୍ଷ ନିବେଶ ସମ୍ଭାବନା ନେଇ ବ୍ୟାପକ ଚର୍ଚ୍ଚା କରାଯିବ। ରାଜ୍ୟରେ ନୂଆ ନୂଆ ଶିଳ୍ପ ସ୍ଥାପନ ସହ ସ୍ଥାନୀୟ ଯୁବକଯୁବତୀଙ୍କ ପାଇଁ ବ୍ୟାପକ ନିଯୁକ୍ତି ସୁଯୋଗ ସୃଷ୍ଟି କରିବା ଏହି ଗସ୍ତର ମୁଖ୍ୟ ଆଭିମୁଖ୍ୟ ରହିଛି।
ଦୁବାଇରେ ଆୟୋଜିତ ହେବାକୁ ଥିବା ବିଶେଷ ରୋଡ୍ ଶୋ’ ସହିତ ସଂଯୁକ୍ତ ଅରବ ଏମିରେଟ୍ସରେ ବସବାସ କରୁଥିବା ପ୍ରବାସୀ ଓଡ଼ିଆମାନଙ୍କୁ ନେଇ ମଧ୍ୟ ଏକ ସ୍ୱତନ୍ତ୍ର ଭାବବିନିମୟ କାର୍ଯ୍ୟକ୍ରମ ଆୟୋଜନ କରାଯିବ। ଏଥିରେ ମୁଖ୍ୟମନ୍ତ୍ରୀ ପ୍ରବାସୀ ଓଡ଼ିଆଙ୍କ ସହ ଭାବବିନିମୟ କରି ଓଡ଼ିଶାର ବିକାଶ, ପ୍ରଗତି ଏବଂ ଶିଳ୍ପାୟନ କ୍ଷେତ୍ରରେ ସେମାନଙ୍କର ସହଯୋଗ ଓ ସମ୍ପୃକ୍ତି ସମ୍ପର୍କରେ ଆଲୋଚନା କରିବେ। ସରକାର ନିବେଶକମାନଙ୍କ ସହ ନିରନ୍ତର ଯୋଗାଯୋଗରେ ରହିଥିବା ବେଳେ ଏହି ଆନ୍ତର୍ଜାତୀୟ ଗସ୍ତ ରାଜ୍ୟକୁ ବିପୁଳ ବିଦେଶୀ ପୁଞ୍ଜି ଆକୃଷ୍ଟ କରିବାରେ ଅତ୍ୟନ୍ତ ସଫଳ ହେବ ବୋଲି ଶିଳ୍ପମନ୍ତ୍ରୀ ଆଶା ପ୍ରକାଶ କରିଛନ୍ତି।