ନୂଆଦିଲ୍ଲୀ: ଅହମଦାବାଦରେ ଅକ୍ଟୋବର ୨୩ରୁ ୩୧ ତାରିଖ ପର୍ଯ୍ୟନ୍ତ ପ୍ରଥମ ରାଜ୍ୟଗୋଷ୍ଠୀ କବାଡ଼ି ଚାମ୍ପିଅନ୍ଶିପ୍ ଆୟୋଜିତ ହେବାକୁ ଯାଉଛି। ୯ ଦିନ ଧରି ଚାଲିବାକୁ ଥିବା ଏହି ଆନ୍ତର୍ଜାତୀୟ ଟୁର୍ଣ୍ଣାମେଣ୍ଟ୍ରେ ବିଶ୍ୱର ବିଭିନ୍ନ ଦେଶରୁ ଆସିଥିବା ଖେଳାଳିମାନେ ନିଜର ପ୍ରତିଦ୍ୱନ୍ଦ୍ୱିତା ପ୍ରଦର୍ଶନ କରିବେ।
ଅନ୍ତର୍ଜାତୀୟ କବାଡ଼ି ମହାସଂଘର ସ୍ୱୀକୃତି ଏବଂ ଭାରତୀୟ ସୌଖୀନ୍ କବାଡ଼ି ମହାସଂଘର ପରିଚାଳନାରେ ଅନୁଷ୍ଠିତ ହେବାକୁ ଥିବା ଏହି ଚାମ୍ପିଅନ୍ଶିପ୍ରେ ମୋଟ ୨୩ଟି ଦଳ ଏବଂ ୧୩ଟି ଦେଶରୁ ୪୦୦ରୁ ଊର୍ଦ୍ଧ୍ୱ କ୍ରୀଡ଼ାବିତ୍ ଭାଗନେଉଛନ୍ତି। ଏହି ୯ ଦିନିଆ ଇଭେଣ୍ଟ୍ରେ ମୋଟ ୬୨ଟି ରୋମାଞ୍ଚକର ମ୍ୟାଚ୍ ଖେଳାଯିବ। ଏହି ପ୍ରତିଯୋଗିତାରେ ଭାରତ, ଶ୍ରୀଲଙ୍କା, ବାଂଲାଦେଶ, ନାଇଜେରିଆ, କେନିଆ, ତାଞ୍ଜାନିଆ, କାନାଡା, ସିଙ୍ଗାପୁର, ମାଲେସିଆ, ୟୁଗାଣ୍ଡା, ଇଂଲଣ୍ଡ, ସ୍କଟ୍ଲାଣ୍ଡ୍ ଏବଂ ଅଷ୍ଟ୍ରେଲିଆ ଭଳି ପ୍ରମୁଖ ଦେଶଗୁଡ଼ିକର ଟିମ୍ ଅଂଶଗ୍ରହଣ କରୁଛନ୍ତି। ଆୟୋଜକ ଭାରତ ପକ୍ଷରୁ ପୁରୁଷ ଦଳର କ୍ୟାପ୍ଟେନ୍ ଦାୟିତ୍ୱ ସୁରଜିତ ସିଂହ ଏବଂ ମହିଳା ଦଳର କ୍ୟାପ୍ଟେନ୍ ଦାୟିତ୍ୱ ନିଧି ଶର୍ମା ବହନ କରିବେ।
ଟୁର୍ଣ୍ଣାମେଣ୍ଟ୍ର ମ୍ୟାଚ୍ଗୁଡ଼ିକ ଗ୍ରୁପ୍ ପର୍ଯ୍ୟାୟରୁ ଆରମ୍ଭ ହୋଇ ଅକ୍ଟୋବର ୩୦ରେ ଉଭୟ ପୁରୁଷ ଓ ମହିଳା ବର୍ଗର ସେମିଫାଇନାଲ୍ ମୁକାବିଲା ଅନୁଷ୍ଠିତ ହେବ। ଏହାପରେ ଅକ୍ଟୋବର ୩୧ ତାରିଖରେ ଫାଇନାଲ୍ ମ୍ୟାଚ୍ ସହିତ ଏହି ପ୍ରତିଯୋଗିତାର ଉଦ୍ଯାପନ ହେବ। ଏକେଏଫ୍ଆଇର ସମ୍ପାଦକ ଜିତେନ୍ଦ୍ର ସିଂହ ଠାକୁର କହିଛନ୍ତି ଯେ ଭାରତୀୟ ମାଟିରେ ଏହାର ଆୟୋଜନ କବାଡ଼ି କ୍ରୀଡ଼ା ପାଇଁ ଏକ ଗୌରବର ମୁହୂର୍ତ୍ତ ଅଟେ।