ଭୁବନେଶ୍ୱର: ରାଜ୍ୟରେ ଦୀର୍ଘ ୮ ବର୍ଷର ବ୍ୟବଧାନ ପରେ ଛାତ୍ର ସଂସଦ ନିର୍ବାଚନ ଅନୁଷ୍ଠିତ ହେଉଥିବାବେଳେ ଏହା ଏବେ ଶିକ୍ଷାନୁଷ୍ଠାନଗୁଡ଼ିକରେ ଉତ୍ତେଜନା ଏବଂ ହିଂସାର ରୂପ ନେଇଛି। ପ୍ରଚାର କାର୍ଯ୍ୟ ତୁଳନାରେ କ୍ୟାମ୍ପସରେ ହିଂସାକାଣ୍ଡ ଏତେ ମାତ୍ରାରେ ବୃଦ୍ଧି ପାଇଛି ଯେ, ବିଜେବି କଲେଜ୍ ହେଉ କି ବାଣୀବିହାର କିମ୍ବା ବାଙ୍କୀ କଲେଜ୍ ସବୁଆଡ଼େ ବୋମାବାଜି, ମାରଣାସ୍ତ୍ର ଆକ୍ରମଣ ଓ ଗୋଷ୍ଠୀ ସଂଘର୍ଷର ଭୟାବହ ଚିତ୍ର ସାମ୍ନାକୁ ଆସିଛି। ପୋଲିସ ମୁତୟନ ସତ୍ତ୍ୱେ ଛାତ୍ର ଗୋଷ୍ଠୀମାନେ ପରସ୍ପରକୁ ଆକ୍ରମଣ କରିବାକୁ ପଛାଉ ନାହାନ୍ତି। ପିପିଲି କଲେଜର ଏକ ଗୋଷ୍ଠୀ ଭୋଜି କରୁଥିବା ବେଳେ ବିରୋଧୀ ଗୋଷ୍ଠୀର ଆକ୍ରମଣରେ ଏବିଭିପି ସଭାପତି ପ୍ରାର୍ଥୀ ଆରୟନ୍ ମହାପାତ୍ରଙ୍କ ମୁଣ୍ଡ ଫାଟିଯାଇଥିଲା। ତଥାପି ସେ ଆଜି ବ୍ୟାଣ୍ଡେଜ୍ ପକାଇ ପ୍ରଚାର ଜାରି ରଖିଛନ୍ତି। ସେହିପରି ବାଣୀବିହାର ଏବଂ ବାଙ୍କୀ କଲେଜରେ ମଧ୍ୟ ବୋମାମାଡ଼ ହେବା ଫଳରେ କ୍ୟାମ୍ପସରେ ଚାପା ଉତ୍ତେଜନା ଏବଂ ଭୟର ବାତାବରଣ ସୃଷ୍ଟି ହୋଇଛି। ଏଭଳି ସ୍ଥିତିରେ ନେତାମାନଙ୍କ ପ୍ରତ୍ୟକ୍ଷ ହସ୍ତକ୍ଷେପ ଏବଂ କଲେଜ ପାଖରେ ଡେରା ପକାଇବା ଘଟଣା ସ୍ଥିତିକୁ ଆହୁରି ଜଟିଳ କରିଛି। ତେବେ ନିର୍ବାଚନ ପାଇଁ ଆଉ ମାତ୍ର ଦୁଇ ଦିନ ବାକି ଥିବାରୁ, ଆଗାମୀ ଦିନରେ ହିଂସା ବଢ଼ିବାର ଆଶଙ୍କାକୁ ଦୃଷ୍ଟିରେ ରଖି କ୍ୟାମ୍ପସଗୁଡ଼ିକରେ କଡ଼ା ପୋଲିସ ଛାଉଣୀ କରାଯାଇଛି।
Student Union Elections: Educational institutions rocked by bomb attacks and assaults with lethal weapons.