Tag: ଅପରାଜିତା ଷଡଙ୍ଗୀ

ଭୁବନେଶ୍ବର: ନିର୍ବାଚନ ପରେ ପରେ ବେଶ କିଛିଦିନ ଧରି ଦଳୀୟ ରାଜନୀତିରେ ସକ୍ରିୟ ରହିଥିଲେ ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ। ହେଲେ ମାସଟିଏ ପରେ ସେ ସଂପୂର୍ଣ୍ଣ ନିରବି ଗଲେ। ଯାହାକୁ ନେଇ ରାଜ୍ୟ ରାଜନୀତିରେ ବେଶ ଚର୍ଚ୍ଚା ଚାଲିଛି। ସବୁବେଳେ ମିଡିଆ ଆଗକୁ ଆସି କିଛି ନା କିଛି ବିସ୍ପୋରକ ତଥ୍ୟ ଦେଉଥିବା ଅପରାଜିତା ଏବେ ପୁରା ଚୁପଚାପ କିପରି ହେଲେ ବୋଲି ପ୍ରଶ୍ନ ଉଠିଛି।

ସେତିକି ନୁହେଁ କିଛି ଦିନ ତଳେ ତାଙ୍କର ଦୃଢ ସମର୍ଥକ ତଥା ସଂଗଠକଙ୍କୁ ବିଜେପି ଦଳରୁ ନିଲମ୍ବନ କରିଦେଲା। ତାହାକୁ ନେଇ ଅପରାଜିତ ପୁରା ଚୁପ ରହିଲେ। ହେଲେ ସେ ଖେଳ ଖେଳିବାକୁ ଭଲ ପାଉଥିବାରୁ ସେହି ନିଲମ୍ବିତ ନେତାଙ୍କୁ ଆଣି ନିଜ ନିର୍ବାଚନ ମଣ୍ଡଳୀର ଦଳୀୟ କାର୍ଯ୍ୟକ୍ରମରେ ସାମିଲ କଲେ। ଏଥିରୁ ସ୍ପଷ୍ଟ ହେଲା ଯେ, ଦଳ ଗୋଟିଏ ପଟେ ଯାଉଥିବା ବେଳେ ଅପରାଜିତା ଅନ୍ୟପଟେ ଯାଉଛନ୍ତି। ଦଳ ପ୍ରତି ତାଙ୍କର ଭୟ ନାହିଁ।

ସେହିପରି ଭୁବନେଶ୍ବରରେ ସୁଭଦ୍ରା ପ୍ରଚାର ରଥ ପାଇଁ ବଡ ଆୟୋଜନ କରାଯାଇଥିଲା। ସେଥିରେ ଖୋଦ ମୁଖ୍ୟମନ୍ତ୍ରୀ ସାମିଲ ହୋଇଥିଲେ। ଭୁବନେଶ୍ବରରେ କାର୍ଯ୍ୟକ୍ରମ ହେଲା ହେଲେ ଅପରାଜିତା ଯୋଗ ନ ଦେବା ସେତେବେଳେ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା। ଅନ୍ୟପକ୍ଷରେ ବିଜେପି ଅପରାଜିତାଙ୍କ ନିର୍ବାଚନ ମଣ୍ଡଳୀ ବାଲିଅନ୍ତାରେ ସଭ୍ୟ ସଂଗ୍ରହ ଅଭିଯାନ କରିଥିଲା। ହେଲେ ସେଠାକୁ କୁଆଡେ ଅପରାଜିତାଙ୍କୁ ଡକା ଯାଇ ନ ଥିଲା। ଯାହାକୁ ନେଇ ଗଣ୍ଡଗୋଳର ସୁତ୍ରପାତ ହୋଇଥିଲା।

