Tag: ବିଜେପି

ଭୁବନେଶ୍ବର: ବିଭିନ୍ନ ନିର୍ବାଚନ ଆଉ ଉପନିର୍ବାଚନରେ ଧର୍ମେନ୍ଦ୍ରଙ୍କ ନେତୃତ୍ବ ହାରିବା ପରେ ବର୍ତ୍ତମାନ ତାଙ୍କ ଧର୍ମପତ୍ନୀ ରାଜନୈତିକ ମଇଦାନକୁ ଲମ୍ପ ପ୍ରଦାନ କରିଛନ୍ତି। ଯାହାର ପ୍ରମାଣ ବର୍ତ୍ତମାନ ତାଳଚେର ଅଞ୍ଚଳରେ ଦେଖିବାକୁ ମିଳିଛି। ସେଠାରେ ତାଙ୍କ ପତ୍ନୀ ମୃଦୁଳା ପ୍ରଧାନ କେନ୍ଦ୍ର ସରକାରଙ୍କ ଉଜ୍ଜଳା ଗ୍ୟାସ ବଣ୍ଟନ କରିବା ସହିତ ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଉଛନ୍ତି। ତାଙ୍କର ଏହି ଗସ୍ତକୁ ସଫଳ କରିବା ପାଇଁ ଧର୍ମେନ୍ଦ୍ରଙ୍କ ପୁରା ଟିମ ଲାଗିପଡିଛନ୍ତି।

ମୃଦୁଳାଙ୍କ ପାଇଁ ତାଳଚେର ଅଞ୍ଚଳରେ ବିଭିନ୍ନ ମଞ୍ଚ ବା ସଭାସମିତର ଆୟୋଜନ ହେବାରେ ଲାଗିଛି। ବର୍ତ୍ତମାନ ମୃଦୁଳୁ ନୂଆଦିଲ୍ଲୀରେ କମ ତାଳଚେରରେ ବେଶୀ ସମୟ ଦେବେ ବୋଲି ତାଙ୍କ ନିକଟତମ ମହଲରୁ ପ୍ରକାଶ ପାଇଛି। ମୁଖ୍ୟତଃ ଜଣେ ନାରୀ ଏବଂ ଜଣେ ଟାଣୁଆ ମନ୍ତ୍ରୀଙ୍କ ପତ୍ନୀ ତଥା ପୂର୍ବତନ କେନ୍ଦ୍ରମନ୍ତ୍ରୀଙ୍କ ବୋହୁ ଭାବେ ତାଙ୍କର ତାଳଚେରରେ ବେଶ ଖାତିର ରହିଛି। ଫଳରେ ତାଙ୍କ ସଭାରେ ଲୋକଙ୍କ ଭିଡ ମଧ୍ୟ ପରିଲକ୍ଷିତ ହେବାରେ ଲାଗିଛି।

କଣ କରନ୍ତି ମୃଦୁଳା ପ୍ରଧାନ, କଣ ତାଙ୍କର ଯୋଗ୍ୟତା

ଧର୍ମେନ୍ଦ୍ରଙ୍କ ପତ୍ନୀ ମୃଦୁଳା ଠାକୁର ପ୍ରଧାନ ହେଉଛନ୍ତି ହିମାଚଳ ପ୍ରଦେଶର ଝିଅ। ସେ ଜଣେ ଏବିଭିପିର ଟାଣୁଆ କର୍ମି। ସେ ଛାତ୍ରୀ ଜୀବନରେ ଜମ୍ମୁ, ହିମାଚଳ ପ୍ରଦେଶ ଏବଂ ପଂଜାବର ଝିଅମାନଙ୍କୁ ଏବିଭିପିରେ ସାମିଲ କରିବା ପାଇଁ କାର୍ଯ୍ୟ କରୁଥିଲେ। ଧର୍ମେନ୍ଦ୍ର ମଧ୍ୟ ଛାତ୍ର ଜୀବନରେ ଏବିଭିପିର ସକ୍ରିୟ ସଦସ୍ୟ ଥିଲେ। ବିଭିନ୍ନ କାର୍ଯ୍ୟକ୍ରମରେ ଦେଖା ସାକ୍ଷାତ ଭିତରେ ଉଭୟ 1995 ମସିହାରେ ବିବାହ ବନ୍ଧନରେ ଆବଦ୍ଧ ହେଲେ। ମୃଦୁଳା ଏବିଭିପି ପରେ ହିମାଚଳ ପ୍ରଦେଶ ହାଇକୋର୍ଟରେ କିଛି ବର୍ଷ ଓକିଲ ଭାବେ ବୃତ୍ତିଗତ ଜୀବନ ଆରମ୍ଭ କରିଥିଲେ।

