ଭୁବନେଶ୍ୱର: ଶିଳ୍ପାୟନ ମାଧ୍ୟମରେ ନୂତନ ନିଯୁକ୍ତି ତଥା ଅତିରିକ୍ତ ଜୀବିକା ନିର୍ବାହ ଦିଗରେ ଆଉ ଏକ ନିର୍ଦ୍ଦିଷ୍ଟ ପଦକ୍ଷେପରେ ଆଜି ମୁଖ୍ୟ ଶାସନ ସଚିବ ଶ୍ରୀ ସୁରେଶ ଚନ୍ଦ୍ର ମହାପାତ୍ରଙ୍କ ଅଧ୍ୟକ୍ଷତାରେ ଡିଜିଟାଲ ମୋଡରେ ରାଜ୍ୟ ସ୍ତରୀୟ ସିଙ୍ଗିଲ ୱିଣ୍ଡୋ କ୍ଲିୟରାନ୍ସ ଅଥରିଟି ବୈଠକ ଅନୁଷ୍ଠିତ ହୋଇଛି। ଏଥିରେ ଆଜି ୧୦ଟି ପ୍ରକଳ୍ପକୁ ଅନୁମୋଦନ ପ୍ରଦାନ କରାଯାଇଛି।
ଏହି ପ୍ରକଳ୍ପଗୁଡିକରେ ପାଖାପାଖି ୨୦୦୫.୮୯ କୋଟି ଟଙ୍କା ବିନିଯୋଗ ହେବ। ଏଥିରେ ୩୫୪୫ ଜଣଙ୍କ ପାଇଁ ପ୍ରତ୍ୟକ୍ଷ ନିଯୁକ୍ତି ମିଳିବ। ଏଥିସହିତ ବହୁ ଲୋକଙ୍କୁ ପରୋକ୍ଷ ନିଯୁକ୍ତି ମିଳିପାରିବ ବୋଲି କୁହାଯାଇଛି। ପୁଞ୍ଜି ବିନିଯୋଗ ପ୍ରସ୍ତାବର ଆର୍ଥିକ ଏବଂ ବୈଷୟିକ ବିବରଣୀ ଉପସ୍ଥାପନ କରି ଶିଳ୍ପ ବିଭାଗର ପ୍ରମୁଖ ସଚିବ ହେମନ୍ତ କୁମାର ଶର୍ମା କହିଛନ୍ତି ଯେ ଅଧିକାଂଶ ପ୍ରକଳ୍ପ ଫାର୍ମାସ୍ୟୁଟିକାଲ୍, ଖାଦ୍ୟ ପ୍ରକ୍ରିୟାକରଣ, ପର୍ୟ୍ୟଟନ ଏବଂ ଭିତ୍ତିଭୂମି ଭଳି କ୍ଷେତ୍ରରେ ଅଧିକ ରହିଛି। ସେଗୁଡିକ ହେଲା…
୧- ଖୋର୍ଦ୍ଧାରେ ସୁମନ ରିଏଲ ମିଡିଆ କଂପାନୀର ଏକ ଫାର୍ମାଚ୍ୟୁଟାକଲ ପ୍ରଡକ୍ସନ ଆଣ୍ଡ ରିସର୍ଚ୍ଚ ୟୁନିଟ। ଏଥିରେ ୨୦୦ କୋଟି ଟଙ୍କା ବିନିଯୋଗ ହେବ। ଏଥିରେ ୧୨୮୦ ଜଣ ପ୍ରତ୍ୟେକ୍ଷ ନିଯୁକ୍ତି ପାଇବେ।
୨-ଯାଜପୁର ଜିଲ୍ଲାରେ ସାନିଭିରା କଂପାନୀ ଏକ କାର୍ବନ ଇଲଟ୍ରୋଏଡ ପେଷ୍ଟ ମାନ୍ୟୁଫାକଚରିଂ ଶିଳ୍ପ ପ୍ରତିଷ୍ଠା କରିବ। ଏଥିରେ ୨୦୫ କୋଟି ଟଙ୍କା ବିନିଯୋଗ ହେବ। ଏଥିରେ ପ୍ରତ୍ୟେକ୍ଷ ଭାବେ ୨୬୦ ଜଣ ନିଯୁକ୍ତି ହେବେ।
