ଭୁବନେଶ୍ୱର: ଫେଡେରେସନ୍ କପ୍, ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ା ଓ ୨୦ ବର୍ଷରୁ କମ୍ ଏସିଆନ୍ ଦୌଡ଼କୁଦ ଚମ୍ପିଆନ୍ସିପ୍ରେ ଚମତ୍କାର ପ୍ରଦର୍ଶନ କରିବା ପରେ ରିଲାଏନ୍ସ ଫାଉଣ୍ଡେସନର କ୍ରୀଡ଼ାବିତ୍ମାନଙ୍କ ଧ୍ୟାନ ଏବେ ୬୨ତମ ଆନ୍ତଃ ରାଜ୍ୟ ବରିଷ୍ଠ ଦୌଡ଼କୁଦ ଚମ୍ପିଆନ୍ସିପ୍ ଉପରେ ରହିଛି ଯାହା ଭୁବନେଶ୍ୱରର କଳିଙ୍ଗ ଷ୍ଟାଡିୟମ୍ରେ ଜୁନ୍ ୧୫ରୁ ୧୯ ପର୍ଯ୍ୟନ୍ତ ଅନୁଷ୍ଠିତ ହେଉଛି।
ୟୁରୋପର ବିଭିନ୍ନ ପ୍ରତିଯୋଗିତାରେ ସଫଳତା ହାସଲ କରି ଭାରତ ପ୍ରତ୍ୟାବର୍ତନ କରିଥିବା ଜ୍ୟୋତି ୟାରାଜି, ଅମ୍ଳାନ ବର୍ଗୋହେନ୍, ସପ୍ନା କୁମାରୀ ଓ ମହମ୍ମଦ ଅଫଜଲ୍ ସେମାନଙ୍କ ଉତ୍କୃଷ୍ଟ ଖେଳକୁ ଆଜିଠାରୁ ଆରମ୍ଭ ହୋଇଥିବା ଏହି ଚମ୍ପିଆନ୍ସିପ୍ରେ ବଜାୟ ରଖିବାକୁ ଲକ୍ଷ୍ୟ ରଖିଛନ୍ତି। ୟୁରୋପର ବିଭିନ୍ନ ପ୍ରତିଯୋଗିତା ଯଥା ନେଦରଲ୍ୟାଣ୍ଡ୍ର ଟି-ମିଟିଂ, ବେଲ୍ଜିୟମ୍ର ଫ୍ଲାଣ୍ଡର୍ସ କପ୍, ଜର୍ମାନିର ୱେନ୍ହିମ୍ରେ କୁର୍ପଫାଲ୍ଜ ଗାଲା, ଫିନ୍ଲ୍ୟାଣ୍ଡ୍ର ଜ୍ୱାସ୍କିଲାର ମୋଟୋନେସ୍ ଏବଂ ବେଲ୍ଜିୟମ୍ର ଆଇଏଫ୍ଏଏମ୍ ଓର୍ଡେଜେମ୍ ଆଦିରେ ଏହି କ୍ରୀଡ଼ାବିତ୍ମାନେ ଶ୍ରେଷ୍ଠ ପ୍ରଦର୍ଶନ କରି ପୋଡିୟମ୍ ସ୍ଥାନ ହାସଲ କରିଥିଲେ।
ୟୁରୋପ ଟୁର୍ରେ କ୍ରୀଡ଼ାବିତ୍ମାନଙ୍କ ଚମତ୍କାର ପ୍ରଦର୍ଶନକୁ ନେଇ ଉତ୍ସାହିତ ଥିବା ରିଲାଏନ୍ସ ଫାଉଣ୍ଡେସନର ଆଥ୍ଲେଟିକ୍ସ ନିର୍ଦ୍ଦେଶକ ଜେମ୍ସ ହିଲିୟର କହିଛନ୍ତି ଯେ, “ୟୁରୋପ ଗସ୍ତରୁ ଯେଉଁ ସଫଳତା ମିଳିଛି ତାହାକୁ ନେଇ ମୁଁ ବହୁତ ଖୁସି। ବେଳେ ବେଳେ ସ୍ଥିତି ଆହ୍ୱାନପୂର୍ଣ୍ଣ ଥିଲା, ତଥାପି