Tag: ନରେନ୍ଦ୍ର ମୋଦୀ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ଜାତୀୟ ଖାଦ୍ୟ ସୁରକ୍ଷା ଆଇନ ସମ୍ପର୍କରେ ମଧ୍ୟ ଏକ ପ୍ରମୁଖ ନିଷ୍ପତ୍ତି ନିଆଯାଇଛି। ଏହି ନିୟମ ଅନୁଯାୟୀ, ଗୋଟିଏ ବର୍ଷ ଅର୍ଥାତ୍ ଡିସେମ୍ବର ୨୦୨୩ ପର୍ଯ୍ୟନ୍ତ ୮୧.୩ କୋଟି ଗରିବ ଲୋକଙ୍କୁ ମାଗଣା ରାସନ ପ୍ରଦାନ କରିବାକୁ ନିଷ୍ପତ୍ତି ନିଆଯାଇଛି। କେନ୍ଦ୍ର ମନ୍ତ୍ରୀ ପୀୟୁଷ ଗୋୟଲ କହିଛନ୍ତି ଯେ, ଜାତୀୟ ଖାଦ୍ୟ ସୁରକ୍ଷା ଅଧିନିୟମ ଅନୁଯାୟୀ ସରକାର ଏକ ବର୍ଷ ପାଇଁ ୮୧.୩ କୋଟି ଲୋକଙ୍କୁ ମାଗଣା ଖାଦ୍ୟ ଶସ୍ୟ ବଣ୍ଟନ କରିବାକୁ ନିଷ୍ପତ୍ତି ନେଇଛନ୍ତି। ଜାତୀୟ ଖାଦ୍ୟ ସୁରକ୍ଷା ଅଧିନିୟମ ଅନୁଯାୟୀ ଗରିବ ଲୋକଙ୍କୁ ମାଗଣା ରାସନ ଦେବା ପ୍ରାୟ ୨ ଲକ୍ଷ କୋଟି ଟଙ୍କା ଖର୍ଚ୍ଚ ହେବ, କେନ୍ଦ୍ର ସରକାର ଏହାର ଭାର ବହନ କରିବେ।

କେନ୍ଦ୍ର ଖାଦ୍ୟ ଏବଂ ସାର୍ବଜଜନୀନ ବଣ୍ଟନ ମନ୍ତ୍ରୀ ପିୟୁଷ ଗୋୟଲ କହିଛନ୍ତି ଯେ, ଜାତୀୟ ଖାଦ୍ୟ ସୁରକ୍ଷା ଅଧିନିୟମ ଅନୁଯାୟୀ ସରକାର କିଲୋଗ୍ରାମ ପିଛା ୩ ଟଙ୍କା ଚାଉଳ, ଗହମ କିଲୋଗ୍ରାମ ୨ ଟଙ୍କା ଏବଂ ମୋଟା ଶସ୍ୟ କିଲୋଗ୍ରାମ ପ୍ରତି ୧ ଟଙ୍କା ହାରରେ ପ୍ରଦାନ କରୁଛନ୍ତି। ଡିସେମ୍ବର ୨୦୨୩ ପର୍ଯ୍ୟନ୍ତ ଏହା ସମ୍ପୂର୍ଣ୍ଣ ମାଗଣାରେ ଉପଲବ୍ଧ ହେବ ବୋଲି ସରକାର ନିଷ୍ପତ୍ତି ନେଇଛନ୍ତି। ଏଥିରେ ୮୧.୩୫ କୋଟି ଲୋକ ଉପକୃତ ହେବେ।

ନିକଟରେ ସୁପ୍ରିମକୋର୍ଟ କହିଥିଲେ ଯେ, ଜାତୀୟ ଖାଦ୍ୟ ସୁରକ୍ଷା ଆଇନ ଅନୁଯାୟୀ ଖାଦ୍ୟ ଶସ୍ୟ ଶେଷ ବ୍ୟକ୍ତିଙ୍କ ନିକଟରେ ପହଞ୍ଚିବା ନିଶ୍ଚିତ କରିବା କେନ୍ଦ୍ର ସରକାରଙ୍କ ଦାୟିତ୍ଵ ଅଟେ। ଆମେ କହୁ ନାହୁଁ ଯେ କେନ୍ଦ୍ର କିଛି କରୁନାହିଁ। କୋଭିଡ ସମୟରେ କେନ୍ଦ୍ର ସରକାର ଲୋକଙ୍କୁ ଖାଦ୍ୟ ଶସ୍ୟ ଯୋଗାଇ ଦେଇଛନ୍ତି। ଏବଂ ଏହା ଜାରି ରହୁ। ଖାଲି ପେଟରେ କେହି ଶୋଇବେ ନାହିଁ। ମଙ୍ଗଳବାର ଦିନ କୋଭିଡ ଏବଂ ଲକଡାଉନ ସମୟରେ ପ୍ରବାସୀ ଶ୍ରମିକମାନେ ସମ୍ମୁଖୀନ ହେଉଥିବା ସମସ୍ୟା ଉପରେ ସୁପ୍ରିମକୋର୍ଟରେ ଶୁଣାଣି ଚାଲିଥିଲା। ଶୁଣାଣି ସମୟରେ ସୁପ୍ରିମକୋର୍ଟ ଏହି ମନ୍ତବ୍ୟ ଦେଇଥିଲେ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଏକ ଉଚ୍ଚ ସ୍ତରୀୟ ବୈଠକରେ ଅଧ୍ୟକ୍ଷତା କରି ଦେଶର କୋଭିଡ -୧୯ ପରିସ୍ଥିତି, ସ୍ୱାସ୍ଥ୍ୟ ଭିତ୍ତିଭୂମି ତଥା ପ୍ରସ୍ତୁତି, ଦେଶରେ ଟିକାକରଣ ଅଭିଯାନର ସ୍ଥିତି ଏବଂ ନୂତନ କୋଭିଡ -୧୯ ପ୍ରକାରର ଉତ୍ପତ୍ତି ଏବଂ ଜନସ୍ୱାସ୍ଥ୍ୟ ଉପରେ ଏହାର ପ୍ରଭାବ ସଂକ୍ରାନ୍ତରେ ସମୀକ୍ଷା କରିଛନ୍ତି। ଏହି ଉଚ୍ଚ ସ୍ତରୀୟ ସମୀକ୍ଷା ବୈଠକ କେତେକ ଦେଶରେ କୋଭିଡ-୧୯ ମାମଲାରେ ବୃଦ୍ଧିକୁ ଦୃଷ୍ଟିରେ ରଖି ଅନୁଷ୍ଠିତ ହୋଇଛି।

ସ୍ୱାସ୍ଥ୍ୟ ସଚିବ ଏବଂ ନୀତି ଆୟୋଗର ସଦସ୍ୟଙ୍କ ଦ୍ୱାରା ଦେଶରେ ବୃଦ୍ଧି ପାଉଥିବା ମାମଲା ସମେତ ବିଶ୍ୱରେ କୋଭିଡ -୧୯ ପରିସ୍ଥିତିକୁ ନେଇ ଏକ ବିସ୍ତୃତ ଉପସ୍ଥାପନା କରାଯାଇଥିଲା। ପ୍ରଧାନମନ୍ତ୍ରୀଙ୍କୁ ସୂଚନା ଦିଆଯାଇଥିଲା ଯେ ଭାରତରେ ୨୨ ଡିସେମ୍ବର, ୨୦୨୨ ରେ ଶେଷ ହୋଇଥିବା ସପ୍ତାହରେ ଦୈନିକ ହାରାହାରି ମାମଲା ସଂଖ୍ୟା ୧୫୩ କୁ ଏବଂ ସାପ୍ତାହିକ ପଜିଟିଭ ହାର ୦.୧୪% ନିୟମିତ ହ୍ରାସ ପାଇବାରେ ଲାଗିଛି। ତେବେ ଗତ ୬ ସପ୍ତାହ ମଧ୍ୟରେ ସମଗ୍ର ବିଶ୍ୱରେ ହାରାହାରି ଦୈନିକ ୫.୯ ଲକ୍ଷ ମାମଲା ରିପୋର୍ଟ ହେଉଛି।

ପ୍ରଧାନମନ୍ତ୍ରୀ ଆତ୍ମସନ୍ତୋଷ ବିରୋଧରେ ଚେତାବନୀ ଦେଇଛନ୍ତି ଏବଂ କଡାକଡି ଭାବେ ସଜାଗ ରହିବାକୁ ପରାମର୍ଶ ଦେଇଛନ୍ତି। ସେ ଦୋହରାଇଛନ୍ତି ଯେ କୋଭିଡ ଏପର୍ଯ୍ୟନ୍ତ ସମାପ୍ତ ହୋଇନାହିଁ ଏବଂ ବିଶେଷ କରି ଅନ୍ତର୍ଜାତୀୟ ବିମାନବନ୍ଦରରେ ଚାଲିଥିବା ନୀରିକ୍ଷଣ ପଦକ୍ଷେପକୁ ଦୃଢ କରିବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।

ସବୁ ସ୍ତରରେ କୋଭିଡ ଯନ୍ତ୍ରପାତି, ପ୍ରସ୍ତୁତି ପ୍ରକ୍ରିୟା ଏବଂ ମାନବ ସମ୍ବଳ ଦୃଷ୍ଟିରୁ ଭିତ୍ତିଭୂମିକୁ ଏକ ଉଚ୍ଚ ସ୍ତରରେ ପ୍ରସ୍ତୁତି ନିଶ୍ଚିତ କରିବାକୁ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି। ଅମ୍ଳଜାନ ସିଲିଣ୍ଡର, ପିଏସ୍‍ଏ ପ୍ଲାଣ୍ଟ, ଭେଣ୍ଟିଲେଟର ଏବଂ ମାନବ ସମ୍ବଳ ସମେତ ହସ୍ପିଟାଲ ଭିତ୍ତିଭୂମିର କାର୍ଯ୍ୟ ପ୍ରସ୍ତୁତି ସୁନିଶ୍ଚିତ କରିବାକୁ କୋଭିଡ ପାଇଁ ଥିବା ବ୍ୟବସ୍ଥାଗୁଡିକର ଅଡିଟ୍ କରିବାକୁ ସେ ରାଜ୍ୟମାନଙ୍କୁ ପରାମର୍ଶ ଦେଇଛନ୍ତି।

ପରୀକ୍ଷା ଏବଂ ଜେନୋମିକ୍ ସିକ୍ୱେନ୍ସିଂ ବଢାଇବାକୁ ପ୍ରଧାନମନ୍ତ୍ରୀ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ରାଜ୍ୟମାନଙ୍କୁ ଜେନୋମ ସିକ୍ୱେନ୍ସିଂ ପାଇଁ ର୍ନିଦ୍ଦିଷ୍ଟ ଆଇଏନଏସଏସିଓଜି ଜେନୋମ ସିକ୍ୱେନ୍ସିଂ ପରୀକ୍ଷାଗାର (ଆଜିଏସଏଲଏସ) ସହିତ ଅଧିକ ସଂଖ୍ୟକ ନମୂନା ପଠାଇବାକୁ କୁହାଯାଇଛି। ଏହା ସଠିକ୍ ସମୟରେ ଏହି ନୂତନ ପ୍ରଜାତିକୁ ଚିହ୍ନଟ କରିପାରିବ, ଯଦି ଏହା ଥାଏ, ତେବେ ଆବଶ୍ୟକ ଅନୁଯାୟୀ ପଦକ୍ଷେପ ଗ୍ରହଣ କରିବା ସହଜ ହେବ।

ପ୍ରଧାନମନ୍ତ୍ରୀ ସମସ୍ତଙ୍କୁ କୋଭିଡ ଉପଯୁକ୍ତ ଆଚରଣ ପାଳନ ବିଶେଷ କରି ଆଗାମୀ ଉତ୍ସବ ଋତୁକୁ ଦୃଷ୍ଟିରେ ରଖି ଜନଗହଳି ପୂର୍ଣ୍ଣ ସ୍ଥାନରେ ମାସ୍କ ପିନ୍ଧିବାକୁ ଅନୁରୋଧ କରିଥିଲେ। ପ୍ରଧାନମନ୍ତ୍ରୀ ଏହା ମଧ୍ୟ ଅନୁରୋଧ କରିଛନ୍ତି ଯେ ବିଶେଷ ଭାବରେ ସମ୍ବେଦନଶୀଳ ଏବଂ ବୟସ୍କ ବର୍ଗଙ୍କ ପାଇଁ ସତର୍କତାର ଡୋଜ୍‍ ଫଳପ୍ରଦ ହୋଇପାରେ।

ଔଷଧ, ଟିକା ଏବଂ ଡାକ୍ତରଖାନା ଶଯ୍ୟା ସମ୍ବନ୍ଧରେ ପର୍ଯ୍ୟାପ୍ତ ଉପଲବ୍ଧତା ରହିଛି ବୋଲି ପ୍ରଧାନମନ୍ତ୍ରୀଙ୍କୁ ସୂଚନା ଦିଆଯାଇଥିଲା। ଅତ୍ୟାବଶ୍ୟକ ଔଷଧର ଉପଲବ୍ଧତା ଏବଂ ମୂଲ୍ୟ ଉପରେ ନିୟମିତ ନଜର ରଖିବାକୁ ସେ ପରାମର୍ଶ ଦେଇଛନ୍ତି।

ସମୁଖ ଭାଗରେ ରହି କାର୍ଯ୍ୟ କରୁଥିବା ସ୍ୱାସ୍ଥ୍ୟ କର୍ମଚାରୀଙ୍କ ସର୍ବଭାରତୀୟ ସ୍ତରରେ ପ୍ରଶଂସିତ କାର୍ଯ୍ୟକୁ ଆଲୋକପାତ କରି ପ୍ରଧାନମନ୍ତ୍ରୀ ସେମାନଙ୍କୁ ସମାନ ନିଃସ୍ୱାର୍ଥପର ତଥା ଉତ୍ସର୍ଗୀକୃତ ଢଙ୍ଗରେ କାର୍ଯ୍ୟ ଜାରି ରଖିବାକୁ ପରାମର୍ଶ ଦେଇଥିଲେ।

