Bhubaneswar Tennis Centre: ଭୁବନେଶ୍ୱରରେ ଆରମ୍ଭ ହେବାକୁ ଥିବା ଆଇଟିଏଫ୍ ଏସିଆ U14 ଏବଂ ଅଣ୍ଡର ଡେଭଲପମେଣ୍ଟ ଚାମ୍ପିଅନସିପ୍ 2023 ଆରମ୍ଭ ହେବାକୁ ମାତ୍ର ଅଳ୍ପ ଦିନ ଅଛି। ଏହି ଅବସରରେ ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଆଜି କଳିଙ୍ଗ ଷ୍ଟାଡିୟମ୍ କ୍ରୀଡା କମ୍ପ୍ଲେକ୍ସରେ ଏକ ଟେନିସ୍ କେନ୍ଦ୍ରର ଉଦଘାଟନ କରିଛନ୍ତି।
ଏଥିସହିତ ସେ ଆଗାମୀ ଆନ୍ତର୍ଜାତୀୟ ଟେନିସ୍ ଟୁର୍ନାମେଣ୍ଟର ଲୋଗୋ ଏବଂ ଜର୍ସିକୁ ମଧ୍ୟ ଲୋକାର୍ପଣ କରିଛନ୍ତି। ୧୪୦୦ ଆସନ ବିଶିଷ୍ଠ ଏହି ଟେନିସ୍ କେନ୍ଦ୍ର ଆନ୍ତର୍ଜାତୀୟ ଟେନିସ୍ ଫେଡେରେସନ୍ ଦ୍ବାରା ସ୍ବୀକୃତ ହୋଇଛି। ଏଥିରେ ଜିମ୍ନାସିୟମ୍, ଖେଳାଳିଙ୍କ ପୋଷାକ ପରିବର୍ତ୍ତନ କୋଠରୀ, ଅଡିଟୋରିୟମ୍, ଏବଂ ଭିଆଇପି ରୁମ୍, ମିଡିଆ ରୁମ୍, ପ୍ରସାରଣ ଏବଂ ପ୍ରଶାସନିକ ବ୍ୟବହାର ରୁମ ସହିତ ଗୋଟିଏ ସିନ୍ଥେଟିକ୍ ସେଣ୍ଟର୍ କୋର୍ଟ ରହିଛି।
୨୫ କୋଟି ଟଙ୍କା ବ୍ୟୟରେ ଟେନିସ୍ କେନ୍ଦ୍ରକୁ ବିକଶିତ କରାଯାଇଛି। ୮ ଟି ସିନ୍ଥେଟିକ୍ ସହିତକଳିଙ୍ଗ ଷ୍ଟାଡିୟମରେ ଥିବା ଟେନିସ୍ କମ୍ପ୍ଲେକ୍ସ ବର୍ତ୍ତମାନ ଆନ୍ତର୍ଜାତୀୟ ଟେନିସ୍ ଫେଡେରେସନ୍ ଏବଂ ଏସୀୟ ଟେନିସ୍ ଫେଡେରେସନ୍ ଅଧୀନରେ ମ୍ୟାଚ୍ ଆୟୋଜନ କରିବାରେ ସକ୍ଷମ ହୋଇପାରିବ। ରାଜ୍ୟରେ ଟେନିସର ବିକାଶ ପାଇଁ ଘନିଷ୍ଠ ଭାବରେ କାର୍ଯ୍ୟ କରିଥିବାରୁ ମୁଖ୍ୟମନ୍ତ୍ରୀ ପଟ୍ଟନାୟକ ଓଡିଶା ଟେନିସ୍ ଆସୋସିଏସନ୍ ଏବଂ କ୍ରୀଡା ବିଭାଗକୁ ଅଭିନନ୍ଦନ ଜଣାଇଛନ୍ତି।
ସେ କହିଛନ୍ତି, “କଳିଙ୍ଗ ଷ୍ଟାଡିୟମ୍ ସ୍ପୋର୍ଟସ୍ କମ୍ପ୍ଲେକ୍ସ କ୍ରୀଡ଼ାର ଏକ ହବ୍ ଏବଂ ଏକ ପ୍ରିମିୟର ଟ୍ରେନିଂ ଗ୍ରାଉଣ୍ଡ ଭାବରେ ପ୍ରଶଂସିତ ହୋଇଛ। ଏହା ଭବିଷ୍ୟତର ଚାମ୍ପିୟାନମାନଙ୍କୁ ସୃଷ୍ଟି କରିବାରେ ସକ୍ଷମ ହେବ। ଟେନିସ୍ କେନ୍ଦ୍ରର ଯୋଗ ଆମର ଇକୋସିଷ୍ଟମକୁ ଆହୁରି ମଜବୁତ କରିବ ଯାହା ଆମର ଟେନିସ୍ ଖେଳାଳୀମାନଙ୍କୁ ଜାତୀୟ ଆନ୍ତର୍ଜାତୀୟ ଇଭେଣ୍ଟରେ ପ୍ରତିଦ୍ୱନ୍ଦ୍ୱିତା ଏବଂ ଉତ୍କର୍ଷ କରିବାରେ ସାହାଯ୍ୟ କରିବ।
