ନୂଆଦିଲ୍ଲୀ: ଆତଙ୍କବାଦୀଙ୍କ ଛାୟା ଏଥର ଆଇପିଏଲରେ ଘୁରି ବୁଲୁଛି। ଆଇପିଏଲ ମ୍ୟାଚରେ ମୁମ୍ବାଇ ପୋଲିସ ଆତଙ୍କବାଦୀ ଆକ୍ରମଣ ଆଲର୍ଟ ଜାରି କରିଛି। ଏଟିଏସକୁ ପଚରାଉଚରା ବେଳେ ଗିରଫ ହୋଇଥିବା ଆତଙ୍କବାଦୀମାନେ ଏହା ସ୍ୱୀକାର କରିଛନ୍ତି। ଆତଙ୍କବାଦୀମାନେ ୱାନଖେଡେ ଷ୍ଟାଡିୟମ, ଟ୍ରାଇଡେଣ୍ଟ ହୋଟେଲ ଏବଂ ଏହାର ଆଖପାଖ ରାସ୍ତାକୁ ଟ୍ରାକ କରୁଥିଲେ ଏବଂ ସୁରକ୍ଷା ଉପରେ ମଧ୍ୟ ନଜର ରଖିଥିଲେ। ଆଇପିଏଲ୍ ମ୍ୟାଚ୍ କୁ ଦ୍ରୁଷ୍ଟିରେ ରଖି ଷ୍ଟାଡିୟମ୍, ହୋଟେଲ ଯେଉଁଠାରେ ଖେଳାଳିମାନେ ରହନ୍ତି ସେଠାରେ ସୁରକ୍ଷା ବୃଦ୍ଧି କରାଯାଇଛି।
ସୁରକ୍ଷା ପାଇଁ ମାର୍ଚ୍ଚ ୨୬ ତାରିଖରୁ ମେ ୨୨ ତାରିଖ ପର୍ଯ୍ୟନ୍ତ କୁଇକ୍ ରେସପନ୍ସ ଟିମ୍, ବମ୍ ସ୍କ୍ବାଡ୍ ଏବଂ ଷ୍ଟେଟ୍ ରିଜର୍ଭ ପୋଲିସ୍ ଫୋର୍ସ ମୁତୟନ କରାଯାଇଛି। ଆତଙ୍କବାଦୀଙ୍କ ସ୍ୱୀକାର ପରେ ଖେଳାଳିଙ୍କ ବସ୍କୁ ନିର୍ଦ୍ଧାରିତ ସ୍ଥାନ ପର୍ଯ୍ୟନ୍ତ ଆଣିବା ପାଇଁ ବର୍ତ୍ତମାନ ଏକ ସ୍ୱତନ୍ତ୍ର ଏସକର୍ଟ ଯୋଗାଇ ଦିଆଯିବ। ହୋଟେଲଗୁଡ଼ିକରେ ସ୍ୱତନ୍ତ୍ର ସୁରକ୍ଷା ବ୍ୟବସ୍ଥା ବ୍ୟତୀତ ଅମ୍ପାୟର ଏବଂ ମ୍ୟାଚ୍ ଅଧିକାରୀଙ୍କୁ ମଧ୍ୟ ସୁରକ୍ଷା ଦିଆଯିବ।
କରୋନା ସଂକ୍ରମଣକୁ ଦେଖି ଏହି ଆଇପିଏଲ୍ ର ଲିଗ୍ ମ୍ୟାଚ୍ କେବଳ ମୁମ୍ବାଇ ଏବଂ ପୁଣେରେ ଖେଳାଯିବ। ମୋଟ ୭୦ ଟି ଲିଗ୍ ମ୍ୟାଚ୍ ମଧ୍ୟରୁ ୨୦ ଟି ମ୍ୟାଚ୍ ୱାନଖେଡେ ଷ୍ଟାଡିୟମରେ ଖେଳାଯିବ ଏବଂ ୧୫ ଟି ମ୍ୟାଚ୍ ବ୍ରେବୋର୍ନ ଷ୍ଟାଡିୟମରେ ଖେଳାଯିବ। ନଭି ମୁମ୍ବାଇର ଅନ୍ୟ ଦୁଇଟି ଭିନସ ଡି ୱାଇ ପାଟିଲ ଷ୍ଟାଡିୟମ ଏବଂ ପୁଣେରେ ମହାରାଷ୍ଟ୍ର କ୍ରିକେଟ୍ ଆସୋସିଏସନ୍ ଷ୍ଟାଡିୟମ୍ ଯଥାକ୍ରମେ ୨୦ ଏବଂ ୧୫ ମ୍ୟାଚ୍ ଆୟୋଜନ କରିବ।
ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) ରେ ମୁମ୍ବାଇରେ ଶନିବାର ଠାରୁ ଦର୍ଶକମାନେ ଷ୍ଟାଡିୟମରେ ବସି ମ୍ୟାଚ୍ ଉପଭୋଗ କରିପାରିବେ। ଯେଉଁଥି ପାଇଁ ବୁଧବାର ଠାରୁ ଟିକେଟ୍ ବିକ୍ରି ଆରମ୍ଭ ହୋଇଛି। ଆୟୋଜକମାନେ କହିଛନ୍ତି ଯେ, ଷ୍ଟାଡିୟମର ମୋଟ କ୍ଷମତାର ୨୫ ପ୍ରତିଶତ ଦର୍ଶକଙ୍କ ପ୍ରବେଶ କରିବାକୁ ଅନୁମତି ଦିଆଯାଇଛି।
ଡିଫେଣ୍ଡିଂ ଚାମ୍ପିଅନ୍ ଚେନ୍ନାଇ ସୁପର କିଙ୍ଗ୍ସ ଶନିବାର ଦିନ ୱାନଖେଡେ ଷ୍ଟାଡିୟମରେ ଆଇପିଏଲ୍ ୨୦୨୨ର ପ୍ରଥମ ମ୍ୟାଚ୍ ରେ କୋଲକାତା ନାଇଟ୍ ରାଇଡର୍ସକୁ ଭେଟିବ। ଆଇପିଏଲରେ ଲକ୍ଷ୍ନୌ ସୁପର ଜିଆଣ୍ଟସ୍ ଏବଂ ଗୁଜୁରାଟ ଟାଇଟାନ୍ସ ନାମକ ଦୁଇଟି ନୂତନ ଦଳ ସାମିଲ ହୋଇଛନ୍ତି।