ହେଲେ ବିବାହ ପରେ ସେ ଆଉ ଓକିଲାତି ପେଶା କାର୍ଯ୍ୟ କରିପାରିଲେ ନାହିଁ। ବିବାହ ପରେ ସେ ଉତ୍କଳ ବିଶ୍ବବିଦ୍ୟାଳୟରୁ ଏଲଏମଏମ ଡିଗ୍ରୀ ହାସଲ କରିଛନ୍ତି। ବର୍ତ୍ତମାନ ତାଙ୍କର ଗୋଟିଏ ପୁଅ ଓ ଝିଅ ଅଛନ୍ତି। ଧର୍ମେନ୍ଦ୍ର ମନ୍ତ୍ରୀ ହେବା ପରେ ସେ ଜଣେ ଗୃହିଣୀ ଭାବେ ଜୀବନ ଅତିବାହିତ କରୁଛନ୍ତି। ତେବେ ସେ ବିବାହ କରିବା ପରେ ବର୍ତ୍ତମାନ ଓଡିଆ ପରିବାର ଭିତରେ ରହି ଭଲ ଓଡିଆ କହିପାରୁଛନ୍ତି।

ମୃଦୁଳା କଣ ଆଗରୁ ରାଜନୀତି କରୁଥିଲେ ନା ଏବେ ଆରମ୍ଭ କରୁଛନ୍ତି

ବିବାହ ପରେ ମୃଦୁଳା ଏବିଭିପି କିମ୍ବା ରାଜନୀତିରେ ଆଉ ସକ୍ରିୟ ନ ଥିଲେ। ହେଲେ ଧର୍ମେନ୍ଦ୍ର ମନ୍ତ୍ରୀ ହେବା ପରେ ଦିଲ୍ଲୀରେ ତାଙ୍କୁ ବିଭିନ୍ନ ଓଡିଆ ଅନୁଷ୍ଠାନ ତରଫରୁ ସଭାସମିତିରେ ଯୋଗ ଦେବା ପାଇଁ ନିମନ୍ତ୍ରଣ ଆସିଲା। ଫଳରେ ସେ କେତେକ ଓଡିଆ ଅନୁଷ୍ଠାନରେ ଯୋଗ ଦେବା ସହିତ ରିତିମତ ସେମାନଙ୍କ ସହିତ ସଂପର୍କରେ ରହିଲେ। ଫଳରେ ଧର୍ମେନ୍ଦ୍ରଙ୍କୁ ସମର୍ଥନ କରିବା ପାଇଁ ନୂଆଦିଲ୍ଲୀର ଓଡିଆ ସଂଗଠନକୁ ମୃଦୁଳା ସୁଦୃଢ କରିବାରେ ଲାଗିଲେ।

ଏହିପରି କାର୍ଯ୍ୟ ପରେ ସେ ଗତ ଦିଲ୍ଲୀ ନିର୍ବାଚନରେ ପ୍ରଚାର ମଇଦାନକୁ ଓହ୍ଲାଇ ଥିଲେ। ଦିଲ୍ଲୀରେ ବିଜେପି ପ୍ରାର୍ଥୀଙ୍କ ପାଇଁ ସେ ଓଡିଆ ଭୋଟ ସାଉଁଟିବାରେ ଲାଗିଥିଲେ। ଏପରିକି ଅନେକ ସ୍ଥାନରେ ସେ ଧର୍ମେନ୍ଦ୍ରଙ୍କ ସହିତ ମଧ୍ୟ ପ୍ରଚାରରେ ସାମିଲ କରିଥିଲେ। ଏହିପରି ଭାବେ ସେ ଆକସ୍ମିକ ଭାବେ ରାଜନୀତିରେ ନିଜକୁ ସାମିଲ କରାଇଛନ୍ତି।