ଏହି ବୈଠକରେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହା, ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ମନସୁଖ ମାଣ୍ଡଭିୟ; ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ, ଦେଶିକ ବ୍ୟାପାର ମନ୍ତ୍ରୀ ଡକ୍ଟର ଏସ ଜୟଶଙ୍କର, ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁର; ସ୍ୱାସ୍ଥ୍ୟ ଓ ପରିବାର କଲ୍ୟାଣ ରାଷ୍ଟ୍ରମନ୍ତ୍ରୀ ଭାରତୀ ପ୍ରବୀନ ପାୱାର; ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ପି.କେ ମିଶ୍ର, ନୀତି ଆୟୋଗ ସିଇଓ ପରମେଶ୍ୱରନ୍ ଆୟର, ନୀତି ଆୟୋଗ ସଦସ୍ୟ (ସ୍ୱାସ୍ଥ୍ୟ) ଡକ୍ଟର ଭି କେ ପାଲ; କ୍ୟାବିନେଟ ସଚିବ ରାଜୀବ ଗୌବା; ପିଏମଓ ଉପଦ୍ଦେଷ୍ଟା ଅମିତ ଖେର; ଗୃହ ସଚିବ ଏ କେ ଭଲ୍ଲା;  ସ୍ୱାସ୍ଥ୍ୟ ଓ ପରିବାର କଲ୍ୟାଣ ସଚିବ ରାଜେଶ ଭୂଷଣ, ସଚିବ (ଡିଏଚଆର) ଡକ୍ଟର ରାଜୀବ ବାହଲ, ସଚିବ ଫାର୍ମାସ୍ୟୁଟିକାଲ୍ସ (ଆଇ / ସି) ଅରୁଣ ବାରୋକାଙ୍କ ସହିତ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।

ଶିଲଂ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଶିଲଂ ଠାରେ ଉତ୍ତର ପୂର୍ବାଞ୍ଚଳ ପରିଷଦ (ଏନଇସି)ର ବୈଠକକୁ ସମ୍ବୋଧିତ କରିଛନ୍ତି। ଏହି ବୈଠକ ଉତ୍ତର ପୂର୍ବାଞ୍ଚଳ ପରିଷଦର ସୁବର୍ଣ୍ଣ ଜୟନ୍ତୀ ସମାରୋହର ପ୍ରତୀକ। ଏହି ପରିଷଦ ୧୯୭୨ରେ ବିଧିବଦ୍ଧ ଭାବେ ଉଦଘାଟିତ ହୋଇଥିଲା।

ଉତ୍ତର ପୂର୍ବାଞ୍ଚଳ ବିକାଶରେ ଏନଇସିର ଅବଦାନକୁ ପ୍ରଶଂସା କରି ପ୍ରଧାନମନ୍ତ୍ରୀ କହିଛନ୍ତି ଏନଇସିର ସୁବର୍ଣ୍ଣ ଜୟନ୍ତୀ ସମାରୋହ ଆଜାଦୀ କି ଅମୃତ ମହୋତ୍ସବ ସହିତ ଆୟୋଜିତ ହେଉଛି। ଅଞ୍ଚଳର ୮ ରାଜ୍ୟକୁ ଅଷ୍ଟ ଲକ୍ଷ୍ମୀ ଭାବେ ସେ ବିବେଚନା କରୁଥିବା କହିବା ସହ ଏହି ଅଞ୍ଚଳର ବିକାଶ ପାଇଁ ସରକାର ଶାନ୍ତି, ଶକ୍ତି, ପର୍ଯ୍ୟଟନ, ୫ଜି କନେକ୍ଟିଭିଟି, ସଂସ୍କୃତି, ପ୍ରାକୃତିକ କୃଷି, କ୍ରୀଡା ଦକ୍ଷତା ଭଳି ୮ଟି ମୂଳ ସ୍ତମ୍ଭ ଉପରେ କାମ କରିବା ଦରକାର ବୋଲି କହିଛନ୍ତି।

ଉତ୍ତର ପୂର୍ବାଞ୍ଚଳ ଦକ୍ଷିଣ ପୂର୍ବ ଏସିଆକୁ ଆମ ପ୍ରବେଶ ଦ୍ୱାର ଓ ସମଗ୍ର କ୍ଷେତ୍ର ପାଇଁ ଏହା ବିକାଶର କେନ୍ଦ୍ର ପାଲଟି ପାରିବ ବୋଲି ପ୍ରଧାନମନ୍ତ୍ରୀ କହିଛନ୍ତି । ଏହି ଅଞ୍ଚଳର ସମ୍ଭାବନାକୁ ସାକାର କରିବା ପାଇଁ ଭାରତୀୟ- ମିଆଁମାର- ଥାଇଲାଣ୍ଡ ତ୍ରିପକ୍ଷୀୟ ରାଜପଥ ଓ ଅଗରତାଲା- ଅଖୌରା ରେଳ ପ୍ରକଳ୍ପ ଭଳି କାମ ଚାଲିଥିବା ସେ କହିଛନ୍ତି। ସରକାର ‘ଲୁକ ଇଷ୍ଟ’ ନୀତିକୁ ‘ଆକ୍ଟ ଇଷ୍ଟ’ ନୀତିରେ ବଦଳାଇବା ଠାରୁ ଆଗେଇ ସାରିଛନ୍ତି ଓ ଏବେ ଏହା ‘ଆକ୍ଟ ଫାଷ୍ଟ ଫର ନର୍ଥଇଷ୍ଟ’ ନୀତିରେ ପରିଣତ ହୋଇସାରିଛି ବୋଲି ପ୍ରଧାନମନ୍ତ୍ରୀ କହିଛନ୍ତି। ଅଞ୍ଚଳରେ ଶାନ୍ତି ପ୍ରୟାସର ସଫଳତା ସମ୍ପର୍କରେ ଆଲୋକପାତ କରି ସେ କହିଛନ୍ତି ବହୁ ଶାନ୍ତି ରାଜିନାମା ସ୍ୱାକ୍ଷରିତ ହୋଇଛି, ଆନ୍ତଃ ରାଜ୍ୟ ସୀମା ରାଜିନାମା ହୋଇଛି ଓ ଆତଙ୍କବାଦ ଘଟଣା ବେଶ ହ୍ରାସ ପାଇଛି।

ନେଟ ଜିରୋ ପ୍ରତି ଭାରତର ପ୍ରତିବଦ୍ଧତା ସମ୍ପର୍କରେ ଆଲୋଚନା କରି ପ୍ରଧାନମନ୍ତ୍ରୀ କହିଛନ୍ତି ଉତ୍ତର ପୂର୍ବାଞ୍ଚଳ ଜଳବିଦ୍ୟୁତ ଶକ୍ତି କେନ୍ଦ୍ର ପାଲଟି ପାରିବ। ଏହାଦ୍ୱାରା ଅଞ୍ଚଳର ରାଜ୍ୟଗୁଡିକ ଅତିରିକ୍ତ ବିଦ୍ୟୁତ ପାଇବେ, ଶିଳ୍ପଦ୍ୟୋଗ ବିକାଶ ହେବ ଓ ବହୁ ସଂଖ୍ୟାରେ ନିଯୁକ୍ତି ସୃଷ୍ଟି ହେବ। ଅଞ୍ଚଳର ପର୍ଯ୍ୟଟନ କ୍ଷମତା ସମ୍ପର୍କରେ ଆଲୋଚନା କରି ସେ କହିଛନ୍ତି ଅଞ୍ଚଳର ପ୍ରକୃତି ଓ ସଂସ୍କୃତି ଦେଶବିଦେଶରୁ ପର୍ଯ୍ୟଟକଙ୍କୁ ଆକୃଷ୍ଟ କରୁଛି। ଏହି ଅଞ୍ଚଳରେ ପର୍ଯ୍ୟଟନ ସର୍କିଟ ଚିହ୍ନିତ ଓ ବିକଶିତ କରାଯାଉଛି। ବିଭିନ୍ନ ଅଞ୍ଚଳର ଲୋକଙ୍କୁ ଏକାଠି କରିବା ପାଇଁ ୧୦୦ଟି ବିଶ୍ୱବିଦ୍ୟାଳୟର ଛାତ୍ରଛାତ୍ରୀଙ୍କୁ ଉତ୍ତର ପୂର୍ବାଞ୍ଚଳ ପଠାଇବା ସମ୍ପର୍କରେ ସେ ଆଲୋଚନା କରିଛନ୍ତି। ଏହି ଛାତ୍ରଛାତ୍ରୀମାନେ ଅଞ୍ଚଳର ଦୂତ ସାଜିବେ।

ଅଞ୍ଚଳରେ କନେକ୍ଟିଭିଟି ବୃଦ୍ଧି ସମ୍ପର୍କରେ ଆଲୋଚନା କରି ପ୍ରଧାନମନ୍ତ୍ରୀ କହିଛନ୍ତି ଦଶନ୍ଧି ଦଶନ୍ଧି ଧରି ପଡି ରହିଥିବା ଅନେକ ପୋଲ ନିର୍ମାଣ ପ୍ରକଳ୍ପ ଶେଷ ହୋଇଛି। ବିଗତ ୮ ବର୍ଷରେ ଏହି ଅଞ୍ଚଳର ବିମାନ ବନ୍ଦର ସଂଖ୍ୟା ୯ରୁ ୧୬ରେ ପହଞ୍ଚିଛି ଓ ୨୦୧୪ ପୂର୍ବରୁ ପ୍ରାୟ ୯୦୦ ଥିବା ବିମାନ ଉଡାଣ ସଂଖ୍ୟା ଏବେ ବୃଦ୍ଧି ପାଇ ପ୍ରାୟ ୧୯୦୦ ହୋଇଛି। ଅନେକ ଉତ୍ତର ପୂର୍ବାଞ୍ଚଳ ରାଜ୍ୟ ପ୍ରଥମ ଥର ପାଇଁ ରେଳ ମାନଚିତ୍ରକୁ ଆସିଛନ୍ତି ଓ ଜଳମାର୍ଗ ବିସ୍ତାର ପାଇଁ ଉଦ୍ୟମ ଜାରି ରହିଛି। ଏହି ଅଞ୍ଚଳରେ ୨୦୧୪ ପରେ ଜାତୀୟ ରାଜପଥ ଦୈର୍ଘ୍ୟ ୫୦ ପ୍ରତିଶତ ବଢିଛି। ପିଏମ- ଡିଭାଇନ ଯୋଜନା ଶୁଭାରମ୍ଭ ଦ୍ୱାରା ଉତ୍ତର ପୂର୍ବାଞ୍ଚଳରେ ଭିତ୍ତିଭୂମି ପ୍ରକଳ୍ପ ତ୍ୱରାନ୍ୱିତ ହୋଇଛି। ଅପ୍ଟିକାଲ ଫାଇବର ନେଟୱର୍କ ବୃଦ୍ଧି କରି ଉତ୍ତର ପୂର୍ବାଞ୍ଚଳରେ ଡିଜିଟାଲ ସଂଯୋଗୀକରଣ ବୃଦ୍ଧି କରିବାକୁ ସରକାର ଉଦ୍ୟମ କରୁଛନ୍ତି ବୋଲି ସେ କହିଛନ୍ତି। ଆତ୍ମନିର୍ଭର ୫ଜି ଭିତ୍ତିଭୂମି ବିକାଶ ସମ୍ପର୍କରେ ଆଲୋଚନା କରି ସେ କହିଛନ୍ତି ୫ଜି ମାଧ୍ୟମରେ ଅଞ୍ଚଳରେ ଷ୍ଟାର୍ଟଅପ ଇକୋସିଷ୍ଟମ, ସେବା କ୍ଷେତ୍ର ଆଦି ବିକଶିତ ହୋଇପାରିବ। ସରକାର ଉତ୍ତର ପୂର୍ବାଞ୍ଚଳକୁ କେବଳ ଅର୍ଥନୈତିକ ବିକାଶ କେନ୍ଦ୍ର ଭାବେ ନୁହେଁ ବରଂ ସାଂସ୍କୃତିକ ବିକାଶ କେନ୍ଦ୍ର ଭାବେ ଗଢି ତୋଳିବାକୁ ପ୍ରତିବଦ୍ଧ ବୋଲି ସେ କହିଛନ୍ତି।

ଅଞ୍ଚଳର କୃଷି ଦକ୍ଷତା ସମ୍ପର୍କରେ ଆଲୋଚନା କରି ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଛନ୍ତି ଯେ, ପ୍ରାକୃତିକ କୃଷି କ୍ଷେତ୍ରରେ ଉତ୍ତର ପୂର୍ବାଞ୍ଚଳ ପ୍ରମୁଖ ଭୂମିକା ଗ୍ରହଣ କରିପାରିବ। କୃଷି ଉଡାନ ମାଧ୍ୟମରେ ଅଞ୍ଚଳର ଚାଷୀମାନେ ସେମାନଙ୍କ ଉତ୍ପାଦଗୁଡିକୁ ଦେଶ ତଥା ବିଶ୍ୱର ବିଭିନ୍ନ ସ୍ଥାନକୁ ପଠାଇ ପାରିବେ। ଉତ୍ତର ପୂର୍ବାଞ୍ଚଳ ରାଜ୍ୟଗୁଡିକ ଖାଦ୍ୟ ତୈଳ ଉପରେ ଚାଲୁଥିବା ଜାତୀୟ ମିଶନ- ଅଏଲ ପାମରେ ଅଂଶଗ୍ରହଣ କରିବାକୁ ପ୍ରଧାନମନ୍ତ୍ରୀ ଆହ୍ୱାନ ଦେଇଛନ୍ତି। ଭୌଗୋଳିକ ଆହ୍ୱାନର ମୁକାବିଲା ସାଙ୍ଗକୁ ଉତ୍ପାଦ ବଜାରରେ ପହଞ୍ଚାଇବା ପାଇଁ ଡ୍ରୋନ କିପରି ଚାଷୀଙ୍କୁ ସାହାଯ୍ୟ କରିବ ସେ ସମ୍ପର୍କରେ ପ୍ରଧାନମନ୍ତ୍ରୀ ଆଲୋଚନା କରିଛନ୍ତି।

