Tag: ଅର୍ଥ ହଡ଼ପ

ରମେଶ ମହାନ୍ତି

ଜଗତସିଂହପୁର: ବୃଦ୍ଧାଙ୍କୁ କରାୟତ କରି ଜମିବିକ୍ରି କରାଇ ଅର୍ଥ ହଡ଼ପ କରିବାକୁ ଯୋଜନା କରାଯାଉଥିବା ନେଇ ଅଭିଯୋଗ ହୋଇଛି। ଖବର ପାଇ ବୃଦ୍ଧାଙ୍କ ବୋହୂ ତାଙ୍କ କବଳରୁ ଶାଶୂଙ୍କୁ ଘରକୁ ଆଣିବାକୁ ଚେଷ୍ଟା କରୁଥିବା ବେଳେ ବୋହୂକୁ ବନ୍ଧୁକ ଦେଖାଇ ଆକ୍ରମଣ କରାଯାଇଥିବା ନେଇ ରକ୍ତ ଜୁଡୁବୁଡୁ ଅବସ୍ଥାରେ ବୋହୂ ଥାନାର ଦ୍ୱାରସ୍ଥ ହୋଇଥିବା ଜଣାପଡିଛି। ଏଭଳି ଏକ ଘଟଣା ତିର୍ତ୍ତୋଲ ଥାନା ଅଞ୍ଚଳରେ ଦେଖିବାକୁ ମିଳିଛି।

ସୂଚନାନୁଯାୟୀ, ତିର୍ତ୍ତୋଲ ଥାନା ଅନ୍ତର୍ଗତ ତରଜଙ୍ଗା ପଞ୍ଚାୟତ ସ୍ଥିତ ତେରତାଙ୍ଗ ଗ୍ରାମର ରୋଜାଲିନ ବେହେରାଙ୍କ ଶାଶୂ କେଲୁଣି ବେହେରାଙ୍କର କୌଣସି ସନ୍ତାନ ସନ୍ତତି ନଥିବାରୁ ସେ ରୋଜାଲିନ ବେହେରାଙ୍କ ସ୍ୱାମିଙ୍କୁ ପୋଷ୍ୟପୁତ୍ର ଭାବେ ଗ୍ରହଣ କରିଥିଲେ। ଏନେଇ ଏକ ଦଲିଲ୍ ମଧ୍ୟ କରାଯାଇଥିଲା। ଶଶୂରଙ୍କ ମୃତ୍ୟୁ ପରେ ଶାଶୂ ପୁଅ ବୋହୂଙ୍କ ପାଖରେ ରହି ଆସୁଥିଲେ। ପରେ ଖଣ୍ଡାସାହି ଗ୍ରାମର ମହେଶ୍ୱର ସାହୁ ନାମକ ବ୍ୟକ୍ତି ରୋଜାଲିନିଙ୍କ ଶାଶୂକୁ କରାୟତ କରିନେଇ ନିଜ ପାଖରେ ଖଣ୍ଡାସାହି ଗ୍ରାମରେ ରଖିଥିଲେ। ନିଜ ଘରକୁ ଶାଶୁକୁ ଆଣିବା ପାଇଁ ରୋଜାଲିନି ଓ ତାଙ୍କର ସ୍ୱାମୀ ବହୁଥର ଚେଷ୍ଟା କରିଥିଲେ ମଧ୍ୟ ମହେଶ୍ୱର ସାହୁଙ୍କ ବିରୋଧ ଯୋଗୁଁ ସେ ନିରାଶ ହୋଇ ଫେରିଛନ୍ତି ବୋଲି ପ୍ରକାଶ କରିଛନ୍ତି।

ଅଭିଯୋଗ ଅନୁଯାୟୀ ଖଣ୍ଡାସାହି ଗ୍ରାମର ମହେଶ୍ୱର ସାହୁ କିଛିଦିନ ପୂର୍ବେ ତାଙ୍କ ଶାଶୁଙ୍କୁ କରାୟତ କରି କିଛି ଜମି ବିକ୍ରି କରାଇ ଅର୍ଥ ହଡ଼ପ କରିବାକୁ ଚକ୍ରାନ୍ତ କରୁଥିବା ଖବର ବୋହୂ ରୋଜାଲିନି ଓ ତାଙ୍କର ସ୍ୱାମୀ ମଣିଜଙ୍ଗା ସବରେଜିଷ୍ଟାର ଅଫିସରୁ ଜାଣିବାକୁ ପାଇଥିଲେ।ତାଙ୍କ କବଳରୁ ଉଦ୍ଧାର କରି ଶାଶୂଙ୍କୁ ନିଜ ଘରକୁ ଆଣିବାକୁ ଗତ ୯ତାରିଖ ଦିନ ରୋଜାଲିନି ତାଙ୍କ ପାଖରେ ପହଞ୍ଚିବା କ୍ଷଣି ମହେଶ୍ୱର ସାହୁଙ୍କ ସହ ତାଙ୍କ ପୁଅ ଓ ନାତି ମିଶି ତାଙ୍କୁ ଆକ୍ରମଣ କରିବା ସହିତ ବନ୍ଧୁକ ଦେଖାଇ ଧମକ ଦେଇଥିଲେ ବୋଲି ରୋଜାଲିନି ଅଭିଯୋଗ କରିଛନ୍ତି।

ରକ୍ତ ଜୁଡୁବୁଡୁ ଅବସ୍ଥାରେ ରୋଜାଲିନି ତିର୍ତ୍ତୋଲ ଥାନାରେ ପହଞ୍ଚି ଏନେଇ ଅଭିଯୋଗ କରିଥିଲେ। ଗତ ୯ତାରିଖରୁ ଥାନାରେ ଅଭିଯୋଗ ହୋଇଥିଲେ ମଧ୍ୟ ଆଜି ପର୍ଯ୍ୟନ୍ତ ରୋଜାଲିନି ନ୍ୟାୟ ପାଇପାରିଲେ ନାହିଁ ବୋଲି ସେ ଦୁଃଖର ସହିତ ପ୍ରକାଶ କରିଛନ୍ତି। ଅପରପକ୍ଷରେ ରୋଜାଲିନିଙ୍କ ନାମରେ ମଧ୍ୟ ଏକ ମାମଲା ତିର୍ତ୍ତୋଲ ଥାନାରେ ରୁଜୁ ହୋଇଥିବା ଜଣାପଡିଛି।