ନୂଆଦିଲ୍ଲୀ: ଗୋଆରେ ଆୟୋଜିତ ହେବାକୁ ଥିବା ୫୨ତମ ଭାରତୀୟ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବ (ଆଇଏଫଏଫଆଇ)ରେ ମାର୍ଟିନ ସ୍କୋରସେଜି ଏବଂ ଇସ୍ତେବାନ ସାବୋଙ୍କୁ ‘ସତ୍ୟଜିତ ରାଏ ଜୀବନବ୍ୟାପୀ ସାଧନା ପୁରସ୍କାର’ରେ ସମ୍ମାନିତ କରାଯିବ। ସୂଚନା ଏବଂ ପ୍ରସାରଣ ମନ୍ତ୍ରୀ ଅନୁରାଗ ସିଂ ଠାକୁର ଏହି ଘୋଷଣା କରିଛନ୍ତି। ଇସ୍ତେବାନ ସାବୋ ହଙ୍ଗେରୀର ସର୍ବାଧିକ ସମ୍ମାନିତ ଚଳଚ୍ଚିତ୍ର ନିର୍ଦ୍ଦେଶକ ଏବଂ ସେ ବିଗତ ଅନେକ ଦଶନ୍ଧି ମଧ୍ୟରେ ଅନେକ ପ୍ରତିଷ୍ଠା ଅର୍ଜନ କରିଛନ୍ତି। ସେ ମେଫିଷ୍ଟୋ (୧୯୮୧) ଏବଂ ଫାଦର (୧୯୯୬) ଭଳି ଶ୍ରେଷ୍ଠ ଚଳଚ୍ଚିତ୍ର ନିର୍ମାଣ ପାଇଁ ପ୍ରସିଦ୍ଧି ହାସଲ କରିଛନ୍ତି। ଅନ୍ୟପଟେ ମାର୍ଟିନ ସ୍କୋରସେଜି ନୂତନ ହଲିଉଡ୍ ଯୁଗର ପ୍ରମୁଖ ବ୍ୟକ୍ତିତ୍ୱମାନଙ୍କ ମଧ୍ୟରେ ପରିଗଣିତ ହୋଇଥାନ୍ତି। ତାଙ୍କୁ ଚଳଚ୍ଚିତ୍ର ଇତିହାସର ମହାନତମ ଏବଂ ସର୍ବାଧିକ ପ୍ରଭାବଶାଳୀ ଚଳଚ୍ଚିତ୍ର ନିର୍ମାତାମାନଙ୍କ ମଦ୍ୟରେ ସାମିଲ କରାଯାଇଥାଏ।
ଏହି ଘୋଷଣା ଅବସରରେ ଶ୍ରୀ ଅନୁରାଗ ଠାକୁ କହିଥିଲେ, “ଭାରତ ବିଭିନ୍ନ କାହାଣୀର ମାଟି। ଆମର କାହାଣୀ ଦୁନିଆର କଳ୍ପନାଶୀଳତାକୁ ପ୍ରଭାବିତ କରିଛି। ଭାରତରେ ବିବିଧ କାହାଣୀର ଭଣ୍ଡାର ପୂରି ରହିଛି, ସେଥିପାଇଁ ଏହା ‘କଥାବସ୍ତୁର ମାଟି ଭାବେ ପରିଚିତ।
ଭାରତର ସର୍ବାଧିକ ପ୍ରତିଷ୍ଠିତ ଚଳଚ୍ଚିତ୍ର ମହୋତ୍ସବର 52ତମ ସଂସ୍କରଣ ଉପକୂଳବର୍ତ୍ତୀ ରାଜ୍ୟ ଗୋଆରେ ୨୦ରୁ ୨୮ ନଭେମ୍ବର, ୨୦୨୧ରେ ପର୍ଯ୍ୟନ୍ତ ଆୟୋଜିତ ହେବ।
