Tag: ନିର୍ମଳା ସୀତାରମଣ

ନୂଆଦିଲ୍ଲୀ: କେନ୍ଦ୍ର ଅର୍ଥ ଓ କର୍ପୋରେଟ୍ ମନ୍ତ୍ରୀ ନିର୍ମଳା ସୀତାରମଣ ଆଜି ସଂସଦରେ ଉପସ୍ଥାପିତ କରିଥିବା ୨୦୨୩-୨୪ ଅର୍ଥନୈତିକ ସର୍ବେକ୍ଷଣରେ ଆଲୋକପାତ କରି କହିଛନ୍ତି ଯେ, ୧୯୬୦ ଦଶକରେ ଦେଶ ଏକ ଖାଦ୍ୟ ନିଅଣ୍ଟ ଏବଂ ଆମଦାନୀକାରୀ ଦେଶ ହେବାଠାରୁ ଆରମ୍ଭ କରି କୃଷି ଜାତ ଦ୍ରବ୍ୟର ନେଟ୍ ରପ୍ତାନିକାରୀ ହେବା ପର୍ଯ୍ୟନ୍ତ ବହୁ ଆଗକୁ ଯାଇଛି।

ମୌଳିକ ଖାଦ୍ୟ ନିରାପତ୍ତାରୁ ପୋଷଣ ନିରାପତ୍ତା ଆଡକୁ ଯିବା ସମୟର ଆବଶ୍ୟକତା ବୋଲି ସର୍ଭେରେ ଦର୍ଶାଯାଇଛି। ସର୍ବେକ୍ଷଣରେ ଆହୁରି କୁହାଯାଇଛି ଯେ, ଆମକୁ ଅଧିକ ଡାଲି, ବାଜରା, ଫଳ ଏବଂ ପନିପରିବା, କ୍ଷୀର, ମାଂସ ଆବଶ୍ୟକ ଏବଂ ସେମାନଙ୍କର ଚାହିଦା ମୌଳିକ ଖାଦ୍ୟ ତୁଳନାରେ ଦ୍ରୁତ ଗତିରେ ବୃଦ୍ଧି ପାଉଛି । ତେଣୁ କୃଷି କ୍ଷେତ୍ରର ନୀତିଗୁଡ଼ିକ ‘ଚାହିଦା ଭିତ୍ତିକ ଖାଦ୍ୟ ବ୍ୟବସ୍ଥା’ ସହିତ ଅଧିକ ସମନ୍ୱିତ ହେବା ଉଚିତ, ଯାହା ଅଧିକ ପୁଷ୍ଟିକର ଏବଂ ପ୍ରକୃତିର ସମ୍ବଳ ସଂରକ୍ଷଣ ସହିତ ସଂଯୁକ୍ତ ହେବା ଉଚିତ ବୋଲି ସର୍ଭେରେ ପରାମର୍ଶ ଦିଆଯାଇଛି।

ଅର୍ଥନୈତିକ ସର୍ବେକ୍ଷଣରେ ପାଞ୍ଚଟି ନୀତିଗତ ସୁପାରିଶ ଦିଆଯାଇଛି, ଯାହା ସରକାରମାନେ କୃଷକଙ୍କ ହିତରେ ବଜାରକୁ ସଂଚାଳନ କରିବା ପାଇଁ ଆପଣାଇ ପାରିବେ। ପ୍ରଥମ ପଦକ୍ଷେପରେ ଦର ବୃଦ୍ଧିର ପ୍ରଥମ ସଙ୍କେତ ମିଳିଲେ ଭବିଷ୍ୟତ କିମ୍ବା ବିକଳ୍ପ ଉପରେ ପ୍ରତିବନ୍ଧ ନ ଲଗାଇବାକୁ କୁହାଯାଇଛି। ଏଭଳି ବଜାରର ବୁଦ୍ଧିମାନ ନିୟାମକ ଡିଜାଇନ କୃଷିଜାତ ଦ୍ରବ୍ୟର ଭବିଷ୍ୟତ ବଜାର ଉପରେ ପ୍ରଶାସନିକ ହସ୍ତକ୍ଷେପର ଆବଶ୍ୟକତାକୁ କମାଇପାରିବ ବୋଲି ଏହି ସର୍ବେକ୍ଷଣରେ କୁହାଯାଇଛି।

ସର୍ବେକ୍ଷଣର ଦ୍ବିତୀୟ ସୁପାରିସରେ କେବଳ ବ୍ୟତିକ୍ରମିକ ପରିସ୍ଥିତିରେ ରପ୍ତାନି ନିଷେଧାଦେଶ ଲାଗୁ କରିବା ଏବଂ ଘରୋଇ ଉପଭୋକ୍ତାଙ୍କୁ ବିକଳ୍ପ କରିବାକୁ ଅନୁମତି ଦେବା ବିଷୟରେ କୁହାଯାଇଛି, ବିଶେଷକରି ଯଦି ସମ୍ପୃକ୍ତ କୃଷି ଜାତ ଦ୍ରବ୍ୟ ଖାଦ୍ୟଶସ୍ୟ ପରି ଅତ୍ୟାବଶ୍ୟକ ଉପଭୋକ୍ତା ସାମଗ୍ରୀ ନୁହେଁ। ଆନ୍ତର୍ଜାତିକ ବଜାରରେ ଅଧିକ ଦର ରୁ କୃଷକମାନେ ଲାଭବାନ ହୋଇପାରିବେ ବୋଲି ସର୍ଭେରେ ଦର୍ଶାଯାଇଛି।

ତୃତୀୟ ପଦକ୍ଷେପ ଭାବେ ଏହି ସର୍ଭେରେ ମୁଦ୍ରାସ୍ଫୀତି ଟାର୍ଗେଟିଂ ଫ୍ରେମୱାର୍କକୁ ପୁନଃ ଯାଞ୍ଚ କରିବାକୁ କୁହାଯାଇଛି। ଏଥିରେ କୁହାଯାଇଛି ଯେ ଭାରତର ମୁଦ୍ରାସ୍ଫୀତି ଟାର୍ଗେଟିଂ ଫ୍ରେମୱାର୍କ ଖାଦ୍ୟକୁ ବାଦ୍ ଦେଇ ମୁଦ୍ରାସ୍ଫୀତିକୁ ଟାର୍ଗେଟ କରିବା ଉପରେ ବିଚାର କରିବା ଉଚିତ। ଅଧିକ ଖାଦ୍ୟ ଦର ଅଧିକାଂଶ ସମୟରେ ଚାହିଦା ଜନିତ ନୁହେଁ ବରଂ ଯୋଗାଣ ଜନିତ ହଇଥାଏ। ଭାରତର ମୁଦ୍ରାସ୍ଫୀତି ଟାର୍ଗେଟ ଫ୍ରେମୱାର୍କ ଖାଦ୍ୟବ୍ୟତୀତ ମୁଦ୍ରାସ୍ଫୀତି ହାରକୁ ଟାର୍ଗେଟ କରିବା ଉଚିତ କି ନାହିଁ ତାହା ଅନୁସନ୍ଧାନ କରିବା ଉଚିତ” ବୋଲି ସର୍ଭେରେ ଉଲ୍ଲେଖ କରାଯାଇଛି।

ସର୍ଭେରେ ଆହୁରି ଉଲ୍ଲେଖ କରାଯାଇଛି ଯେ ଗରିବ ଏବଂ ନିମ୍ନ ଆୟକାରୀ ଉପଭୋକ୍ତାଙ୍କ ପାଇଁ ଖାଦ୍ୟ ମୂଲ୍ୟ ବୃଦ୍ଧି ଯୋଗୁଁ ସୃଷ୍ଟି ହେଉଥିବା ଅସୁବିଧାକୁ ଉପଯୁକ୍ତ ଅବଧି ପାଇଁ ବୈଧ ନିର୍ଦ୍ଦିଷ୍ଟ କ୍ରୟ ପାଇଁ ପ୍ରତ୍ୟକ୍ଷ ଲାଭ ସ୍ଥାନାନ୍ତର କିମ୍ବା କୁପନ୍ ମାଧ୍ୟମରେ ପରିଚାଳନା କରାଯାଇପାରିବ।

ଚତୁର୍ଥ ସୁପାରିସରେ ମୋଟ ନେଟ୍ ଜଳସେଚିତ ଅଞ୍ଚଳକୁ ବୃଦ୍ଧି କରିବାର ଆବଶ୍ୟକତା ବିଷୟରେ କୁହାଯାଇଛି। ଅନେକ ରାଜ୍ୟ ଜାତୀୟ ହାରାହାରି ଠାରୁ ବହୁତ କମ୍ ଏବଂ ଭୂପୃଷ୍ଠ ଜଳ ପାଇଁ ଭାରତର ଜଳସେଚନ ଦକ୍ଷତା ମାତ୍ର ୩୦-୪୦ ପ୍ରତିଶତ ଏବଂ ଭୂତଳ ଜଳ ପାଇଁ ୫୦-୬୦ ପ୍ରତିଶତ ବୋଲି ସର୍ଭେରେ ଦର୍ଶାଯାଇଛି। ଏହି ସର୍ବେକ୍ଷଣରେ ଉନ୍ନତ ଜଳ ବ୍ୟବହାର କୃଷି ପଦ୍ଧତି ଏବଂ ଡ୍ରିପ୍ ଏବଂ ଫର୍ଟିଗେସନ୍ ଭଳି ଜ୍ଞାନକୌଶଳର ଆବଶ୍ୟକତା ଉପରେ ଆଲୋକପାତ କରାଯାଇଛି।

ଏହି ସର୍ବେକ୍ଷଣର ପଞ୍ଚମ ଏବଂ ଅନ୍ତିମ ପରାମର୍ଶ ହେଉଛି ଚାଷକୁ ଜଳବାୟୁ ଦୃଷ୍ଟିକୋଣ ସହିତ ସୁସଙ୍ଗତ କରିବା। ଧାନ ଓ ଆଖୁ ଭଳି ଶସ୍ୟ ଜଳ ପ୍ରବାହିତ ଫସଲ ଏବଂ ଧାନ ଚାଷ କଲେ ମିଥେନ୍ ନିର୍ଗମନ ହୋଇଥାଏ। ଫସଲ ନିରପେକ୍ଷ ପ୍ରୋତ୍ସାହନ ଢାଞ୍ଚାକୁ ପ୍ରୋତ୍ସାହିତ କରିବାର ସମୟ ଆସିଛି ବୋଲି ସର୍ଭେରେ କୁହାଯାଇଛି।

ଏକବିଂଶ ଶତାବ୍ଦୀର ତିନୋଟି ବଡ଼ ଆହ୍ୱାନର ସଙ୍ଗମରେ କୃଷି ରହିଛି- ଖାଦ୍ୟ ଓ ପୋଷଣ ନିରାପତ୍ତା ବଜାୟ ରଖିବା, ଜଳବାୟୁ ପରିବର୍ତ୍ତନର ଅନୁକୂଳତା ଏବଂ ପ୍ରଶମନ ତଥା ଜଳ, ଶକ୍ତି ଏବଂ ଜମି ଭଳି ଗୁରୁତ୍ୱପୂର୍ଣ୍ଣ ସମ୍ବଳର ସ୍ଥାୟୀ ବ୍ୟବହାର। ସର୍ବେକ୍ଷଣରେ ଦର୍ଶାଯାଇଛି ଯେ ଯଦିଓ କୃଷି ଏବଂ ଆନୁଷଙ୍ଗିକ କ୍ଷେତ୍ରରେ ଲାଭଦାୟକ ନିଯୁକ୍ତିର ଯଥେଷ୍ଟ  ସମ୍ଭାବନା ରହିଛି, ତଥାପି ଭାରତ ଅର୍ଥନୈତିକ ଅଭିବୃଦ୍ଧି ଏବଂ ନିଯୁକ୍ତି ସୃଷ୍ଟିରେ ଯୋଗଦାନ କରିବା ପାଇଁ କୃଷିର ସମ୍ଭାବନାକୁ ସମ୍ପୂର୍ଣ୍ଣ ଉପଯୋଗ କରିପାରିନାହିଁ।