କ୍ରୀଡ଼ାବିତ୍ମାନେ ସେମାନଙ୍କ ଉତ୍କୃଷ୍ଟ ଖେଳ ପ୍ରଦର୍ଶନ କରିଥିଲେ। ଜ୍ୟୋତି କେତେକ ଦୌଡ଼କୁ ୧୩ ସେକେଣ୍ଡ୍ରୁ କମ୍ ସମୟରେ ପୂର୍ଣ୍ଣ କରିଥିଲେ ଏବଂ ୨୦୦ ମିଟର ଦୌଡ଼ରେ ଅମ୍ଳାନ ନିଜର ତୃତୀୟ ଦ୍ରୁତତମ ଦୌଡ଼ ରେକର୍ଡ ହାସଲ କରିଥିଲେ। ୮୦୦ ମିଟରରେ ଅଫଜଲ ନିଜର ବ୍ୟକ୍ତିଗତ ଶ୍ରେଷ୍ଠତା ହାସଲ କରିଥିଲେ। ଏହି ଗସ୍ତର ଲକ୍ଷ୍ୟ ଥିଲା ଆନ୍ତଃ ରାଜ୍ୟ ବରିଷ୍ଠ ଦୌଡ଼କୁଦ ଚମ୍ପିଆନ୍ସିପ୍ ଓ ଏସିଆନ୍ ଚମ୍ପିଆନ୍ସିପ୍ ପାଇଁ ଖେଳାଳିମାନଙ୍କୁ ସେମାନଙ୍କ ଶ୍ରେଷ୍ଠ ଫର୍ମରେ ରଖିବା।’’
ଚଳିତ ବର୍ଷ ଅନୁଷ୍ଠିତ ହୋଇଥିବା ୨୬ତମ ଜାତୀୟ ଫେଡେରେସନ୍ କପ୍ ବରିଷ୍ଠ ଦୌଡ଼କୁଦ ଚମ୍ପିଆନ୍ସିପ୍ରେ ଭଲ ପ୍ରଦର୍ଶନ କରିଥିବା କିଛି ବିଶିଷ୍ଟ ଖେଳାଳି ଏହି ଚମ୍ପିଆନ୍ସିପ୍ରେ ନିଜ ପ୍ରଦର୍ଶନ ଜରିଆରେ ପ୍ରଭାବିତ କରିବାକୁ ଲକ୍ଷ୍ୟ ରଖିଛନ୍ତି। ୧୫୦୦ ମିଟର ଦୌଡ଼ରେ ୩:୪୪.୪୩ ସମୟ ସହ ସ୍ୱର୍ଣ୍ଣ ପଦକ ଜିତିଥିବା ଜିନ୍ସନ୍ ଜନ୍ସନ୍ ଦୃଢ଼ ପ୍ରତ୍ୟାବର୍ତନ କରିଥିଲେ। ମହିଳା ହେପ୍ଟାଥଲନ୍ରେ ରୌପ୍ୟ ଜିତି ପୂର୍ଣ୍ଣିମା ହେମ୍ବ୍ରମ୍ ମଧ୍ୟ ଦୃଢ଼ ପ୍ରଦର୍ଶନ କରିଥିଲେ।
ଅନ୍ୟ ପକ୍ଷରେ, ଚଳିତ ବର୍ଷ ଅନୁଷ୍ଠିତ ହୋଇଥିବା ଦୁଇଟି ପ୍ରତିଯୋଗିତାର ବାଧାଦୌଡ଼ରେ ନିଜର ବ୍ୟକ୍ତିଗତ ଶ୍ରେଷ୍ଠ ପ୍ରଦର୍ଶନ କରିଥିବା ଯୁବ ଖେଳାଳି ତେଜସ୍ ସିର୍ଜେ ଏଠାରେ ନିଜ ସଫଳତା ଜାରି ରଖିବାକୁ ଲକ୍ଷ୍ୟ ରଖିଛନ୍ତି।