ପ୍ରମୁଖ ଓଟିଟି ନିର୍ମାତାଙ୍କ ସହିତ ସହଯୋଗ
ଶ୍ରୀ ଅନୁରାଗ ଠାକୁର କହିଛନ୍ତି ଯେ ପ୍ରଥମ ଥର ପାଇଁ ଆଇଏଫଏଫଆଇରେ ପ୍ରମୁଖ ଓଟିଟି ନିର୍ମାତାମାନଙ୍କୁ ମହୋତ୍ସବରେ ଅଂଶଗ୍ରହଣ କରିବା ଲାଗି ନିମନ୍ତ୍ରଣ କରାଯାଉଛି। ପ୍ରଥମ ଥର ନେଟଫ୍ଲିକ୍ସ, ଆମାଜନ ପ୍ରାଇମ, ଜି-ଫାଇଭ୍, ବୁଟ୍ ଏବଂ ସୋନି ଲିଭ୍ ଚଳଚ୍ଚିତ୍ର ମହୋତ୍ସବରେ ଅଂଶଗ୍ରହଣ କରିବେ। ଏ ସମସ୍ତ ଓଟିଟି ବିଶେଷ ମାଷ୍ଟରକ୍ଲାସ, କଣ୍ଟେଣ୍ଟ ଲଞ୍ଚ ଏବଂ ପ୍ରିଭ୍ୟୁ, ଚୟନ କରାଯାଇଥିବା ଚଳଚ୍ଚିତ୍ର ପ୍ୟାକେଜର ପ୍ରଦର୍ଶନ ଏବଂ ମହୋତ୍ସବ ସ୍ଥଳୀ ଓ ଭର୍ଚୁଆଲ କାର୍ଯ୍ୟକ୍ରମ ଜରିଆରେ ଅଂଶଗ୍ରହଣ କରିବେ। ଶ୍ରୀ ଠାକୁର କହିଥିଲେ ଯେ ଓଟିଟିରେ ଚଳଚ୍ଚିତ୍ର ଦେଖିବାର ଅଭ୍ୟାସ ବଢ଼ୁଛି ଏବଂ ଆଇଏଫଏଫଆଇ ନୂତନ ପ୍ରଯୁକ୍ତି ଆପଣାଉଛି। ଓଟିଟି ନିର୍ମାତାମାନଙ୍କ ସହିତ ଉଦ୍ୟୋଗର କଳାକାରମାନଙ୍କ ସହିତ ଆଲୋଚନା ପାଇଁ ମାଷ୍ଟର କ୍ଲାସ ଆୟୋଜନ କରାଯାଉଛି।
ନେଟଫ୍ଲିକ୍ସ ତିନି ଦିନିଆ ଭର୍ଚୁଆଲ ମାଷ୍ଟରକ୍ଲାସ ଆୟୋଜନ କରୁଛି। ପ୍ୟାରିସସ୍ଥିତ ଛବି ଓ କଳାର ପ୍ରତିଷ୍ଠିତ ସ୍କୁଲ୍ ଗୋବଲିନ୍ସ-ସ୍କୁଲ ଲା’ ଇମେଜ ଏହି ଆୟୋଜନ କରୁଛି।
ନେଟଫ୍ଲିକ୍ସ ଜେନ କ୍ୟାମ୍ପିୟନଙ୍କ ଚଳଚ୍ଚିତ୍ର ‘ଦ ପାୱାର ଅଫ ଦ ଡଗ’ର ଭାରତ ପ୍ରିମିୟର ଆୟୋଜନ କରିବ। ‘ଧମାକା’ ଚଳଚ୍ଚିତ୍ରର ବିଶେଷ ପ୍ରଦର୍ଶନୀ ପାଇଁ ଏହା ମଧ୍ୟ ପ୍ରସ୍ତାବ ଦେଇଛି। ଏଥିରେ ପ୍ରମୁଖ ଚଳଚ୍ଚିତ୍ର ପ୍ରତିଭା କାର୍ତ୍ତିକ ଆର୍ଯ୍ୟନ ଚଳଚ୍ଚିତ୍ରର ପରିଚୟ ଦେବେ। ମୁକ୍ତିଲାଭ ଅପେକ୍ଷାରେ ଥିବା କ୍ରାଇମ୍ ଥ୍ରୀଲର ‘ଆରାଣ୍ୟକ’ର ପ୍ରଥମ ଅଧ୍ୟାୟ ପ୍ରଦର୍ଶନ କରାଯିବ। ଏଥିରେ ରବିନା ଟଣ୍ଡନ ଏବଂ ଆଶୁତୋଷ ରାଣା ପ୍ରମୁଖ ଭୂମିକାରେ ଅଭିନୟ କରୁଛନ୍ତି।