ଜଳ ଅଭାବ ଏବଂ ଜଳବାୟୁ ପରିବର୍ତ୍ତନ ଯୋଗୁଁ ସୃଷ୍ଟି ହୋଇଥିବା ଆହ୍ୱାନ ଯୋଗୁଁ କୃଷି କ୍ଷେତ୍ରରେ ଏକ ଗମ୍ଭୀର ଢାଞ୍ଚାଗତ ପରିବର୍ତ୍ତନର ଆବଶ୍ୟକତା ରହିଛି ବୋଲି ସର୍ଭେରେ କୁହାଯାଇଛ। ବିପରୀତ ସ୍ଥାନାନ୍ତର କାରଣରୁ କୋଭିଡ୍ ବର୍ଷଗୁଡ଼ିକରେ କୃଷି ନିଯୁକ୍ତିରେ ବୃଦ୍ଧି, ଆର୍ଥିକ ବର୍ଷ ୨୪ରେ କୃଷିକ୍ଷେତ୍ରରେ ମୂଲ୍ୟ ବୃଦ୍ଧି ହାର ହ୍ରାସ ଏବଂ ୨୦୨୪ ଗ୍ରୀଷ୍ମଋତୁରେ ଦେଶର ଉତ୍ତର-ପଶ୍ଚିମ ଏବଂ କେନ୍ଦ୍ରୀୟ ଅଞ୍ଚଳରେ ଅତ୍ୟଧିକ ଗରମ ଗ୍ରୀଷ୍ମ ପ୍ରବାହ ଯୋଗୁଁ ଜଳ ଚାପ ଏବଂ ଶକ୍ତି ବ୍ୟବହାର ବୃଦ୍ଧି ଭାରତର କୃଷି କ୍ଷେତ୍ର ନୀତିଗୁଡ଼ିକର ଗମ୍ଭୀର ଏବଂ ଉତ୍ତମ ସମୀକ୍ଷା ଜରୁରୀ ହୋଇପଡ଼ିଛି ବୋଲି ସର୍ବେକ୍ଷଣରେ ଦର୍ଶା ଯାଇଛି।

ନୂଆଦିଲ୍ଲୀ: ସାମ୍ପ୍ରତିକ ବର୍ଷ ଗୁଡ଼ିକରେ ଭାରତର ସାମାଜିକ ଏବଂ ସଂସ୍ଥାଗତ ପ୍ରଗତି କଲ୍ୟାଣର ସଶକ୍ତ ଆଭିମୁଖ୍ୟ ମାଧ୍ୟମରେ ହାସଲ ହୋଇଛି, କାରଣ ନୂତନ ଆଭିମୁଖ୍ୟ ସରକାରୀ କାର୍ଯ୍ୟକ୍ରମ ଗୁଡ଼ିକର କାର୍ଯ୍ୟକାରିତା ଏବଂ ଖର୍ଚ୍ଚ ଫଳପ୍ରଦତାକୁ ପରିବର୍ତ୍ତନ କରିବା ଉପରେ ଗୁରୁତ୍ୱ ଦେଉଛି।

ଅଟଳ ପେନସନ ଯୋଜନା (ଏପିୱାଇ) ଭଳି ଯୋଜନା ମାଧ୍ୟମରେ ଅଣସଂଗଠିତ କ୍ଷେତ୍ରର ଶ୍ରମିକମାନଙ୍କ ପାଇଁ ଶେଷ ମାଇଲ ସେବା ଯୋଗାଣ ଏବଂ ସୁଲଭ ସାମାଜିକ ସୁରକ୍ଷା ଯୋଜନା ପାଇଁ ସଂସ୍କାର କାର୍ଯ୍ୟକାରୀ କରିବାକୁ ଲକ୍ଷ୍ୟ ରଖାଯାଇଛି। ଆଜି ସଂସଦରେ କେନ୍ଦ୍ର ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରୀ ନିର୍ମଳା ସୀତାରମଣଙ୍କ ଦ୍ୱାରା ଉପସ୍ଥାପିତ ଅର୍ଥନୈତିକ ସର୍ବେକ୍ଷଣ ୨୦୨୩ – ୨୪ରେ ଏହା ଉଲ୍ଲେଖ କରାଯାଇଛି।

ବହୁମୁଖୀ ଦାରିଦ୍ର‌୍ୟ ହ୍ରାସ

ସାମାଜିକ ସେବା ଉପରେ ଖର୍ଚ୍ଚ ପରିମାଶ ୨୦୧୭ – ୧୮ରେ ଜିଡିପିର ୬.୭% ଥିବାବେଳେ ୨୦୨୩ -୨୪ରେ ଏହା ଜିଡିପିର ୭.୮%କୁ ବୃଦ୍ଧି ପାଇଛି। କାର୍ଯ୍ୟକ୍ରମର ଉନ୍ନତ କାର୍ଯ୍ୟକାରିତା ସହିତ ବର୍ଦ୍ଧିତ ଅର୍ଥନୈତିକ ଗୁରୁତ୍ୱ ଯୋଗୁଁ ବହୁମୁଖୀ ଦାରିଦ୍ର‌୍ୟ ଦ୍ରୁତ ଗତିରେ ହ୍ରାସ ପାଇଛି ଏବଂ (ଜାତୀୟ) ବହୁମୁଖୀ ଦାରିଦ୍ର‌୍ୟ ସୂଚକାଙ୍କ (ଏମପିଆଇ) ୨୦୧୫ – ୧୬ରେ ୦.୧୧୭ ଥିବା ବେଳେ ୨୦୧୯ – ୨୧ରେ ଏହା ୦.୦୬୬ କୁ ହ୍ରାସ ପାଇଛି। ୨୦୧୫ – ୧୬ ରୁ ୨୦୧୯ – ୨୧ ମଧ୍ୟରେ ୧୩.୫ କୋଟି ଭାରତୀୟ ବହୁମୁଖୀ ଦାରିଦ୍ର‌୍ୟରୁ ମୁକ୍ତି ପାଇଛନ୍ତି ବୋଲି ଅର୍ଥନୈତିକ ସର୍ବେକ୍ଷଣ ୨୦୨୩  -୨୪ରେ କୁହାଯାଇଛି।

ଏହି ଧାରା ଗ୍ରାମୀଣ ଭାରତରୁ ପ୍ରେରିତ, ଯେଉଁଥିରେ ବିହାର, ମଧ୍ୟପ୍ରଦେଶ, ଉତ୍ତରପ୍ରଦେଶ, ଓଡ଼ିଶା ଏବଂ ରାଜସ୍ଥାନ ଭଳି ରାଜ୍ୟରେ ସବୁଠାରୁ ମହତ୍ତ୍ୱପୂର୍ଣ୍ଣ ସୁଧାର ଘଟିଛି। ୨୦୧୫ – ୧୬ରୁ ୨୦୧୯ -୨୧ ମଧ୍ୟରେ ଉତ୍ତରପ୍ରଦେଶରେ ଗରିବ ଲୋକଙ୍କ ସଂଖ୍ୟାରେ ସର୍ବାଧିକ ହ୍ରାସ ଘଟିଛି ଏବଂ ୩.୪୩ କୋଟି ଲୋକ ବହୁମୁଖୀ ଦାରିଦ୍ର‌୍ୟରୁ ମୁକ୍ତି ପାଇଛନ୍ତି।

ଗ୍ରାମୀଣ – ସହରାଞ୍ଚଳ ବିଭାଜନରେ ଅସମାନତା ହ୍ରାସ ହୋଇଛି  ଓ ବିଭାଜନ କମିଛି

ଅର୍ଥନୈତିକ ସର୍ବେକ୍ଷଣରେ ଏହା ମଧ୍ୟ ଦର୍ଶାଯାଇଛି ଯେ ସାମାଜିକ କ୍ଷେତ୍ରରେ ବିଭିନ୍ନ ପଦକ୍ଷେପର ପରିଣାମ ସ୍ୱରୂପ ଅସମାନତା ହ୍ରାସ ହୋଇଛି। ଗତ ଦଶନ୍ଧିରେ ଗ୍ରାମୀଣ କ୍ଷେତ୍ର ପାଇଁ ଗିନି ଗୁଣାଙ୍କ (ଗିନି କୋଏଫିସିଏଂଟ) ୦.୨୮୩ ରୁ ୦.୨୬୬ ହ୍ରାସ ପାଇଛି ଏବଂ ସହରାଞ୍ଚଳ କ୍ଷେତ୍ର ପାଇଁ ୦.୩୬୩ ରୁ ୦.୩୧୪ ହୋଇଯାଇଛି।

ସେହିପରି ଗ୍ରାମୀଣ – ସହରାଞ୍ଚଳ ବିଭାଜନରେ ମଧ୍ୟ ବହୁତ ହ୍ରାସ ଦେଖାଦେଇଛି, କାରଣ ଗ୍ରାମୀଣ ଓ ସହରାଞ୍ଚଳ ମାସିକ ମୁଣ୍ଡପିଛା ବ୍ୟବହାର ବ୍ୟୟ (ଏମପିସିଇ) ମଧ୍ୟରେ ଥିବା ପାର୍ଥକ୍ୟ ୨୦୧୧ – ୧୨ରେ ୮୩.୯% ଥିବାବେଳେ ୨୦୨୨ – ୨୩ରେ ଏହା ୭୧.୨% କୁ ହ୍ରାସ ପାଇଛି।

ଏହି ସମୀକ୍ଷା ରିପୋର୍ଟରେ କୁହାଯାଇଛି ଯେ ନବୀନତମ ଏନଏସଏ ଅନୁମାନ (ଆର୍ଥିକ ବର୍ଷ ୨୦୨୦ ନିମନ୍ତେ)ରେ ମୋଟ ଜିଡିପିରେ ସରକାରୀ ସ୍ୱାସ୍ଥ୍ୟ ବ୍ୟୟ (ଜିଏଚଇ)ର ଭାଗ ସହିତ ମୋଟ ସ୍ୱାସ୍ଥ୍ୟ ବ୍ୟୟ ସଚଏିଇର ଭାଗରେ ବୃଦ୍ଧି ସୂଚୀତ ହୋଇଛି।