ଏହିପରି ଅନେକ ଘଟଣା ଘଟିଛି ଯାହା ଅପରାଜିତା ଓ ରାଜ୍ୟ ବିଜେପି ଭିତରେ ଭଲ ନାହିଁ ବୋଲି ପ୍ରମାଣିତ ହୋଇଛି। ସବୁବେଳେ ଏକଲା ଚଲୋ ନୀତି ଆପଣେଇଥିବା ଅପରାଜିତା ଏବେ ଦଳର ଆଭିମୁଖ୍ୟ ଉପରେ ବିମୁଖ ହୋଇ ଏକା ସଂଗଠନ ଆଉ କାର୍ଯ୍ୟକ୍ରମ କରିବାରେ ଲାଗିଛନ୍ତି। ବିଜେପିର ଏହି ଫାୟାର ବ୍ରାଣ୍ଡ ନେତ୍ରୀଙ୍କ ଏପରି ହାବଭାବ ଦେଖି ସମସ୍ତେ ଆଶ୍ଚର୍ଯ୍ୟ ହେବାରେ ଲାଗିଛନ୍ତି। ଏପରିକି ଦଳୀୟ ନେତାଙ୍କ ଭିତରେ କୁଆଡେ ଛନକା ପଶିଛି ବୋଲି ଶୁଣାଯାଉଛି।

ତେବେ ଅପରାଜିତାଙ୍କ ଏପରି ନିରବତାକୁ ଲକ୍ଷ୍ୟ କରି ଅନେକ କହିଲେଣି ଯେ, ଏହା କଣ ଝଡ ପୂର୍ବର ନିରବତା କି? ଅପରାଜିତା କଣ କିଛି ବଡ ବିସ୍ପୋରଣ କରିବେ କି? ଏ ନେଇ ସାରା ରାଜ୍ୟରେ ଏକ ଚର୍ଚ୍ଚା ଚାଲିଛି। ଏହା ସ୍ବୀକାର କରିବାକୁ ପଡିବ ଯେ, ଦଳ ଭିତରେ ଅପରାଜିତାଙ୍କ ଏକ ବଡ ଦବଦବା ରହିଛି। ତାଙ୍କର ସାରା ରାଜ୍ୟରେ ବହୁ ସମର୍ଥକ ତଥା ପ୍ରଶଂସକ ଅଛନ୍ତି। ଏପରିକି ତାଙ୍କ ହାତରେ ବିଜେପିର ଅନେକ ବିଧାୟକ ମଧ୍ୟ ଅଛନ୍ତି।

ଏସବୁ ସମୀକରଣକୁ ଲକ୍ଷ୍ୟ ରଖି ସନ୍ଦେହ ହେଲାଣି ଯେ, ଅପରାଜିତା ଏକ ବଡ ଟିମ ଧରି ବିଜେପି ଛାଡି ଦେବେ କି? ଯଦି ହଁ ତେବେ ସେ କଣ ଦଳବଳ ସହିତ ବିଜେଡିରେ ଯୋଗ ଦେବେ କି? ତେବେ ବିଶେଷ ସୁତ୍ର ଅନୁସାରେ ଅପରାଜିତାଙ୍କ ହାତରେ ଥିବା କେତେକ ନେତା ବର୍ତ୍ତମାନ ଦଳର କିଛି ବିଧାୟକଙ୍କ ସହିତ ଆଲୋଚନା କରିବାରେ ଲାଗିଛନ୍ତି। ଜଣେ ଟାଣୁଆ ଆଉ ଚର୍ଚ୍ଚିତ ଖଣ୍ଡାୟତ ବିଧାୟକ କୁଆଡେ ଏହି କାମରେ ମଧ୍ୟ ଲାଗି ପଡିଛନ୍ତି। ଯଦି ସବୁକିଛି ଠିକଠାକ ହୁଏ ତେବେ ଅପରାଜିତା କିଛି ବିଧାୟକଙ୍କୁ ଧରି ଦଳ ଛାଡିବେ ବୋଲି ଅନୁମାନ କରାଯାଉଛି।

ବର୍ତ୍ତମାନ ବିଧାନସଭା ଆସନ ସଂଖ୍ୟା ଅନୁସାରେ ଦ୍ବିତୀୟ ସ୍ଥାନରେ ବିଜେଡି ଅଛି। ତେଣୁ ବିଜେଡି ସହିତ ହାତ ମିଳାଇଲେ ରାଜ୍ୟରେ ସରକାର ଗଠନ କରିବାରେ ଖୁବ ସହଜ ହେବ। ସେଥିପାଇଁ ଅପରାଜିତାଙ୍କ ରଣନୀତିକାରମାନେ କୁଆଡେ ଏହି ହିସାବ କିତାବ କରିବାରେ ଲାଗିପଡିଛନ୍ତି।