ସୋନି ଲିଭ୍ ପକ୍ଷରୁ ଏକ ମାଷ୍ଟର କ୍ଲାସର ପ୍ରସ୍ତାବ ଦିଆଯାଇଛି, ଏହାକୁ ସ୍କାମ-୧୯୯୨ର ଚିତ୍ରନାଟ୍ୟ ଲେଖକ ସୁମିତ ପୁରୋହିତ ଏବଂ ସୌରଭ ଦେ ଉପସ୍ଥାପନ କରିବେ। ଏହାର ବିଷୟ ପ୍ରବର୍ତ୍ତନ ଷ୍ଟୁଡିଓ ନେକ୍ସଟ୍ର ବ୍ୟବସାୟ ମୁଖ୍ୟ ଇନ୍ଦ୍ରନୀଲ ଚକ୍ରବର୍ତ୍ତୀ କରିବେ।
ଜି–ଫାଇଭ୍ ବିଶେଷ ଭାବେ ପ୍ରସ୍ତୁତ ବ୍ରେକପଏଣ୍ଟ ଉପସ୍ଥାପନ କରାଯିବ। ଏହା ପେସ-ଏଣ୍ଡ-ଭୂପତି ନାମକ ଏକ ଲୋକପ୍ରିୟ ଧାରାବାହିକ, ଯାହାକୁ ଆଇଏଫଏଫଆଇ ପାଇଁ ନିତେଶ ତିୱାରୀ ଏବଂ ଅଶ୍ୱିନୀ ଆୟାର ପ୍ରସ୍ତୁତ କରିଛନ୍ତି।
ସ୍ୱାଧୀନତାର ଅମୃତ ମହୋତ୍ସବ ପାଳନ ଉପଲକ୍ଷେ ୭୫ଜଣ ଉଦୀୟମମାନ ସୃଜନଶୀଳ ପ୍ରତିଭାଙ୍କ ଚୟନ
ଏକ ପ୍ରମୁଖ ଘୋଷଣା ଭାବେ ଶ୍ରୀ ଅନୁରାଗ ଠାକୁ କହିଥିଲେ ଯେ ଆଇଏଫଏଫଆଇ ଭାରତର ଯୁବା ଉଦୀୟମାନ ପ୍ରତିଭାମାନଙ୍କୁ ମଞ୍ଚ ଉପଲବ୍ଧ କରାଇବ, ଯାହାଫଳରେ ସେମାନେ ମୁଖ୍ୟଧାରାର ଚଳଚ୍ଚିତ୍ର ନିର୍ମାତା ଏବଂ ଚଳଚ୍ଚିତ୍ର ଉଦ୍ୟୋଗ ସହ ଯୋଡ଼ି ହୋଇପାରିବେ। ମହୋତ୍ସବରେ ୩୫ ବର୍ଷରୁ କମ ବୟସର ୭୫ ଜଣ ସୃଜନଶୀଳ ପ୍ରତିଭାମାନଙ୍କୁ ନିମନ୍ତ୍ରଣ କରାଯିବ। ସେମାନେ ଚଳଚ୍ଚିତ୍ର ଉଦ୍ୟୋଗର ବିଶିଷ୍ଟ ବ୍ୟକ୍ତିବିଶେଷଙ୍କ ସହିତ ଆଲୋଚନା କରିବେ ଏବଂ ମହୋତ୍ସବରେ ଆୟୋଜିତ ହେବାକୁ ଥିବା ମାଷ୍ଟରକ୍ଲାସରେ ଅଂଶଗ୍ରହଣ କରିବେ। ସାରା ଦେଶର ଯୁବ ଚଳଚ୍ଚିତ୍ର