ଏହା ବ୍ୟତୀତ ସମୀକ୍ଷାରେ ଆହୁରି ଦର୍ଶାଯାଇଛି ଯେ ବିଗତ ବର୍ଷମାନଙ୍କରେ ପ୍ରାଥମିକ ସ୍ୱାସ୍ଥ୍ୟ ସେବା ବ୍ୟୟର ଅଂଶ ଆର୍ଥିକ ବର୍ଷ ୨୦୧୫ରେ ଜିଏଚଇର ୫୧.୩ ପ୍ରତିଶତରୁ ବୃଦ୍ଧି ପାଇ ୨୦୨୦ ଆର୍ଥିକ ବର୍ଷରେ ଜିଏଚଇର ୫୫.୯ ପ୍ରତିଶତ ଛୁଇଁଛି। ଜିଏଚଇରେ ପ୍ରାଥମିକ ଏବଂ ମାଧ୍ୟମିକ ସ୍ୱାସ୍ଥ୍ୟସେବା ଅଂଶ ଆର୍ଥିକ ବର୍ଷ ୨୦୧୫ରେ ୭୩.୨ ପ୍ରତିଶତ ଥିବାବେଳେ ତାହା ବୃଦ୍ଧି ପାଇ ୨୦୨୦ ଆର୍ଥିକ ବର୍ଷରେ ୮୫.୫ ପ୍ରତିଶତ ହୋଇଛି। ଅନ୍ୟ ପକ୍ଷରେ  ଘରୋଇ କ୍ଷେତ୍ରରେ ପ୍ରାଥମିକ ଏବଂ ମାଧ୍ୟମିକ ସ୍ୱାସ୍ଥ୍ୟସେବା ଅଂଶ ଏହି ଅବଧିରେ ତୃତୀୟ ପର୍ଯ୍ୟାୟର ରୋଗୀଙ୍କ ଉପରେ ପଡ଼ୁଥିବା ଆର୍ଥିକ ବୋଝ ଏବଂ ପ୍ରାଥମିକ ସ୍ୱାସ୍ଥ୍ୟ ସୁବିଧା ନିମନ୍ତେ ସରକାରୀ ସୁବିଧାଗୁଡ଼ିକର ଉପଯୋଗର କାରଣ ୮୩.୦ ପ୍ରତିଶତରୁ ହ୍ରାସ ପାଇ ୭୩.୭ ପ୍ରତିଶତ ହୋଇଛି।

ଏହି ସମୀକ୍ଷାରୁ ଜଣାପଡ଼ିଛି ଯେ ସ୍ୱାସ୍ଥ୍ୟ ଉପରେ ସାମାଜିକ ସୁରକ୍ଷା ବ୍ୟୟରେ ବିଶେଷ ଭାବରେ ବୃଦ୍ଧି ପରିଲକ୍ଷିତ ହୋଇଛି। ଏହା ଆର୍ଥିକ ବର୍ଷ ୨୦୧୫ରେ ୫.୭ ପ୍ରତିଶତରୁ ବୃଦ୍ଧି ପାଇ ୨୦୨୦ରେ ୯.୩ ପ୍ରତିଶତରେ ପହଞ୍ଚିଛି। ଆର୍ଥିକ ବର୍ଷ ୨୦୧୫ ଏବଂ ଆର୍ଥିକ ବର୍ଷ ୨୦୨୦ ମଧ୍ୟରେ ସାମଗ୍ରିକ ସ୍ୱାସ୍ଥ୍ୟ ବ୍ୟୟ (ଟିଏଚଇ)ର ପ୍ରତିଶତ ରୂପରେ ଆଉଟ୍ ଅଫ୍ ଫୋକସ୍ ବ୍ୟୟ (ଓଓପିଇ)ରେ ହ୍ରାସ ପରିଲକ୍ଷିତ ହୋଇଛି।

ଉପଯୁକ୍ତ ବିକାଶ ସହିତ ପ୍ରମୁଖ ସ୍ୱାସ୍ଥ୍ୟ ସୂଚକାଂକରେ ମଧ୍ୟ ସୁଧାର ଆସିଛି। ୨୦୧୩ ମସିହାରେ ଶିଶୁ ମୃତ୍ୟୁହାର ପ୍ରତି ୧୦୦୦ ଜୀବିତ ପ୍ରସବରେ ୩୯ ଥିଲା ଯାହାକି ହ୍ରାସ ପାଇ ୨୦୨୦ ମସିହାରେ ପ୍ରତି ୧୦୦୦ ଜୀବିତ ପ୍ରସବ କ୍ଷେତ୍ରରେ ୨୮ ହୋଇଛି। ମାତୃମୃତ୍ୟୁ ହାର ୨୦୧୪ ମସିହାରେ ପ୍ରତି ଏକ ଲକ୍ଷ ଜୀବିତ ପ୍ରସବ କ୍ଷେତ୍ରରେ ୧୬୭ ଥିଲା ଏବଂ ତାହା ହ୍ରାସ ପାଇ ୨୦୨୦ ମସିହାରେ ୯୭ ଛୁଇଁଛି।

ଆର୍ଥିକ ସର୍ଭେ ରିପୋର୍ଟରେ ଦୁଇଟି ପ୍ରସଙ୍ଗ ଉପରେ ସୁପାରିଶ କରାଯାଇଛି ଯାହା ନିକଟ ଭବିଷ୍ୟତରେ ଦେଶର ସ୍ୱାସ୍ଥ୍ୟ ଏବଂ ରୋଗ ପ୍ରୋଫାଇଲକୁ ଦେଖି ନିର୍ଣ୍ଣାୟକ ହେବ ବୋଲି ଅନୁମାନ କରାଯାଇଛି। ପ୍ରଥମଟି ହେଲା, ସମୀକ୍ଷାରେ ସରକାର ଏବଂ ସାଧାରଣ ଲୋକଙ୍କୁ ପୌଷ୍ଟିକ ଭୋଜନ ଏବଂ ମାନସିକ ସ୍ୱାସ୍ଥ୍ୟ ଉପରେ ପ୍ରାଥମିକତା ପ୍ରଦାନ କରାଯିବାର ପରାମର୍ଶ ଦିଆଯାଇଛି। ଦ୍ୱିତୀୟରେ, ସାର୍ବଜନୀନ ସ୍ୱାସ୍ଥ୍ୟକୁ ରାଜ୍ୟ ସରକାରଙ୍କ ବିଷୟ ବୋଲି ଦର୍ଶାଯାଇ ସମୀକ୍ଷାରେ ‘ଅତି କମ୍ ବାଧାର ମାର୍ଗ’ ମାଧ୍ୟମରେ ଶେଷତମ ସ୍ଥାନରେ ଥିବା ବ୍ୟକ୍ତି ପର୍ଯ୍ୟନ୍ତ ପହଞ୍ଚାଯିବା ନିମନ୍ତେ ରାଷ୍ଟ୍ରୀୟ କାର୍ଯ୍ୟକ୍ରମକୁ କାର୍ଯ୍ୟାନ୍ୱୟନ ମାଧ୍ୟମରେ ରାଜ୍ୟ ଏବଂ ସ୍ଥାନୀୟ ସ୍ତରର ଶାସନର କେନ୍ଦ୍ରୀୟ ଭୂମିକା ଉପରେ ଗୁରୁତ୍ୱାରୋପ କରାଯାଇଛି।

ନୂଆଦିଲ୍ଲୀ: କେନ୍ଦ୍ର ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରୀ ନିର୍ମଳା ସୀତାରମଣ ଏବଂ କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀଙ୍କ ଉପସ୍ଥିତିରେ ଆଜି ନୂଆଦିଲ୍ଲୀଠାରେ ୨୦୨୪-୨୫ ବଜେଟ୍ ପ୍ରସ୍ତୁତି ପ୍ରକ୍ରିୟାର ଚୂଡ଼ାନ୍ତ ପର୍ଯ୍ୟାୟରେ ହଲୱା ସମାରୋହ ଅନୁଷ୍ଠିତ ହୋଇଛି।

ବଜେଟ୍ ପ୍ରସ୍ତୁତିରେ ନିୟୋଜିତ ଅଧିକାରୀଙ୍କ ‘ଲକ୍-ଇନ୍’ ପ୍ରକ୍ରିୟା ଆରମ୍ଭ ହେବା ପୂର୍ବରୁ ପ୍ରତିବର୍ଷ ଏକ ପାରମ୍ପରିକ ହଲୱା ସମାରୋହ ଅନୁଷ୍ଠିତ ହୋଇଥାଏ। ୨୦୨୪-୨୫ ଆର୍ଥିକ ବର୍ଷପାଇଁ କେନ୍ଦ୍ରୀୟ ବଜେଟ୍ ୨୦୨୪ ଜୁଲାଇ ୨୩ ତାରିଖରେ ଉପସ୍ଥାପିତ ହେବ।

ଡିଜିଟାଲ ସୁବିଧାର ସରଳ ରୂପ ବ୍ୟବହାର କରି ସଂସଦ ସଦସ୍ୟ (ସାଂସଦ) ଏବଂ ସାଧାରଣ ଜନତାଙ୍କ ଦ୍ୱାରା ବଜେଟ୍ ଦସ୍ତାବିଜକୁ ଅସୁବିଧାମୁକ୍ତ ଆକସେସ୍ କରିବା ପାଇଁ ବାର୍ଷିକ ଆର୍ଥିକ ବିବରଣୀ (ସାଧାରଣତଃ ବଜେଟ୍), ଅନୁଦାନ ଦାବି (ଡିଜି), ଅର୍ଥ ବିଲ୍ ଇତ୍ୟାଦି ସମେତ ସମସ୍ତ କେନ୍ଦ୍ରୀୟ ବଜେଟ୍ ଦସ୍ତାବିଜ୍ “କେନ୍ଦ୍ର ବଜେଟ୍ ମୋବାଇଲ୍ ଆପ୍”ରେ ଉପଲବ୍ଧ ହେବ। ଏହି ଆପ୍ ଦ୍ୱିଭାଷୀ (ଇଂରାଜୀ ଏବଂ ହିନ୍ଦୀ) ଏବଂ ଉଭୟ ଆଣ୍ଡ୍ରଏଡ୍ ଏବଂ ଆଇଓଏସ୍ ପ୍ଲାଟଫର୍ମରେ ଉପଲବ୍ଧ ହେବ। ୟୁନିୟନ ବଜେଟ୍ ୱେବ୍ ପୋର୍ଟାଲ (www.indiabudget.gov.in) ରୁ ମଧ୍ୟ ଏହି ଆପ୍ ଡାଉନଲୋଡ୍ କରାଯାଇପାରିବ।

ଜୁଲାଇ ୨୩, ୨୦୨୪ରେ ସଂସଦରେ କେନ୍ଦ୍ର ଅର୍ଥମନ୍ତ୍ରୀଙ୍କ ବଜେଟ୍ ଭାଷଣ ଶେଷ ହେବା ପରେ ବଜେଟ୍ ଦସ୍ତାବିଜ ମୋବାଇଲ୍ ଆପ୍ ରେ ଉପଲବ୍ଧ ହେବ।

ହଲୱା ସମାରୋହରେ କେନ୍ଦ୍ର ଅର୍ଥମନ୍ତ୍ରୀଙ୍କ ସହ ଅର୍ଥ ମନ୍ତ୍ରଣାଳୟର ସଚିବ ଏବଂ ବଜେଟ୍ ପ୍ରସ୍ତୁତିରେ ସାମିଲ ଥିବା ଭାରତ ସରକାରଙ୍କ ଅନ୍ୟ ବରିଷ୍ଠ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ।

ଏହି ଅବସରରେ କେନ୍ଦ୍ର ଅର୍ଥମନ୍ତ୍ରୀ ବଜେଟ୍ ପ୍ରେସ୍ ପରିଦର୍ଶନ କରିବା ସହ ପ୍ରସ୍ତୁତିର ସମୀକ୍ଷା କରିବା ସହ ସଂପୃକ୍ତ ଅଧିକାରୀମାନଙ୍କୁ ଶୁଭେଚ୍ଛା ଜଣାଇଥିଲେ।