ଏହା ଲୁକ୍କାୟିତ ପ୍ରତିଭା ଅନ୍ୱେଷଣ କରିବାରେ ଏବଂ ସମ୍ଭାବ୍ୟ ପଦକ ବିଜେତାମାନଙ୍କୁ ପ୍ରତିପୋଷଣ କରିବାରେ ମଧ୍ୟ ସାହାଯ୍ୟ କରିବ। ସୂଚନାଯୋଗ୍ୟ ଯେ, ଓଡିଶା ଟେନିସ୍ ଖେଳାଳି, କବୀର ହଂସ, ଦେବାଶିଷ ସାହୁ, ସୋହିନୀ ସଂଜୟ ମହାନ୍ତି ଏବଂ ଆରାଧ୍ୟା ବର୍ମା ଟେନିସ୍ ରେ ନିଜର ପରିଚୟ ସୃଷ୍ଟି କରୁଛନ୍ତି। ଓଡିଶା କ୍ରୀଡ଼ା ବିଭାଗ ଯୁବ ଟେନିସ୍ ଖେଳାଳିଙ୍କ ସ୍ଥାୟୀ ଉଚ୍ଚ ପ୍ରଦର୍ଶନ ପାଇଁ ଏକ ରୋଡ୍ ମ୍ୟାପ ପ୍ରସ୍ତୁତ କରିବା ଉପରେ ଧ୍ୟାନ ଦେଉଛନ୍ତି।
ଏହି ଅବସରରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ବିଭିନ୍ନ ଆନ୍ତର୍ଜାତୀୟ ଇଭେଣ୍ଟରେ ସଫଳତା ପାଇଁ କ୍ରୀଡ଼ାବିତ୍ ଅର୍ଚ୍ଚନା ମାଝି (ଖୋ ଖୋ), ସ୍ବାଧୀନ ମାଝି (ଆଥଲେଟିକ୍ସ), ଦେବାଶିଷ ସାହୁ (ଟେନିସ୍) ଏବଂ ଜୟନ୍ତୀ ବେହେରା (ପାରା ଆଥଲେଟିକ୍ସ) ଙ୍କୁ ମଧ୍ୟ ଅଭିନନ୍ଦନ ଜଣାଇଛନ୍ତି।
ଉଦଘାଟନ ପୂର୍ବରୁ କ୍ରୀଡ଼ା ମନ୍ତ୍ରୀ ତୁଷାରକାନ୍ତ ବେହେରା ବିଭିନ୍ନ ଜାତୀୟ ପ୍ରତିଯୋଗୀତାରେ ସଫଳତା ପାଇଁ 45 ଜଣ ଆଥଲେଟସଙ୍କୁ ନଗଦ ପୁରସ୍କାର ପ୍ରଦାନ କରିଥିଲେ। ଏହି ଉଦଘାଟନୀ ଉତ୍ସବରେ ମୁଖ୍ୟ ଶାସନ ସଚିବ ପି.କେ ଜେନା, ଉନ୍ନୟନ କମିଶନର ଅନୁ ଗର୍ଗ, ମୁଖ୍ୟମନ୍ତ୍ରୀଙ୍କ (୫ ଟି) ସଚିବ ଭି କେ ପାଣ୍ଡିଆନ୍, କ୍ରୀଡ଼ା ଏବଂ ଯୁବ ସେବା ସଚିବ ଭିନେଲ କ୍ରିଷ୍ଣା, OTA ସଭାପତି ଅସିତ ତ୍ରିପାଠୀ, ସଚିବ ସତ୍ୟଜିତ୍ ମହାନ୍ତି ଏବଂ OTA ଏବଂ କ୍ରୀଡା ବିଭାଗର ଅନ୍ୟ ଅଧିକାରୀମାନେ ଉପସ୍ଥିତ ଥିଲେ।
