ବାଲୁଗାଁ( ସୀତାରାମ ଅଗ୍ରୱାଲ): ଭାରତୀୟ କ୍ରୀଡ଼ାଜଗତର କିମ୍ବଦନ୍ତୀ ପୁରୁଷ ତଥା ହକିର ମହାନାୟକ ମେଜର ଧ୍ୟାନଚାନ୍ଦଙ୍କ ଜନ୍ମଦିନରେ ବାଲୁଗାଁରେ ଜାତୀୟ କ୍ରୀଡ଼ା ଦିବସ ଅନୁଷ୍ଠିତ ହୋଇଯାଇଛି l ବାଲୁଗାଁ କ୍ରୀଡ଼ା ଓ ସାଂସ୍କୃତିକ ପରିଷଦ ଓ ସ୍ବେଛାସେବୀ ଅନୁଷ୍ଠାନ ବିହଙ୍ଗ ଫାଉଣ୍ଡେସନର ମିଳିତ ଆୟୋଜନରେ ଅନୁଷ୍ଠିତ ଏହି ସମାରୋହରେ ଡକ୍ଟର ମାନସ ମୋହନ ବଳିୟାରସିଂହ ସଭାପତିତ୍ୱ କରିଥିଲେ।
ଅତିଥିମାନେ ଧ୍ୟାନଚାନ୍ଦଙ୍କ ଫଟୋ ରେ ମାଲ୍ୟାର୍ପଣ କରିବା ପରେ ଅନୁଷ୍ଠାନ ପକ୍ଷରୁ ସମ୍ବର୍ଦ୍ଧିତ କରାଯାଇଥିଲା। ଏଥିରେ ମୁଖ୍ୟ ଅତିଥିଭାବେ ବାଲୁଗାଁର ସୁନାମଧନ୍ୟ ଫୁଟବଲ ଓ ବ୍ୟାଡମିଣ୍ଟନ ଖେଳାଳୀ ହମିଦ ଖାଁ ମୁଖ୍ୟ ଅତିଥିଭାବେ ଯୋଗଦେଇଥିବା ବେଳେ କ୍ରୀଡ଼ାବିତ ବିଭୁତି ଭୂଷଣ ସାମନ୍ତରାୟ,ବୈରାଗୀ ଚରଣ ବଳ ଓ ରବିନାରାୟଣ ନାୟକ ସମ୍ମାନିତ ଅତିଥିଭାବେ ଯୋଗ ଦେଇଥିଲେ।
ମୁଖ୍ୟ ଅତିଥି ଶ୍ରୀ ଖାଁ ବାଲୁଗାଁର କ୍ରୀଡ଼ା ଇତିହାସ ରୋମନ୍ଥନ କରିବା ସହ ନିଜ ଛାତ୍ର ଅବସ୍ଥାର ସଂଘର୍ଷମୟ କ୍ରୀଡ଼ା ଅନୁଭୂତି ଉପସ୍ଥାପନ କରିଥିଲେ। ସେ କହିଥିଲେ ଯେ କ୍ରୀଡ଼ା ଜୀବନକୁ ଶୃଙ୍ଖଳିତ, ଧୈର୍ଯ୍ୟବାନ ଓ ଏକନିଷ୍ଠ କରିଥାଏ। ଏହା ଜଣେ ଖେଳାଳିର ସମଗ୍ର ଜୀବନକୁ ପରିଚାଳିତ ଓ ନିୟନ୍ତ୍ରଣ କରିଥାଏ। କ୍ରୀଡ଼ାବିତ ବିଭୁତି ଭୂଷଣ ସାମନ୍ତରାୟ ବାଲୁଗାଁ ଅଂଚଳର ଫୁଟବଲ ଖେଳର ଉତ୍କର୍ଷତା ଓ ଗାରିମା ବର୍ଣ୍ଣନା କରିଥିଲେ।