ଏହି ପ୍ରତିଯୋଗିତାରେ ଅଂଶଗ୍ରହଣ କରିବାକୁ ଥିବା ଅନ୍ୟ କ୍ରୀଡ଼ାବିତ୍ମାନଙ୍କ ମଧ୍ୟରେ ରହିଛନ୍ତି ପ୍ରଜ୍ଞା ସାହୁ । ନିକଟରେ ଶେଷ ହୋଇଥିବା ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ା ୨୦୨୩ରେ ୧୩.୬୩ ସେକେଣ୍ଡ୍ ସମୟ ନେଇ ୧୦୦ ମିଟର ବାଧାଦୌଡ଼ରେ ପ୍ରଜ୍ଞା ସ୍ୱର୍ଣ୍ଣ ପଦକ ଜିତିବା ସହିତ ଏହି କ୍ରୀଡ଼ାରେ ପୂର୍ବରୁ ଜ୍ୟୋତି ୟାରାଜୀଙ୍କ (୧୩.୭୭ ସେକେଣ୍ଡ୍) ନାମରେ ଥିବା ରେକର୍ଡ ଭାଙ୍ଗିଥିଲେ। ଏହି ଟୁର୍ଣ୍ଣାମେଂଟ୍ ଖେଳୁଥିବା ସମୟରେ ଆନ୍ତଃ ରାଜ୍ୟ ଦୌଡ଼କୁଦ ଚାମ୍ପିଆନ୍ସିପ୍ ପାଇଁ ରହିଥିବା ଯୋଗ୍ୟତା ସମୟକୁ ପ୍ରଜ୍ଞା ଓ ଅଭିଷେକ ଦଳବେହେରା (୧୦୦ ମିଟର) ଅତିକ୍ରମ କରିଥିଲେ। ବିଶ୍ୱବିଦ୍ୟାଳୟ କ୍ରୀଡ଼ାରେ ରିଲାଏନ୍ସ ଫାଉଣ୍ଡେସନର ଖେଳାଳି ଯଥା ସୁସ୍ମିତା ଟିଗା (୩୦୦୦ ମିଟର ଷ୍ଟିପଲ୍ଚେଜ୍), ଲାଲୁ ପ୍ରସାଦ ଭୋଇ (୧୦୦ ମିଟର), ସ୍ୱାଧୀନ ମାଝି (ପୁରୁଷ ଉଚ୍ଚ ଡିଆଁ) ଓ ମୌମିତା ମଣ୍ଡଳ (ମହିଳା ଲମ୍ବ ଡିଆଁ) ଆଦି ଚମତ୍କାର ଢଙ୍ଗରେ ପୋଡିୟମ୍ ଦଖଲ କରିଥିଲେ।
କ୍ରୀଡ଼ାବିତ୍ମାନେ ନିକଟରେ ହାସଲ କରିଥିବା ସଫଳତାକୁ ନଜରରେ ରଖି ଓଡ଼ିଶା ରିଲାଏନ୍ସ ଫାଉଣ୍ଡେସନ ଆଥ୍ଲେଟିକ୍ସ ହାଇ ପରଫରମାନ୍ସ ସେଂଟରର ମୁଖ୍ୟ ପ୍ରଶିକ୍ଷକ ମାର୍ଟିନ୍ ଓୱେନ୍ସ କହିଛନ୍ତି ଯେ, “ଖେଲୋ ଇଣ୍ଡିଆ ବିଶ୍ୱବିଦ୍ୟାଳୟ କ୍ରୀଡ଼ାରେ ଆମ ଯୁବ କ୍ରୀଡ଼ାବିତ୍ମାନେ ବାସ୍ତବରେ ବେଶ ପ୍ରଭାବଶାଳୀ ଖେଳ ପ୍ରଦର୍ଶନ କରିଥିଲେ। ଏହି ଟୁର୍ଣ୍ଣାମେଂଟ୍ରେ ସେମାନଙ୍କୁ ବହୁତ ଭଲ ଅଭିଜ୍ଞତା ହାସଲ କରିବା ଏବଂ ନିକଟରେ ମିଳିଥିବା ସଫଳତା ଆଧାରରେ ଭଲ ପ୍ରଦର୍ଶନ କରିବାର ସୁଯୋଗ ମିଳିବ । ଆମର ବହୁ କ୍ରୀଡ଼ାବିତ୍ଙ୍କ ପାଇଁ ଏହି ଟୁର୍ଣ୍ଣାମେଂଟ୍ରେ ଏସିଆନ୍ ଗେମ୍ସ ଲାଗି ଯୋଗ୍ୟତା ହାସଲ କରିବାର ସୁଯୋଗ ରହିଛି।’’