ଭୁବନେଶ୍ଵର: ଆସନ୍ତା ଡିସେମ୍ବର ୪ ତାରିଖ ଦିନ ପୁରୀ ବ୍ଲୁ ଫ୍ଲାଗ ବିଚରେ ଭାରତୀୟ ନୌସେନା ପକ୍ଷରୁ ନୌସେନା ଦିବସ ପାଳନ କରାଯିବ। ଯେଉଁଥିରେ ରାଷ୍ଟ୍ରପତି ଙ୍କ ସମେତ ଅନେକ ଭିଭିଆଇପି ଯୋଗ ଦେବାର କାର୍ଯ୍ୟକ୍ରମ ଥିବା ବେଳେ ସେମାନଙ୍କ ଆଗମନ କୁ ନଜରରେ ରଖି ପୋଲିସ ପକ୍ଷରୁ ସମୀକ୍ଷା କରାଯାଇଅଛି। ରାଷ୍ଟ୍ରପତିଙ୍କ ଶ୍ରୀମନ୍ଦିର ଗସ୍ତ ସହ ମହାପ୍ରଭୁଙ୍କ ଦର୍ଶନ ଓ ପରେ ଗୋପବନ୍ଧୁ ଆୟୁର୍ବେଦ ମହାବିଦ୍ୟାଳୟ ହୀରକ ଜୟନ୍ତୀ ଉତ୍ସବରେ ଯୋଗ ଦାନ କାର୍ଯ୍ୟକ୍ରମ ରହିଅଛି।ପରେ ରାଷ୍ଟ୍ରପତି ନୌ ସେନା ଦିବସ ପାଳନ କାର୍ଯ୍ୟକ୍ରମରେ ଯୋଗଦାନ କୁ ନେଇ କଡା ସୁରକ୍ଷା ବ୍ୟବସ୍ଥା ଗ୍ରହଣ କରାଯିବ।ନୌସେନା ପକ୍ଷରୁ ଯୁଦ୍ଧ ଜାହାଜ ସମେତ ଏୟାରକ୍ରାଫ୍ଟ ସୋ ଓ କମାଣ୍ଡୋ ଅପରେସନର ପରାକ୍ରମ ପ୍ରଦର୍ଶିତ ହେବ।
ତେବେ ସୁରକ୍ଷା ଓ ଶୃଙ୍ଖଳିତ ଟ୍ରାଫିକ ବ୍ୟବସ୍ଥା ନେଇ ୮୦ ପ୍ଲାଟୁନ ଫୋର୍ସ ଓ ୩୦୦ ଅଧିକାରୀ ମୁତୟନ ନେଇ ପୋଲିସ ଡିଜି ସୂଚନା ଦେଇଛନ୍ତି। ସେହିପରି ଭୁବନେଶ୍ୱରରୁ ପୁରୀ ମଧ୍ୟରେ ବ୍ୟାପକ ଟ୍ରାଫିକ ଵ୍ୟଵସ୍ଥା ସମେତ ସିସିଟିଭି କ୍ୟାମେରା ଲଗାଯାଇ ବିଭିନ୍ନ ସ୍ଥାନରେ କଣ୍ଟ୍ରୋଲ ରୁମ ଦ୍ୱାରା ଏହାକୁ ନିୟନ୍ତ୍ରଣ କରାଯିବ।ତେବେ ଆଜି ପୋଲିସ ଡିଜି ଶ୍ରୀମନ୍ଦିର ସମେତ ସମଙ୍ଗ ପାର୍କିଙ୍ଗ ଅଂଚଳ ବ୍ଲୁ ଫ୍ଲାଗ ବିଚ ଅଂଚଳକୁ ବରିଷ୍ଠ ଅଧିକାରୀ ଙ୍କ ସହ ବୁଲି ଦେଖିଥିବା ବେଳେ ଜିଲ୍ଲା ପୋଲିସ କାର୍ଯ୍ୟାଳୟ ଠାରେ ସମୀକ୍ଷା କରିଥିଲେ।
ରାଷ୍ଟ୍ରପତିଙ୍କ ସହ ନୌ ସେନାର ବହୁ ବରିଷ୍ଠ ଅଧିକାରୀ ଓ ବିଭିନ୍ନ ନିମନ୍ତ୍ରିତ ଅତିଥିଙ୍କୁ ମିଶାଇ ୭୫୦୦ ଅତିଥି ଯୋଗ ଦେବାର କାର୍ଯ୍ୟକ୍ରମ ରହିଛି। ଦେଶାତ୍ମବୋଧକ ଚେତନା ଜାଗ୍ରତ କରୁଥିବା ଏହି ବିରଳ ତଥା ଆକର୍ଷଣୀୟ ଦୃଶ୍ୟ ଦେଖିବା ପାଇଁ ଲକ୍ଷାଧିକ ଲୋକଙ୍କ ସମାଗମକୁ ଦୃଷ୍ଟିରେ ରଖି ସବୁ ପ୍ରକାର ବ୍ୟବସ୍ଥା ଗ୍ରହଣ କରାଯାଇଛି।