ନୂଆଦିଲ୍ଲୀ: କେନ୍ଦ୍ର ଅର୍ଥ ଓ କର୍ପୋରେଟ୍ ବ୍ୟାପାର ମନ୍ତ୍ରୀ ନିର୍ମଳା ସୀତାରମଣଙ୍କ ଅଧ୍ୟକ୍ଷତାରେ ଆଜି ନୂଆଦିଲ୍ଲୀରେ ୫୨ତମ ଜିଏସଟି ପରିଷଦ ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ କେନ୍ଦ୍ର ଅର୍ଥ ରାଷ୍ଟ୍ରମନ୍ତ୍ରୀ ପଙ୍କଜ ଚୌଧୁରୀ, ଅର୍ଥ ବିଭାଗ ଦାୟିତ୍ୱ ନିର୍ବାହ କରୁଥିବା ଗୋଆ ଏବଂ ମେଘାଳୟ ମୁଖ୍ୟମନ୍ତ୍ରୀ, ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ (ବିଧାନସଭା ସହିତ) ଅର୍ଥମନ୍ତ୍ରୀ ଏବଂ ଅର୍ଥ ମନ୍ତ୍ରଣାଳୟ ତଥା ରାଜ୍ୟ/ କେନ୍ଦ୍ରଶାସିତ ଅଞ୍ଚଳର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।

ଜିଏସଟି ଟିକସ ହାରରେ ପରିବର୍ତ୍ତନ, ବ୍ୟବସାୟକୁ ସୁଗମ କରିବା ଏବଂ ଜିଏସଟିରେ ଅନୁପାଳନକୁ ସୁବ୍ୟବସ୍ଥିତ କରିବା ପାଇଁ ପଦକ୍ଷେପ ସମ୍ପର୍କରେ ଜିଏସଟି କାଉନସିଲ ନିମ୍ନଲିଖିତ ସୁପାରିସ କରିଛି।

A. ବସ୍ତୁ ଓ ସେବା ଉପରେ ଜିଏସଟି ଦର ସଂକ୍ରାନ୍ତରେ ସୁପାରିସ
I. ସାମଗ୍ରୀର ଜିଏସଟି ହାରରେ ପରିବର୍ତ୍ତନ

1. ଏଚଏସ ୧୯୦୧ ବର୍ଗରେ ଆସୁଥିବା ଗୁଣ୍ଡ ଆକାରରେ ଏବଂ ଅତିକମରେ ୭୦% ଓଜନର ମିଲେଟ୍ ବା ଶ୍ରୀ ଅନ୍ନ ଥିବା ଅଟା ଖୋଲାରେ ବିକ୍ରି ହେଉଥିଲେ ଏହା ଉପରେ କୌଣସି ଜିଏସଟି ଶୁଳ୍କ ଲାଗୁ ହେବ ନାହିଁ। ଅନ୍ୟପଟେ ଆଗୁଆ ପ୍ୟାକେଟ୍ ହୋଇ ଲେଭଲ ଥାଇ ବିକ୍ରି ହେଲେ ୫% ଜିଏସଟି ଲାଗୁ ହେବ ।

2. ଏଚ୍ଏସ୍ ୫୬୦୫ ଅଧୀନରେ ଆସୁଥିବା ମେଟାଲାଇଜ୍ଡ ପଲିଏଷ୍ଟର ଫିଲ୍ମ/ପ୍ଲାଷ୍ଟିକ୍ ଫିଲ୍ମରୁ ନିର୍ମିତ ଇମିଟେସନ ଜରି ସୂତା ବା ସୂତା କୁ ୫% ଜିଏସ୍ ଟି ହାର ଥିବା ଇମିଟେସନ ଜରି ସୂତା ବା ସୂତା ଏଣ୍ଟ୍ରି ମାଧ୍ୟମରେ କରାଯାଇଛି। ତେବେ ପଲିଏଷ୍ଟର ଫିଲ୍ମ (ମେଟାଲାଇଜ୍ଡ୍) /ପ୍ଲାଷ୍ଟିକ୍ ଫିଲ୍ମ ଉପରେ ଇନଭର୍ସନ କ୍ଷେତ୍ରରେ କୌଣସି ରିଫଣ୍ଡ କରାଯିବ ନାହିଁ।

3. ଉପକୂଳରେ ଯାତ୍ରା କରିବାକୁ ମାର୍ଗ ପରିବର୍ତ୍ତନ କଲେ ବିଦେଶ ଯାତ୍ରା କରୁଥିବା ଜାହାଜଗୁଡ଼ିକ ଜାହାର ମୂଲ୍ୟ ଉପରେ ୫% ଆଇଜିଏସଟି ପଇଠ କରିବେ। ତେବେ ପର୍ଯ୍ୟଟନକୁ ପ୍ରୋତ୍ସାହିତ କରିବା ଲାଗି ବିଦେଶୀ ପତାକା ଥିବା ବିଦେଶୀ ଜାହାଜ ଉପକୂଳରେ ଯାତ୍ରା କରିବା ସମୟରେ ସର୍ତ୍ତମୂଳକ ଓ ସୀମିତ ଅବଧିର ଆଇଜିଏସଟି ଛାଡ଼ କରାଯିବ ।

II. ବସ୍ତୁ ସହ ଜଡ଼ିତ ଅନ୍ୟାନ୍ୟ ଶୁଳ୍କ

1. ମାନବ ବ୍ୟବହାର ପାଇଁ ଆଲକହଲ ଯୁକ୍ତ ମଦ ଉତ୍ପାଦନ ଲାଗି ବ୍ୟବହୃତ ଅତିରିକ୍ତ ସାଧାରଣ ମଦ (ଇଏନଏ) ଜିଏସଟି ବାହାରେ ରଖିବାକୁ ଜିଏସଟି ପରିଷଦ ସୁପାରିସ କରିଛି । ମାନବ ବ୍ୟବହାର ପାଇଁ ମଦ ଉତ୍ପାଦନରେ ଉପଯୋଗ କରାଯାଉଥିବା ଇଏନଏକୁ ଜିଏସଟି ପରିସରରୁ ବାଦ୍ ଦେବା ପାଇଁ ଆଇନ କମିଟି ଆଇନରେ ଉପଯୁକ୍ତ ସଂଶୋଧନ ସଂକ୍ରାନ୍ତରେ ଯାଞ୍ଚ କରିବ।

2. ଶୀରା ଉପରେ ଜିଏସଟି ୨୮%ରୁ ୫%କୁ ହ୍ରାସ କରାଯିବ । ଏହି ପଦକ୍ଷେପ ଚିନ ମିଲଗୁଡ଼ିକ ପାଇଁ ଅଧିକ ନଗଦ ଅର୍ଥ ବୃଦ୍ଧି କରିବ ଏବଂ ଆଖୁ ଚାଷୀଙ୍କ ଆଖୁ ବକେୟା ଶୀଘ୍ର ପରିଶୋଧ କରିବାରେ ସକ୍ଷମ କରିବ । ଶୀରା ମଧ୍ୟ ଏହାର ଉତ୍ପାଦନରେ ଏକ ଉପାଦାନ ହୋଇଥିବାରୁ ଏହା ଦ୍ୱାରା ଗୋଖାଦ୍ୟ ଉତ୍ପାଦନ ଖର୍ଚ୍ଚ ମଧ୍ୟ ହ୍ରାସ ପାଇବ ।

3. ଶିଳ୍ପ ବ୍ୟବହାର ପାଇଁ ସଂଶୋଧିତ ସ୍ପିରିଟ୍ କୁ ଅନ୍ତର୍ଭୁକ୍ତ କରିବା ପାଇଁ ସୀମା ଶୁଳ୍କ ଆଇନରେ ୮ ଅଙ୍କ ସ୍ତରରେ ଏକ ପୃଥକ ଶୁଳ୍କ ଏଚ୍ ଏସ୍ କୋଡ୍ ସୃଷ୍ଟି କରାଯାଇଛି। ଜିଏସଟି ହାର ବିଜ୍ଞପ୍ତିରେ ସଂଶୋଧନ କରାଯାଇ ଶିଳ୍ପ ବ୍ୟବହାର ପାଇଁ ଇଏନଏର ଏକ ଏଣ୍ଟ୍ରି ସୃଷ୍ଟି କରାଯିବ ଯେଉଁଥିରେ ୧୮% ଜିଏସଟି ଲାଗୁ ହେବ ।

III. ସେବାର ଜିଏସଟି ହାରରେ ପରିବର୍ତ୍ତନ

1. ୨୮.୦୬.୨୦୧୭ ବିଜ୍ଞପ୍ତି ସଂଖ୍ୟା ୧୨/୨୦୧୭-ସିଟିଆରର ଧାରା ନଂ ୩ ଏବଂ ୩ଏରେ ଭାରତୀୟ ସମ୍ବିଧାନର ଧାରା ୨୪୩ଜି ଏବଂ ୨୪୩ଡବ୍ଲୁ ଅଧୀନରେ ପଞ୍ଚାୟତ/ପୌରପାଳିକାକୁ ଦିଆଯାଇଥିବା କୌଣସି କାର୍ଯ୍ୟ ସମ୍ବନ୍ଧରେ କେନ୍ଦ୍ର/ରାଜ୍ୟ/କେନ୍ଦ୍ରଶାସିତ ଅଞ୍ଚଳ ସରକାର ଏବଂ ସ୍ଥାନୀୟ କର୍ତ୍ତୃପକ୍ଷଙ୍କୁ ପ୍ରଦାନ କରାଯାଉଥିବା ଶୁଦ୍ଧ ଏବଂ ମିଶ୍ରିତ ସେବାକୁ ଜିଏସଟି ଛାଡ଼ କରାଯାଇଛି। ଜିଏସଟି କାଉନସିଲ ବର୍ତ୍ତମାନର ରିହାତି ଏଣ୍ଟ୍ରିଗୁଡ଼ିକୁ କୌଣସି ପରିବର୍ତ୍ତନ ନକରି ବଜାୟ ରଖିବାକୁ ସୁପାରିସ କରିଛି।

2. ଏହାବ୍ୟତୀତ ଜଳ ଯୋଗାଣ, ଜନସ୍ୱାସ୍ଥ୍ୟ, ପରିମଳ, କଠିନ ବର୍ଜ୍ୟବସ୍ତୁ ପରିଚାଳନା ଏବଂ ବସ୍ତି ଉନ୍ନତିକରଣ ଏବଂ ସରକାରୀ କର୍ତ୍ତୃପକ୍ଷଙ୍କୁ ଯୋଗାଇ ଦିଆଯାଉଥିବା ଉନ୍ନତିକରଣ ସେବାରୁ ଟିକସମୁକ୍ତ କରିବାକୁ ଜିଏସ୍ ଟି ପରିଷଦ ସୁପାରିସ କରିଛି।

IV. ସେବା ସହ ଜଡ଼ିତ ଅନ୍ୟାନ୍ୟା ପରିବର୍ତ୍ତନ

1. ଏହା ସ୍ପଷ୍ଟ କରାଯାଉଛି ଯେ, ‘‘ଖାଦ୍ୟ ଓ ଖାଦ୍ୟ ଉତ୍ପାଦ ସହ ଜଡ଼ିତ ସେବା କାର୍ଯ୍ୟ’’ କ୍ଷେତ୍ରରେ ପ୍ରଯୁଜ୍ୟ ୫% ଜିଏସଟି ଦର ବାର୍ଲିକୁ ମଲ୍ଟରେ ପ୍ରକ୍ରିୟାକରଣ କରିବା ସେବା କ୍ଷେତ୍ରରେ ମଧ୍ୟ ଲାଗୁ ହେଉଛି ଏବଂ ଏହି ଦର ୧୮% ନୁହେଁ।