ଅନ୍ୟପଟେ ଦେଖିବାକୁ ଗଲେ କେତେକ ଟାଣୁଆ ବିଧାୟକଙ୍କୁ ମନ୍ତ୍ରୀପଦ ମିଳି ନ ଥିବାରୁ ସେମାନେ ଭିତରେ ଭିତରେ ଅସନ୍ତୁଷ୍ଠ ମଧ୍ୟ ଅଛନ୍ତି। ଫଳରେ ସେମାନଙ୍କୁ ହାତ କରିବାରେ ଏହି ରଣନୀତିକାରମାନେ ଶତଚେଷ୍ଠା କରିବାରେ ଲାଗିଛନ୍ତି। ଯଦି ସେମାନଙ୍କ ଅପେରସନ ଠିକଠାକ ହୁଏ ତେବେ ଅପରାଜିତା ବିଜେପିର ଏକ ବଡ ବିଭାଜନ କରି ପୁଣି ବିଜେଡିକୁ ଶାସନ କ୍ଷମତା ଆଣିବେ ବୋଲି ସନ୍ଦେହ ପ୍ରକାଶ ପାଇଛି।

ଭୁବନେଶ୍ବର: ଅପରାଜିତା ଷଡଙ୍ଗୀ, ଭୁବନେଶ୍ବର ସାଂସଦ। ଏଥର ନିର୍ବାଚନ ପରେ ତାଙ୍କର ରାଜନୈତିକ ହାବଭାବରେ ପରିବର୍ତ୍ତନ ହେବ ବୋଲି ଆଶା କରାଯାଉଥିଲା। ହେଲେ ତାହା ହେଲା ନାହିଁ। ତାଙ୍କର ସେହି ପୁରୁଣା ରୋଗ ଏକଲା ଚଲୋ ନୀତିକୁ ପୁଣି ସେ ଆପଣେଇ ନେଲେଣି। ଫଳରେ ସେ ବର୍ତ୍ତମାନ ନା ଦଳକୁ ଖାତିର କରୁଛନ୍ତି ନା ସଭାପତିଙ୍କୁ ନିର୍ଦ୍ଦେଶକୁ  ମାନୁଛନ୍ତି। ତାଙ୍କର ଏପରି ନୀତି ଦେଖି ଦଳ ଭିତରେ ଗୁଂଜରଣ ସୃଷ୍ଟି ହୋଇଥିବା ବେଳେ ତାଙ୍କ ସମର୍ଥକମାନେ ବେଶ ଉତ୍ସାହିତ ହୋଇପଡିଛନ୍ତି।

ନିକଟରେ ଭୁବନେଶ୍ବରରେ ସୁଭଦ୍ରା ପ୍ରଚାର ରଥ ଗଡିବା ପାଇଁ ବିରାଟ ଆୟୋଜନ କରାଯାଇଥିଲା। ତାହାକୁ ଖୋଦ ମୁଖ୍ୟମନ୍ତ୍ରୀ ଉଦଘାଟନ କରିଥିଲେ। ଉପସ୍ଥିତ ଥିଲେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡା। ହେଲେ ଆଶ୍ଚର୍ଯ୍ୟର କଥା, ସେଠାକୁ ଖୋଦ ଭୁବନେଶ୍ବର ସାଂସଦଙ୍କୁ ଦେଖା ମିଳିଲା ନାହିଁ। ଶୁଣିବାକୁ ମିଳିଲା ଯେ, କୁଆଡେ ମ୍ୟାଡମ ରାଗିଛନ୍ତି। ସେଥିପାଇଁ ସଭାକୁ ଆସିଲେ ନାହିଁ।

