ସମୀକ୍ଷା ବ୍ୟୁରୋ
ଗତ ସପ୍ତାହେ ହେଲା ଲୋକଙ୍କ ଭିତରେ ଯେଉଁ ଅସନ୍ତୋଷ ଥିଲା ତାହା ଆଜି ଉଗ୍ର ରୂପ ଧାରଣ କରିଛି। ରାଜଧାନୀ ଭୁବନେଶ୍ବରର ହୃତକେନ୍ଦ୍ର ରାଜମହଲ ଛକରେ ଆଜି ଉତ୍ତ୍ୟକ୍ତ ଜନତା ପୋଲିସକୁ ଖୋଲାଖୋଲି ସାମ୍ନା କରିଛନ୍ତି। ରାଜରାସ୍ତାରେ ଆଜି ପୋଲିସ ଲୋକଙ୍କୁ ଗୋଡେଇ ଗୋଡେଇ ମାଡ ଦେଇଛି। ପୋଲିସ ଆକ୍ରମଣରେ ଗଣମାଧ୍ୟମର ପ୍ରତିନିଧିମାନେ ମଧ୍ୟ ଆହତ ହୋଇଛନ୍ତି। ଗତ ୧୯ ବର୍ଷର ନବୀନ ପଟ୍ଟନାୟକ ସରକାରରେ ପୋଲିସ ଗୁଣ୍ଡାରାଜର ଏ ପ୍ରକାର ଘଟଣା ଲୋକଙ୍କୁ ଆହୁରି କ୍ରୋଧିତ କରିଛି। ନୂଆ ମୋଟର ଯାନ ଆଇନକୁ ଲାଗୁ କରିବାରେ ଓଡିଶା ପୋଲିସର ମାତ୍ରାଧିକ ଆଗ୍ରହ ଓ ତାହାର ପ୍ରତିକ୍ରିୟାରେ ଲୋକଙ୍କ ଭିତରେ କୋକୁଆ ଭୟ ସୃଷ୍ଟି ହୋଇଥିବାରୁ ଆଜି ଏ ପ୍ରକାର ଘଟଣା ଘଟିଛି। ଗତ ସପ୍ତାହେ ହେଲା ଏହି ଆଇନକୁ ନେଇ ଲୋକଙ୍କ ଭିତରେ ଅସନ୍ତୋଷ କୁହୁଳୁଥିଲା। ଲୋକେ ଭୟରେ ନିଜର ଦୁଇ ଚକିଆ ଗାଡି ନେଇ ରାସ୍ତାକୁ ଆସିବା ବନ୍ଦ କରିଦେଇଛନ୍ତି। ତେବେ ଲୋକଙ୍କୁ ଭୟଭୀତ କରିବା ପୋଲିସର ବଡ ସଫଳତା ବୋଲି ପୋଲିସ ଭାବିନେଇଛି।
ଯେ କୌଣସି ଆଇନକୁ କାର୍ୟକାରୀ କରିବା ପୂର୍ବରୁ ସେ ସମ୍ପର୍କରେ ସବିଶେଷ ଜନ ସଚେତନତା ସୃଷ୍ଟି କରିବା ନିହାତି ଜରୁରୀ। ହଜାର ହଜାର ଟଙ୍କାର ଜରିମାନା ଆଦାୟ କରିବାର ସାମନ୍ତବାଦୀ ଆଇନକୁ ଲୋକେ ମୁଣ୍ଡପାତି ଗ୍ରହଣ କରିନେବେ ବୋଲି ଭାବିବା ପୋଲିସର ସବୁଠୁ ବଡ ଭୁଲ ଥିଲା। ଏହି ଆଇନକୁ ବିଜେପି ଶାସିତ ରାଜ୍ୟ ଗୁଡିକ ମଧ୍ୟ କାର୍ୟକାରୀ କରୁନଥିବା ବେଳେ ଓଡିଶା ସରକାର ଏହାକୁ ତୁରନ୍ତ ଲାଗୁ କରିବାର କାରଣ ଏଯାଏ ବୁଝା ପଡୁନାହିଁ।
ଆଜି ରାଜଧାନୀ ଭୁବନେଶ୍ବରର ରାଜମହଲ ପ୍ରଥମେ କିଛି ଲୋକ ପୋଲିସ ଗାଡିର କାଗଜପତ୍ର ଯାଞ୍ଚ କରିବାକୁ ଚେଷ୍ଟା କରିଥିଲେ। ଇତି ମଧ୍ୟରେ ଲୋକେ ଦେଖୁଛନ୍ତି ଯେ, ପୋଲିସ ସରକାରୀ ଗାଡି ଗୁଡିକୁ ଢିଲା ଛାଡୁଥିବା ବେଳେ ସାଧାରଣ ଲୋକଙ୍କ ଉପରେ ଅଧିକ ଜୁଲମ କରୁଛି। ପୁରୁଣା-ଧତଡା ଲୁନା ଖଣ୍ଡେ ଧରି କ୍ଷୀର ବିକୁଥିବା ବୁଢା ଲୋକ ଉପରେ ୫୦୦୦ ଟଙ୍କାର ଜରିମାନା- ସେକଥା ଶୁଣି ଲୋକେ ତାତିବା ସ୍ଵାଭାବିକ। ଏହି ଆଇନରେ ସାଧାରଣ ଗରିବ ଲୋକଙ୍କର ଜୀବନ ଓ ଜୀବିକା ଦୁର୍ବିସହ ହୋଇପଡିଛି। ସେକଥା ନ ବୁଝି ରାଜ୍ୟ ପୋଲିସ ଏହି ଆଇନକୁ ଅତ୍ୟଧିକ ମାତ୍ରାରେ ଲୋକଙ୍କ ଉପରେ ଲଦିଦେବାକୁ ଚେଷ୍ଟା କଲା। ରାଜମହଲ ଛକରେ ଲୋକଙ୍କର ପ୍ରତିକ୍ରିୟାକୁ ଗଣତାନ୍ତ୍ରିକ ଉପାୟରେ ସାମ୍ନା ନ କରି ଲାଠିମାଡ କରିବା ଓ ଗୁଣ୍ଡା ଭଳି ପ୍ରଦର୍ଶନ କରିବା, ସରକାରଙ୍କୁ ନିନ୍ଦିତ କରିଛି।
ରାଜଧାନୀ ଓ କଟକ ପୋଲିସ କମିଶନର ଭାବରେ ଯୋଗଦେବା ବେଳେ ସୁଧାଂଶୁ ଷଡଙ୍ଗୀ ପୋଲିସ ଲୋକଙ୍କ ବନ୍ଧୁ ଭାବେ କାମ କରିବ ବୋଲି ଘୋଷଣା କରିଥିଲେ। ତେବେ ଲାଠିମାଡ କରି ଏ କି ପ୍ରକାର ବନ୍ଧୁତା ତାହା ଲୋକେ ନିଶ୍ଚୟ ପଚାରିବେ? ଲୋକଙ୍କ ଉପରେ ଜୁଲମ କରି ଯଦି କୌଣସି ଆଇନକୁ ଲଦି ଦେବାକୁ ଚେଷ୍ଟା କରାଯାଏ ତାହେଲେ, ତାହାର ପରିଣତିରେ ଉଗ୍ର ଜନ ଅସନ୍ତୋଷ ପ୍ରକାଶ ପାଇବା ସ୍ଵାଭାବିକ। ଆଜିର ରାଜମହଲ ଘଟଣା ପରେ ଏହି ଆଇନ ବିରୋଧରେ ଜନମତ ପ୍ରବଳ ହେବା ସୁନିଶ୍ଚିତ।