କ୍ରୀଡା ପ୍ରତି ଅଞ୍ଚଳର ଅବଦାନ ସମ୍ପର୍କରେ ଆଲୋଚନା କରି ସେ କହିଛନ୍ତି ସରକାର ଉତ୍ତର ପୂର୍ବାଞ୍ଚଳରେ ଭାରତର ପ୍ରଥମ କ୍ରୀଡା ବିଶ୍ୱବିଦ୍ୟାଳୟ ବିକଶିତ କରି ଅଞ୍ଚଳର କ୍ରୀଡାବିତମାନଙ୍କୁ ସହାୟତା କରିବା ପାଇଁ ଉଦ୍ୟମରତ। ଅଞ୍ଚଳର ୮ଟି ରାଜ୍ୟରେ ୨୦୦ରୁ ଅଧିକ ଖେଲୋ ଇଣ୍ଡିଆ କେନ୍ଦ୍ର ଅନୁମୋଦିତ ହୋଇଛି ଓ ଏହି ଅଞ୍ଚଳର ବହୁ କ୍ରୀଡାବିତ ଟପ୍ସ ଯୋଜନାରେ ଲାଭାନ୍ୱିତ ହେଉଛନ୍ତି।

ପ୍ରଧାନମନ୍ତ୍ରୀ ଭାରତର ଜି-୨୦ ଅଧ୍ୟକ୍ଷତା ସମ୍ପର୍କରେ ଆଲୋଚନା କରିବା ସହ କହିଛନ୍ତି ଏହାର ବୈଠକରେ ଭାଗ ନେବାକୁ ସାରା ବିଶ୍ୱରୁ ଆସୁଥିବା ଲୋକେ ଉତ୍ତର ପୂର୍ବାଞ୍ଚଳ ଆସିବେ । ଅଞ୍ଚଳର ପ୍ରକୃତି, ସଂସ୍କୃତି ଓ ଦକ୍ଷତା ପ୍ରଦର୍ଶିତ କରିବାର ଏହା ପ୍ରକୃଷ୍ଟ ଅବସର।

ନୂଆଦିଲ୍ଲୀ: ସଂସଦର ଶୀତ ଅଧିବେଶନ ଆରମ୍ଭରେ ଆଜି (୦୭-୧୨-୨୦୨୨) ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଜ୍ୟସଭାରେ ଉଦ୍ବୋଧନ ଦେବା ସହ ଉପରାଷ୍ଟ୍ରପତିଙ୍କୁ ସ୍ୱାଗତ କରିଛନ୍ତି।

ଦେଶରେ ସମସ୍ତ ନାଗରିକ ଓ ସଂସଦ ସଦସ୍ୟଙ୍କ ତରଫରୁ ପ୍ରଧାନମନ୍ତ୍ରୀ ଉପ ରାଷ୍ଟ୍ରପତି ତଥା ରାଜ୍ୟସଭା ଅଧ୍ୟକ୍ଷ ଜଗଦୀପ ଧନଖଡଙ୍କୁ ପ୍ରଥମେ ଅଭିନନ୍ଦନ ଜଣାଇ ତାଙ୍କ ଅଭିଭାଷଣ ଆରମ୍ଭ କରିଥିଲେ। ଉପରାଷ୍ଟ୍ରପତିଙ୍କ ସମ୍ମାନଜନକ ପଦବୀ ଉପରେ ଆଲୋକପାତ କରି ସେ କହିଲେ, ଏହି ପଦବୀ ଲକ୍ଷ ଲକ୍ଷ ଜନସାଧାରଣଙ୍କ ନିମନ୍ତେ ଏକ ପ୍ରେରଣା।

ରାଜ୍ୟସଭାର ଅଧ୍ୟକ୍ଷଙ୍କୁ ସମ୍ବୋଧନ କରି ପ୍ରଧାନମନ୍ତ୍ରୀ ଆଜିର ଦିବସରେ ସଶସ୍ତ୍ର ସେନା ପତାକା ଦିବସ ପଡୁଥିବାରୁ ସଦନର ସମସ୍ତ ସଦସ୍ୟଙ୍କ ପକ୍ଷରୁ ସଶସ୍ତ୍ର ସେନାକୁ ଅଭିବାଦନ ଜଣାଇଥିଲେ। ଉପରାଷ୍ଟ୍ରପତିଙ୍କ ଜନ୍ମସ୍ଥାନ ଝୁନଝୁନର ସ୍ମରଣ କରି ପ୍ରଧାନମନ୍ତ୍ରୀ ଝୁନଝୁନର ଅନେକ ପରିବାର ଦେଶ ସେବାରେ ଅଗ୍ରଣୀ ଭୂମିକା ନେଇଥିବା ପ୍ରକାଶ କରିଥିଲେ। ସେ ଉପରାଷ୍ଟ୍ରପତିଙ୍କ ଅନ୍ତରଙ୍ଗ ସମ୍ପର୍କ ଯବାନ ଓ କିଷାନମାନଙ୍କ ସହ ଥିବା ଉପରେ ଆଲୋକପାତ କରି କହିଥିଲେ ଯେ “ ଆମର ଉପରାଷ୍ଟ୍ରପତି ହେଉଛନ୍ତି ଜଣେ ଚାଷୀର ପୁଅ ଓ ସେ ସୈନିକ ବିଦ୍ୟାଳୟରେ ଅଧ୍ୟୟନ କରୁଥିଲେ, ସେଥିପାଇଁ ସେ ଉଭୟ ଯବାନ ଓ କିଷାନମାନଙ୍କ ଅନ୍ତରଙ୍ଗ ବନ୍ଧୁ।”

ରାଜ୍ୟସଭା ଦୁଇଟି ଅବିସ୍ମରଣୀୟ ଘଟଣା ସମୟରେ ଉପରାଷ୍ଟ୍ରପତିଙ୍କୁ ସ୍ୱାଗତ ଜଣାଉଛି ବୋଲି ପ୍ରଧାନମନ୍ତ୍ରୀ କହିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ ଭାରତ ସ୍ୱାଧୀନତାର ଅମୃତ କାଳରେ ପ୍ରବେଶ କରିବା ସହ ଜି-୨୦ ଶିଖର ବୈଠକରେ ଅଧ୍ୟକ୍ଷତା କରିବାର ସୁଯୋଗ ପାଇଛି। ନବ ଭାରତର ବିକାଶ ଛଡା ଭାରତ ବିଶ୍ୱର ଗତି ନିର୍ଦ୍ଧାରଣ ଦିଗରେ ଏକ ପ୍ରମୁଖ ଭୂମିକା ଗ୍ରହଣ କରିବ। “ଆମ ଗଣତନ୍ତ୍ର, ଆମ ସଂସଦ ଓ ଆମ ସଂସଦୀୟ ପଦ୍ଧତିରେ ଏହି ଯାତ୍ରାର ଏକ ଗୁରୁତ୍ୱପୂର୍ଣ୍ଣ ଭୂମିକା ରହିଛି” ବୋଲି ସେ କହିଥିଲେ।

ରାଜ୍ୟସଭାର ଅଧ୍ୟକ୍ଷ ଭାବେ ଉପ ରାଷ୍ଟ୍ରପତି ପଦବୀର ମିଆଦ ଆଜଠାରୁ ଆନୁଷ୍ଠାନିକଭାବେ ଆରମ୍ଭ ହେଉଥିବା ବିଷୟ ଅବତାରଣା କରି ପ୍ରଧାନମନ୍ତ୍ରୀ ସଂସଦର ଉପର ସଦନ ଉପରେ ନ୍ୟସ୍ତ ଦାୟିତ୍ୱ ହେଉଛି ସାଧାରଣ ଜନତାଙ୍କ ସମସ୍ୟା ବୋଲି କହିଥିଲେ। “ ଏହି ସମୟରେ ଭାରତ ଏହି ଦାୟିତ୍ୱକୁ ହୃଦୟଙ୍ଗମ କରୁଛି ଓ ଏଥିପ୍ରତି ଅଙ୍ଗୀକାରବଦ୍ଧ” ବୋଲି ସେ କହିଥିଲେ।

ପ୍ରଧାନମନ୍ତ୍ରୀ ମଧ୍ୟ କହିଥିଲେ ଯେ ଭାରତର ସମ୍ମାନୀୟ ଆଦିବାସୀ ସମାଜ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଜରିଆରେ ଏହି ଗୁରତ୍ୱପୂର୍ଣ୍ଣ ସମୟରେ ଦେଶକୁ ମାର୍ଗଦର୍ଶନ ଦେଉଛି। ସେ ମଧ୍ୟ ପୂର୍ବତନ ରାଷ୍ଟ୍ରପତି ଶ୍ରୀ ରାମନାଥ କୋବିନ୍ଦ ଏକ ଅବହେଳିତ ଶ୍ରେଣୀରୁ ଆସି ମଧ୍ୟ ଏପରି ସର୍ବୋଚ୍ଚ ସ୍ଥାନରେ କିପରି ପହଂଚି ପାରିଥିଲେ, ତାହାର ଅବତାରଣା କରିଥିଲେ।
ସମ୍ମାନ ଓ ଭକ୍ତିର ସହ ଅଧ୍ୟକ୍ଷଙ୍କ ଆସନ ଆଡକୁ ଚାହିଁ ପ୍ରଧାନମନ୍ତ୍ରୀ କହିଥିଲେ ଯେ “ ସମ୍ପଦ ବଳରେ ଜଣେ ଯାହା ଚାହିଁବ ତାହା ହାସଲ କରିପାରିବ ନାହିଁ, ବରଂ ତାହା ଅଭ୍ୟାସ ଓ ଉପଲବ୍ଧି ଦ୍ୱାରା ଯେ ସମ୍ଭବ ଆପଣଙ୍କ ଜୀବନ ତାହା ପ୍ରମାଣ କରିଛି।” ରାଷ୍ଟ୍ରପତିଙ୍କ ସୁପ୍ରିମକୋର୍ଟର ତିନିଦଶନ୍ଧିର ଜଣେ ବରିଷ୍ଠ ଆଇନଜୀବୀ ଅଭିଜ୍ଞତାର ନଜିର ଦେଇ ପ୍ରଧାନମନ୍ତ୍ରୀ ଟିକେ ହାଲୁକା ଢଙ୍ଗରେ କହିଥିଲେ ଯେ ସେ ଗୃହରେ ଅଦାଲତରେ ଅନୁପସ୍ଥିତି ଅନୁଭବ କରିବେ ନାହିଁ କାରଣ ରାଜ୍ୟସଭାରେ ଅନେକ ସଦସ୍ୟ ଏପରି ଅଛନ୍ତି ଯେଉଁମାନେ ତାଙ୍କୁ ସୁପ୍ରିମକୋର୍ଟରେ ଦେଖୁଥିଲେ।

ସେ ପୁଣି କହିଥିଲେ ଯେ ‘ଆପଣ ବିଧାୟକରୁ ସଂସଦ ସଦସ୍ୟ, କେନ୍ଦ୍ର ମନ୍ତ୍ରୀ ଓ ରାଜ୍ୟପାଳ ଭୂମିକା ତୁଲାଇ ସାରିଛନ୍ତି।” ଏ ସମସ୍ତ ଭୂମିକାରେ ଗୋଟିଏ କଥା ଯାହା ସମାନ ଥିଲା, ତାହା ହେଉଛି ଦେଶର ବିକାଶ ଓ ଗଣତାନ୍ତ୍ରିକ ମୂଲ୍ୟବୋଧ ପ୍ରତି ନିଷ୍ଠା ବୋଲି ସେ କହିଥିଲେ। ଉପରାଷ୍ଟ୍ରପତି ଭାବେ ଉପରାଷ୍ଟ୍ରପତି ନିର୍ବାଚନରେ ପାଇଥିବା ଶତକଡା ୭୫ଭାଗ ଭୋଟ ତାଙ୍କ ପ୍ରତି ଅନ୍ୟମାନଙ୍କ ଆନୁଗତ୍ୟର ପ୍ରମାଣ ବୋଲି ଶ୍ରୀ ମୋଦି କହିଥିଲେ। “ନେତୃତ୍ୱର ପ୍ରକୃତ ସଂଜ୍ଞା ହେଉଛି ଅଗ୍ରଣୀ ଭୂମିକା ଓ ରାଜ୍ୟସଭା ପରିପ୍ରେକ୍ଷୀରେ ଏହା ଆହୁରି ଗୁରୁତ୍ୱପୂର୍ଣ୍ଣ ମନେ ହୁଏ। କାରଣ ଏକ ସ୍ୱଚ୍ଛ ଉପାୟରେ ଗଣତାନ୍ତ୍ରିକ ନିଷ୍ପତ୍ତିକୁ ଫଳପ୍ରଦ କରିବା ହେଉଛି ଗୃହର ଦାୟିତ୍ୱ।

ଗୃହର ମର୍ଯ୍ୟାଦା ବୃଦ୍ଧି ପାଇଁ ସଦସ୍ୟମାନଙ୍କ ଉପରେ ନ୍ୟସ୍ତ ଦାୟିତ୍ୱର ଅବତାରଣା କରି ପ୍ରଧାନମନ୍ତ୍ରୀ କହିଥିଲେ ଯେ ଗୃହ ଦେଶର ମହାନ୍ ଗଣତାନ୍ତ୍ରିକ ଐତିହ୍ୟର ରକ୍ଷାକର୍ତ୍ତା ଓ ଏହାର ଶକ୍ତି ଭାବେ ବିବେଚିତ ହୋଇଥାଏ। ଅନେକ ପୂର୍ବତନ ପ୍ରଧାନମନ୍ତ୍ରୀ ମଧ୍ୟ କେବେ କେମିତି ରାଜ୍ୟସଭା ସଦସ୍ୟଭାବେ କାର୍ଯ୍ୟ କରିବା ଉପରେ ସେ ଆଲୋକପାତ କରିଥିଲେ। ଉପରାଷ୍ଟ୍ରପତିଙ୍କ ମାର୍ଗଦର୍ଶନରେ ଏହି ଗୃହ ଏହାର ମର୍ଯ୍ୟାଦା ଓ ଗରିମା ଅତୁଟ ରଖିବ ବୋଲି ପ୍ରଧାନମନ୍ତ୍ରୀ ପ୍ରତିଶ୍ରୁତି ଦେଇଥିଲେ । “ଗୃହରେ ଗୁରୁତ୍ୱପୂର୍ଣ୍ଣ ଗଣତାନ୍ତ୍ରିକ ଆଲୋଚନା ଗଣତନ୍ତ୍ରର ଜନନୀଭାବେ ଆମର ଗର୍ବକୁ ଆହୁରି ଶକ୍ତିଶାଳୀ କରିବ” ବୋଲି ସେ କହିଥିଲେ।