2. ସିଜିଏସଟି ଆଇନ, ୨୦୧୭ର ଧାରା ୯(୫) ଅନୁଯାୟୀ ଇଲେକ୍ଟ୍ରୋନିକ୍ ବାଣିଜ୍ୟିକ ଅପରେଟର (ଇସିଓ) ମାଧ୍ୟମରେ ଯୋଗାଇ ଦିଆଯାଉଥିବା ବସ୍ ପରିବହନ ସେବା ଉପରେ ଜିଏସଟି ପୈଠ କରିବାର ଦେୟତା ଇସିଓଙ୍କ ଉପରେ ୨୦୨୨ ଜାନୁଆରୀ ପହିଲାରୁ ଲାଗୁ କରାଯାଇଛି । ଶିଳ୍ପ ସଂଘର ପ୍ରସ୍ତାବ ଆଧାରରେ ବାଣିଜ୍ୟ ସୁବିଧା ପାଇଁ ଏହି ପଦକ୍ଷେପ ନିଆଯାଇଥିଲା ଯେ ଇସିଓ ମାଧ୍ୟମରେ ସେବା ଯୋଗାଉଥିବା ଅଧିକାଂଶ ବସ୍ ଅପରେଟର ଗୋଟିଏ କିମ୍ବା ଦୁଇଟି ବସ୍ ର ମାଲିକ ଏବଂ ସେମାନେ ପଞ୍ଜୀକରଣ କରିବା ଏବଂ ଜିଏସଟି ଅନୁପାଳନ ପୂରଣ କରିବା ସ୍ଥିତିରେ ନଥିଲେ। ବ୍ୟବସାୟକୁ ସହଜ କରିବା ପାଇଁ କ୍ଷୁଦ୍ର ଅପରେଟରମାନଙ୍କ ଆବଶ୍ୟକତା ଏବଂ ଆଇଟିସି ନେବା ପାଇଁ ବଡ଼ ସଂଗଠିତ କମ୍ପାନୀର ଆବଶ୍ୟକତା ମଧ୍ୟରେ ସନ୍ତୁଳନ ଆଣିବା ଲାଗି ଜିଏସଟି କାଉନସିଲ ସୁପାରିସ କରିଛି ଯେ, କମ୍ପାନୀ ଭାବରେ ସଂଗଠିତ ବସ୍ ଅପରେଟରମାନଙ୍କୁ ସିଜିଏସଟି ଅଧିନିୟମ, ୨୦୧୭ର ଧାରା ୯(୫)ର ପରିସରରୁ ବାଦ୍ ଦିଆଯାଇପାରେ । ଏହାଦ୍ୱାରା ସେମାନେ ଆଇଟିସି ବ୍ୟବହାର କରି ସେମାନଙ୍କ ଯୋଗାଣ ଉପରେ ଜିଏସଟି ପୈଠ କରିପାରିବେ ।

3. ସାରା ଦେଶରେ ଖଣିଜ ସମ୍ପଦ ଥିବା ଖଣି ଅଞ୍ଚଳରେ ରାଜ୍ୟ ସରକାରଙ୍କ ଦ୍ୱାରା ଗଠିତ ଜିଲ୍ଲା ଖଣିଜ ଫାଉଣ୍ଡେସନ୍ ଟ୍ରଷ୍ଟ (ଡିଏମଏଫଟି) ସରକାରୀ କର୍ତ୍ତୃପକ୍ଷ ଏବଂ ଏହିପରି ଅନ୍ୟ କୌଣସି ସରକାରୀ କର୍ତ୍ତୃପକ୍ଷଙ୍କ ପାଇଁ ଉପଲବ୍ଧ ଜିଏସଟିରୁ ସମାନ ରିହାତି ପାଇବାକୁ ଯୋଗ୍ୟ ବୋଲି ପରିଷଦ ସ୍ପଷ୍ଟ କରିଛି।

4. ଭାରତୀୟ ରେଳବାଇ ଦ୍ୱାରା ସମସ୍ତ ସାମଗ୍ରୀ ଏବଂ ସେବା ଯୋଗାଣ ଉପରେ ଫରୱାର୍ଡ ଚାର୍ଜ ବ୍ୟବସ୍ଥା ଅଧୀନରେ ଟିକସ ଆଦାୟ କରାଯିବ ଯାହା ଦ୍ୱାରା ସେମାନେ ଆଇଟିସି ପାଇପାରିବେ । ଏହା ଦ୍ୱାରା ଭାରତୀୟ ରେଳବାଇର ଖର୍ଚ୍ଚ ହ୍ରାସ ପାଇବ ।

B. ବ୍ୟବସାୟକୁ ସୁଗମ କରିବା ପାଇଁ ପଦକ୍ଷେପ:

i) ଯେଉଁ କ୍ଷେତ୍ରରେ ନିର୍ଦ୍ଧାରିତ ସମୟ ସୀମା ମଧ୍ୟରେ ଆପିଲ୍ ଦାଖଲ ହୋଇପାରିବ ନାହିଁ ସେଠାରେ ଡିମାଣ୍ଡ ଅର୍ଡର ବିରୋଧରେ ଅପିଲ୍ ଦାଖଲ କରିବା ପାଇଁ କ୍ଷମା ଯୋଜନା

1. ୩୧ ମାର୍ଚ୍ଚ ୨୦୨୩ରେ କିମ୍ବା ତା’ପୂର୍ବରୁ ସିଜିଏସଟି ଆଇନ, ୨୦୧୭ର ଧାରା ୭୩ ଓ ୭୪ ଅଧୀନରେ ଜାରି ହୋଇଥିବା ଡିମାଣ୍ଡ ଅର୍ଡର ବିରୋଧରେ ଏହି ଆଇନର ୧୦୭ ଧାରା ଅଧୀନରେ ଏକ ଅପିଲ କରିପାରିନଥିବା ଟିକସଦାତା ବ୍ୟକ୍ତି କିମ୍ବା କେବଳ ଧାରା ୧୦୭ର ଉପଧାରା (୧) ରେ ନିର୍ଦ୍ଧାରିତ କରାଯାଇଥିବା ସମୟ ଅବଧିରେ ଅପିଲ କରାଯାଇନଥିବା ଦର୍ଶାଇ ଆଦେଶ ବିରୋଧରେ ଯେଉଁମାନଙ୍କର ଅପିଲକୁ ଖାରଜ କରି ଦିଆଯାଇଛି ସେମାନଙ୍କୁ ସିଜିଏସଟି ଆଇନ, ୨୦୧୭ର ଧାରା ୧୪୮ରେ ଥିବା ଏକ ସ୍ୱତନ୍ତ୍ର ବ୍ୟବସ୍ଥା ଅନୁଯାୟୀ କ୍ଷମା ପ୍ରାର୍ଥନା ଯୋଜନାର ସୁବିଧା ଦେବା ପାଇଁ ପରିଷଦ ସୁପାରିସ କରିଛି। ଏଭଳି ସମସ୍ତ କ୍ଷେତ୍ରରେ ଟିକସଦାତାଙ୍କ ଦ୍ୱାରା ଆବେଦନ ଦାଖଲ ପାଇଁ ୩୧ ଜାନୁଆରୀ ୨୦୨୪ ପର୍ଯ୍ୟନ୍ତ ଅନୁମତି ଦିଆଯିବ, ଯେଉଁଥିରେ ବିବାଦ ଅଧୀନ ଟିକସର ୧୨.୫% ପୂର୍ବ ଜମା ରାଶି ପୈଠ କରିବାର ସର୍ତ୍ତ ରହିଛି, ସେଥିରୁ ଅତିକମରେ ୨୦% (ଅର୍ଥାତ୍ ବିବାଦ ଅଧୀନ ଟିକସର ୨.୫%) ଇଲେକ୍ଟ୍ରୋନିକ୍ କ୍ୟାସ୍ ଲେଜରରୁ ଡେବିଟ୍ ହେବା ଆବଶ୍ୟକ। ଏହା ଦ୍ୱାରା ବହୁ ସଂଖ୍ୟକ ଟିକସଦାତା ସୁବିଧା ପାଇବେ, ଯେଉଁମାନେ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ଅତୀତରେ ଆବେଦନ କରିପାରି ନାହାନ୍ତି ।

କମ୍ପାନିକୁ ମଞ୍ଜୁର କରାଯାଉଥିବା କ୍ରେଡିଟ୍ ସୀମା/ଋଣ ବିରୁଦ୍ଧରେ ନିର୍ଦ୍ଦେଶକମାନେ ବ୍ୟାଙ୍କକୁ ପ୍ରଦାନ କରୁଥିବା ବ୍ୟକ୍ତିଗତ ଗ୍ୟାରେଣ୍ଟିର ଟିକସଯୋଗ୍ୟତା ଏବଂ ହୋଲ୍ଡିଂ କମ୍ପାନୀ ଦ୍ୱାରା ଏହାର ସହାୟକ କମ୍ପାନୀକୁ ପ୍ରଦାନ କରାଯାଇଥିବା କର୍ପୋରେଟ୍ ଗ୍ୟାରେଣ୍ଟି ସମେତ ସମ୍ପୃକ୍ତ ବ୍ୟକ୍ତିମାନଙ୍କ ପାଇଁ ପ୍ରଦାନ କରାଯାଇଥିବା କର୍ପୋରେଟ୍ ଗ୍ୟାରେଣ୍ଟିର ଟିକସଯୋଗ୍ୟତା ସମ୍ପର୍କରେ ସ୍ପଷ୍ଟୀକରଣ: ଏ ସଂକ୍ରାନ୍ତ ପରିଷଦର ସୁପାରିସ ହେଲା :

a) ଏକ ବିଜ୍ଞପ୍ତି ଜାରି କରି ସ୍ପଷ୍ଟ କରାଯାଇଛି ଯେ ଯେତେବେଳେ ବ୍ୟାଙ୍କ/ ଆର୍ଥିକ ଅନୁଷ୍ଠାନଗୁଡ଼ିକୁ ସେମାନଙ୍କ ତରଫରୁ ବ୍ୟକ୍ତିଗତ ଗ୍ୟାରେଣ୍ଟି ପ୍ରଦାନ କରିବା ପାଇଁ କମ୍ପାନୀ ପକ୍ଷରୁ ନିର୍ଦ୍ଦେଶକଙ୍କୁ ପ୍ରତ୍ୟକ୍ଷ କିମ୍ବା ପରୋକ୍ଷ ଭାବେ କୌଣସି ପ୍ରତିଫଳ ପ୍ରଦାନ କରାନଯାଏ, ତେବେ ଉକ୍ତ କାରବାର/ଯୋଗାଣର ଖୋଲା ବଜାର ମୂଲ୍ୟକୁ ଶୂନ୍ୟ ବୋଲି ବିବେଚନା କରାଯାଇପାରେ ଏବଂ ତେଣୁ ଏଭଳି ସେବା ଯୋଗାଣ କ୍ଷେତ୍ରରେ କୌଣସି ଟିକସ ଦେବାକୁ ପଡ଼ିବ ନାହିଁ।