ରାଗିବାର କାରଣ ହେଲା ଯେ, ତାଙ୍କ ସମର୍ଥକଙ୍କୁ କାହିଁକି ଦଳ ନିଲମ୍ବନ କଲା। ତାଙ୍କ ସହିତ ଆଲୋଚନା ନ କରି ଖୋର୍ଦ୍ଧା ଜିଲ୍ଲାର ମୁଖ୍ୟ କର୍ମିମାନଙ୍କୁ ଦଳ କାହିଁକି ନିଲମ୍ବନ କଲା। ତାହାର କୈଫତ କୁଆଡେ ଅପରାଜିତା ମାଗିଥିଲେ। ହେଲେ ଦଳ ତରଫରୁ କୁହାଗଲା ଯେ ଯାହା ହୋଇଛି ଠିକ ହୋଇଛି। ସେହି ରାଗରେ ଅପରାଜିତା ସବୁ ନିଲମ୍ବିତ ନେତାଙ୍କୁ ତାଙ୍କ ମଞ୍ଚରେ ଡାକି ବସାଇଲେ। ଯାହାକୁ ନେଇ ରାଜ୍ୟ ରାଜନୀତିରେ ବଡ ଚର୍ଚ୍ଚା ଆରମ୍ଭ ହୋଇଯାଇଛି।

ଏକଦା ସଭାପତି ମନମୋହନ ସାମଲ ଏବଂ ଅପରାଜିତା ଷଡଙ୍ଗୀଙ୍କ ମଧ୍ୟରେ ବେଶ ଭଲ ପଡୁଥିଲା। ଅପରାଜିତା ଯେତେ କାର୍ଯ୍ୟକ୍ରମ କଲେ ମନମୋହନଙ୍କୁ ଡାକୁଥିଲେ। ଆଉ ମନମୋହନ ଭଦ୍ରକରେ ଯାହା କାର୍ଯ୍ୟକ୍ରମ କଲେ ଅପରାଜିତାଙ୍କୁ ନେଉଥିଲେ। ହେଲେ ନିର୍ବାଚନ ପରେ କଣ ହେଲା କେଜାଣି ଆଉ ଉଭୟଙ୍କ ମଧ୍ୟରେ କୁଆଡେ କଥାବାର୍ତ୍ତା ନାହିଁ। ମୁଖ୍ୟତଃ ତାଙ୍କ ସମର୍ଥକଙ୍କୁ ନିଲମ୍ବନ କରିବା ପରେ ଅପରାଜିତା ମନମୋହନଙ୍କଠାରୁ କୁଆଡେ ମୁହଁ ବୁଲାଇ ନେଇଛନ୍ତି।

ବର୍ତ୍ତମାନ ସବୁଠାରୁ ବଡ ଆଶ୍ଚର୍ଯ୍ୟ ଘଟଣା ହେଉଛି ଯେ, ଅପରାଜିତା ଦଳିୟ ଶୃଙ୍ଖଳ ଭାଙ୍ଗି ନିଲମ୍ବିତ ନେତାଙ୍କୁ ପାଖରେ ବସାଇ ସଭା କରିଥିଲେ ମଧ୍ୟ ବିଜେପି କୌଣସି ପ୍ରତିକ୍ରିୟା ଦେଉ ନାହିଁ। ଏପରିକି ଅପରାଜିତାଙ୍କୁ ଏକ କାରଣ ଦର୍ଶା ନୋଟିସଟିଏ ମଧ୍ୟ ପଠାଇ ପାରୁ ନାହିଁ। ତେଣୁ ଦଳରେ ଅପରାଜିତା ବଡ ନା ମନମୋହନ ତାହା ଜାଣିବା କର୍ମିମାନଙ୍କ ପାଇଁ କଷ୍ଟକର ହୋଇପଡିଛି।

ଅପରାଜିତାଙ୍କ ସମର୍ଥକଙ୍କ ଅନୁସାରେ ସେ ବର୍ତ୍ତମାନ ଏକଲା ଚଲୋ ନୀତିରେ କାର୍ଯ୍ୟ କରିବେ। ରାଜ୍ୟ ନେତାଙ୍କୁ ସେ ଖାତିର କରିବେ ନାହିଁ। ଯାହା କରିବେ କୁଆଡେ ଦିଲ୍ଲୀର ନିର୍ଦ୍ଦେଶ ଅନୁସାରେ କରିବେ। ଏ ସବୁ ଜାଣିବା ପରେ ଅପରାଜିତାଙ୍କ ଭୂମିକା ଆଗାମୀ ଦିନର କଣ ହେବ ତାହା ଦେଖିବା ପାଇଁ ବିଭିନ୍ନ ମହଲରେ ଉତ୍ସୁକୁତା ପ୍ରକାଶ ପାଇଛି।