ଅଭିଭାଷଣର ଉଦ୍ଯାପନରେ ପ୍ରଧାନମନ୍ତ୍ରୀ କିପରି ପୂର୍ବତନ ଉପରାଷ୍ଟ୍ରପତି ତଥା ଅଧ୍ୟକ୍ଷ ଗତ ଅଧିବେଶନରେ ତାଙ୍କର ପଦବିନ୍ୟାସ ଓ ମିତ୍ରାକ୍ଷର ସଦସ୍ୟମାନଙ୍କୁ ହସର ଖୋରାକ୍ ଯୋଗାଇଥିଲା ତାହାର ସ୍ମୃତିଚାରଣ କରିଥିଲେ। “ମୁଁ ନିଶ୍ଚିତ ଯେ ଆପଣ ପ୍ରତ୍ୟୁପନ୍ନମତିତା କେବେ ମଧ୍ୟ ଆପଣଙ୍କଠାରୁ ଖସିଯିବ ନାହିଁ ଓ ଆପଣ ଗୃହକୁ ତାହାର ସୁବିଧା ନେଇ ଚାଲିଥିବେ” ବୋଲି କହି ପ୍ରଧାନମନ୍ତ୍ରୀ ଅଭିଭାଷଣଣର ପରିସମାପ୍ତି ଘଟାଇଥିଲେ।

ନୂଆଦିଲ୍ଲୀ: ଅଜିଠୁ ସଂସଦରେ ଶୀତ କାଳୀନ ଅଧିବେଶନ ଆରମ୍ଭ ହୋଇଛି। ତେବେ ଏହା ପୂର୍ବରୁ ସମସ୍ତ ସାଂସଦଙ୍କୁ ପ୍ରଧାନମନ୍ତ୍ରୀ ମୋଦୀ ବାର୍ତ୍ତା ଦେଇଛନ୍ତି। ସେ ତାଙ୍କ ଉଦବୋଧନରେ କହିଛନ୍ତି ଯେ, “ସଂସଦର ଶୀତକାଳୀନ ଅଧିବେଶନର ଆଜି ପ୍ରଥମ ଦିବସ। ଏହି ଅଧିବେଶନ ଏଥିପାଇଁ ମହତ୍ତ୍ୱପୂର୍ଣ୍ଣ କାରଣ ୧୫ ଅଗଷ୍ଟ ପୂର୍ବରୁ ଆମେ ଏକାଠି ହୋଇଥିଲେ। ୧୫ ଅଗଷ୍ଟରେ ସ୍ୱାଧୀନତାର ୭୫ ବର୍ଷ ପୂରଣ ହୋଇଥିଲା ଏବଂ ଏବେ ଆମେ ଅମୃତକାଳ ଯାତ୍ରାରେ ଆଗକୁ ଅଗ୍ରସର ହେଉଛେ। ଆଜି ଏଭଳି ଏକ ସମୟରେ ଆମେ ଏକତ୍ରିତ ହୋଇଛେ, ଯେତେବେଳେ ଭାରତକୁ ଜି-୨୦ ର ପରିଚାଳନା ସୁଯୋଗ ମିଳିଛି। ବିଶ୍ୱ ସମୁଦାୟରେ ଯେଉଁଭଳି ଭାବେ ଭାରତକୁ ସ୍ଥାନ ମିଳୁଛି, ଯେଉଁଭଳି ଭାରତକୁ ନେଇ ଆଶା ବଢ଼ୁଛି ଏବଂ ଯେଉଁଭଳି ଭାବେ ଭାରତ ବୈଶ୍ୱିକ ମଞ୍ଚରେ ନିଜ ଭାଗୀଦାରି ବଢ଼ାଇବାରେ ଲାଗିଛି, ଏଭଳି ସମୟରେ ଏହି ଜି-୨୦ ଅଧ୍ୟକ୍ଷତା ଦାୟିତ୍ୱ ମିଳିବା ଏକ ବହୁତ ବଡ଼ ସୁଯୋଗ।

ଏହି ଜି-୨୦ ସମ୍ମିଳନୀ କେବଳ ଏକ କୂଟନୈତିକ କାର୍ଯ୍ୟକ୍ରମ ନୁହେଁ। ବରଂ ଏହି ଜି-୨୦ ସମ୍ମିଳନୀ ଭାରତର ସାମର୍ଥ୍ୟକୁ ବିଶ୍ୱ ସାମ୍ନାରେ ପ୍ରସ୍ତୁତ କରିବାର ସୁଯୋଗ। ଏତେ ବଡ଼ ଦେଶ, ଗଣତନ୍ତ୍ରର ଜନନୀ, ଏତେ ବିବିଧତା, ଏତେ ସାମର୍ଥ୍ୟ; ପୁରା ବିଶ୍ୱ ଭାରତକୁ ଜାଣିବା ଏବଂ ଭାରତ ବିଶ୍ୱ ସମ୍ମୁଖରେ ନିଜ ସାମର୍ଥ୍ୟ ପ୍ରଦର୍ଶନ ନିମନ୍ତେ ଏହା ଏକ ବହୁତ ବଡ଼ ସୁଯୋଗ।

ବିଗତ ଦିନଗୁଡ଼ିକରେ ମୋର ସମସ୍ତ ଦଳର ଅଧ୍ୟକ୍ଷଙ୍କ ସହ ସକାରାତ୍ମକ ବାତାବରଣରେ ଚର୍ଚ୍ଚା ହୋଇଛି। ଗୃହରେ ମଧ୍ୟ ଏହାର ପ୍ରତିଫଳନ ନିଶ୍ଚିତ ଦୃଶ୍ୟମାନ ହେବ। ଗୃହରେ ବି ସେହି ସ୍ୱର ଉଠିବ, ଯାହା ଭାରତର ସାମର୍ଥ୍ୟକୁ ବିଶ୍ୱରେ ପ୍ରସ୍ତୁତ କରିବା ଲାଗି କାମରେ ଆସିବ। ଏହି ଅଧିବେଶନରେ ଦେଶକୁ ବିକାଶର ନୂଆ ଉଚ୍ଚତାକୁ ନେଇଯିବା ଲାଗି ବର୍ତ୍ତମାନ ବୈଶ୍ୱିକ ପରିସ୍ଥିତିରେ ଭାରତକୁ ଆଗକୁ ବଢ଼ାଇବା ପାଇଁ ନୂଆ ସୁଯୋଗ ଆଦିକୁ ଧ୍ୟାନରେ ରଖି ଅନେକ ମହତ୍ତ୍ୱପୂର୍ଣ୍ଣ ନିର୍ଣ୍ଣୟ ଏହି ଅଧିବେଶନରେ ନେବା ପାଇଁ ଉଦ୍ୟମ ହେବ। ମୋର ବିଶ୍ୱାସ ଯେ ସମସ୍ତ ରାଜନୈତିକ ଦଳ ଆଲୋଚନାକୁ ଆହୁରି ସୁଦୃଢ଼ କରିବେ। ସଂସଦର ଏହି କାର୍ଯ୍ୟକାଳର ଯେଉଁ ସମୟ ଏବେ ବାକି ରହିଛି, ମୁଁ ସମସ୍ତ ଦଳର ନେତାମାନଙ୍କୁ ଏବଂ ସମସ୍ତ ଫ୍ଲୋର ଲିଡରଙ୍କୁ କହିବାକୁ ଚାହିଁବି ଯେ ପ୍ରଥମ ଥର ପାଇଁ ଯେଉଁମାନେ ସଂସଦ ଆସିଛନ୍ତି, ଯେଉଁ ନୂଆ ସାଂସଦ ଅଛନ୍ତି, ଯେଉଁ ଯୁବ ସାଂସଦ ଅଛନ୍ତି ସେମାନଙ୍କ ଉଜ୍ଜ୍ୱଳ ଭବିଷ୍ୟତ ଲାଗି ଏବଂ ଗଣତନ୍ତ୍ରର ଭାବୀ ପିଢ଼ିକୁ ପ୍ରସ୍ତୁତ କରିବା ପାଇଁ ଆମେ ଅଧିକରୁ ଅଧିକ ସୁଯୋଗ ସେହିମାନଙ୍କୁ ଦେବା ଏବଂ ଆଲୋଚନାରେ ସେମାନଙ୍କର ଭାଗୀଦାରି ବଢ଼ାଇବା।

ବିଗତ ଦିନଗୁଡ଼ିକରେ ପାଖାପାଖି ସମସ୍ତ ଦଳର କୌଣସି ନା କୌଣସି ସାଂସଦଙ୍କ ସହିତ ମୋର ଔପଚାରିକ ସାକ୍ଷାତ ଯେବେ ବି ହୋଇଛି, ଗୋଟିଏ କଥା ନିଶ୍ଚିତ ସମସ୍ତ ସାଂସଦ କୁହନ୍ତି ଯେ ଗୃହରେ ହୋହଲ୍ଲା ଏବଂ ତା’ପରେ ଗୃହ ସ୍ଥଗିତ ହୋଇଯାଏ। ଏହାଦ୍ୱାରା ଆମ ସାଂସଦମାନଙ୍କର କ୍ଷତି ହୋଇଥାଏ। ଯୁବ ସାଂସଦମାନଙ୍କ କହିବା କଥା ହେଉଛି ଯେ ଅଧିବେଶନ ନ ଚାଲିବା କାରଣରୁ ଆଲୋଚନା ହୋଇ ନ ପାରିବା କାରଣରୁ ଆମେ ଯାହା ଏଠାରୁ ଶିଖିବାକୁ ଚାହୁଁ, ଆମେ ଯାହା ବୁଝିବାକୁ ଚାହୁଁ କାରଣ ଏହା ଗଣତନ୍ତ୍ରର ବହୁତ ବଡ଼ ବିଶ୍ୱବିଦ୍ୟାଳୟ। ଆମେ ତାହାଦ୍ୱାରା ପଛୁଆ ରହିଯାଉଥାଉ। ଆମକୁ ସେହି ସୌଭାଗ୍ୟ ମିଳୁନାହିଁ ଏବଂ ଏଥିପାଇଁ ଗୃହ ଚାଲିବା ବହୁତ ଜରୁରି। ଏହି ସମସ୍ତ ଦଳର ଯୁବ ସାଂସଦମାନଙ୍କର ବିଶେଷ ସ୍ୱର ବାହାରିଥାଏ।

ମୁଁ ବୁଝୁଛି ଯେ ଏବଂ ବିରୋଧୀ ଦଳର ଯେଉଁ ସାଂସଦ ଅଛନ୍ତି ସେମାନଙ୍କର ବି କହିବା କଥା ହେଉଛି ବିତର୍କରେ ଆମକୁ କହିବାକୁ ସୁଯୋଗ ମିଳୁନାହିଁ। ସେହି କାରଣରୁ ଗୃହ ସ୍ଥଗିତ ହୋଇଯାଏ। ସେହି କାରଣରୁ ହୋହଲ୍ଲା ହୋଇଥାଏ। ସେଥିଯୋଗୁ ଆମର ବହୁତ କ୍ଷତି ହୋଇଥାଏ। ମୁଁ ବୁଝୁଛି ଯେ ସମସ୍ତ ଫ୍ଲୋର ଲିଡର, ସମସ୍ତ ଦଳୀୟ ନେତା ଆମର ଏହି ସାଂସଦମାନଙ୍କ ଯନ୍ତ୍ରଣାକୁ ବୁଝିବେ। ସେମାନଙ୍କ ବିକାଶ ନିମନ୍ତେ, ଦେଶର ବିକାଶରେ ସେମାନଙ୍କ ସାମର୍ଥ୍ୟକୁ ଯୋଡ଼ିବା ଲାଗି ସେମାନଙ୍କର ଯେଉଁ ଉତ୍ସାହ ରହିଛି, ଉମଙ୍ଗ ରହିଛି, ସେମାନଙ୍କର ପ୍ରତିଭା ରହିଛି, ତାହାର ଲାଭ ଦେଶକୁ ମିଳୁ, ନିଷ୍ପତ୍ତିଗୁଡ଼ିକରେ ମିଳୁ, ନିଷ୍ପତ୍ତି ପ୍ରକ୍ରିୟାରେ ମିଳୁ, ଏହା ଗଣତନ୍ତ୍ରରେ ବହୁତ ଆବଶ୍ୟକ। ମୁଁ ଆହୁରି ସମସ୍ତ ଦଳଙ୍କୁ କହିବାକୁ ଚାହେଁ ଯେ ସମସ୍ତ ସାଂସଦ ଏହି ଅଧିବେଶନକୁ ଆହୁରି ଅଧିକ ସଫଳ ବନାଇବା ଦିଗରେ ସାମୂହିକ ଉଦ୍ୟମ କରିବେ।

ଏହି ଅଧିବେଶନରେ ଆଉ ଏକ ସୌଭାଗ୍ୟ ଯେ ଆଜି ପ୍ରଥମ ଥର ପାଇଁ ଆମ ଉପରାଷ୍ଟ୍ରପତି ଜୀ, ରାଜ୍ୟସଭାର ଅଧ୍ୟକ୍ଷ ଭାବେ ନିଜ କାର୍ଯ୍ୟକାଳ ଆରମ୍ଭ କରିବେ, ତାଙ୍କର ଏହା ପ୍ରଥମ ଅଧିବେଶନ ହେବ ଏବଂ ପ୍ରଥମ ଦିନ ହେବ। ଯେଉଁ ପ୍ରକାରେ ଆମର ରାଷ୍ଟ୍ରପତି ଦ୍ରୌପଦୀ ମୁର୍ମୁ ଜୀ ଭାରତର ମହାନ ସଂସ୍କୃତି ଓ ଆମ ଆଦିବାସୀ ପରମ୍ପରା ସହ ଦେଶର ଗୌରବ ବଢ଼ାଇବାରେ ବଡ଼ ଭୂମିକା ନିଭାଇଛନ୍ତି, ସେହିଭଳି ଭାବେ ଜଣେ ଚାଷୀ ପୁତ୍ର ଉପରାଷ୍ଟ୍ରପତି ପଦରେ ଆଜି ରାଜ୍ୟସଭାର ଅଧ୍ୟକ୍ଷ ଭାବେ ଦେଶର ଗୌରବ ବଢ଼ାଇବେ, ସାଂସଦମାନଙ୍କୁ ପ୍ରେରଣା ଦେବେ, ପ୍ରୋତ୍ସାହିତ କରିବେ। ତାଙ୍କୁ ବି ମୋ ତରଫରୁ ଅନେକ ଅନେକ ଶୁଭକାମନା ଜଣାଉଛି।”

ବହୁତ ବହୁତ ଧନ୍ୟବାଦ ବନ୍ଧୁଗଣ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ପୂର୍ବାହ୍ନ ୧୦ଟା ବେଳେ ସୁପ୍ରିମ୍‌କୋର୍ଟଠାରେ ଆୟୋଜିତ ସମ୍ବିଧାନ ଦିବସ ପାଳନ ସମାରୋହରେ ଯୋଗ ଦେବେ। ୨୦୧୫ ମସିହାଠାରୁ ଏହି ଦିନଟିକୁ ସମ୍ବିଧାନ ଦିବସରୂପେ ପାଳନ କରାଯାଇ ଆସୁଛି । ୧୯୪୯ ମସିହା ନଭେମ୍ବର ୨୬ ତାରିଖରେ ସମ୍ବିଧାନ ପ୍ରଣୟନ ସଭାରେ ଭାରତର ସମ୍ବିଧାନ ଗୃହିତ ହୋଇଥିଲା।

ଏହି କାର୍ଯ୍ୟକ୍ରମ ଅବସରରେ ପ୍ରଧାନମନ୍ତ୍ରୀ ଶ୍ରୀମୋଦୀ ଇ-କୋର୍ଟ କାର୍ଯ୍ୟକ୍ରମ ଅଧୀନରେ କେତେଗୁଡ଼ିଏ ନୂତନ ଉପକ୍ରମର ଶୁଭାରମ୍ଭ କରିବେ। ଏହି ପ୍ରକଳ୍ପ ବିବାଦୀୟ ପକ୍ଷ, ଆଇନଜୀବୀ ଏବଂ ବିଚାର ବିଭାଗକୁ ବିଚାରାଳୟର ଆଇସିଟି ସକ୍ଷମ ସେବା ଯୋଗାଇ ଦେବା ନିମନ୍ତେ ଉଦ୍ଦିଷ୍ଟ।

ପ୍ରଧାନମନ୍ତ୍ରୀଙ୍କ ଦ୍ୱାରା ଯେଉଁ ସବୁ ସେବାର ଶୁଭାରମ୍ଭ କରାଯିବାର ଅଛି ସେଥିମଧ୍ୟରେ ଭର୍ଚୁଆଲ୍ ନ୍ୟାୟିକ ଘଡ଼ି,  ଜଷ୍ଟ ଆଇଏସ ମୋବାଇଲ୍ ଆପ୍ ୨-୦, ଡିଜିଟାଲ କୋର୍ଟ ଏବଂ ଏସ୩ୱସ୍ ୱେବ୍‌ସାଇଟ୍ ଆଦି ଅନ୍ତର୍ଭୁକ୍ତ।

ଭର୍ଚୁଆଲ୍‌ କୋର୍ଟ ଘଡ଼ି ଏପରି ଏକ ଉପକ୍ରମ ଯାହା ବିଚାରାଳୟ ଗୁଡ଼ିକ ସ୍ତରରେ ନ୍ୟାୟ ପ୍ରଦାନ ବ୍ୟବସ୍ଥା ସମ୍ପର୍କୀତ ବିଭିନ୍ନ ପ୍ରକାର ଗୁରୁତ୍ୱପୂର୍ଣ୍ଣ ପରିସଂଖ୍ୟାନ ବିସ୍ତୃତ ଭାବେ ପ୍ରଦାନ କରିଥାଏ। ସେଥିରେ କେତେ ସଂଖ୍ୟକ ମାମଲା ବିଚାରାଧୀନ ରହିଛି, କେତେ ସଂଖ୍ୟକ ମାମଲାର ଫଇସଲା ହୋଇଛି ଏବଂ କେତେ ସଂଖ୍ୟକ ମାମଲା ପ୍ରତିଦିନ/ ସପ୍ତାହ/ ମାସ ଭିତ୍ତିରେ ବିଚାରାଳୟସ୍ତରରେ ଫଇସଲା ପାଇଁ ପଡ଼ି ରହିଛି ତାହାର ବିସ୍ତୃତ ସୂଚନା ଦେଇଥାଏ। ବିଚାରାଳୟ ଗୁଡ଼ିକ କାର୍ଯ୍ୟଦକ୍ଷତା ଦୃଷ୍ଟିରୁ କିପରି ଭାବେ ଉତ୍ତରଦାୟୀ  ଏବଂ ସ୍ୱଚ୍ଛ ଭାବେ ସେମାନଙ୍କର କାର୍ଯ୍ୟ କରୁଛନ୍ତି ଏବଂ ବିଭିନ୍ନ ବିଚାରାଳୟରେ ମାମଲାଗୁଡ଼ିକ ଫଇସଲା ହେବା ନିମନ୍ତେ କେଉଁ ପର୍ଯ୍ୟାୟରେ ରହିଛି ତାହାର ବିସ୍ତୃତ ସୂଚନା ଜନସାଧାରଣଙ୍କୁ ସୂଚାଇଥାଏ। ଜିଲ୍ଲା ନ୍ୟାୟାଳୟର ଯେକୌଣସି ବିଚାରାଳୟର ଜନସାଧାରଣ ଭର୍ଚୁଆଲ୍ ନ୍ୟାୟ ଘଡ଼ି ୱେବ୍‌ସାଇଟ୍‌କୁ ଯାଇ ଜନସାଧାରଣ ଏହି ସବୁ ସୂଚନା ପ୍ରାପ୍ତ ହୋଇପାରିବେ।

ଜଷ୍ଟଆଇଏସ ମୋବାଇଲ୍ ଆପ୍ ୨.୦ ଏଭଳି ଏକ ସୂଚନା ସାଧନ ଯାହା ନ୍ୟାୟିକ ଅଧିକାରୀମାନଙ୍କ ନିମନ୍ତେ ଉପଲବ୍ଧ ଏବଂ ତାହା ମାଧ୍ୟମରେ ସଫଳତାର ସହିତ ସେମାନେ ବିଚାରାଳୟ ଏବଂ ମାମଲାର ପରିଚାଳନା କରିପାରିବେ। କେବଳ ନିଜ ବିଚାରାଳୟର ନୁହେଁ ବରଂ ବ୍ୟକ୍ତିଗତ ଭାବେ ସମସ୍ତ ବିଚାରପତି ଯେଉଁମାନେ କି ସେମାନଙ୍କ ଅଧୀନରେ ଥିବେ ସେମାନଙ୍କ କୋର୍ଟରେ ବିଚାର ପାଇଁ ପଡ଼ି ରହିଥିବା ମାମଲା ଏବଂ ସେସବୁର ଫଇସଲା ସମ୍ପର୍କୀତ ସୂଚନା ସହଜରେ ପାଇପାରିବେ । ଏହି ଆପ୍‌ ହାଇକୋର୍ଟ ଏବଂ ସୁପ୍ରିମ୍‌କୋର୍ଟର ବିଚାରପତିମାନଙ୍କ ପାଇଁ ଉପଲବ୍ଧ ଯେଉଁମାନେ ବର୍ତ୍ତମାନ ସେମାନଙ୍କ କାର୍ଯ୍ୟ ପରିସର ଅଧୀନରେ ଥିବା ସମସ୍ତ ରାଜ୍ୟ ଏବଂ ଜିଲ୍ଲା ନ୍ୟାୟାଳୟ ମାନଙ୍କରେ ବକେୟା ମାମଲାକୁ ଅନୁଧ୍ୟାନ କରିପାରିବେ।

ଡିଜିଟାଲ କୋର୍ଟ ଆଉ ଏକ ପ୍ରୟାସ ଯାହା କୋର୍ଟର ରେକର୍ଡକୁ ଡିଜିଟାଇଜ୍‌ ରୂପରେ ବିଚାରପତି ମାନଙ୍କ ପାଇଁ ଉପଲବ୍ଧ କରାଇଥାଏ ଏବଂ ଏହା କାଗଜ ହୀନ କୋର୍ଟ ବ୍ୟବସ୍ଥାକୁ ରୂପାନ୍ତରଣର ଏକ ପର୍ଯ୍ୟାୟ ।

ସେହିଭଳି ଏସ୩ୱାସ୍ ୱେବ୍‌ସାଇଟ୍‌ ଏଭଳି ଏକ ଢାଞ୍ଚା ଯାହା ଜିଲ୍ଲା ନ୍ୟାୟିକ ବ୍ୟବସ୍ଥା ସମ୍ପର୍କୀତ ନିର୍ଦ୍ଦିଷ୍ଟ ସୂଚନା ଓ ସେବାର ପ୍ରକାଶନ ନିମନ୍ତେ ୱେବ୍‌ସାଇଟ୍‌ ସୃଷ୍ଟି କରିବା, ଏହାର ମୁତୟନ ଏବଂ ପରିଚାଳନା କରିଥାଏ। ଏସ୩ୱାସ୍ ୱେବ୍‌ସାଇଟ୍ ଏକ କ୍ଲାଉଡ୍‌ ସେବା ଯାହା ସରକାରୀ ସଂସ୍ଥାମାନଙ୍କ ନିମନ୍ତେ ନିରାପଦ, ଆକଳନକ୍ଷମ ଏବଂ ସୁଗମ୍ୟ (ଉପଲବ୍ଧ) ୱେବ୍‌ସାଇଟ୍‌ର ବିକାଶ ଘଟାଇଥାଏ। ଏହା ବହୁଭାଷିକ, ନାଗରିକ ତଥା ଦିବ୍ୟାଙ୍ଗ ଅନୁକୂଳ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭିଡିଓ ବାର୍ତ୍ତା ମାଧ୍ୟମରେ ଗୋଆ ସରକାରଙ୍କ ରୋଜଗାର ମେଳାକୁ ସମ୍ବୋଧିତ କରିଛନ୍ତି।

ପ୍ରଧାନମନ୍ତ୍ରୀ ଧନତେରସ ଅବସରରେ କେନ୍ଦ୍ରୀୟ ସ୍ତରରେ ରୋଜଗାର ମେଳାର ଶଭୁାରମ୍ଭ କରିଥିଲେ। କେନ୍ଦ୍ର ସ୍ତରରେ 10 ଲକ୍ଷ ଚାକିରି ଯୋଗାଇବା ପାଇଁ ଏହି ଅଭିଯାନର ଆରମ୍ଭ କରାଯାଇଥିଲା। ସେବେଠାରୁ ପ୍ରଧାନମନ୍ତ୍ରୀ ଗୁଜରାଟ, ଜାମ୍ମୁ ଓ କାଶ୍ମୀର ଏବଂ ମହାରାଷ୍ଟ୍ର ସରକାରଙ୍କ ରୋଜଗାର ମେଳାକୁ ସମ୍ବୋଧିତ କରିବା ସହ ବିଭିନ୍ନ ସରକାରୀ ବିଭାଗର ସମସ୍ତ ନୂତନ ନିଯୁକ୍ତ ବ୍ୟକ୍ତିଙ୍କ ପାଇଁ ଅନ୍‌ଲାଇନ୍ ଓରିଏଣ୍ଟେସନ୍ ପାଠ୍ୟକ୍ରମ ପାଇଁ ଗୋଟିଏ ଦିନ ପୂର୍ବରୁ କର୍ମଯୋଗୀ ପ୍ରାରମ୍ଭ ମଡ୍ୟୁଲ୍ ମଧ୍ୟ ଆରମ୍ଭ କରିଥିଲେ।

ଏହି ସମାବେଶକୁ ସମ୍ବୋଧିତ କରି ପ୍ରଧାନମନ୍ତ୍ରୀ ନିଯୁକ୍ତିପତ୍ର ପାଇଥିବା ଯୁବକମାନଙ୍କୁ ଅଭିନନ୍ଦନ ଜଣାଇବା ସହ ଗୋଆ ସରକାର ନିଯୁକ୍ତି କ୍ଷେତ୍ରରେ ଏହା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି କହିଥିଲେ। ଆସନ୍ତା ମାସରେ ଗୋଆ ପୋଲିସ ଏବଂ ଅନ୍ୟାନ୍ୟ ବିଭାଗରେ ଅଧିକ ନିଯୁକ୍ତି ପ୍ରକ୍ରିୟା ହେବାକୁ ଯାଉଛି ବୋଲି ପ୍ରଧାନମନ୍ତ୍ରୀ ସୂଚନା ଦେଇଛନ୍ତି। ଏହା ଗୋଆ ପୋଲିସ ଫୋର୍ସକୁ ମଜବୁତ କରିବ ଏବଂ ନାଗରିକ ତଥା ପର୍ଯ୍ୟଟକଙ୍କ ପାଇଁ ଏକ ଉନ୍ନତ ସୁରକ୍ଷା ବ୍ୟବସ୍ଥା ସୃଷ୍ଟି କରିବ ବୋଲି ସେ କହିଛନ୍ତି।