b) ପରସ୍ପର ସହ ଜଡ଼ିତ ପକ୍ଷମାନଙ୍କ ମଧ୍ୟରେ ପ୍ରଦାନ କରାଯାଇଥିବା କର୍ପୋରେଟ୍ ଗ୍ୟାରେଣ୍ଟି ଯୋଗାଣର ଟିକସଯୋଗ୍ୟ ମୂଲ୍ୟ ପ୍ରଦାନ କରିବା, କିମ୍ବା ବାସ୍ତବ ପ୍ରତିଫଳ, ଯାହା ଅଧିକ ଥିବ ତାହାର ଏକ ପ୍ରତିଶତ ଭାବରେ ପ୍ରଦାନ କରିବା ଲାଗି ସିଜିଏସଟି ନିୟମ, ୨୦୧୭ର ନିୟମ ୨୮ରେ ଉପ-ନିୟମ (୨) ସାମିଲ କରିବାକୁ ପରିଷଦ ସୁପାରିସ କରିଛି।

c) ବିଜ୍ଞପ୍ତି ଜରିଆରେ ସ୍ପଷ୍ଟ କରାଯାଉଛି ଯେ ଉକ୍ତ ଉପ-ନିୟମ ଯୋଡ଼ିବା ପରେ ସମ୍ପୃକ୍ତ ପକ୍ଷଙ୍କ ମଧ୍ୟରେ ପ୍ରଦାନ କରାଯାଉଥିବା କର୍ପୋରେଟ୍ ଗ୍ୟାରେଣ୍ଟି ସେବାର ଏଭଳି ଯୋଗାଣ ମୂଲ୍ୟ ସିଜିଏସଟି ନିୟମ, ୨୦୧୭ର ନିୟମ ୨୮ର ପ୍ରସ୍ତାବିତ ଉପନିୟମ (୨) ଦ୍ୱାରା ନିୟନ୍ତ୍ରିତ ହେବ ଏବଂ ସେବା ଗ୍ରହଣକାରୀଙ୍କ ପାଇଁ ସମ୍ପୂର୍ଣ୍ଣ ଆଇଟିସି ଉପଲବ୍ଧ ଅଛି କି ନାହିଁ ତାହାର କୌଣସି ଫରକ ପଡ଼ିବ ନାହିଁ ।

iii) ଗୋଟିଏ ବର୍ଷ ସମ୍ପୂର୍ଣ୍ଣ ହେବା ପରେ ଅସ୍ଥାୟୀ ଭାବେ ବ୍ୟାଜାପ୍ତି ହୋଇଥିବା ସମ୍ପତ୍ତିର ସ୍ୱୟଂକ୍ରିୟ ପୁନରୁଦ୍ଧାର ପାଇଁ ବ୍ୟବସ୍ଥା :
ସିଜିଏସଟି ନିୟମ, ୨୦୧୭ର ନିୟମ ୧୫୯ର ଉପନିୟମ (୨) ଏବଂ ଫର୍ମ ଜିଏସଟି ଡିଆରସି-୨୨ରେ ସଂଶୋଧନ କରିବାକୁ ପରିଷଦ ସୁପାରିସ କରିଛି, ଯାହା ଦ୍ୱାରା ଫର୍ମ ଜିଏସଟି ଡିଆରସି -୨୨ରେ ଅସ୍ଥାୟୀ ବ୍ୟାଜାପ୍ତି ପାଇଁ ଦିଆଯାଇଥିବା ଆଦେଶ କଥିତ ଆଦେଶ ଦିଆଯିବା ତାରିଖଠାରୁ ଏକ ବର୍ଷ ସମ୍ପୂର୍ଣ୍ଣ ହେବା ପରେ ବୈଧ ହେବ ନାହିଁ । କମିଶନରଙ୍କ ଠାରୁ ପୃଥକ ନିର୍ଦ୍ଦିଷ୍ଟ ଲିଖିତ ନିର୍ଦ୍ଦେଶର ଆବଶ୍ୟକତା ରହିବ ନାହିଁ ଏବଂ ଏକ ବର୍ଷର ଅବଧି ଶେଷ ହେବା ପରେ ଅସ୍ଥାୟୀ ଭାବେ ଜବତ ସମ୍ପତ୍ତି ମୁକ୍ତ ହୋଇପାରିବ।

iv) ଯୋଗାଣ ସ୍ଥାନ ସମ୍ବନ୍ଧୀୟ ବିଭିନ୍ନ ପ୍ରସଙ୍ଗରେ ସ୍ପଷ୍ଟୀକରଣ: ନିମ୍ନଲିଖିତ ସେବା ଯୋଗାଣ ସମ୍ବନ୍ଧରେ ଯୋଗାଣର ସ୍ଥାନ ସ୍ପଷ୍ଟ କରିବା ପାଇଁ ପରିଷଦ ଏକ ସର୍କୁଲାର ଜାରି କରିବାକୁ ସୁପାରିସ କରିଛି:

a) ଯେଉଁ କ୍ଷେତ୍ରରେ ଯୋଗାଣକାରୀଙ୍କ ଅବସ୍ଥାନ କିମ୍ବା ସେବା ଗ୍ରହଣକାରୀଙ୍କ ଅବସ୍ଥାନ ଭାରତ ବାହାରେ ଥାଏ, ସେହି କ୍ଷେତ୍ରରେ ମେଲ୍ କିମ୍ବା କୋରିଅର୍ ମାଧ୍ୟମରେ ସାମଗ୍ରୀ ପରିବହନର ସେବା ଯୋଗାଣ;

b) ବିଜ୍ଞାପନ ସେବା ଯୋଗାଣ;

c) ସହ-ଅବସ୍ଥାନ ସେବା ଯୋଗାଣ।

v) ସେବାର ରପ୍ତାନି ସମ୍ବନ୍ଧୀୟ ସ୍ପଷ୍ଟୀକରଣ ଜାରି -: ଆଇଜିଏସଟି ଆଇନ ୨୦୧୭ର ଧାରା ୨ର ଧାରା (୬)ର ଉପଧାରା (୪)ର ବ୍ୟବସ୍ଥା ଅନୁଯାୟୀ ସେବା ରପ୍ତାନି ପାଇଁ ଯୋଗ୍ୟତା ଅର୍ଜନ କରିବା ଉଦ୍ଦେଶ୍ୟରେ ରିଜର୍ଭ ବ୍ୟାଙ୍କ ଦ୍ୱାରା ଅନୁମତି ପ୍ରାପ୍ତ ସ୍ୱତନ୍ତ୍ର ଆଇଏନଆର ଭୋସ୍ତ୍ରୋ ଆକାଉଣ୍ଟରେ ପ୍ରାପ୍ତ ରପ୍ତାନି ବାବଦ ପ୍ରେରିତ ଅର୍ଥରାଶି ଗ୍ରହଣୀୟତା ସ୍ପଷ୍ଟ କରିବା ପାଇଁ ପରିଷଦ ଏକ ସର୍କୁଲାର ଜାରି କରିବାକୁ ସୁପାରିସ କରିଛି।

୩୧.୦୭.୨୦୨୩ ତାରିଖରେ ଜାରି ହୋଇଥିବା ୦୧/୨୦୨୩-ସମନ୍ୱିତ ଟିକସ ବିଜ୍ଞପ୍ତିରେ ସଂଶୋଧନ ଦ୍ୱାରା ଆଇଜିଏସଟି ଫେରସ୍ତ ମାର୍ଗ ପାଇଁ ଅଧିକୃତ କାର୍ଯ୍ୟ ନିମନ୍ତେ ଏସଇଜେଡ୍ ୟୁନିଟ୍ / ଡେଭଲପର୍ସଙ୍କୁ ଯୋଗାଣ ଅନୁମତି : ସମନ୍ୱିତ ଟିକସ ପୈଠ ଉପରେ ଅଧିକୃତ କାର୍ଯ୍ୟ ପାଇଁ ସ୍ୱତନ୍ତ୍ର ଆର୍ଥକ ଜୋନ୍ ଡେଭଲପର୍ କିମ୍ବା ସ୍ୱତନ୍ତ୍ର ଆର୍ଥିକ ଜୋନ୍ ୟୁନିଟକୁ ସାମଗ୍ରୀ କିମ୍ବା ସେବା ଯୋଗାଣ କରିବା ପାଇଁ (ପାନ ମସଲା, ତମାଖୁ, ଗୁଟଖା ଇତ୍ୟାଦି ସାମଗ୍ରୀ ବ୍ୟତୀତ) ବିଜ୍ଞପ୍ତି ସଂଖ୍ୟା ୧/୨୦୨୩-ସମନ୍ୱିତ ଟିକସ ତାରିଖ ୩୧.୦୭.୨୦୨୩ରେ ଉଲ୍ଲେଖ କରାଯାଇଥିବା ସାମଗ୍ରୀ କିମ୍ବା ସେବା ଯୋଗାଣ କରିବା ପାଇଁ ଏକ ସ୍ୱତନ୍ତ୍ର ଆର୍ଥିକ ଜୋନ୍ ଡେଭଲପର୍ କିମ୍ବା ସ୍ୱତନ୍ତ୍ର ଅର୍ଥନୈତିକ ଜୋନ୍ ୟୁନିଟକୁ ଯୋଗାଣକାରୀ ଏବଂ ଏହିପରି ପ୍ରଦାନ କରାଯାଇଥିବା ଟିକସ ରିଫଣ୍ଡ ଦାବି କରିବା ଲାଗି ୩୧.୦୭.୨୦୨୩ ତାରିଖରେ ଜାରି ହୋଇଥିବା ୦୧/୨୦୨୩-ସମନ୍ୱିତ ଟିକସ ବିଜ୍ଞପ୍ତିରେ ସଂଶୋଧନ ପାଇଁ ପରିଷଦ ସୁପାରିସ କରିଛି ।

C. ଆଇନ ଓ ପ୍ରକ୍ରିୟା ସଂକ୍ରାନ୍ତରେ ଅନ୍ୟାନ୍ୟ ପଦକ୍ଷେପ :

i) ପ୍ରସ୍ତାବିତ ଜିଏସଟି ଆପିଲେଟ୍ ଟ୍ରିବ୍ୟୁନାଲର ଅଧ୍ୟକ୍ଷ ଏବଂ ସଦସ୍ୟ ନିଯୁକ୍ତି ସମ୍ବନ୍ଧରେ ଟ୍ରିବ୍ୟୁନାଲ ସଂସ୍କାର ଆଇନ, ୨୦୨୧ର ବ୍ୟବସ୍ଥା ସହିତ ସିଜିଏସଟି ଆଇନ, ୨୦୧୭ର ବ୍ୟବସ୍ଥାଗୁଡ଼ିକର ସମନ୍ୱୟ: ନିମ୍ନଲିଖିତ ଉଦ୍ଦେଶ୍ୟ ଲାଗି ସିଜିଏସଟି ଆଇନ, ୨୦୧୭ର ଧାରା ୧୧୦ରେ ସଂଶୋଧନ ପାଇଁ ପରିଷଦ ସୁପାରିସ:

