ଭୁବନେଶ୍ବର: ରାଜ୍ୟରୁ ବେଆଇନ ନିଶା ଓ ମାଦକ ଦ୍ରବ୍ୟ କାରବାରକୁ ସମ୍ପୂର୍ଣ୍ଣ ମୂଳୋତ୍ପାଟନ କରିବା ଏବଂ ପ୍ରଧାନମନ୍ତ୍ରୀଙ୍କ ‘ନିଶା ମୁକ୍ତ ଭାରତ’ ସ୍ୱପ୍ନକୁ ସାକାର କରିବା ପାଇଁ ଓଡ଼ିଶା ଅବକାରୀ ବିଭାଗ ଏକ ବ୍ୟାପକ ରଣନୀତି ପ୍ରସ୍ତୁତ କରିଛି। ଆସନ୍ତା ପାର୍ବଣ ଋତୁରେ ବେଆଇନ ନିଶା ବେପାର ଓ ଅପରାଧିକ କାର୍ଯ୍ୟକଳାପ ବୃଦ୍ଧି ପାଇବାର ସମ୍ଭାବନାକୁ ଦୃଷ୍ଟିରେ ରଖି ଆସନ୍ତା ଅକ୍ଟୋବର ୧୦ରୁ ୩୧ ତାରିଖ ପର୍ଯ୍ୟନ୍ତ ରାଜ୍ୟବ୍ୟାପୀ ଜୋରଦାର ସ୍ୱତନ୍ତ୍ର ଚଢ଼ଉ ଅଭିଯାନ ଚାଲିବ।
ସବୁ ଜିଲ୍ଲାର ଅବକାରୀ ଅଧୀକ୍ଷକମାନଙ୍କୁ ନେଇ ଆଭାସୀ ମାଧ୍ୟମରେ ଅନୁଷ୍ଠିତ ବୈଠକରେ ଅଧ୍ୟକ୍ଷତା କରି ମନ୍ତ୍ରୀ ଶ୍ରୀ ହରିଚନ୍ଦନ କହିଲେ ଯେ ମୁଖ୍ୟମନ୍ତ୍ରୀ ଏବଂ ଓଡ଼ିଶା ସରକାର ବେଆଇନ ନିଶା କାରବାରକୁ ମୁଳୋତ୍ପାଟନ ନେଇ ଯେଉଁ ଲକ୍ଷ୍ୟ ଧାର୍ଯ୍ୟ କରିଛନ୍ତି ଏହାକୁ ଆଗେଇ ନେବାକୁ ହେଲେ ବିଗତ ଦୁଇ ବର୍ଷ ପରି ବ୍ୟାପକ ମାତ୍ରାରେ ଚଢ଼ଉ କାର୍ଯ୍ୟକ୍ରମ କରିବାକୁ ପଡ଼ିବ। ଆବଶ୍ୟକ ସ୍ଥଳେ ପୁଲିସ ଓ ଜିଲ୍ଲାପ୍ରଶାସନର ସହଯୋଗ ନେବାକୁ ପଡ଼ିବ। ଆଗକୁ ପାର୍ବଣ ଋତୁ ଆସୁଥିବାରୁ ବେଆଇନ ନିଶା ଓ ଅପରାଧିକ କାରବାର ବୃଦ୍ଧି ପାଇବାର ସମ୍ଭାବନା ରହିଛି। ଏହି ଦୃଷ୍ଟିରୁ ଚଳିତ ଅକ୍ଟୋବର ୧୦ ରୁ ୩୧ ପର୍ଯ୍ୟନ୍ତ ହେବାକୁ ଥିବା ସ୍ୱତନ୍ତ୍ର ଚଢ଼ଉ ଅଭିଯାନକୁ ଗୁଇନ୍ଦା ତଥ୍ୟ ଆଧାରରେ ଅଧିକ ଜୋରଦାର କରିବାକୁ ପଡ଼ିବ ବୋଲି ମନ୍ତ୍ରୀ ସବୁ ଜିଲ୍ଲା ଅବକାରୀ ଅଧୀକ୍ଷକମାନଙ୍କୁ ନିର୍ଦ୍ଦେଶ ଦେଇଥିଲେ। ଏଥି ସହିତ ଅଦାଲତରେ ଅପରାଧୀଙ୍କ ବିରୋଧରେ କଡ଼ା ଦଣ୍ଡବିଧାନ ପାଇଁ ମଜଭୁତ ପ୍ରମାଣ ସଂଗ୍ରହ କରିବାକୁ ସେ ବୈଠକରେ ପରାମର୍ଶ ଦେଇଥିଲେ।
ଏଥିସହିତ ଚଢ଼ଉ ସମୟରେ କୌଣସି ଚାପର ବଶବର୍ତ୍ତୀ ନହେବା ସହିତ ଅଭ୍ୟାସଗତ ଅପରାଧୀଙ୍କ ପ୍ରତି ଶୂନ୍ୟସହନଶୀଳତା ନୀତି ଆପଣାଇବା ପାଇଁ ପରାମର୍ଶ ଦେଇଥିଲେ। ବୈଠକରେ ଅବକାରୀ କମିଶନର ପି. ଅନ୍ୱେଷା ରେଡ୍ଡୀ ପିପିଟି ମାଧ୍ୟମରେ ଜିଲ୍ଲା ୱାରୀ ହୋଇଥିବା ଚଢ଼ଉ ଅଭିଯାନ, ଜବତ ସାମଗ୍ରୀ ଓ ଯାନବାହାନ ସଂଖ୍ୟା, ଗିରଫଦାରୀ ବିଷୟରେ ତଥ୍ୟ ଉପସ୍ଥାପନ ସହ ବିଭାଗ ପକ୍ଷରୁ କାର୍ଯ୍ୟକାରୀ ହେଉଥିବା ବିଭିନ୍ନ କାର୍ଯ୍ୟକ୍ରମ ବିଷୟରେ ମନ୍ତ୍ରୀଙ୍କୁ ସୂଚନା ପ୍ରଦାନ କରିଥିଲେ। ବୈଠକରେ ଅତିରିକ୍ତ ଅବକାରୀ କମିଶନର ରୁଦ୍ର ନାରାୟଣ ମହାନ୍ତିଙ୍କ ସମେତ ସମସ୍ତ ଜିଲ୍ଲାର ଅବକାରୀ ଅଧିକ୍ଷକ, ଜୋନାଲ ଅଧିକାରୀ ଓ ବିଭାଗର ବରିଷ୍ଠ ଅଧିକାରୀ ମାନେ ଉପସ୍ଥିତ ଥିଲେ।