ହେଲେ ବର୍ତ୍ତମାନ ତାଳଚେରରେ ସେ କୁଆଡେ ନିଜର ରାଜନୈତିକ କର୍ମଭୂମି କରିବେ ବୋଲି ନିଷ୍ପତି କରିଛନ୍ତି। ଫଳରେ ସେଠାରେ ସେ ଉଜ୍ଜଳା ବଣ୍ଟନ କରିବା ସହିତ ବିଭିନ୍ନ କାର୍ଯ୍ୟକ୍ରମରେ ନିଜକୁ ସାମିଲ କରାଇବାରେ ଲାଗିଛନ୍ତି। ଭବିଷ୍ୟତରେ ସେ ତାଳଚେରରୁ ବିଜେପି ପ୍ରାର୍ଥୀ ହେବେ ବୋଲି ତାଙ୍କର ସମର୍ଥକମାନେ ଆଲୋଚନା କରିବାରେ ଲାଗିଛନ୍ତି। ମୃଦୁଳାଙ୍କ ଏପରି ରାଜନୈତିକ କାର୍ଯ୍ୟକ୍ରମ ଓଡିଶା ବିଜେପିରେ ଏକ ନୂଆ  ସମୀକରଣ ସୃଷ୍ଟି ହେଲାଣି।

ଭୁବନେଶ୍ବର: ଆମେ ବହୁତ ପୁରୁଣା କଥା କହିବୁ ନାହିଁ। ଏଇ ଅଳ୍ପ ଦିନର ଘଟଣା। ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀଙ୍କ କେଉଁଝର ଗସ୍ତ କରିଥିଲେ। ଉଦ୍ଦେଶ୍ୟ ନ ଥିଲା ତାଙ୍କର ନିଜ ଅନୁଷ୍ଠାନର କାର୍ଯ୍ୟକ୍ରମରେ ଯୋଗଦେବା। ଉଦ୍ଦେଶ୍ୟ ଥିଲା ରାଜ୍ୟରେ ବିଜେପିକୁ କିପରି ସୁଦୃଢ କରିବା। କାରଣ କେଉଁଝରରେ ସଂପୂର୍ଣ୍ଣ ଭାବେ ବିଜେପିର ଅର୍ଥାତ ଦଳୀୟ ସଭା କରାଯାଇଥିଲା। ହେଲେ ଦଳର କୌଣସି ତୁଙ୍ଗ ନେତା ସେହି ସଭାରେ ନ ଥିଲେ। ଥିଲେ କେବଳ ଜିଲ୍ଲା ବିଜେପି କର୍ମକର୍ତ୍ତା।

ତେବେ ଏହି ଗୋଟିଏ ଘଟଣା ନୁହେଁ। ଏହିପରି ବହୁ ଘଟଣା ଅନେକ ଜିଲ୍ଲାରେ ଘଟିଛି। ପ୍ରତି ମାସରେ ଅପରାଜିତା ବିଭିନ୍ନ ଜିଲ୍ଲା ଗସ୍ତରେ ଯାଉଛନ୍ତି। ସେଠାରେ ଦଳୀୟ ସଭା କରିବାରେ ଲାଗିଛନ୍ତି। ଯଦି ସେ ତାଙ୍କ ଅନୁଷ୍ଠାନ ସଭା କରୁଥା’ନ୍ତେ ହୁଏତ ପ୍ରଶ୍ନ କରାଯାଇ ନ ଥାଆନ୍ତା। ହେଲେ ସେ ବିଜେପି ଦଳର କର୍ମିଙ୍କୁ ନେଇ ବିରାଟ ସଭା ଓ ରାଲି କରୁଛନ୍ତି। ଆଉ ସେଥିରେ ନା ବିଜେପି ସଭାପତି ଯାଉଛନ୍ତି ନା କୌଣସି ଆଗଧାଡିର ନେତା। ସେଠାରେ କେବଳ ଅପରାଜିତା ଆଉ ଅପରାଜିତା।