ଆପିଲେଟ୍ ଟ୍ରିବ୍ୟୁନାଲ, କେନ୍ଦ୍ରୀୟ ବର୍ହିଶୁଳ୍କ ଓ ସେବା କର ଟ୍ରିବ୍ୟୁନାଲ, ରାଜ୍ୟ ଭାଟ୍ ଟ୍ରିବ୍ୟୁନାଲରେ ଅଥବା ହାଇକୋର୍ଟ କିମ୍ବା ସୁପ୍ରିମକୋର୍ଟରେ ପରୋକ୍ଷ ଟିକସ ଆଇନ ଅଧୀନରେ ମାମଲାରେ ଯଥେଷ୍ଟ ଅଭିଜ୍ଞତା ଥିବା ଜଣେ ଓକିଲ ନ୍ୟାୟିକ ସଦସ୍ୟ ଭାବରେ ନିଯୁକ୍ତି ପାଇଁ ଯୋଗ୍ୟ ହୋଇପାରିବେ;

ଅଧ୍ୟକ୍ଷ ଏବଂ ସଦସ୍ୟ ଭାବରେ ନିଯୁକ୍ତି ଲାଗି ଯୋଗ୍ୟ ହେବା ପାଇଁ ସର୍ବନିମ୍ନ ବୟସ ୫୦ ବର୍ଷ;

ଅଧ୍ୟକ୍ଷ ଏବଂ ସଭ୍ୟମାନଙ୍କର କାର୍ଯ୍ୟକାଳ ଯଥାକ୍ରମେ ୭୦ ବର୍ଷ ଏବଂ ୬୭ ବର୍ଷ ପର୍ଯ୍ୟନ୍ତ ହେବ ।

ii) ଜିଏସଟି କାଉନସିଲର ୫୦ତମ ବୈଠକରେ ସୁପାରିସ ଅନୁଯାୟୀ ଆଇଏସଡି ସମ୍ବନ୍ଧୀୟ ଆଇନରେ ସଂଶୋଧନ:

ଜିଏସଟି କାଉନସିଲ ଏହାର ୫୦ତମ ବୈଠକରେ ସୁପାରିସ କରିଥିଲା ଯେ ସିଜିଏସଟି ଆଇନ, ୨୦୧୭ର ଧାରା ୨୦ରେ ଧାର୍ଯ୍ୟ କରାଯାଇଥିବା ଆଇଏସଡି (ଇନପୁଟ୍ ସର୍ଭିସ ଡିଷ୍ଟ୍ରିବ୍ୟୁଟର) ପ୍ରକ୍ରିୟାକୁ ତୃତୀୟ ପକ୍ଷଠାରୁ ମୁଖ୍ୟ କାର୍ଯ୍ୟାଳୟ (ଏଚଓ) ଦ୍ୱାରା କ୍ରୟ କରାଯାଇଥିବା ଇନପୁଟ୍ ସେବା ସମ୍ବନ୍ଧରେ ଆଇଟିସି ବଣ୍ଟନ ପାଇଁ ବାଧ୍ୟତାମୂଳକ କରାଯାଇପାରେ କିନ୍ତୁ ଉଭୟ ଏଚଓ ଏବଂ ଶାଖା କାର୍ଯ୍ୟାଳୟ (ବିଓ) କିମ୍ବା କେବଳ ଏକ କିମ୍ବା ଏକାଧିକ ବିଓଙ୍କ ପାଇଁ ଆରୋପଣୀୟ ହେବ।
ସୂଚନା:

ଜିଏସଟି ପରିଷଦର ସୁପାରିସକୁ ଏହି ବିଜ୍ଞପ୍ତି ଜରିଆରେ ହିତାଧିକାରୀଙ୍କ ସୂଚନା ପାଇଁ ସରଳ ଭାଷାରେ ଉପସ୍ଥାପିତ କରାଯାଇଛି । ସମ୍ପୃକ୍ତ ସର୍କୁଲାର/ବିଜ୍ଞପ୍ତି/ଆଇନ ସଂଶୋଧନ ମାଧ୍ୟମରେ ଏହା କାର୍ଯ୍ୟକାରୀ ହେବ, ଯାହାକି କେବଳ ଆଇନ ଦ୍ୱାରା ବଳବତ୍ତର ହେବ ।

ନୂଆଦିଲ୍ଲୀ: ସଂସଦର ସ୍ୱତନ୍ତ୍ର ଅଧିବେଶନର ଦ୍ୱିତୀୟ ଦିନରେ ରାଜ୍ୟସଭାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମହିଳା ସଂରକ୍ଷଣ ବିଲ୍ (ନାରୀ ଶକ୍ତି ବନ୍ଦନ ଅଧିନିୟମ) ରେ ଏକାଠି ହେବାକୁ ସମସ୍ତ ଦଳକୁ ନିବେଦନ କରିଛନ୍ତି। ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ, ମହିଳା ସଶକ୍ତିକରଣ ସହ ଜଡିତ ବିଲ୍ ଉପରେ ସର୍ବସମ୍ମତି କ୍ରମେ ନିଷ୍ପତ୍ତି ନେବା ପାଇଁ ରାଜ୍ୟସଭାର ଏକ ବଡ଼ ସୁଯୋଗ ରହିଛି। ନୂତନ ସଂସଦର ରାଜ୍ୟସଭାରେ ସ୍ୱାଗତ ଭାଷଣରେ ପ୍ରଧାନମନ୍ତ୍ରୀ ମୋଦୀ ଏହା କହିଛନ୍ତି।

ପ୍ରଧାନମନ୍ତ୍ରୀ ମୋଦୀଙ୍କ ପରେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେଙ୍କୁ ରାଜ୍ୟସଭାରେ ଭାଷଣ ଦେବାର ସୁଯୋଗ ଦିଆଯାଇଥିଲା। ଏହି ସମୟରେ ଶ୍ରୀ ଖଡଗେ କହିଛନ୍ତି ଯେ, ଓବିସି ମହିଳାମାନେ ନାରୀ ଶକ୍ତି ବନ୍ଦନ ଅଧିନିୟମରେ ସଂରକ୍ଷଣ ପାଇବା ଉଚିତ। ଏହି ବିବୃତ୍ତିରେ ରାଜ୍ୟସଭାରେ ଉତ୍ତେଜନା ଦେଖାଦେଇଥିଲା।

ଦଳଗୁଡ଼ିକ ଦୁର୍ବଳ ମହିଳାମାନଙ୍କୁ ଟିକେଟ୍ ଦିଅନ୍ତି:

ଶ୍ରୀ ଖଡଗେ କହିଛନ୍ତି ଯେ, “ସାଂସଦମାନେ ନିର୍ବାଚିତ ହୋଇ ଆସନ୍ତି। ପଛୁଆ ବର୍ଗ ଏବଂ ଅନୁସୂଚିତ ଜାତିର ମହିଳାମାନେ ସେପରି ଶିକ୍ଷିତ ନୁହଁନ୍ତି। ସେମାନଙ୍କର ସାକ୍ଷରତା ମଧ୍ୟ ବହୁତ କମ୍ ଅଟେ। ସମସ୍ତ ଦଳର ଦୁର୍ବଳ ମହିଳାଙ୍କୁ ଟିକେଟ୍ ଦେବାର ଅଭ୍ୟାସ ରହିଛି। ଯେଉଁମାନେ ଲଢି ପାରନ୍ତି ସେମାନଙ୍କୁ ଟିକେଟ ଦିଅନ୍ତି ନାହିଁ। ଏହା ମୁଁ ଜାଣେ।”

ଖଡଗେଙ୍କ ବିବୃତ୍ତିରେ ବିଜେପିର ଆପତ୍ତି:

ବିଜେପି ନେତାମାନେ ଏହାକୁ ବିରୋଧ କରିଥିଲେ। ଏହା ପରେ ଶ୍ରୀ ଖଡଗେ କହିଛନ୍ତି ଯେ, ମୋର କହିବା କଥା ଯେ, ସେମାନେ ସର୍ବଦା ଦୁର୍ବଳ ବିଭାଗର ଲୋକଙ୍କୁ ପାଟି ନ ଖୋଲିବାକୁ କୁହନ୍ତି।

ବିଜେପି ସାଂସଦଙ୍କ ଦ୍ୱାରା ହଙ୍ଗାମା:

ତାଙ୍କ ବିବୃତ୍ତି ଉପରେ ବିଜେପି ସାଂସଦଙ୍କ ମଧ୍ୟରେ ହଙ୍ଗମା ଜାରି ରହିଥିଲା। ଏହା ଉପରେ ଶ୍ରୀ ଖଡଗେ କହିଛନ୍ତି ଯେ, “ମୁଁ ସମସ୍ତ ଦଳ ବିଷୟରେ କହୁଛି। ସବୁ ଦଳରେ ଏହା ହେଉଛି। ସେଥିପାଇଁ ମହିଳାମାନେ ତଳେ ଅଛନ୍ତି। ସେମାନଙ୍କୁ ଆଗକୁ ବଢିବାକୁ ଦିଅନ୍ତି ନାହିଁ।”

ନିର୍ମଳା ସୀତାରମଣ ଆପତ୍ତି ଜଣାଇଥିଲେ:

ଏହା ପରେ ଅଧ୍ୟକ୍ଷ ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କୁ ତାଙ୍କ ଆପତ୍ତି ପଞ୍ଜିକରଣ କରିବାକୁ କହିବାର ସୁଯୋଗ ଦେଇଥିଲେ। ସେ କହିଛନ୍ତି ଯେ, ଦଳ ମହିଳାଙ୍କୁ ଗୁରୁତ୍ୱ ଦେଉ ନାହିଁ ବୋଲି କହିବା ଅନ୍ୟାୟ। ଏହା ଭୁଲ ଅଟେ। ପାର୍ଟୀ ଆମ ସମସ୍ତଙ୍କୁ ସୁଯୋଗ ଦେଇଛି।

‘ମହିଳାମାନଙ୍କ ମଧ୍ୟରେ ପାର୍ଥକ୍ୟ କର ନାହିଁ’:

ଏହା ଉପରେ ନିର୍ମଳା ସୀତାରମଣ କହିଛନ୍ତି ଯେ, ରାଷ୍ଟ୍ରପତି ମୁର୍ମୁ କିଏ? ଆପଣ ସେପରି କହିପାରିବେ ନାହିଁ। ଆପଣ କିପରି ଦୁଇ ମହିଳାଙ୍କ ମଧ୍ୟରେ ପାର୍ଥକ୍ୟ କରିପାରିବେ? ଆମେ ସମସ୍ତ ମହିଳାଙ୍କ ପାଇଁ ସଂରକ୍ଷଣ ବିଷୟରେ କହୁଛୁ।

ଜଗଦୀପ ଧନଖଡ଼ ସମାଧାନ କରିବାକୁ ଚେଷ୍ଟା କରିଥିଲେ:

ଅଧ୍ୟକ୍ଷ ଜଗଦୀପ ଧନଖଡ଼ ସମାଧାନ କରିବାକୁ ଚେଷ୍ଟା କରିଥିଲେ। ସେ କହିଛନ୍ତି ଯେ, ଆମେ ଏକ ଐତିହାସିକ ପ୍ରସଙ୍ଗ ଉପରେ ଆଲୋଚନା କରୁଛୁ।

ସର୍ବଦା ମହିଳା ସଂରକ୍ଷଣକୁ ସମର୍ଥନ କରନ୍ତି:

ଏହା ପରେ ଶ୍ରୀ ଖଡଗେ କହିଛନ୍ତି ଯେ, ମୁଁ କେବଳ କହୁଛି ଯେ ଆମେ ମହିଳା ସଂରକ୍ଷଣ ବିଲ୍କୁ ନିରନ୍ତର ସମର୍ଥନ କରିଛୁ। ୨୦୧୦ ରେ ଏହାକୁ ପାସ୍ କରିବାକୁ ମଧ୍ୟ ଚେଷ୍ଟା କରାଯାଇଥିଲା। ସଂସଦ ହେଉଛି ଗଣତନ୍ତ୍ରର ମନ୍ଦିର।