୩-ଜଗତସିଂହପୁର ଜିଲ୍ଲାରେ ସାଇ ବଲ୍କ ବ୍ୟାଗ କଂପାନୀ ୧୩୫ କୋଟି ଟଙ୍କା ବିନିଯୋଗ କରି ଏକ ରସାୟନିକ କାରଖାନା ପ୍ରତିଷ୍ଠା କରିବ। ଏଥିରେ ୩୦୧ ଜଣ ନିଯୁକ୍ତି ପାଇବେ।
୪-ଯାଜପୁରରେ ୟୁନାଇଟେଡ ଫେରୋକାଷ୍ଟ ୨୬୧ ଟଙ୍କା ବିନିଯୋଗରେ ଏକ ଫେରୋ ଆଲାଏଜ କାରଖାନା ପ୍ରତିଷ୍ଠା କରିବ। ଏଥିରେ ୩୭୬ ଜଣ ସିଧା ନିଯୁକ୍ତି ହେବେ।
୫- କେଉଁଝର ଜିଲ୍ଲାରେ ବାଲେନ୍ତୋ ଏଣ୍ଟ୍ରପ୍ରାଇଜସ ୭୭୫ କୋଟି ଟଙ୍କା ବିନିଯୋଗ କରି ଲୁହା ଓର ଏବଂ ପାଲେଟ ପ୍ଲାଣ୍ଟ ପ୍ରତିଷ୍ଠା କରିବ। ଏଥିରେ ୩୧୪ ଜଣ ସିଧା ନିଯୁକ୍ତି ହେବେ।
୬- କଟକରେ ଓରିକ୍ଲିନ କଂପାନୀ ୮୮ କୋଟି ଟଙ୍କା ବିନିଯୋଗରେ ଜାମ, ଜେଲ୍ଲି, ସସ୍ ପ୍ରଭୃତି ଉତ୍ପାଦନ କାରଖାନା ପ୍ରତିଷ୍ଠା କରିବ। ଏଥିରେ ସିଧା ୧୬୦ ଜଣ ନିଯୁକ୍ତି ପାଇବେ।
୭- ଖୋର୍ଦ୍ଧାରେ ଡିଏନ ସି ସେଲ୍ସ କଂପାନୀ ୫୦ କୋଟି ଟଙ୍କା ବିନିଯୋଗ କରି ଏକ ଚିଙ୍ଗୁଡି ପ୍ରକିୟାକରଣ କାରଖାନା କରିବ। ଏଥିରେ ସିଧା ୪୦୯ ଜଣ ନିଯୁକ୍ତି ପାଇବେ।
୮- ଝାରସୁଗୁଡାରେ ରୁନ୍ୟା ଆଲ୍ୟୁମିନିୟମ କଂପାନୀ ୮୦ କୋଟି ଟଙ୍କା ବିନିଯୋଗରେ ଆଲମ୍ୟୁନିୟମ ପାଉଡର ଉତ୍ପାଦନ କରିବ। ଏଥିରେ ୧୨୫ ଜଣ ନିଯୁକ୍ତି ହେବେ।
୯- ଗଂଜାମ ଗୋପାଳପୁରରେ ଥିବା ମେ ଫାୟାର ହୋଟେଲ ଆଣ୍ଡ ରିସୋର୍ଟ ୮୫ କୋଟି ଟଙ୍କା ବିନିଯୋଗରେ ଏହାର କଳେବର ବୃଦ୍ଧି କରିବ। ଏଥିରେ ୧୨୦ ଜଣ ନିଯୁକ୍ତ ହେବେ।