ତେବେ ଅପରାଜିତା ଏପରି ଏକାକି ସଂଗଠନ କରିବାର ଉଦ୍ଦେଶ୍ୟ କଣ। ସେ କଣ ବିଜେପିର ସର୍ବେସର୍ବା କି ? ଏହିପରି ବିଭିନ୍ନ ପ୍ରଶ୍ନ ସାଧାରଣରେ ଆଲୋଚନା ହେବାରେ ଲାଗିଛି। କାରଣ ଅପରାଜିତା ହେଉଛନ୍ତି ଭୁବନେଶ୍ବରର ସାଂସଦ। ସେ କେବଳ ତାଙ୍କ ନିର୍ବାଚନ ମଣ୍ଡଳିରେ ସଭା କଲେ କେହି କିଛି କହିବାର ନାହିଁ। ହେଲେ ଏକାକୀ ସାରା ଓଡିଶା ଭ୍ରମଣ କରି ବିଜେପିର ବାନା ଉଡେଇବାର କାରଣ କଣ ?

ବର୍ତ୍ତମାନ ଆଉ ଏକ ଘଟଣା ସଂପର୍କରେ ଏଇଠି ଉପସ୍ଥାପନା କରିବୁ। ତାହା ହେଲା ଅପରାଜିତାଙ୍କ ରାୟଗଡା ଗସ୍ତ। ସେ ଗତ ମାସରେ ରାୟଗଡା ଯାଇଥିଲେ। ସେ ଯିବା ପୂର୍ବରୁ ରାଜ୍ୟ ବିଜେପିର ତରଫରୁ ଫତୁଆ ଜାରି କରାଗଲା। ତାହା ହେଲା ଯେ ଅପରାଜିତାଙ୍କ ସଭାକୁ କୌଣସି ବିଜେପି କର୍ମି ଯିବେ ନାହିଁ। ଏ କଥା ଅପରାଜିତା ଜାଣିବା ସତ୍ବେ ମଧ୍ୟ ସେ ରାୟଗଡା ଗସ୍ତ କରିଥିଲେ। ସେଠାରେ ବିଜେପି କର୍ମି କମ ଥିଲେ, ହେଲେ ସାଧାରଣ ଲୋକେ ଅନେକ ଥିଲେ। ହେଲେ ସେଠାରେ ଏକ ବଡମ୍ବନାର ବିଷୟ ଘଟିଲା। ତାହା ହେଲା, ଅପରାଜିତାଙ୍କ ସଭାକୁ ଯେଉଁ କେତେଜଣ ବିଜେପି ନେତା ଯାଇଥିଲେ ସେମାନଙ୍କୁ ରାଜ୍ୟ ବିଜେପି ଦଳରୁ ନିଲମ୍ବିତ କରିଦିଆଗଲା।

ଏହି ଘଟଣାରୁ ସ୍ପଷ୍ଟ ହେଲା ଯେ, ଅପରାଜିତା ଯାହା କରୁଛନ୍ତି ତାହା ରାଜ୍ୟ ବିଜେପିର ହଜମ ହେଉ ନାହିଁ। ସେ ଯେଉଁଠି ସଭା କରୁଛନ୍ତି ତାହାକୁ ଭଣ୍ଡୁର କରିବା ପାଇଁ ଏକ ଗୋଷ୍ଟୀ ରିତମତ କସରତ କରିବାରେ ଲାଗିଛନ୍ତି। ତେବେ ସେ ସବୁକୁ ଭ୍ରୁକ୍ଷେପ ନ କରି ଅପରାଜିତା ଏକାକୀ ଲଢେଇ ଜାରି ରଖିଛନ୍ତି। ଏଥିରୁ ସ୍ପଷ୍ଟ ହେଲା ଯେ, ତାଙ୍କୁ ଯେତେ ବିରୋଧ କରାଯିବ ସେ ସେତିକି ଉତ୍ସାହିତ ହୋଇ ସଭା ରାଲି କରିବେ। କେହି ରୋକିପାରିବେ ନାହିଁ।