ନିର୍ମାତାମାନଙ୍କୁ ନେଇ ଆୟୋଜିତ ଏକ ପ୍ରତିଯୋଗିତା ମାଧ୍ୟମରେ ଏହି ଯୁବ ପ୍ରତିଭାମାନଙ୍କୁ ଚୟନ କରାଯିବ। ପ୍ରତିଯୋଗିତାର ଉଦ୍ଦେଶ୍ୟ ହେଉଛି, ୭୫ ଜଣ ଯୁବ ଚଳଚ୍ଚିତ୍ର ନିର୍ମାତା, କଳାକାର, ଗାୟକ/ଗାୟିକା, ପଟ୍ଟକଥା ଲେଖକ ଏବଂ ଅନ୍ୟ ଲୋକମାନଙ୍କୁ ବିଶ୍ୱବ୍ୟାପୀ ପ୍ରସିଦ୍ଧ ଏହି ମହୋତ୍ସବରେ ନିଜର ପ୍ରତିଭା ପ୍ରଦର୍ଶନ କରିବାର ସୁଯୋଗ ଦେବା।
ଅନଲାଇନ ଆବେଦନ ଦାଖଲ କରିବାର ଶେଷ ତାରିଖ ୩୦ ଅକ୍ଟୋବର, ୨୦୨୧ ରଖାଯାଇଛି। ଏହି ’୭୫ କ୍ରିଏଟିଭ୍ ମାଇଣ୍ଡ୍ସ ଅଫ ଟୁମୋରୋ’ ପ୍ରତିଯୋଗିତା ପାଇଁ ଚଳଚ୍ଚିତ୍ର ନାମାଙ୍କନ ନିମନ୍ତେ ବିସ୍ତୃତ ମାର୍ଗଦର୍ଶିକା ପାଳନ କରାଯିବାର ଆବଶ୍ୟକତା ରହିଛି। ଆବେଦନପତ୍ର www.dff.gov.in ଏବଂ www.iffi.org.ରେ ଉପଲବ୍ଧ ରହିଛି।
ବ୍ରିକ୍ସ ଚଳଚ୍ଚିତ୍ର ମହୋତ୍ସବ
ଶ୍ରୀ ଠାକୁର ଏହା ମଧ୍ୟ ଘୋଷଣା କରିଥିଲେ ଯେ ପ୍ରଥମ ଥର ପାଇଁ ବ୍ରିକ୍ସ ଚଳଚ୍ଚିତ୍ର ମହୋତ୍ସବ ଜରିଆରେ ପାଞ୍ଚଟି ବ୍ରିକ୍ସ ଦେଶଗୁଡ଼ିକର ଚଳଚ୍ଚିତ୍ର ମଧ୍ୟ ପ୍ରଦର୍ଶିତ କରାଯିବ, ଯାହାର ଆୟୋଜନ ଆଇଏଫଏଫଆଇ ସହିତ ମିଳିତ ଭାବେ କରାଯିବ। ଏହି ପାଞ୍ଚଟି ଦେଶ ହେଲେ ବ୍ରାଜିଲ, ରୁଷ, ଦକ୍ଷିଣ ଆଫ୍ରିକା, ଚୀନ ଏବଂ ଭାରତ। ଏମାନଙ୍କୁ ୫୨ତମ ଆଇଏଫଏଫଆଇରେ ଫୋକସ ଦେଶ ଭାବେ ମଧ୍ୟ ରଖାଯାଇଛି।
ଆଇଏଫଏଫଆଇର ଏହି ସଂସ୍କରଣରେ ଉଦଘାଟନୀ ଚଳଚ୍ଚିତ୍ରର ଘୋଷଣା କରି ଶ୍ରୀ ଠାକୁର କହିଥିଲେ ଯେ କାର୍ଲୋସ ସୌରାଙ୍କ ନିର୍ଦ୍ଦେଶିତ ଚଳଚ୍ଚିତ୍ର ‘ଦ କିଙ୍ଗ ଅଫ ଅଲ ଦ ୱାର୍ଲ୍ଡ’ (ଅଲ ରେ ଦ ତୋଦୋ ଅଲ ମୁନ୍ଦୋ) ପ୍ରଦର୍ଶିତ କରାଯାଇ ଚଳଚ୍ଚିତ୍ର ମହୋତ୍ସବ ଆରମ୍ଭ କରାଯିବ। ଏହା ମଧ୍ୟ ଏହି ଚଳଚ୍ଚିତ୍ରର ଅନ୍ତର୍ଜାତୀୟ ପ୍ରିମିୟର ହେବ। ଭେନିସ ଚଳଚ୍ଚିତ୍ର ମହୋତ୍ସବରେ ସର୍ବଶ୍ରେଷ୍ଠ ନିର୍ଦ୍ଦେଶକ ପୁରସ୍କାର ବିଜେତା ଜେନ କ୍ୟାମ୍ପିୟନଙ୍କ ନିର୍ଦ୍ଦେଶିତ ‘ଦ ପାୱାର ଅଫ ଦ ଡଗ’ ମିଡ ଫେଷ୍ଟ ଫିଲ୍ପ’ ଭାବେ ପ୍ରଦର୍ଶିତ ହେବ। ଆଇଏଫଏଫଆଇର ଏହି ୫୨ତମ ସଂସ୍କରଣ ପାଇଁ ୩୦ଟି ଚଳଚ୍ଚିତ୍ର ଚୟନ କରାଯାଇଛି। ଏ ସମସ୍ତ ଚଳଚ୍ଚିତ୍ର ପ୍ରମୁଖ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବରେ ପ୍ରଦର୍ଶିତ କରାଯାଇଛି। ଏହି ମହୋତ୍ସବରେ ଏଗୁନିକୁ ଫେଷ୍ଟିଭାଲ କ୍ଲାଇଡୋସ୍କୋପ ଏବଂ ୱାର୍ଲ୍ଡ ପାନୋରାମ ବର୍ଗରେ ପ୍ରଦର୍ଶିତ କରାଯିବ।
୫୨ତମ ଆଇଏଫଏଆଇରେ ଶ୍ରୀ ଦିଲୀପ କୁମାର, ସୁଶ୍ରୀ ସୁମିତ୍ରା ଭାବେ, ଶ୍ରୀ ବୁଦ୍ଧଦେବ ଦାସଗୁପ୍ତା, ଶ୍ରୀ ସଞ୍ଚାରୀ ବିଜୟ, ଶ୍ରୀମତୀ ସୁରେଖା ସିକରୀ, ଶ୍ରୀ ଜ୍ୟାଁ-ପଲ୍ ବେଲମୁନ୍ଦୋ, ଶ୍ରୀ ବଟ୍ରେଣ୍ଡ ଟେଭେନିୟର, ଶ୍ରୀ କ୍ରିଷ୍ଟୋଫର ପ୍ଲମର ଏବଂ ଶ୍ରୀ ଜ୍ୟାଁ କ୍ଲାଦ୍ କାରିୟେରଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯିବ।
୫୨ତମ ଆଇଏଫଏଫଆଇରେ ଅନ୍ତର୍ଜାତୀୟ ପ୍ରତିଯୋଗିତାରେ ବିଚାର ଭାବେ ନିମ୍ନ ବ୍ୟକ୍ତିବିଶେଷଙ୍କୁ ଦାୟିତ୍ୱ ଅର୍ପଣ କରାଯାଇଛି;
– ରଖଶାନ ବନୀ ଏତେମାଦ (୬୭ବର୍ଷୀୟା)/ଇରାନ ଚଳଚ୍ଚିତ୍ର ନିର୍ମାତା-ନିର୍ଣ୍ଣାୟକ ମଣ୍ଡଳୀର ଅଧ୍ୟକ୍ଷ
– ଷ୍ଟିଫନ ଉଲୀ (୬୫ ବର୍ଷୀୟ) ବ୍ରିଟିଶ ଚଳଚ୍ଚିତ୍ର ନିର୍ମାତା ନିର୍ଦ୍ଦେଶକ