୧୦- ଯାଜପୁରରେ ନରେଶ କୁମାର ଆଣ୍ଡ କୋ କଂପାନୀ ୧୨୫ କୋଟି ଟଙ୍କାରେ ୱେରହାଉସିଂ ଏବଂ ଲଜିଷ୍ଟିକ ପାର୍କ ପ୍ରତିଷ୍ଠା କରିବ। ଏଥିରେ ୨୦୦ ଜଣ ନିଯୁକ୍ତି ପାଇବେ।
ପ୍ରକଳ୍ପଗୁଡିକୁ ମଞ୍ଜୁରୀ ଦେଇ ମୁଖ୍ୟ ଶାସନ ସଚିବ ଶ୍ରୀ ମହାପାତ୍ର ପ୍ରକଳ୍ପର ନିର୍ମାଣ ଏବଂ କାର୍ୟ୍ୟକ୍ଷମ ପାଇଁ ସମୟ ସୀମା ନିର୍ଦ୍ଧାରଣ କରିବାକୁ ଇପିକୋଲକୁ ନିର୍ଦ୍ଦେଶ ଦେଇଥିଲେ। ସଂପୃକ୍ତ ପ୍ରକଳ୍ପ ପ୍ରସ୍ତାବକଙ୍କ ଦ୍ବାରା ସମୟସୀମା ପାଳନକୁ ତୀକ୍ଷ୍ଣ ନଜର ରଖିବାକୁ ସେ ନିର୍ଦ୍ଦେଶ ଦେଇଛନ୍ତି। ନିବେଶକମାନଙ୍କୁ ଆହୁରି ଅଧିକ ନିଯୁକ୍ତି କରିବାକୁ କୁହାଯାଇଥିଲା।
ଅତିରିକ୍ତ ମୁଖ୍ୟ ଶାସନ ସଚିବ ରାଜସ୍ୱ ଏବଂ ବିପର୍ୟ୍ୟୟ ପରିଚାଳନା ଏବଂ ଜଙ୍ଗଲ, ପରିବେଶ ଏବଂ ଜଳବାୟୁ ପରିବର୍ତ୍ତନ ଶ୍ରୀ ସତ୍ୟବ୍ରତ ସାହୁ, ପ୍ରମୁଖ ସଚିବ ଶ୍ରୀ ହେମନ୍ତ କୁମାର ଶର୍ମା, ପ୍ରମୁଖ ସଚିବ ଶକ୍ତି ଶ୍ରୀ ନିକୁଞ୍ଜା ବିହାରୀ ଧଲ, ଅର୍ଥ ବିଭାଗର ପ୍ରମୁଖ ସଚିବ ଶ୍ରୀ ବିଶାଳ କୁମାର ଦେବ, ପର୍ଯ୍ୟଟନ ବିଭାଗର ପ୍ରମୁଖ ସଚିବ ଶ୍ରୀ ସୁରେନ୍ଦ୍ର କୁମାର, ପ୍ରମୁଖ ସଚିବ ଇସ୍ପାତ ଏବଂ ଖଣି ଶ୍ରୀ ଦେଓ ରଂଜନ କୁମାର ସିଂ, ପ୍ରମୁଖ ସଚିବ ପଞ୍ଚାୟତରାଜ ଏବଂ ପାନୀୟ ଜଳ ଶ୍ରୀ ଅଶୋକ କୁମାର ମୀନା, ଏମଡି ଇପିକୋଲ ଶ୍ରୀ ଭୁପେନ୍ଦ୍ର ସିଂ ପୁନିୟା ଏବଂ ସମ୍ପୃକ୍ତ ବିଭାଗର ବରିଷ୍ଠ ଅଧିକାରୀମାନେ ଏହି ଆଲୋଚନାରେ ଭାଗ ନେଇଥିଲେ।