ମଲ୍ଲିକାର୍ଜୁନ କହିଛନ୍ତି ଯେ, ସେମାନେ ଆମକୁ ଶ୍ରେୟ ଦିଅନ୍ତି ନାହିଁ, କିନ୍ତୁ ମୁଁ ସେମାନଙ୍କ ନଜରକୁ ଆଣିବାକୁ ଚାହୁଁଛି ଯେ ମହିଳା ସଂରକ୍ଷଣ ବିଲ୍ ୨୦୧୦ ରେ ପାରିତ ହୋଇସାରିଥିଲା, କିନ୍ତୁ ଏହାକୁ ବନ୍ଦ କରିଦିଆଯାଇଥିଲା।

ନୂଆଦିଲ୍ଲୀ: ଜି -୨୦ ଶିଖର ସମ୍ମିଳନୀର ସଫଳତା ତଥା ଭାରତର ଅର୍ଥନୀତି ସମେତ ଅନ୍ୟାନ୍ୟ ପ୍ରସଙ୍ଗ ଉପରେ ଏନଡିଟିଭି ସହ ଏକ ବିଶେଷ ବାର୍ତ୍ତାଳାପରେ ଦେଶର ଅର୍ଥମନ୍ତ୍ରୀ ନିର୍ମଳା ସୀତାରମଣ ଖୋଲାଖୋଲି ଭାବେ ନିଜର ମତ ପ୍ରକାଶ କରିଛନ୍ତି। ଏହି ସମୟରେ ସେ କହିଥିବା ୧୦ ଟି ବିଷୟ ଉପରେ ଆସନ୍ତୁ ଜାଣିବା…

ଭାରତର ଅର୍ଥନୀତି ଏବଂ ଜି -୨୦ ର ସଫଳତା ଉପରେ ଅର୍ଥମନ୍ତ୍ରୀଙ୍କ ଠାରୁ ୧୦ ଟି ବଡ଼ ଜିନିଷ:

୧- ଜି -୨୦ ର ସମସ୍ତ ପ୍ରସଙ୍ଗରେ ଭାରତ ସହମତି ହାସଲ କରିଛି। ୟୁକ୍ରେନ ଏବଂ ଋଷ ପ୍ରସଙ୍ଗରେ ସମସ୍ତ ଜି -୨୦ ଦେଶ ମଧ୍ୟରେ ଏକ ସାଧାରଣ ସହମତି ପ୍ରକାଶ ପାଇଛି।

୨- ୨୨ ଟି ଦେଶ ଭାରତ ସହିତ ଟଙ୍କାରେ ବ୍ୟବସାୟ କରିବାକୁ ପ୍ରସ୍ତୁତ। ଜି -୨୦ ସଦସ୍ୟ ଦେଶମାନେ ଭାରତ ଉପରେ ଆତ୍ମବିଶ୍ୱାସ ପ୍ରକାଶ କରିଛନ୍ତି। ଗ୍ଲୋବାଲ ସାଉଥର ସ୍ୱର ଉପରେ ପିଏମ ମୋଦୀଙ୍କ ଗୁରୁତ୍ୱ ରହିଛି।

୩- ଜି -୨୦ ସାମୂହିକ ଭାବରେ କ୍ରିପ୍ଟୋ, ବୈଶିକ ଋଣ, ବ୍ରେଟନ୍ ଉଡ୍ସ ଇନଷ୍ଟିଚ୍ୟୁସନ- ଇଣ୍ଟରନାସନାଲ ମନିଟାରି ଫୋରମ୍ ଏବଂ ବିଶ୍ଵ ବ୍ୟାଙ୍କରେ ସଂସ୍କାରର ଆବଶ୍ୟକତା ଭଳି ଆଲୋଚନା କରାଯାଇଥିଲା।

୪- ବିକାଶର ଆବଶ୍ୟକତାକୁ ଭାରତ ବୁଝୁଛି। ଜି-୨୦ ପାଇଁ ଅନେକ ସହରରେ ବୈଠକ ଅନୁଷ୍ଠିତ ହୋଇଥିଲା। ସମସ୍ତ ଦେଶ ଭାରତର ବିବିଧତା ଏବଂ ସଂସ୍କୃତି ଦେଖିଥିଲେ।

୫- ଜି -୨୦ ଶିଖର ସମ୍ମିଳନୀ ସମଗ୍ର ବିଶ୍ୱରେ ଭାରତର ଏକ ନୂତନ ଭାବମୂର୍ତ୍ତି ସୃଷ୍ଟି କରିଛି। ଏହି ସମୟ ମଧ୍ୟରେ ସମଗ୍ର ବିଶ୍ୱ ଭାରତର ଚମତ୍କାର ସଂସ୍କୃତି ଦେଖିଲା।

୬- ଡିଜିଟାଲ କ୍ଷେତ୍ରରେ ଭାରତ ଏକ ନୂତନ ପରିଚୟ ସୃଷ୍ଟି କରିଛି। ଡିଜିଟାଲ୍ ଟେକ୍ନୋଲୋଜି MSME ପାଇଁ ଲାଭଦାୟକ ପ୍ରମାଣିତ କରୁଛି।

୭- ମୋଦୀ ସରକାରଙ୍କ ଏହି ଯୋଜନାରେ ସମସ୍ତେ ଉପକୃତ ହୋଇଛନ୍ତି। ଉଜ୍ଜ୍ୱଲା ସମେତ ସମସ୍ତ ଯୋଜନାରେ କୌଣସି ଭେଦଭାବ ହୋଇନାହିଁ।

୮- ବିରୋଧୀ ସନାତନ ଧର୍ମକୁ ଧ୍ୱଂସ କରିବାକୁ ଚାହୁଁଛନ୍ତି। ଏହା କେବଳ ବିରୋଧୀଙ୍କ ପାଇଁ ସନାତନ ବିରୋଧ ନୁହେଁ ବରଂ ସେମାନଙ୍କର ଉଦ୍ଦେଶ୍ୟ ହେଉଛି ହିନ୍ଦୁମାନଙ୍କୁ ବିରୋଧ କରିବା।

୯- ଧର୍ମନିରପେକ୍ଷତା ନାମରେ ବିରୋଧୀ କୁମ୍ଭୀର କାନ୍ଦଣା କାନ୍ଦୁଛି। ଯେଉଁମାନେ ଦେଶ ଭାଙ୍ଗୁଛନ୍ତି ସେମାନଙ୍କ ସହ କଂଗ୍ରେସ ଛିଡା ହୋଇଛି। ସମଗ୍ର ବିରୋଧୀ ଏକ ଗୋଷ୍ଠୀର ଅଂଶ ଯାହା ଦେଶ ଭାଙ୍ଗିବାକୁ ଚେଷ୍ଟା କରୁଛି।

୧୦- ପ୍ରତ୍ୟେକ କ୍ଷେତ୍ରରେ ମହିଳାଙ୍କ ଅଂଶଗ୍ରହଣ ବୃଦ୍ଧି ପାଇଛି। ମିଶନ୍ ଚନ୍ଦ୍ରଯାନରେ ମହିଳାଙ୍କ ଅଂଶଗ୍ରହଣ ସମସ୍ତଙ୍କ ପାଇଁ ଏକ ପ୍ରେରଣା।

ଭୁବନେଶ୍ଵର: କେନ୍ଦ୍ର ଅର୍ଥ ଓ କର୍ପୋରେଟ୍‌ ବ୍ୟାପାର ମନ୍ତ୍ରୀ ନିର୍ମଳା ସୀତାରମଣ ଆଜି ଠାରୁ ଦୁଇଦିନିଆ ଓଡ଼ିଶା ଗସ୍ତରେ ଆସୁଛନ୍ତି। ସେ ପୁରୀ ଓ ଭୁବନେଶ୍ୱର ଠାରେ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେବେ।

କେନ୍ଦ୍ର ଅର୍ଥମନ୍ତ୍ରୀ ଆଜି ସନ୍ଧ୍ୟାରେ ଭୁବନେଶ୍ୱର ଠାରେ ପହଞ୍ଚିବା ପରେ ବିଜେପି ରାଜ୍ୟ କାର୍ଯ୍ୟାଳୟ ଠାରେ ଏକ କାର୍ଯ୍ୟକ୍ରମରେ ଯୋଗ ଦେବେ। ଏହାପରେ ସେ ପୁରୀ ଗସ୍ତ କରିବେ।

ଶ୍ରୀମତୀ ସୀତାରମଣ ଗୁରୁବାର ସକାଳୁ ଶ୍ରୀମନ୍ଦିରରେ ଶ୍ରୀଜିଉମାନଙ୍କୁ ଦର୍ଶନ କରିବେ । ଏହାପରେ ପେଣ୍ଠକଟା ନିକଟସ୍ଥ କେନ୍ଦ୍ରୀୟ ସଂସ୍କୃତ ବିଶ୍ୱବିଦ୍ୟାଳୟ ଶ୍ରୀ ଶଦାଶିବ କ୍ୟାମ୍ପସ ପରିସରରେ ‘ମେରୀ ମାଟି ମେରା ଦେଶ’ କାର୍ଯ୍ୟକ୍ରମରେ ଅଂଶଗ୍ରହଣ କରି ବୃକ୍ଷରୋପଣ କରିବେ। ପୂର୍ବାହ୍ନ ପ୍ରାୟ ସାଢ଼େ ଦଶଟା ସମୟରେ କେନ୍ଦ୍ର ଅର୍ଥମନ୍ତ୍ରୀ ପୁରୀ ଜିଲ୍ଲା ବୀରହରେକୃଷ୍ଣପୁର ସ୍ଥିତ ମହାନ ସ୍ୱାଧୀନତା ସଂଗ୍ରାମୀ ଶହୀଦ ଜୟୀ ରାଜଗୁରୁଙ୍କ ଜନ୍ମସ୍ଥାନ ପରିଦର୍ଶନ କରିବେ। ଏହାପରେ ସେ ଭୁବନେଶ୍ୱର ଫେରିଆସିବେ।

ଗୁରୁବାର ଅପରାହ୍ଣରେ କେନ୍ଦ୍ର ଅର୍ଥମନ୍ତ୍ରୀ ଭୁବନେଶ୍ୱର ଠାରେ କୁଇ ଓ ଦେଶୀୟ ଭାଷା ଉପରେ ଏକ ପୁସ୍ତକ ଉନ୍ମୋଚନ କରିବେ। ସେହିଦିନ ଅପରାହ୍ଣ ୫ଟା ସମୟରେ ଶ୍ରୀମତୀ ସୀତାରମଣ ସୋଆ ବିଶ୍ୱବିଦ୍ୟାଳୟ ସଭାଗୃହ ଠାରେ ବିଂଶତମ ଜାତୀୟ ଚାର୍ଟାର୍ଡ ଏକାଉଣ୍ଟାଣ୍ଟ ସମ୍ମିଳନୀକୁ ଉଦଘାଟନ କରିବାର କାର୍ଯ୍ୟକ୍ରମ ରହିଛି। ଗୁରୁବାର ରାତିରେ କେନ୍ଦ୍ର ମନ୍ତ୍ରୀ ନୂଆଦିଲ୍ଲୀ ଫେରିଯିବେ।