ତେବେ ସାଧାରଣରେ ଏକ ସନ୍ଦେହ ହେବାରେ ଲାଗିଛି ଯେ ଅପରାଜିତା ଏପରି ଏକାକୀ ଦଳିୟ ସଂଗଠନ କରିବା ପାଇଁ ତାଙ୍କୁ କିଏ ଶକ୍ତି ଯୋଗାଉଛି। କାରଣ କିଛି ଅଦୃଶ୍ୟ ଶକ୍ତି ନ ମିଳିଲେ ଧର୍ମେନ୍ଦ୍ର ପ୍ରଧାନ ପରି ନେତା ଆଉ ତାଙ୍କ ଚେଲାଚାମୁଣ୍ଡାଙ୍କୁ ଅପରାଜିତା ଟକ୍କର ଦିଅନ୍ତେ କିପରି। ଦୀର୍ଘ ବର୍ଷ ଧରି ଓଡିଶା ବିଜେପି ଅର୍ଥ ଧର୍ମେନ୍ଦ୍ର ପ୍ରଧାନଙ୍କୁ ହିଁ ବୁଝାଉ ଥିଲା। ଏବେ ବି ମଧ୍ୟ ସେହି ଅବସ୍ଥା ଅଛି। ହେଲେ ତାଙ୍କ ଚକ୍ରବୁହ୍ୟକୁ ଭେଦ କରି ଅପରାଜିତା ଆଗକୁ ବଢିବାରେ ଲାଗିଛନ୍ତି। ତେଣୁ ଏ କ୍ଷେତ୍ରରେ ଦିଲ୍ଲୀ ଆର୍ଶିବାଦ ନ ଥିଲେ ତାହା କେବେ ସମ୍ଭବ ହୁଅନ୍ତା ନାହିଁ।

ତେବେ ଏହାର କାରଣରେ ଏତିକି ଅନୁମାନ କରାଯାଇପାରେ ଯେ, ଧର୍ମେନ୍ଦ୍ରଙ୍କୁ ରାଜ୍ୟ ସଂଗଠନ କରିବା ପାଇଁ ଯେଉଁ ଭଲି ଶକ୍ତି ପ୍ରଦାନ କରାଯାଇଥିଲା, ସେଥିରେ ସେ ସଫଳ ହୋଇପାରିଲେ ନାହିଁ। ଧର୍ମେନ୍ଦ୍ର ଓଡିଶାରେ ଜଣେ ଫେଲ୍ ନେତା ଭାବେ ପରିଚିତ ହେଲେ। ବାରମ୍ବାର ନିର୍ବାଚନ ଆଉ ଉପନିର୍ବାଚନରେ ହାରିବା ଦ୍ବାରା ତାଙ୍କର ସଂଗଠନ ପ୍ରତି ଦିଲ୍ଲୀର ସନ୍ଦେହ ସୃଷ୍ଟି ହେଲା। ଫଳରେ ତାଙ୍କୁ ଶିକ୍ଷା ଦେଇ ବର୍ତ୍ତମାନ ଅପରାଜିତାଙ୍କୁ କେନ୍ଦ୍ରୀୟ ନେତୃତ୍ବ ଆଗକୁ ଆଣିଛନ୍ତି।

ତେବେ ଏହା ନିଶ୍ଚିତ କୁହାଯାଇ ପାରିବ ଯେ, ଯେ ପର୍ଯ୍ୟନ୍ତ ଧର୍ମେନ୍ଦ୍ର ଶକ୍ତିଶାଳି ଥିବେ ସେ ପର୍ଯ୍ୟନ୍ତ ଅପରାଜିତାଙ୍କୁ ସଂଗଠନ କରିବା ଭରୀ କଷ୍ଟକର ହେବ। ତଥାପି ଅପରାଜିତା ଯେତିକି ସଂଗଠନ କରୁଛନ୍ତି ତାହାକୁ ନେଇ ରାଜ୍ୟ ବିଜେପିର ବହୁ ତୁଙ୍ଗ ନେତା ଖାଲି ଦାନ୍ତ କଡମଡ କରିବା ଛଡା ଆଉ କିଛି କରିପାରୁ ନାହାଁନ୍ତି।

