ନୂଆଦିଲ୍ଲୀ: ଗୁଆହାଟୀଠାରେ ଅନୁଷ୍ଠିତ ବିସିସିଆଇର ଏକ ଗୁରୁତ୍ୱପୂର୍ଣ୍ଣ ବୈଠକରେ ଭାରତୀୟ ମହିଳା କ୍ରିକେଟ୍ ଦଳର ନେତୃତ୍ୱରେ ଏକ ପ୍ରମୁଖ ପରିବର୍ତ୍ତନ କରାଯାଇଛି। ହରମନ୍ପ୍ରୀତ କୌରଙ୍କ ସ୍ଥାନରେ ଷ୍ଟାର୍ ବ୍ୟାଟର ସ୍ମୃତି ମନ୍ଧାନାଙ୍କୁ ଦିନିକିଆ ଓ ଟି-୨୦ ଫର୍ମାଟ୍ ପାଇଁ ନୂଆ ଅଧିନାୟିକା ଭାବେ ନିଯୁକ୍ତି ଦିଆଯାଇଛି। ଦୀର୍ଘ ଦିନ ଧରି ଉପ-ଅଧିନାୟିକା ଦାୟିତ୍ୱ ତୁଲାଉଥିବା ସ୍ମୃତି ୨୦୧୩ରୁ ଦଳର ଏକ ମୁଖ୍ୟ ଅଙ୍ଗ ରହିଆସିଛନ୍ତି। ପୂର୍ବରୁ ସେ ୧୮ଟି ଟି-୨୦ ଓ ୪ଟି ଦିନିକିଆ ମ୍ୟାଚ୍ରେ ଭାରତର ନେତୃତ୍ୱ ନେଇସାରିଥିବା ବେଳେ ମହିଳା ପ୍ରିମିୟର ଲିଗ୍ (ଡବ୍ଲ୍ୟୁପିଏଲ) ରେ ରୋୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) କୁ ୨୦୨୪ ଏବଂ ୨୦୨୬ ମସିହାରେ ଚାମ୍ପିଅନ୍ କରାଇ ନିଜର ଦକ୍ଷ ଅଧିନାୟକତ୍ୱର ପ୍ରମାଣ ଦେଇଛନ୍ତି।
ବିସିସିଆଇ ସଭାପତି ମିଥୁନ ମିନ୍ହାସ ଏବଂ ସମ୍ପାଦକ ଦେବଜୀତ ସାଇକିଆ, ସ୍ମୃତିଙ୍କ ଉପରେ ସମ୍ପୂର୍ଣ୍ଣ ଆସ୍ଥା ପ୍ରକଟ କରିଛନ୍ତି। ସଭାପତି ମିଥୁନ ମିନ୍ହାସ କହିଛନ୍ତି ଯେ, ସ୍ମୃତି ବହୁ ବର୍ଷ ଧରି ଭାରତୀୟ କ୍ରିକେଟ୍ର ମୁଖ୍ୟ ଆଧାର ରହିଛନ୍ତି ଏବଂ ଦଳକୁ ଆଗରୁ ନେତୃତ୍ୱ ଦେବାର ସମସ୍ତ ଗୁଣ ତାଙ୍କ ପାଖରେ ରହିଛି। ସେହିପରି ସମ୍ପାଦକ ଦେବଜୀତ ସାଇକିଆ ମଧ୍ୟ ସ୍ମୃତିଙ୍କ ଅଭିଜ୍ଞତାକୁ ପ୍ରଶଂସା କରି ସେ ନିଜ ଦାୟିତ୍ୱ ସୁଚାରୁ ରୂପେ ତୁଲାଇବେ ବୋଲି ଦୃଢ଼ ବିଶ୍ୱାସ ପ୍ରକାଶ କରିଛନ୍ତି। ଅଧିନାୟିକା ଭାବେ ମନୋନୀତ ହେବା ପରେ ସ୍ମୃତି ମନ୍ଧାନା ଏହାକୁ ନିଜ ପାଇଁ ଏକ ବଡ଼ ସମ୍ମାନ ଓ ସ୍ୱପ୍ନ ସଦୃଶ ବୋଲି କହିଛନ୍ତି। ଏହି ସୁଯୋଗ ପାଇଁ ସେ ବିସିସିଆଇ, ଚୟନକର୍ତ୍ତା ଏବଂ ସାଥୀ ଖେଳାଳିଙ୍କୁ ଧନ୍ୟବାଦ ଜଣାଇବା ସହ ଆଗାମୀ ଦିନରେ ନିଜର ସର୍ବଶ୍ରେଷ୍ଠ ପ୍ରଦର୍ଶନ ଦେବାକୁ ପ୍ରତିଶ୍ରୁତି ଦେଇଛନ୍ତି।