ହାମିଲଟନ୍ : ଭାରତ ଏବଂ ନ୍ୟୁଜିଲ୍ୟାଣ୍ଡ ମଧ୍ୟରେ ଅନୁଷ୍ଠିତ ଦିନିକିଆ ଶୃଙ୍ଖଳାର ପ୍ରଥମ ଦୁଇ ମ୍ୟାଚ୍ରେ ବିଜୟୀ ହେବା ସହିତ ଶୃଙ୍ଖଳା ଉପରେ କବ୍ଜା କରି ନେଇଛି କିଓ୍ବି ଦଳ । ଟି 20 ଶୃଙ୍ଖଳାକୁ 5-0ରେ ହାରିବା ପରେ ପ୍ରଥମ ଦୁଇ ଦିନିକିଆରେ ବିଜୟୀ ହୋଇ ସିରିଜ୍ ଉପରେ କବ୍ଜା କରିଛି ନ୍ୟୁଜିଲ୍ୟାଣ୍ଡ ଦଳ । ହାମିଲଟନ୍ରେ ଅନୁଷ୍ଠିତ ଦ୍ବିତୀୟ ଦିନିକିଆକୁ ନ୍ୟୁଜିଲ୍ୟାଣ୍ଡ 22 ରନରେ ବିଜୟୀ ହେବା ସହିତ ଭାରତ ବିପକ୍ଷରେ କ୍ରମାଗତ ତୃତୀୟ ଦିନିକିଆ ଶୃଙ୍ଖଳାରେ ବିଜୟୀ ହୋଇଛି । ଟସ୍ ଜିତି ପ୍ରଥମେ ବୋଲିଂ କରୁଥିବା ଭାରତ ନ୍ୟୁଜିଲ୍ୟାଣ୍ଡକୁ ମାତ୍ର 273 ରନ୍ରେ ସୀମିତ ରଖିଥିଲେ ମଧ୍ୟ ବ୍ୟାଟ୍ସମ୍ୟାନ୍ଙ୍କ ବିଫଳତା କାରଣରୁ 22 ରନ୍ ପଛରେ ରହିଯାଇଥିଲା ।
ଟସ୍ ଜିତି ପ୍ରଥମେ ବୋଲିଂ କରିଥିବା ଭାରତକୁ ପ୍ରଥମ ସଫଳତା ମିଳିଥିଲା 17 ତମ ଓଭରରେ । 85 ରନ୍ରେ ପ୍ରଥମ ଓ୍ବିକେଟ୍ ହରାଇଥିବା ପରବର୍ତ୍ତୀ 112 ରନ୍ ମଧ୍ୟରେ 7 ଓ୍ବିକେଟ ହରାଇଥିଲା । ମାତ୍ର ନବମ ଓ୍ବିକେଟ୍ରେ ରସ୍ ଟେଲର (73) ଏବଂ ଜେମିସାନ(23)ଙ୍କ 76 ରନ୍ ଭାଗିଦାରୀ ବଳରେ ଦଳ 273 ରନ୍ ସଂଗ୍ରହ କରିଥିଲା । ନ୍ୟୁଜିଲ୍ୟାଣ୍ଡ ପକ୍ଷରୁ ମାର୍ଟିନ୍ ଗପ୍ତିଲ୍ ସର୍ବାଧିକ 79 ରନ୍ କରିଥିବା ବେଳେ ଟେଲର ଅପରାଜିତ 73 ରନ୍ ସଂଗ୍ରହ କରିଥିଲେ । ଭାରତ ପକ୍ଷରୁ ୟୁଜବେନ୍ଦ୍ର ଚହଲ ସର୍ବାଧିକ 3ଟି ଓ୍ବିକେଟ ଅକ୍ତିଆର କରିଥିଲେ ।
274ରନ୍ର ପିଛା କରୁଥିବା ଭାରତୀୟ ଦଳର ପ୍ରାରମ୍ଭିକ ଯୋଡି ବିଫଳ ହୋଇଥିବା ବେଳେ ଅଧିନାୟକ ବିରାଟ କୋହଲି ମଧ୍ୟ ବଡ ସ୍କୋର କରି ପାରିନଥିଲେ । ଗୋଟିଏ ପଟୁ ଶ୍ରେୟସ୍ ଆୟାର୍(52) ବ୍ୟାଟିଂ କରୁଥିବା ବେଳେ କେ ଏଲ୍ ରାହୁଲ, କେଦାର ଯାଦବ ଶସ୍ତାରେ ଆଉଟ ହୋଇଥିଲେ । ଦଳୀୟ ସ୍କୋର 129 ରହିଥିବା ବେଳେ ଷଷ୍ଠ ଓ୍ବିକେଟ୍ ଭାବରେ ଶ୍ରେୟସ୍ ଆୟାର ଆଉଟ ହେବା ପରେ ଭାରତର ପରାଜୟ ଏକ ପ୍ରକାର ନିଶ୍ଚିତ ହୋଇଥିଲା । ମାତ୍ର ରବୀନ୍ଦ୍ର ଜାଡେଜା(55) ତଳୁଆ ଅର୍ଡର ବ୍ୟାଟ୍ସମ୍ୟାନ୍ଙ୍କ ସହ ମିଶି ଇନିଂସ ଆଗକୁ ବଢାଇଥିଲେ । ଶାର୍ଦ୍ଦୁଲ ଠାକୁର(18)ଙ୍କ ସହିତ 24 ରନ୍ ଯୋଡିଥିଲେ । ନବ୍ଦୀପ୍ ସାଇନି(45)ଙ୍କ ସହିତ ଜାଡେଜା 76 ରନ୍ ଯୋଗ କରି ଦଳକୁ ବିଜୟର ନିକଟବର୍ତ୍ତୀ କରିଥିଲେ । ମାତ୍ର ସାଇନିଙ୍କ ପରେ ଚହଲ (12) ରନ୍ଆଉଟ ହୋଇଥିଲେ । ଜାଡେଜା ବାଉଣ୍ଡ୍ରି ମାରିବା ପ୍ରୟାସରେ ଆଉଟ ହେବା ସହିତ ଭାରତୀୟ ଇନିଂସର ସମାପ୍ତି ଘଟିଥିଲା । କାଇଲ୍ ଜେମିସନ୍ଙ୍କୁ ମ୍ୟାଚ୍ର ଶ୍ରେଷ୍ଠ ଖେଳାଳି ଘୋଷଣା କରାଯାଇଥିଲା ।