ଭୁବନେଶ୍ବର: ରାଜ୍ୟ ବିଜେପି ମମିତା ହତ୍ୟା ଘଟଣାରେ ଏକ ପ୍ରକାରର ବାଉଳା ହୋଇ ପଡିଛି କହିଲେ ଅତ୍ୟୁକ୍ତି ହେବ ନାହିଁ। କାରଣ ବାରମ୍ବାର ତୁମ୍ବି ତୋଫାନ ଆଉ ହୋ ହାଲ୍ଲା କଲେ ମଧ୍ୟ ମୁଖ୍ୟମନ୍ତ୍ରୀ ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ହଟାଉ ନାହିଁନ୍ତି। ଫଳରେ ଦଳ ରାଗିଯାଇ ବର୍ତ୍ତମାନ ମନ୍ତ୍ରୀମାନଙ୍କ ଗସ୍ତକୁ ବିରୋଧ କରିବାରେ ଲାଗିଛି। ମନ୍ତ୍ରୀମାନେ ଯେଉଁଆଡେ ଯାଉଛନ୍ତି ତାଙ୍କ ଗାଡି ଉପରକୁ ଅଣ୍ଡା ଫିଙ୍ଗୁଛନ୍ତି।

ହେଲେ ଆଶ୍ଚର୍ଯ୍ୟର କଥା ଯେ, ଯେଉଁ ବୈଠକକୁ ବିଜେପି ବିରୋଧ କରୁଛି ସେହି ବୈଠକରେ ବିଜେପି ସାଂସଦ ମନ୍ତ୍ରୀଙ୍କ ସହିତ ବସୁଛନ୍ତି। ଏକାଠି କୋଳାକୋଳି ହେଉଛନ୍ତି। ଏହିପରି ଘଟଣା ଝାରସୁଗୁଡାରେ ହୋଇଥିବା ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନାର ସ୍ମାର୍ଟ କାର୍ଡ ବଣ୍ଟନରେ ଦେଖିବାକୁ ମିଳିଛି। ଯେଉଁଥିରେ ବରଗଡ ବିଜେପି ସାଂସଦ ସୁରେଶ ପୂଜାରୀ ଯୋଗ ଦେଇଥିଲେ। ଆଉ ମୁଖ୍ୟମନ୍ତ୍ରୀଙ୍କ ସ୍ମାର୍ଟ କାର୍ଡ ବଣ୍ଟନକୁ ସଫଳ କରାଇଥିଲେ।

ଝାରସୁଗଡାରେ ଆୟୋଜିତ ଏହି ସଭା ମଞ୍ଚରେ ସ୍ବାସ୍ଥ୍ୟମନ୍ତ୍ରୀ ନବ ଦାସ, ମନ୍ତ୍ରୀ ସୁଶାନ୍ତ ସିଂ, ବିଧାୟକ କିଶୋର ମହାନ୍ତି ପ୍ରମୁଖ ଯୋଗ ଦେଇଥିଲେ। ମୁଖ୍ୟମନ୍ତ୍ରୀ ଭିଡିଓ କଂନଫ୍ରେସିଂ ମାଧ୍ୟମରେ ଯୋଗ ଦେଇଥିଲେ। ବଡକଥା ହେଲା ଏହି ସଭାକୁ ବିଜେପି ବିରୋଧ କରୁଥିବା ବେଳେ ସେହି ବୈଠକରେ ବରଗଡ ସାଂସଦ ସୁରେଶ ପୂଜାରୀ ବସିଥିଲେ। ଯାହାକୁ ନେଇ ବିଭିନ୍ନ ମହଲରେ ସମାଲୋଚନା କରାଯାଉଛି।