କ୍ରୀଡ଼ା ପ୍ରଶିକ୍ଷକ ବୈରାଗୀ ଚରଣ ବଳ କ୍ରୀଡ଼ା ସହିତ ସାମ୍ପ୍ରତିକ ସମୟର କ୍ରୀଡ଼ା ପ୍ରୋତ୍ସାହନ ଓ ରୋଜଗାର ପନ୍ଥାର ସୂଚନା ପ୍ରଦାନ କରିଥିଲେ। ଏହି ଅବସରରେ ପ୍ରାକ୍ତନ ଲକି ଷ୍ଟାର ଫୁଟବଲ ଖେଳାଳି ବିଜୟ କୁମାର ବେହେରା, ଲିଙ୍ଗରାଜ ଜାଲି, ଜାତୀୟ ଫୁଟବଲ କୋଚ ପ୍ରସନ୍ନ ବେହେରା, ଜାତୀୟ କରାଟେ କୋଚ ଦୀପକ ସାମନ୍ତରା, କ୍ରୀଡ଼ାବିତ କ୍ରିଷ୍ଣl ଶିକାରୀ ପ୍ରମୁଖ ସେମାନଙ୍କର କ୍ରୀଡ଼ା ଅନୁଭୂତି ସହିତ ବାଲୁଗାଁ ବାଣପୁର ଅଂଚଳ ରେ କ୍ରୀଡାର ବିକାଶ ପାଇଁ ସ୍ବପ୍ନ ଉପସ୍ଥାପନ କରିଥିଲେ। ଏହାପରେ କାର୍ଯ୍ୟକ୍ରମ ସଂଯୋଜକ ତଥା ବିହଙ୍ଗ ଫାଉଣ୍ଡେସନର ସଭାପତି ଡକ୍ଟର କୈଳାସ ଚନ୍ଦ୍ର ମହାରଣlଙ୍କ ପରିଚାଳନାରେ କ୍ରୀଡ଼ା ସମ୍ବର୍ଦ୍ଧନା ପର୍ବ ଅନୁଷ୍ଠିତ ହୋଇଥିଲା।
ଏହି ସମ୍ବର୍ଦ୍ଧନା ସମାରୋହରେ ଅନ୍ତର୍ଜାତୀୟ କରାଟେ ଖେଳାଳୀ ଦୀପକ କୁମାର ସାମନ୍ତରାୟ, ଅନ୍ତର୍ଜାତୀୟ ଭଲିବଲ ଖେଳାଳୀ ଆଶିଷ ସ୍ୱାଇଁ, ଫୁଟବଲ କୋଚ ପ୍ରସନ୍ନ କୁମାର ବେହେରା, ହେମନ୍ତ କୁମାର ବେହେରା, ଜାତୀୟ ଭଲିବଲ କୋଚ ବିଭୂ୍ଧେନ୍ଦୁ ମାନସିଂହ, ଜାତୀୟ ଭଲିବଲ ଖେଳାଳୀ କଳ୍ପଶ୍ରୀ ପ୍ରଧାନ, ଅର୍ଚନା ବେହେରା, ଲିଙ୍କି ବରାଳ, ଜାତୀୟ ଶକ୍ତି ଉତ୍ତୋଳନକାରୀ ଖେଳାଳୀ ସୌମେନ ସେନାପତି, ଜାତୀୟ ସ୍ବର୍ଣ୍ଣ ପଦକ ବିଜୟିନୀ କରାଟେ ଖେଳାଳୀ ସଲୋନୀ ପାତ୍ର, ଜାତୀୟ କବାଡି ଖେଳାଳୀ ଆଦର୍ଶ ପ୍ରୀତମ ବେହେରା, କରାଟେ ଜୁନିଅର ଜାତୀୟ ଖେଳାଳୀ ଦିବ୍ୟାଙ୍ଗନା ସାମନ୍ତରାୟ, ଦୀପଶିଖା ସାମନ୍ତରାୟ ଓ ଜାତୀୟବ୍ୟାଡ଼ମିଣ୍ଟନ ଖେଳାଳୀ ରଜତ ମହାନ୍ତି ଙ୍କୁ ମୁଖ୍ୟ ଅତିଥି ହମିଦ ଖାଁ ଓ ଅନ୍ୟ ଅତିଥିମାନେ ମାନପତ୍ର, ଉତ୍ତରୀୟ ଓ କ୍ରୀଡ଼ା ସ୍ମାରକୀ ଦେଇ ସମ୍ବର୍ଦ୍ଧିତ କରିଥିଲେ l ସଭାପତି ଡକ୍ଟର ମାନସ ମୋହନ ବଳିୟାରସିଂହ ସମସ୍ତଙ୍କୁ କୃତଜ୍ଞତା ଜଣାଇଥିଲେ। ଏଥିରେ ସହଯୋଗ କରିଥିଲେ ବିଏସସିସି ଓ ବିହଙ୍ଗ ଫାଉଣ୍ଡେସନର ସଦସ୍ୟମାନେ।