– ସିରୋ ଗ୍ବେରା (୪୦ ବର୍ଷୀୟ)/କଲୋମ୍ବିୟା ଚଳଚ୍ଚିତ୍ର ନିର୍ମାତା
– ବିମୁକ୍ତି ଜୟସୁନ୍ଦରା (୪୪ ବର୍ଷୀୟ)/ଶ୍ରୀଲଙ୍କା/ଚଳଚ୍ଚିତ୍ର ନିର୍ମାତା
– ନୀଳ ମାଧବ ପଣ୍ଡା (୪୭ ବର୍ଷୀୟ) ଭାରତୀୟ ଚଳଚ୍ଚିତ୍ର ନିର୍ମାତା
ପୂର୍ବାବଲୋକନ
୫୨ତମ ଆଇଏଫଏଫଆଇର ପୂର୍ବାବଲୋକନ ବର୍ଗରେ ହଙ୍ଗେରୀର ପ୍ରସିଦ୍ଧ ଚଳଚ୍ଚିତ୍ର ନିର୍ମାତା ଶ୍ରୀ ବେଲା ଟାଙ୍କ ଚଳଚ୍ଚିତ୍ର ପ୍ରଦର୍ଶିତ କରାଯିବ। ତାଙ୍କର ଚଳଚ୍ଚିତ୍ର ବର୍ଲିନ, କାନ୍ସ ଏବଂ ଲୋକାର୍ଣ୍ଣୋ ଚଳଚ୍ଚିତ୍ର ମହୋତ୍ସବରେ ଅନେକ ପ୍ରଶଂସା ସାଉଣ୍ଟିଥିଲା। ସେ ନିଜର ଏକ ଚଳଚ୍ଚିତ୍ର ନିର୍ମାଣଶୈଳୀ ବିକଶିତ କରିଛନ୍ତି।
ରୁଷ ଚଳଚ୍ଚିତ୍ର ଏବଂ ଥିଏଟର ନିର୍ଦ୍ଦେଶକ ଶ୍ରୀ ଆନ୍ଦ୍ରେଇ କୋନକେଲୋସ୍କିଙ୍କ ଚଳଚ୍ଚିତ୍ର ମଧ୍ୟ ପୂର୍ବାବଲୋକନ ବର୍ଗରେ ପ୍ରଦର୍ଶିତ କରାଯିବ। ଏହା ମଧ୍ୟ ଅନେକ ପୁରସ୍କାର ହାସଲ କରିଛି। ଏଥିରେ କାନ୍ସ ଗ୍ରାଁ ପ୍ରତି ସ୍ପେଶାଲ ଦୁ ଜ୍ୟୁରୀ, ଫିକରେସ୍କୀ ପୁରସ୍କାର, ଦୁଇଟି ସିଲ୍ଭର ଲାୟନ, ତିନୋଟି ଗୋଲ୍ଡନ ଇଗଲ ପୁରସ୍କାର ଏବଂ ପ୍ରାଇମଟାଇମ ଏମ୍ମୀ ପୁରସ୍କାର ସାମିଲ ରହିଛି।
ପୂର୍ବାବଲୋକନ ବର୍ଗରେ ଦାଦାସାହେବ ଫାଲକେ ପୁରସ୍କାର ବିଜେତା ଶ୍ରୀ ରଜନୀକାନ୍ତଙ୍କୁ ମଧ୍ୟ ସାମିଲ କରାଯାଇଛି।
ମହୋତ୍ସବରେ ପରଦାରେ ପ୍ରଥମ ଥର କାଳ୍ପନିକ ବ୍ରିଟିଶ ସିକ୍ରେଟ୍ ଏଜେଣ୍ଟ ଜେମ୍ସ ବଣ୍ଡ ଭୂମିକା ନିର୍ବାହ କରିଥିବା ଅଭିନେତା ଶନ୍ କୋନରୀଙ୍କୁ ବିଶେଷ ଭାବେ ସ୍ମରଣ କରାଯିବ ଏବଂ ଶ୍ରଦ୍ଧାଞ୍ଜଳି ଅର୍ପଣ କରାଯିବ।