ଗତ କିଛି ସପ୍ତାହ ଧରି ଦେଶର ବିଭିନ୍ନ ରାଜ୍ୟରେ ନିରନ୍ତର ନିଯୁକ୍ତି ମେଳା ଆୟୋଜନ କରାଯାଉଥିବାବେଳେ କେନ୍ଦ୍ର ସରକାର ମଧ୍ୟ ହଜାର ହଜାର ଯୁବକଙ୍କୁ ଚାକିରୀ ଯୋଗାଇ ଦେଉଛନ୍ତି ବୋଲି ଶ୍ରୀ ମୋଦୀ କହିଥିଲେ। ଯୁବ ସଶକ୍ତିକରଣ ପାଇଁ ନିଜ ସ୍ତରରେ ଏଭଳି ଚାକିରି ମେଳା ଆୟୋଜନ ପାଇଁ ଡବଲ-ଇଞ୍ଜିନ ସରକାର ଦ୍ୱାରା ପରିଚାଳିତ ରାଜ୍ୟଗୁଡ଼ିକର ପ୍ରୟାସରେ ପ୍ରଧାନମନ୍ତ୍ରୀ ସନ୍ତୋଷ ପ୍ରକାଶ କରିଥିଲେ. ପ୍ରଧାନମନ୍ତ୍ରୀ ସୂଚାଇ ଦେଇଛନ୍ତି ଯେ ଗତ 8 ବର୍ଷ ମଧ୍ୟରେ କେନ୍ଦ୍ର ସରକାର ଗୋଆର ବିକାଶରେ ହଜାର ହଜାର କୋଟି ଟଙ୍କା ନିବେଶ କରିଛନ୍ତି। ପ୍ରାୟ 3000 କୋଟି ଟଙ୍କା ବ୍ୟୟରେ ନିର୍ମିତ ମୋପା ଠାରେ ଖୁବଶୀଘ୍ର ଉଦଘାଟିତ ବିମାନବନ୍ଦରର ସମ୍ପର୍କରେ ସୂଚନା ପ୍ରଦାନ କରି ପ୍ରଧାନମନ୍ତ୍ରୀ କହିଛନ୍ତି ଯେ ଏହା ଗୋଆର ହଜାର ହଜାର ଲୋକଙ୍କ ପାଇଁ ଏକ ପ୍ରମୁଖ ନିଯୁକ୍ତି ଉତ୍ସ ହୋଇପାରିଛି। ରାଜ୍ୟରେ ଚାଲିଥିବା ଭିତ୍ତିଭୂମି ପ୍ରକଳ୍ପଗୁଡ଼ିକୁ ତ୍ବରାନ୍ବିତ କରାଯାଉଛି। ପ୍ରଧାନମନ୍ତ୍ରୀ କହିଥିଲେ ଯେ “ସ୍ବୟଂ ସମ୍ପୂର୍ଣ୍ଣ ଗୋଆ” ର ଦୂରଦୃଷ୍ଟି ହେଉଛି ରାଜ୍ୟରେ ମୌଳିକ ସୁବିଧାରେ ଉନ୍ନତି ଆଣିବା ସହିତ ଭିତ୍ତିଭୂମିରେ ଉନ୍ନତି ଆଣିବା।

ଗୋଆ ପର୍ଯ୍ୟଟନ ମାଷ୍ଟର ପ୍ଲାନ ଏବଂ ନୀତି ସମ୍ପର୍କରେ ପ୍ରଧାନମନ୍ତ୍ରୀ ସୂଚନା ଦେଇଛନ୍ତି ଯେ ଗୋଆର ବିକାଶ ପାଇଁ ରାଜ୍ୟ ସରକାର ଏକ ନୂତନ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଛନ୍ତି ଯାହା ପର୍ଯ୍ୟଟନ କ୍ଷେତ୍ରରେ ପୁଞ୍ଜି ବିନିଯୋଗ ପାଇଁ ନୂତନ ସମ୍ଭାବନା ସୃଷ୍ଟି କରିଛି ଏବଂ ଏହାଦ୍ୱାରା ବହୁ ସଂଖ୍ୟାରେ ନିଯୁକ୍ତି ବୃଦ୍ଧି ପାଇବ। ପାରମ୍ପରିକ ଚାଷରେ ନିଯୁକ୍ତି ବୃଦ୍ଧି ପାଇଁ ଗୋଆର ଗ୍ରାମାଞ୍ଚଳକୁ ଆର୍ଥିକ ସାମର୍ଥ୍ୟ ଦେବା ପାଇଁ ନିଆଯାଉଥିବା ପଦକ୍ଷେପ ଉପରେ ପ୍ରଧାନମନ୍ତ୍ରୀ ସୂଚନା ଦେଇ କହିଥିଲେ ଯେ ଧାନ, ଫଳ ପ୍ରକ୍ରିୟାକରଣ, ନଡିଆ, ଝୋଟ, ମସଲା ଉତ୍ପାଦନ କରୁଥିବା କୃଷକମାନେ ସ୍ୱୟଂ ସହାୟକ ଗୋଷ୍ଠୀ ସହ ଜଡିତ ଅଛନ୍ତି। ଏହି ପ୍ରୟାସ ଗୋଆରେ ରୋଜଗାର ଏବଂ ଆତ୍ମନିଯୁକ୍ତି ପାଇଁ ଅନେକ ନୂତନ ସୁଯୋଗ ସୃଷ୍ଟି କରୁଛି।

ଗୋଆର ବିକାଶ ତଥା ଦେଶର ବିକାଶ ପାଇଁ କାର୍ଯ୍ୟ କରିବାକୁ ନୂତନ ନିଯୁକ୍ତ ଲୋକଙ୍କୁ ଅନୁରୋଧ କରି ପ୍ରଧାନମନ୍ତ୍ରୀ କହିଥିଲେ ଯେ ଆପଣଙ୍କ ଜୀବନର ସବୁଠାରୁ ଗୁରୁତ୍ୱପୂର୍ଣ୍ଣ 25 ବର୍ଷ ବର୍ତ୍ତମାନ ଆରମ୍ଭ ହେବାକୁ ଯାଉଛି। ଏକ ବିକଶିତ ଭାରତର ଦୃଷ୍ଟିକୋଣକୁ ଗୁରୁତ୍ବ ପ୍ରଦାନ କରି ପ୍ରଧାନମନ୍ତ୍ରୀ ତାଙ୍କ ସମ୍ବୋଧନ ସମାପ୍ତ କରି 2047 ର ଏକ ନୂତନ ଭାରତର ଲକ୍ଷ୍ୟ ରଖିଥିଲେ। “ଗୋଆର ବିକାଶ ସହିତ ଆପଣଙ୍କର 2047 ମସିହାର ନୂଆ ଭାରତର ଲକ୍ଷ୍ୟ ରହିଛି। ମୁଁ ନିଶ୍ଚିତ ଯେ ଆପଣ ସମସ୍ତେ ପୂର୍ଣ୍ଣ ନିଷ୍ଠା ଓ ତତ୍ପରତା ସହିତ ଆପଣଙ୍କର କର୍ତ୍ତବ୍ୟର ପଥ ଅନୁସରଣ କରିବେ ” ବୋଲି ପ୍ରଧାନମନ୍ତ୍ରୀ କହିଥିଲେ।

ନୂଆଦିଲ୍ଲୀ: ରୋଜଗାର ମେଳା ଜରିଆରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ସକାଳ ୧୦.୩୦ ରେ ଭିଡିଓ କନଫରେନ୍ସିଂ ମାଧ୍ୟମରେ ପ୍ରାୟ ୭୧ ହଜାର ନବ ନିଯୁକ୍ତମାନଙ୍କୁ ନିଯୁକ୍ତି ପତ୍ର ବଣ୍ଟନ କରିବେ। ଏହି ଅବସରରେ ପ୍ରଧାନମନ୍ତ୍ରୀ ନବନିଯୁକ୍ତଙ୍କୁ ସମ୍ବୋଧିତ ମଧ୍ୟ କରିବେ।

ରୋଜଗାର ସୃଷ୍ଟି ଉପରେ ସର୍ବୋଚ୍ଚ ପ୍ରାଥମିକତା ଦେବା ପାଇଁ ପ୍ରଧାନମନ୍ତ୍ରୀଙ୍କ ପ୍ରତିବଦ୍ଧତା ପୂରଣ ଦିଗରେ ରୋଜଗାର ମେଳା ଏକ ପଦକ୍ଷେପ। ରୋଜଗାର ମେଳା ପରବର୍ତ୍ତି ନିଯୁକ୍ତି ସୃଷ୍ଟିରେ ଏକ ପ୍ରମୁଖ ଭୂମିକା ଗ୍ରହଣ କରିବ ଏବଂ ଯୁବକମାନଙ୍କୁ ସେମାନଙ୍କର ସଶକ୍ତିକରଣ ଏବଂ ଜାତୀୟ ବିକାଶରେ ସିଧାସଳଖ ଅଂଶଗ୍ରହଣ ପାଇଁ ଅର୍ଥପୂର୍ଣ୍ଣ ସୁଯୋଗ ପ୍ରଦାନ କରିବ ବୋଲି ଆଶା କରାଯାଉଛି। ଏହା ପୂର୍ବରୁ ଅକ୍ଟୋବରରେ, ରୋଜଗାର ମେଳା ଅଧୀନରେ ୭୫ ହଜାର ନୂତନ ନିଯୁକ୍ତ ବ୍ୟକ୍ତିଙ୍କୁ ନିଯୁକ୍ତି ପତ୍ର ପ୍ରଦାନ କରାଯାଇଥିଲା।

ନୂତନ ନିଯୁକ୍ତ ବ୍ୟକ୍ତିଙ୍କୁ ନିଯୁକ୍ତି ପତ୍ରର ଭୌତିକ କପି ଦେଶର ୪୫ ଟି ସ୍ଥାନରେ (ଗୁଜରାଟ ଏବଂ ହିମାଚଳ ପ୍ରଦେଶ ବ୍ୟତୀତ) ହସ୍ତାନ୍ତର କରାଯିବ। ଏହାପୂର୍ବରୁ ପୂର୍ଣ୍ଣ ହୋଇଥିବା ବର୍ଗ ବ୍ୟତୀତ ଶିକ୍ଷକ, ଅଧ୍ୟାପକ, ନର୍ସ, ନର୍ସିଂ ଅଫିସର, ଡାକ୍ତର, ଫାର୍ମାସିଷ୍ଟ, ରେଡିଓଗ୍ରାଫର ଏବଂ ଅନ୍ୟାନ୍ୟ ବୈଷୟିକ ଏବଂ ପାରାମେଡିକାଲ୍ ପୋଷ୍ଟଗୁଡିକ ମଧ୍ୟ ପୂରଣ କରାଯାଉଛି। ବିଭିନ୍ନ ସେଣ୍ଟ୍ରାଲ୍ ଆର୍ମଡ୍ ପୋଲିସ୍ ଫୋର୍ସ (ସିଏପିଏଫ୍‌) ରେ ଗୃହ ବ୍ୟାପାର ମନ୍ତ୍ରଣାଳୟ ଦ୍ୱାରା ବହୁ ସଂଖ୍ୟକ ପଦବୀ ପୂରଣ କରାଯାଉଛି।

ପ୍ରଧାନମନ୍ତ୍ରୀ କର୍ମଯୋଗୀ ପ୍ରାରମ୍ଭ ମଡ୍ୟୁଲ୍ ମଧ୍ୟ ଶୁଭାରମ୍ଭ କରିବେ। ବିଭିନ୍ନ ସରକାରୀ ବିଭାଗର ସମସ୍ତ ନବନିଯୁକ୍ତଙ୍କ ପାଇଁ ମଡ୍ୟୁଲ୍ ହେଉଛି ଏକ ଅନଲାଇନ୍ ଓରିଏଣ୍ଟେସନ୍ ପାଠ୍ୟକ୍ରମ। ଏଥିରେ ସରକାରୀ କର୍ମଚାରୀଙ୍କ ପାଇଁ ଆଚରଣ ସଂହିତା, କର୍ମକ୍ଷେତ୍ରର ନୈତିକତା ଏବଂ ଅଖଣ୍ଡତା, ମାନବ ସମ୍ବଳ ନୀତି ଏବଂ ଅନ୍ୟାନ୍ୟ ସୁବିଧା ଏବଂ ଭତ୍ତା ଅନ୍ତର୍ଭୂକ୍ତ ହେବ ଯାହା ସେମାନଙ୍କୁ କାର୍ଯ୍ୟକ୍ଷେତ୍ରରେ ସହାୟତା ପ୍ରଦାନ କରିବ ଏବଂ ନୂତନ ଭୂମିକାକୁ ସୁଗମ କରିବାରେ ସାହାଯ୍ୟ କରିବ । ସେମାନେ ସେମାନଙ୍କର ଜ୍ଞାନ, କୌଶଳ ଏବଂ ଦକ୍ଷତା ବୃଦ୍ଧି ପାଇଁ igotkarmayogi.gov.in ପ୍ଲାଟଫର୍ମରେ ଅନ୍ୟାନ୍ୟ ପାଠ୍ୟକ୍ରମ ଅନୁସନ୍ଧାନ କରିବାର ସୁଯୋଗ ପାଇବେ।

ନୂଆଦିଲ୍ଲୀ: ଆତଙ୍କବାଦର ମୁକାବିଲା ଦିଗରେ ମନରେ କୌଣସି ଦ୍ୱିଧା ରଖିବା ଅନୁଚିତ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦୃଢ କଣ୍ଠରେ କହିଛନ୍ତି। ଆତଙ୍କବାଦ ନିଜର ବିଦେଶ ନୀତି ଭାବେ ଗ୍ରହଣ କରୁଥିବା ଦେଶଗୁଡିକୁ ମଧ୍ୟ ସେ ସତର୍କ କରାଇ ଦେଇଛନ୍ତି। ଆଜି (୧୮.୧୧. ୨୦୨୨) ନୂଆଦିଲ୍ଲୀଠାରେ ଆତଙ୍କବାଦକୁ ଅର୍ଥ ଯୋଗାଣ ସମ୍ପର୍କୀତ ‘ନୋ ମନି ଫର ଟେରର” (ଏନଏମଏଫଟି)ର ତୃତୀୟ ମନ୍ତ୍ରିସ୍ତରୀୟ ସମ୍ମିଳନୀରେ ଉଦ୍‌ବୋଧନ ଦେଇ ସେ ଏହା କହିଛନ୍ତି।