ପୂର୍ବରୁ ସେହି ବରଗଡରେ ଆଉ ଏକ ସଭା ହୋଇଥିଲା ଯେଉଁଥିରେ ବିଜେପି କର୍ମିମାନେ ମନ୍ତ୍ରୀମାନଙ୍କୁ ଅଣ୍ଡାମାଡ କରି ସଭାକୁ ବିରୋଧ କରିଥିଲେ। ବିଜେଡି ବିଜେପି କର୍ମି ମୁହାଁମୁହିଁ ହୋଇଥିଲେ। ହେଲେ ସେତେବେଳେ ସେହି ବୈଠକରେ ବିଜେପି ସାଂସଦ ସୁରେଶ ପୂଜାରୀ ନିଜ ନିର୍ବାଚନ ମଣ୍ଡଳି ହୋଇଥିଲେ ମଧ୍ୟ ଯୋଗଦେଇ ନ ଥିଲେ। ସେହି ସଭାରେ ମୁଖ୍ୟମନ୍ତ୍ରୀ ନିଜେ ଉପସ୍ଥିତ ଥିଲେ। ଗୋଟିଏ ସଭାରେ ଯୋଗଦେଲେ ନାହିଁ ହେଲେ ଆଉ ଏକ ସଭାରେ ସେ ଯୋଗଦେଲେ। ଯାହାକୁ ନେଇ ସାଂସଦଙ୍କ ଭୂମିକାକୁ ନେଇ ସନ୍ଦେହ ସୃଷ୍ଟି ହୋଇଛି।

ଏ ନେଇ ସୁରେଶ ପୂଜାରୀଙ୍କୁ ପଚରାଯିବାରୁ ତାଙ୍କର ଉତ୍ତର ଭିନ୍ନ ପ୍ରକାରର ଥିଲା। ଯାହାକୁ କୁହାଯିବ ପିଲାଳିଆମି ଉତ୍ତର।  ସେ କହିଲେ ଯେ ବରଗଡରେ ମୁଖ୍ୟମନ୍ତ୍ରୀ ନିଜେ ଉପସ୍ଥିତ ଥିଲେ, ସେଥିପାଇଁ ଯୋଗ ଦେଇ ନ ଥିଲି। ହେଲେ ଝାରସୁଗୁଡାରେ ମୁଖ୍ୟମନ୍ତ୍ରୀ ନିଜେ ନ ଆସି ଭଚ୍ୟୁୟାଲି ଥିଲେ। ସେଥିପାଇଁ ଯୋଗଦେଲି। ଏପରି ଉତ୍ତରକୁ ନେଇ ଅନେକ ସମାଲୋଚନା ହେଉଛି। କାରଣ ଯାହା ହେଲେ ବି ମୁଖ୍ୟମନ୍ତ୍ରୀ ସେହି ସଭାରେ ଭାଷଣ ଦେଇଥିଲେ ଏବଂ ତାହା ସରକାରୀ କାର୍ଯ୍ୟକ୍ରମ ଥିଲା। ଯାହାକୁ ବିଜେପି ବିରୋଧ କରୁଛି।

ଏଥିରୁ ସ୍ପଷ୍ଟ ହୋଇଛି ଯେ, ବିଜେପିର କିଏ କେତେବେଳେ କଣ କରୁଛି ତାହା ଜାଣିବା ମୁସ୍କିଲ। କହିବାକୁ ଗଲେ ଦଳରେ ଯିଏ ଯାହା ଚାହିଁବ ସିଏ ତାହା କରିବ। ଏଥିରେ ଯେପରି କୌଣସି ଲଗାମ ନାହିଁ। ମମିତା ଘଟଣା ପୂର୍ବରୁ ଏହି ସ୍ମାର୍ଟ କାର୍ଡ ବଣ୍ଟନ ଉତ୍ସବରେ ବିଜେପି ବିଧାୟକମାନେ ଯୋଗ ଦେଇଥିଲେ। ହେଲେ ସେତେବେଳେ ତାହାକୁ ସମାଲୋଚନା କରାଯାଉ ନ ଥିଲା। ହେଲେ ବର୍ତ୍ତମାନ ପରିସ୍ଥିତିରେ ବିଜେପି ଦଳର ନିତି ପଦାରେ ପଡିଛି କହିଲେ ଅତ୍ୟୁକ୍ତି ହେବ ନାହିଁ।