ପୁରୀ : ଭକ୍ତ ବତ୍ସଳ ମହାପ୍ରଭୁ କାଳିଆ ଠାକୁର ଏଥର ବିନା ଭକ୍ତରେ କରିବେ ତାଙ୍କର ଯାତ୍ରା। ଭକ୍ତ ପ୍ରିୟ କଳା ରସିକ କଳାଠାକୁର ଏଥର ବିନା ଭକ୍ତରେ ଆସିବେ ସ୍ନାନମଣ୍ଡପକୁ ପୁଣି ଆସିବେ ବଡଦାଣ୍ଡକୁ । କରୋନା କଟକଣା ପାଇଁ ପୁରୀ ଶ୍ରୀମନ୍ଦିର ବନ୍ଦ ରହିଥିବାବେଳେ ମହାପ୍ରଭୁ ଶ୍ରୀଜଗନ୍ନାଥଙ୍କ ସ୍ନାନଯାତ୍ରାକୁ ଅନୁମତି ମିଳିଛି । ମାତ୍ର ଚଳିତ ଥର ସ୍ନାନ ଯାତ୍ରାରେ ଭକ୍ତଙ୍କ ଗହଣରେ ପ୍ରଭୁ ଆସିବେନି ବରଂ ଆସିବେ ସେହି ପଣ୍ଡାମାନଙ୍କ ଗହଣରେ ।
ଗ୍ରହଣ ଶ୍ରୀମନ୍ଦିର ପରିଚାଳନା କମିଟି ବୈଠକରେ ଆଜି ରଥଯାତ୍ରା ଓ ସ୍ନାନଯାତ୍ରା ନେଇ ଗୁରୁତ୍ବପୂର୍ଣ୍ଣ ନିଷ୍ପତ୍ତି ନିଆଯାଇଛି । ବୈଠକ ନିଷ୍ପତ୍ତି ନେଇ କମିଟି ଅଧ୍ୟକ୍ଷ ଗଜପତି ମହାରାଜ ସୂଚନା ଦେଇଛନ୍ତି । ସ୍ନାନ ଯାତ୍ରା ବିଧିବିଧାନ ଅନୁସାରେ କରିବାକୁ ନିଷ୍ପତ୍ତି ଗ୍ରହଣ କରାଯାଇଥିବାବେଳେ କୌଣସି ଦର୍ଶନାର୍ଥୀଙ୍କ ପାଇଁ ଶ୍ରୀମନ୍ଦିର ଖୋଲାଯାଇପାରିବ ନାହିଁ । ସାଧାରଣ ଦର୍ଶନାର୍ଥୀଙ୍କ ପାଇଁ ଶ୍ରୀମନ୍ଦିର ବନ୍ଦ ରହିବାକୁ ନିଷ୍ପତ୍ତି ନିଆଯାଇଛି । ସ୍ନାନଯାତ୍ରାରେ କୋଭିଡ୍ ଗାଇଡଲାଇନ୍କୁ ସେବକମାନେ ପାଳନ କରିବେ । କରୋନା ରିସ୍କ ଏଡାଇବା ପାଇଁ ସବୁ ବ୍ୟବସ୍ଥା କରାଯାଉଛ । ରଥଯାତ୍ରା ନେଇ ମଧ୍ୟ ବୈଠକରେ ଗୁରୁତ୍ବପୂର୍ଣ୍ଣ ନିଷ୍ପତ୍ତି ହୋଇଛି। ବିଧି ଅନୁସାରେ ରଥଯାତ୍ରା କରିବାକୁ ପରିଚାଳନା ସମିତି ମତ ଦେଲା । ରଥଯାତ୍ରାରେ ସାଧାରଣ ଭକ୍ତଙ୍କ ଯୋଗଦାନ ଅନୁଚିତ ବୋଲି କୁହାଗଲା । ଅଧିକାରୀ, ପୋଲିସ୍, ସେବାୟତଙ୍କ ଦ୍ବାରା ରଥଯାତ୍ରା ହୋଇପାରିବ । 8ରୁ 10 ଲକ୍ଷ ଲୋକ ଏକାଠି ହେଲେ କରୋନା ପରିସ୍ଥିତି ବିଗିଡି ପାରେ । ତେଣୁ ସାଧାରଣ ଦର୍ଶନାର୍ଥୀଙ୍କ ବିନା ସମାଗମରେ ରଥଯାତ୍ରା ହୋଇପାରିବ । ରାଜ୍ୟ ସରକାର ଅନୁମତି ଦେଲେ ରଥଯାତ୍ରା ହୋଇପାରିବ ବୋଲି କହିଛନ୍ତି ଗଜପତି ମହାରାଜା ।
ପୁରୀକୁ ଯେମିତି ବାହାର ଲୋକ ଆସିବେନି, ସରକାର ସେନେଇ ବ୍ୟବସ୍ଥା କରିବେ । ସେହିପରି ବଡଦାଣ୍ଡକୁ ଯେମିତି ଲୋକ ନ ଆସିବେ, ସେ ନେଇ ସରକାର ବ୍ୟବସ୍ଥା କରିବେ। ଯଦି ସରକାର ବ୍ୟବସ୍ଥା କରିବେ, ତେବେ ରଥଯାତ୍ରା ସମ୍ଭବ ହୋଇପାରିବ । କେବଳ ରଥଯାତ୍ରା ଦିନ ନୁହେଁ, ନୀଳାଦ୍ରିବିଜେ ଯାଏ କଟକଣା ଜାରି ରହିବ ବୋଲି ସୂଚନା ରହିଛି । ବିନା ଭକ୍ତରେ ରଥଯାତ୍ରା ସମ୍ଭବ ବୋଲି ପରିଚାଳନା କମିଟି ମତ ଦେଇଛି । ତେବେ ରଥଯାତ୍ରା ନିଷ୍ପତ୍ତି ରାଜ୍ୟ ସରକାର ନେବେ ବୋଲି ଗଜପତି କହିଛନ୍ତି । ଯାହା ରାଜ୍ୟ ସରକାର ନିଷ୍ପତ୍ତି ନେବେ ତାହାକୁ ପରିଚାଳନା କମିଟି ମାନିବେ ବୋଲି ସୂଚନା ଦେଇଛନ୍ତି ଗଜପତି । ତେବେ ଏହି ନିଷ୍ପତ୍ତି କେବଳ ଶ୍ରୀମନ୍ଦିର ପାଇଁ ବୋଲି କହିଛନ୍ତି ଗଜପତି । ସେହିପରି ବିଶ୍ବର ଅନ୍ୟ ଜଗନ୍ନାଥ ମନ୍ଦିର ପାଇଁ ନିଷ୍ପତ୍ତି ସେଠିକାର ପ୍ରଶାସନ ନେବ ବୋଲି କହିଛନ୍ତି ଗଜପତି ।