ସମବେତ ଜନତାଙ୍କୁ ସ୍ୱାଗତ କରି ପ୍ରଧାନମନ୍ତ୍ରୀ ଭାରତରେ ଆୟୋଜିତ ହେଉଥିବା ସମ୍ମିଳନୀରେ ଗୁରୁତ୍ୱ ଉପରେ ଆଲୋକପାତ କରିଥିଲେ। ବିଶ୍ୱ ଗୁରୁତର ଭାବେ ଏ ବିଷୟ ଚିନ୍ତା କରିବାର ବହୁ ଆଗରୁ ଆମ ଦେଶ ଆତଙ୍କବାଦର କଳା ମୁହଁ ଦେଖି ସାରିଛି  ବୋଲି ସେ କହିଥିଲେ। ପ୍ରଧାନମନ୍ତ୍ରୀ କହିଥିଲେ ଯେ, “ଆତଙ୍କବାଦ ଭିନ୍ନ ଭିନ୍ନ ନାମ ଓ ଆକାରରେ ଭାରତକୁ କ୍ଷତାକ୍ତ କରିଛି।”

ହଜାର ହଜାର ଅମୂଲ୍ୟ ଜୀବନ ହାନୀ ସତ୍ୱେ ଭାରତ ସାହସର ସହ ଆତଙ୍କବାଦର ମୁକାବିଲା କରିଛି ବୋଲି ସେ କହିଥିଲେ। ଏଥିରେ ଯୋଗଦେଇଥିବା ପ୍ରତିନିଧିଗଣ ଭାରତୀୟ ମାନେ ଆତଙ୍କର କିପରି ମୁକାବିଲା କରିଛନ୍ତି ସେ ସମ୍ପର୍କରେ ଭାରତ ସହ ମତ ବିନିମୟ କରିବା ଉପରେ ସେ ଆଲୋକପାତ କରିଥିଲେ। “ଆମ ବିଚାରରେ ଗୋଟିଏ ଆକ୍ରମଣ ଅନେକ ସହ ସମାନ ଓ ଗୋଟିଏ ଜୀବନ ହାନୀ ମଧ୍ୟ ଅନେକ ସହ ସମାନ। ସେଥିପାଇଁ ଆତଙ୍କବାଦ ସମୂଳେ ଧ୍ୱଂସ ନ ହେବା ପର୍ଯ୍ୟନ୍ତ ଆମେ ବିଶ୍ରାମ କରିବୁ ନାହିଁ ବୋଲି ପ୍ରଧାନମନ୍ତ୍ରୀ ଦୃଢୋକ୍ତି ପ୍ରକାଶ କରିଥିଲେ।

ସମ୍ମିଳନୀର ଗୁରୁତ୍ୱ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଏହାକୁ କେବଳ ଏକ ମନ୍ତ୍ରମାନଙ୍କ ସମାଗମ ଭାବେ ବିବେଚନା କରିବା ଅନୁଚିତ, କାରଣ ଆତଙ୍କବାଦ ସମଗ୍ର ମାନବତାକୁ ପ୍ରଭାବିତ କରୁଛି। ଆତଙ୍କବାଦର ଦୀର୍ଘକାଳୀନ ପ୍ରଭାବ ବିଶେଷ କରି ଗରିବମାନଙ୍କ ଉପରେ ଓ ସ୍ଥାନୀୟ ଅର୍ଥନୀତି ଉପରେ ପଡିଥାଏ। “ସେ ପର୍ଯ୍ୟଟନ ହେଉ ବା ବାଣିଜ୍ୟ ନିରବିଚ୍ଛନ୍ନ ଭାବେ ଭୟର ବାତାବରଣ ଥିବା ସ୍ଥାନକୁ କେହି ଭଲ ପାଆନ୍ତି ନାହିଁ” ବୋଲି ଶ୍ରୀ ମୋଦୀ କହିଥିଲେ। ଆତଙ୍କବାଦ ଯୋଗୁଁ ଲୋକମାନଙ୍କ ଜୀବନଜୀବିକା ଛଡାଇ ନିଆଯାଇଥାଏ। ସବୁଠାରୁ ଗୁରୁତ୍ୱପୂର୍ଣ୍ଣ ହେଉଛି ଆତଙ୍କବାଦ ପାଇଁ ଯୋଗାଯାଉଥିବା ଆର୍ଥିକ ବ୍ୟବସ୍ଥା ମୂଳରେ ପ୍ରହାର କରିବା।

ପ୍ରଧାନମନ୍ତ୍ରୀ କହିଥିଲେ ଯେ ଆତଙ୍କବାଦର ମୁକାବିଲା ନେଇ କୌଣସି ଦ୍ୱିଧା ରହିବା ଅନୁଚିତ । ଆତଙ୍କବାଦ ନେଇ ଥିବା ଭ୍ରମାତ୍ମକ ଚିନ୍ତାଧାରା ଉପରେ ଆଲୋକପାତ କରି ସେ କହିଥିଲେ ଯେ “ କେଉଁଠି କେତେ ବଡ ଆକ୍ରମଣ ଘଟିଲା ସେଥି ନେଇ ପ୍ରତିକ୍ରିୟା ଭିନ୍ନ ହେବା ମଧ୍ୟ ଅନୁଚିତ । ପ୍ରତ୍ୟେକ ଆତଙ୍କ ବା ଆକ୍ରମଣ ସମଦୃଷ୍ଟିରେ ଓ ସମାନ ପଦକ୍ଷେପ ଅନୁଯାୟୀ ବିବେଚନା କରାଯିବା ଆବଶ୍ୟକ । ପୁଣି ବେଳେ ବେଳେ ଆତଙ୍କବାଦ ସପକ୍ଷରେ ପରୋକ୍ଷ ଯୁକ୍ତି ହୋଇ ତାହା ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ ନ କରିବାକୁ ମଧ୍ୟ ମତଭେଦ ଦେଖାଦେଇଥାଏ । ଏଭଳି ବୈଶ୍ୱିକ ବିପଦର ମୁକାବିଲା ନେଇ କୌଣସି ଦ୍ୱିବିଧାର ମଧ୍ୟ ସ୍ଥାନନାହିଁ ।

“ଆତଙ୍କବାଦରେ ଭଲ ଖରାପ କିଛି ନାହିଁ, ଏହା ମାନବତା, ସ୍ୱାଧୀନତା ଓ ସଭ୍ୟତା ଉପରେ ଆକ୍ରମଣ । ଏହାର କୌଣସି ସୀମା ସରହଦ ନାହିଁ ବୋଲି କହି ପ୍ରଧାନମନ୍ତ୍ରୀ କେବଳ ପୋଷାକ, ଏକତା ଓ ଶୂନ୍ୟ ସହନଶୀଳତା କାର୍ଯ୍ୟାନୁଷ୍ଠାନ ଆତଙ୍କବାଦକୁ ପରାସ୍ତ କରିପାରିବ” ବୋଲି କହିଥିଲେ ।

ଜଣେ ଆତଙ୍କବାଦୀ ଓ ଆତଙ୍କବାଦ ମଧ୍ୟରେ ପାର୍ଥକ୍ୟ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଜଣେ ଆତଙ୍କବାଦୀକୁ ଅସ୍ତ୍ରଶସ୍ତ୍ର ବା ତତ୍କାଳ ରଣନୀତି ବଳରେ ନିପାତ କରିହେବ, ମାତ୍ର ସବୁ ରଣନୀତିକ ସଫଳତା ସେମାନଙ୍କ ଆର୍ଥିକ ମେରୁଦଣ୍ଡକୁ ନ ଭାଙ୍ଗିଲେ ଅଚଳପ୍ରାୟ ହୋଇଯିବ । ଶ୍ରୀ ମୋଦୀ କହିଥିଲେ ଯେ “ ଜଣେ ଆତଙ୍କବାଦୀ ଜଣେ ବ୍ୟକ୍ତିବିଶେଷ ହୋଇଥିବାବେଳେ ଆତଙ୍କବାଦ କେତେକ ବ୍ୟକ୍ତିଙ୍କ  ଏକ କାର୍ଯ୍ୟକ୍ରମ।” ଶ୍ରୀ ମୋଦି କହିଥିଲେ ଯେ ଆକ୍ରମଣ ହିଁ ପ୍ରତିରକ୍ଷାର ଶ୍ରେଷ୍ଠ ଉପାୟ ଓ ଆତଙ୍କବାଦର ମୂଳୋତ୍ପାଟନ ନିମନ୍ତେ ବୃହତ୍ । ପେଶାଗତ ଓ ସାମଗ୍ରୀକ ଜବାବ ଦରକାର । ଆମେ ଆତଙ୍କବାଦୀଙ୍କ ସମର୍ଥନ ବ୍ୟବସ୍ଥାକୁ ଧ୍ୱଂସ କରିବା ସହ ସେମାନଙ୍କ ଅର୍ଥପ୍ରାପ୍ତିର ରାସ୍ତା ଆମ ନାଗରିକଙ୍କ ନିରାପତ୍ତା ପାଇଁ ବନ୍ଦ କରିବା ଦରକାର ।

ଆତଙ୍କବାଦକୁ ରାଜନୈତିକ, ଆର୍ଥିକ ଓ ଆଦର୍ଶଗତ ସମର୍ଥନ ବନ୍ଦ କରିବା ପାଇଁ ରାଜ୍ୟଗୁଡିକର ସାହାଯ୍ୟ ସବୁଠାରୁ ମହତ୍ୱପୂର୍ଣ୍ଣ । କେତେକ ଦେଶ ସେମାନଙ୍କ ବୈଦେଶିକ ନୀତିର ଅଙ୍ଗଭାବେ ଆତଙ୍କବାଦକୁ ସମର୍ଥନ ଦେଇଥାନ୍ତି । ସେ ମଧ୍ୟ ଆନ୍ତର୍ଜାତିକ ସଂଗଠନଗୁଡିକୁ ଛାୟା ଯୁଦ୍ଧକୁ ନେଇ ସତର୍କ ରହିବାକୁ କହିଥିଲେ ।” ଯେଉଁ ଦେଶଗୁଡିକ ଆତଙ୍କବାଦକୁ ସମର୍ଥନ କରୁଛନ୍ତି ସେମାନଙ୍କ ଉପରେ ଅର୍ଥଦଣ୍ଡ ବ୍ୟବସ୍ଥା ହେବା ଦରକାର । ବ୍ୟକ୍ତି ଓ ସଂଗଠନ ଯେଉଁମାନେ ଆତଙ୍କବାଦମାନଙ୍କୁ ଅନୁକମ୍ପା ପ୍ରଦର୍ଶନ କରୁଛନ୍ତି ସେମାନଙ୍କୁ ଏକଘରିଆ କରିବା ଆବଶ୍ୟକ । ଏଭଳି ବିଷୟର ମୁକାବିଲା ନେଇ କୌଣସି ଯଦିବା କିନ୍ତୁର ସ୍ଥାନ ନାହିଁ । ଆତଙ୍କବାଦକୁ ଦିଆଯାଉଥିବା ସମସ୍ତ ପ୍ରକାଶ୍ୟ ଓ ଛଦ୍ମ ସମର୍ଥନ ବିରୁଦ୍ଧରେ ସମଗ୍ର ବିଶ୍ୱ ଏକାଠି ହେବା ଦରକାର” ବୋଲି ସେ କହିଥିଲେ ।

ପ୍ରଧାନମନ୍ତ୍ରୀ କହିଥିଲେ ଯେ “ସଂଗଠିତ ଅପରାଧ ମଧ୍ୟ ଏକପ୍ରକାର ଆତଙ୍କ ଖର୍ଚ୍ଚର ଏକ ଉତ୍ସ ଓ  ଅପରାଧିକ ସଂଗଠନ ଓ ଆତଙ୍କବାଦ ଗୋଷ୍ଠୀ ମଧ୍ୟରେ ନିବିଡ ସମ୍ପର୍କ ରହିଛି । ସଂଗଠିତ ଅପରାଧ ବିରୁଦ୍ଧରେ କାର୍ଯ୍ୟାନୁଷ୍ଠାନ ଆତଙ୍କବାଦ ବିରୁଦ୍ଧରେ ସଂଗ୍ରାମ ପାଇଁ ଗୁରୁତ୍ୱପୂର୍ଣ୍ଣ । ବେଳେ ବେଳେ ଆର୍ଥିକ ଅନିୟମିତତା ଓ ଆର୍ଥିକ ଅପରାଧ ମଧ୍ୟ ଆତଙ୍କବାଦୀ କାର୍ଯ୍ୟକଳାପ ନିମନ୍ତେ ପାଣ୍ଠି ଯୋଗାଇବା । ଏହା ବିରୁଦ୍ଧରେ ସଂଗ୍ରାମ ନିମନ୍ତେ ବୈଶ୍ୱିକ ସହଯୋଗ” ଆବଶ୍ୟକ ବୋଲି ସେ କହିଥିଲେ ।

ଜଟିଳ ବାତାବରଣ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଜାତିସଂଘ ସୁରକ୍ଷା ପରିଷଦ, ଆର୍ଥିକ କାର୍ଯ୍ୟାନୁଷ୍ଠାନ ଟାସ୍କଫୋର୍ସ, ଆର୍ଥିକ ଗୁଇନ୍ଦା ବିଭାଗ ଓ ଏଗମଣ୍ଟ ଗ୍ରୁପ ବେଆଇନ ପାଣ୍ଠି ପ୍ରବାହର ଚିହ୍ନଟ, ନିରାକରଣ ଓ ଆଇନଗତ କାର୍ଯ୍ୟାନୁଷ୍ଠାନ ଉପରେ ମିଳିତ ଭାବେ ଉଦ୍ୟମ କରି ଆସୁଛନ୍ତି । ଗତ ଦୁଇ ଦଶନ୍ଧି ଧରି ଏହି ବ୍ୟବସ୍ଥା ଆତଙ୍କ ବିରୁଦ୍ଧରେ ଯୁଦ୍ଧ ଜାରି ରଖିଛି । ଏଥିପାଇଁ ଆତଙ୍କବାଦ ପାଇଁ ପାଣ୍ଠି ଯୋଗାଣର ବିପଦ ସମ୍ପର୍କରେ ମଧ୍ୟ ତଥ୍ୟ ଲୋକଲୋଚନକୁ ଆସିପାରୁଛି ବୋଲି ସେ କହିଥିଲେ ।

ପ୍ରଯୁକ୍ତି ବିଦ୍ୟାର ବିକାଶ ସହ ଆତଙ୍କବାଦର ଗତିପଥ ପରିବର୍ତ୍ତନ ଉପରେ ମନ୍ତବ୍ୟ ରଖି ପ୍ରଧାନମନ୍ତ୍ରୀ କହିଥିଲେ ଯେ “ଆତଙ୍କବାଦକୁ ପାଣ୍ଠି ଯୋଗାଣ ଓ ଏଥିରେ ଆତଙ୍କବାଦୀଙ୍କୁ ଭର୍ତ୍ତି କରିବା ପାଇଁ ନୂତନ ବୈଷୟିକ ଜ୍ଞାନର ଉପଯୋଗ ହେଉଛି । ଡାର୍କ ନେଟ, ଘରୋଇ ମୁଦ୍ରା ଭଳି ଆହ୍ୱାନଗୁଡିକ ସମ୍ମୁଖକୁ ଆସୁଛି । ତେଣୁ ନୂତନ ବୈଷୟିକ ଜ୍ଞାନ ଆଧାରିତ ପାଣ୍ଠି ଯୋଗାଣ ନେଇ ଏକ ପ୍ରକାର ବୁଝାମଣାର ଆବଶ୍ୟକତା ରହିଛି । ଏ ଦିଗରେ ଘରୋଇ କ୍ଷେତ୍ରରେ ଉପଯୋଗ ମଧ୍ୟ ଆବଶ୍ୟକ ।”

ବ୍ୟକ୍ତିଗତ ବା ଆଭାସୀ ସହଯୋଗ ଉପରେ ଗୁରୁତ୍ୱଆରୋପ କରି ପ୍ରଧାନମନ୍ତ୍ରୀ କହିଥିଲେ ଯେ  ସାଇବର ଆତଙ୍କବାଦ ଓ ଅନଲାଇନ ଉଗ୍ରବାଦ ପାଇଁ ବ୍ୟବହୃତ ଭିତ୍ତିଭୂମିର ପରିବଣ୍ଟନ ହେଉଥିବାବେଳେ କେତେକ ଗୋଷ୍ଠୀ ଆତଙ୍କବାଦୀମାନଙ୍କୁ ଅଗମ୍ୟ ଅଞ୍ଚଳରୁ ଅସ୍ତ୍ରଶସ୍ତ୍ର ଓ ଅନ୍‌ଲାଇନ ସମ୍ବଳ ଜରିଆରେ ତାଲିମ ଦେଉଛନ୍ତି ।

“ଯୋଗାଯୋଗ, ଯାତ୍ରା, ରଣନୀତି ଭଳି ଅନେକ ସଂଯୋଗ ବ୍ୟକ୍ତି ବିଭିନ୍ନ ଦେଶରେ ରହିଛି ।” ନିଜ ଅକ୍ତିଆରେ ଥିବା ଏହି ସବୁ ବ୍ୟବସ୍ଥା ଉପରେ କାର୍ଯ୍ୟାନୁଷ୍ଠାନ ନେବାକୁ ପ୍ରଧାନମନ୍ତ୍ରୀ ପ୍ରତ୍ୟେକ ଦେଶକୁ ଅନୁରୋଧ କରିଥିଲେ।

ପ୍ରଧାନମନ୍ତ୍ରୀ ସତର୍କ କରାଇ କହିଥିଲେ ଯେ ଆତଙ୍କବାଦୀମାନେ ବିଭିନ୍ନ ଦେଶର ଆଇନଗତ ନିୟମ, ପଦ୍ଧତି ଇତ୍ୟାଦିର ଦୂରୁପଯୋଗ କରିବାକୁ ଅନୁମତି ଦେବା ଅନୁଚିତ । ସରକାରୀ ବ୍ୟବସ୍ଥା ମଧ୍ୟରେ ଉତ୍ତମ ସହଯୋଗ ବଳରେ ଏହା ଦୂରୀକରଣ କରିହେବ । ମିଳିତ କାର୍ଯ୍ୟାନୁଷ୍ଠାନ, ଗୁଇନ୍ଦା ସହଯୋଗ ଓ ଦେଶାନ୍ତର ଇତ୍ୟାଦି ଆତଙ୍କ ବିରୁଦ୍ଧରେ ସଂଗ୍ରାମରେ ସହାୟକ ହେବ” ବୋଲି ପ୍ରଧାନମନ୍ତ୍ରୀ ପ୍ରସ୍ତାବ ଦେଇଥିଲେ । ଆତଙ୍କବାଦ ଓ ଉଗ୍ରବାଦ ସମସ୍ୟାର ମିଳିତ କାର୍ଯ୍ୟାନୁଷ୍ଠାନର ଆବଶ୍ୟକତା ରହିଛି ବୋଲି ସେ କହିଥିଲେ । ‘ଉଗ୍ରବାଦକୁ ସମର୍ଥନ କରୁଥିବା କୌଣସି ବ୍ୟକ୍ତିର ଦେଶରେ ସ୍ଥାନ ନାହିଁ ବୋଲି ସେ କହିଥିଲେ ।

ନିକଟରେ ଭାରତ ଆତଙ୍କବାଦ ବିରୁଦ୍ଧରେ ସଂଗ୍ରାମ ନିମନ୍ତେ ଆନ୍ତର୍ଜାତିକ ସହଯୋଗ ନେଇ କରୁଥିବା ଉଦ୍ୟମ ଉପରେ ଜୋର ଦେଇ ପ୍ରଧାନମନ୍ତ୍ରୀ ତାଙ୍କ ବ୍ୟକ୍ତବ୍ୟ ସମାପନ କରିଥିଲେ । ସୁରକ୍ଷାର ବିଭିନ୍ନ ଦିଗ ସମ୍ପର୍କରେ ଆୟୋଜିତ ବିଭିନ୍ନ ସମ୍ମିଳନୀ ନେଇ ପ୍ରଧାନମନ୍ତ୍ରୀ ନୂଆଦିଲ୍ଲୀରେ ଇଣ୍ଟରପୋଲ ସାଧାରଣ ଅଧିବେଶନ, ଜାତିସଂଘ ସୁରକ୍ଷା ପରିଷଦର ଆତଙ୍କବାଦ ନିରୋଧୀ କମିଟିର ମୁମ୍ବାଇ ସ୍ୱତନ୍ତ୍ର ଅଧିବେଶନ ସମ୍ପର୍କରେ ସୂଚନା ଦେଇଥିଲେ । ଏହାଛଡା ସେ ମଧ୍ୟ ‘ନୋ ମନି ଫର ଟେରର” ସମ୍ମିଳନୀ ଜରିଆରେ ଆତଙ୍କବାଦ ପାଇଁ ପାଣ୍ଠି ଯୋଗାଣ ବିରୁଦ୍ଧରେ ସଚେତନତା ସୃଷ୍ଟି କରାଯାଉଥିବା ପ୍ରକାଶ କରିଥିଲେ ।

କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ ଶ୍ରୀ ଅମିତ ଶାହ, ସ୍ୱରାଷ୍ଟ୍ର ରାଷ୍ଟ୍ରମନ୍ତ୍ରୀ ଶ୍ରୀ ନିତ୍ୟାନନ୍ଦ ରାଏ, ସ୍ୱରାଷ୍ଟ୍ର ସଚିବ ଶ୍ରୀ ଅଜୟ କୁମାର ଭାଲ୍ଲା ଓ ଜାତୀୟ ତଦନ୍ତ ସଂସ୍ଥା ମହାନିର୍ଦ୍ଦେଶକ ଶ୍ରୀ ଦିନକର ଗୁପ୍ତା ଏହି ଅବସରରେ ଉପସ୍ଥିତ ଥିଲେ ।

ପୃଷ୍ଠଭୂମି –୧୮, ୧୯ ନଭେମ୍ବର ଦୁଇଦିନ ଧରି ଆୟୋଜିତ ସମ୍ମିଳନୀରେ ବିଭିନ୍ନ ଅଂଶଗ୍ରହଣକାରୀ ଦେଶ ଓ ସଂଗଠନକୁ ବିଭିନ୍ନ ପ୍ରସଙ୍ଗରେ ଆଲୋଚନା ପାଇଁ ବିଶେଷକରି ଆତଙ୍କବାଦୀମାନଙ୍କୁ ପାଣ୍ଠି ଯୋଗାଣ ସମସ୍ୟାର ମୁକାବିଲା ନିମନ୍ତେ ବର୍ତ୍ତମାନର ଆନ୍ତର୍ଜାତୀୟ ବ୍ୟବସ୍ଥା ଉପରେ ବିଚାରବିମର୍ଶ ଓ ଅନ୍ୟାନ୍ୟ ସମସ୍ୟାର ମୁକାବିଲା ଦିଗରେ ଆବଶ୍ୟକ ପଦକ୍ଷେପ ନେଇ ସମ୍ମିଳନୀରେ ଆଲୋଚନା ହେଉଛି । ପୂର୍ବରୁ ୨୦୧୮ ଏପ୍ରିଲରେ ପ୍ୟାରିସ ଏବଂ ୨୦୧୯ ନଭେମ୍ବରର  ମେଲବୋର୍ଣ୍ଣଠାରେ ଏହି ସମ୍ମିଳନୀରେ ପ୍ରଥମ ଦୁଇଟି ସଂସ୍କରଣ ଅନୁଷ୍ଠିତ ହୋଇଥିଲା । ଏଥିରେ ହୋଇଥିବା ଆଲୋଚନା ଆଗକୁ ବଢାଇବା ତଥା ପରବର୍ତ୍ତୀ ପଦକ୍ଷେପ ନିମନ୍ତେ ଯୋଜନା ପ୍ରସ୍ତୁତ କରିବା ନେଇ ବିଚାର ବିମର୍ଶ କରାଯିବ । ସମ୍ମିଳନୀରେ ବିଭିନ୍ନ ଦେଶର ମନ୍ତ୍ରୀ, ବହୁ ରାଷ୍ଟ୍ରୀୟ ସଂଗଠନର ସଦସ୍ୟ ଓ ଆର୍ଥିକ କାର୍ଯ୍ୟାନୁଷ୍ଠାନ ଟାସ୍କଫୋର୍ସ ସମେତ ବିଶ୍ୱରୁ ୪୫୦ ପ୍ରତିନିଧି ଅଂଶଗ୍ରହଣ କରୁଛନ୍ତି ।

ସମ୍ମିଳନୀରେ ମୁଖ୍ୟତଃ ଚାରିଟି ଅଧିବେଶନ ରହିଛି । ସେଗୁଡିକ ମଧ୍ୟରେ ଆତଙ୍କବାଦ ଓ ଆତଙ୍କବାଦକୁ ପାଣ୍ଠି ଯୋଗାଣର ବୈଶ୍ୱିକ ସ୍ଥିତି, ଆତଙ୍କବାଦୀଙ୍କୁ ଆର୍ଥିକ ସହାୟତାର ଆନୁଷ୍ଠାନିକ ଓ ଅଣଆନୁଷ୍ଠାନିକ ପଦ୍ଧତିର ଉପଯୋଗ, ନୂତନ ବୈଷୟିକ ଜ୍ଞାନ ଓ ଆତଙ୍କବାଦକୁ ଆର୍ଥିକ ସହାୟତା ଓ ଏଥିପାଇଁ ପାଣ୍ଠି ଯୋଗାଣ ବନ୍ଦ କରିବା ସମସ୍ୟାର ମୁକାବିଲା ନେଇ ଆନ୍ତର୍ଜାତୀୟ ସହଯୋଗ ଅର୍ନ୍ତଭୁକ୍ତ ।

ନୂଆଦିଲ୍ଲୀ: ବାଲିଠାରେ ଚାଲିଥିବା ଜି-୨୦ ଶିଖର ସମ୍ମିଳନୀ କାଳରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଯୁକ୍ତରାଷ୍ଟ୍ର ଆମେରିକାର ରାଷ୍ଟ୍ରପତି ଯୋଶେଫ ଆର ବାଇଡେନଙ୍କୁ ସାକ୍ଷାତ କରିଛନ୍ତି। ସେମାନେ ଭାରତ-ଯୁକ୍ତରାଷ୍ଟ୍ର ରଣନୈତିକ ଭାଗିଦାରୀ ତଥା ନୂତନ ପ୍ରଯୁକ୍ତିବିଦ୍ୟା, ଆଧୁନିକ କମ୍ପ୍ୟୁଟିଙ୍ଗ୍ ଓ କୃତ୍ରିମ ମେଧା ଇତ୍ୟାଦି ସମ୍ପର୍କରେ ଆଲୋଚନା କରିଥିଲେ। କ୍ୱାଡ୍, ୧୨ୟୁ୨ ଇତ୍ୟାଦିକୁ କେନ୍ଦ୍ର କରି ଉଭୟ ନେତା ଭାରତ-ଯୁକ୍ତରାଷ୍ଟ୍ର ସମ୍ପର୍କ ନେଇ ସନ୍ତୋଷ ପ୍ରକଟ କରିଥିଲେ।

ଉଭୟ ନେତା ବୈଶ୍ୱିକ ଓ ଆଞ୍ଚଳିକ ବିକାଶ ବିଷୟ ଉପରେ କଥା ହୋଇଥିଲେ। ଭାରତ-ୟୁଏସ ଭାଗିଦାରିତା ନିରବଚ୍ଛିନ୍ନ ସହଯୋଗ ଯୋଗୁଁ ବୃଦ୍ଧି ପାଉଥିବାରୁ ଶ୍ରୀ ମୋଦୀ ରାଷ୍ଟ୍ରପତି ବାଇଡେନଙ୍କୁ ଧନ୍ୟବାଦ ଜ୍ଞାପନ କରିଥିଲେ। ଭାରତର ଜି-୨୦ ଅଧ୍ୟକ୍ଷତା କାଳରେ ଉଭୟ ଦେଶ ଉତ୍ତମ ସମନ୍ୱୟ ରକ୍ଷା କରିବେ ବୋଲି ଶ୍ରୀ ମୋଦୀ ବିଶ୍ୱାସ ପ୍ରକଟ କରିଥିଲେ।