ଭୁବନେଶ୍ବର: ଆସନ୍ତାକାଲିଠାରୁ ଅର୍ଥାତ ୩୧ତାରିଖରୁ ଆୟୁଷ ଛାତ୍ରଛାତ୍ରୀମାନେ କଲେଜ ବନ୍ଦ ଡାକରା ଦେଇଛନ୍ତି। ଚଳିତ ବର୍ଷ ରାଜ୍ୟରେ ଥିବା ତିନୋଟି ସରକାରୀ ଆୟୁର୍ବେଦିକ କଲେଜ ରେ ଭିତ୍ତିଭୂମି ଓ ମାନବ ସମ୍ବଳ ଅଭାବ ଯୋଗୁଁ କେନ୍ଦ୍ର ସରକାରଙ୍କ ମିନିଷ୍ଟି ଅଫ ଆୟୁଷ ବିଭାଗ ଅନ୍ତର୍ଗତ “ଭାରତୀୟ ଚିକିତ୍ସା ପଦ୍ଧତି ଆୟୋଗ” ରାଜ୍ୟରେ ବିଭିନ୍ନ ଆୟୁର୍ବେଦିକ କଲେଜରେ ଥିବା ବି. ଏ. ଏମ. ଏସ ବା ବ୍ୟାଚଳର ଅଫ ଇଣ୍ଡିଆନ ମେଡ଼ିସିନ ଆଣ୍ଡ ସର୍ଜରୀ ସ୍ନାତକ ଶିକ୍ଷା ସିଟ ହ୍ରାସ କରିଛନ୍ତି।
ଦକ୍ଷିଣ ଓଡ଼ିଶାର ଏକ ମାତ୍ର କବିରାଜ ଅନନ୍ତ ତ୍ରିପାଠୀ ଶର୍ମା ଆୟୁର୍ବେଦ ମହାବିଦ୍ୟାଳୟରେ ପୂର୍ବରୁ ଥିବା ୭୫ଟି ସ୍ନାତକ ଶିକ୍ଷା ସିଟ କମି ଏବର୍ଷ ୫୩ କୁ ଖସି ଆସିଛି। କେନ୍ଦ୍ର ସରକାରଙ୍କ ଆୟୁଷ ମନ୍ତ୍ରଣାଳୟ ୨୨ଟି ସିଟ କମାଇ ଦେଇଛନ୍ତି। ସେହିପରି ପୁରୀ ସ୍ଥିତ ପୁରାତନ ଗୋପବନ୍ଧୁ ଆୟୁର୍ବେଦ ରେ ଥିବା ୭୫ ଟି ସିଟ କମି ଚଳିତ ବର୍ଷ ୬୪ଟି ସ୍ନାତକ ଶିକ୍ଷା ରେ ଆଡ଼ମିଶନ ଦିଆଯିବ। ଏହି କଲେଜର ୧୧ଟି ସିଟକୁ କେନ୍ଦ୍ର ଆୟୁଷ ମନ୍ତ୍ରଣାଳୟ କମାଇ ଦେଇଛନ୍ତି। ସେହିପରି ପଶ୍ଚିମ ଓଡ଼ିଶାରେ ଥିବା ବଲାଙ୍ଗୀର ଆୟୁର୍ବେଦ ମହାବିଦ୍ୟାଳୟ ର୭୫ଟି ସ୍ନାତକ ଶିକ୍ଷା ସିଟ କୁ କେନ୍ଦ୍ର ସରକାରଙ୍କ ଆୟୁଷ ମନ୍ତ୍ରଣାଳୟ ପୂର୍ଵ ପରି ସୁରକ୍ଷିତ ରଖିଛନ୍ତି।
ସେହିପରି ବେସରକାରୀ ଭାବେ ଥିବା ବରଗଡ଼ ପାଇକମାଲ ସ୍ଥିତ ନୃସିଂହ ନାଥ ଆୟୁର୍ବେଦମହାବିଦ୍ୟାଳୟ ର ପୂର୍ବରୁ ଥିବା ୩୦ଟି ସିଟ କୁ ୬୦ ଗୋଟି ଓ କଟକ ଶ୍ରୀ ଶ୍ରୀ ଆୟୁର୍ବେଦ ମହାବିଦ୍ୟାଳୟର ୧୦୦ ଗୋଟି ସିଟ କୁ ଆବଶ୍ୟକ ଭିତ୍ତିଭୂମି ବିକାଶ ଓ ମାନଵ ସମ୍ବଳ ଥିବା କାରଣରୁ କେନ୍ଦ୍ର ଆୟୁଷ ବିଭାଗ ଏହାକୁ ସୁରକ୍ଷିତ ରଖିଛନ୍ତି। ବେସରକାରୀ ଭାବେ ଥିବା ବହୁ ପୁରାତନ ବାରିପଦା ର ମୟୁରଭଞ୍ଜ ଆୟୁର୍ବେଦ ମହାବିଦ୍ୟାଳୟ କେନ୍ଦ୍ର ବନ୍ଦ ହୋଇଯାଇଥିବା ବେଳେ ଓ ଭୁବନେଶ୍ୱର ଇନ୍ଦିରାଗାନ୍ଧୀ ମେମୋରିଆଲ ଆୟୁର୍ବେଦିକ ମହାବିଦ୍ୟାଳୟ ବିପର୍ଯ୍ୟସ୍ତ ଅବସ୍ଥାରେ ପହଂଚି ଗଲାଣି।
ରାଜ୍ୟରେ ତିନି ସରକାରୀ ଆୟୁର୍ବେଦ ମହାବିଦ୍ୟାଳୟ ରେ ଭିତ୍ତିଭୂମି, ମାନଵ ସମ୍ବଳ ଅଭାବ କାରଣରୁ ସିଟ ସଂଖ୍ୟା ହ୍ରାସ ପାଇଥିବା ବେଳେ ରାଜ୍ୟର ଦୁଇଟି ପ୍ରାଇଭେଟ ଆୟୁର୍ବେଦ ମହାବିଦ୍ୟାଳୟରେ ଆବଶ୍ୟକ ଭିତ୍ତିଭୂମି ଥିବା ଦର୍ଶାଇ ସିଟ ସଂଖ୍ୟାକୁ ସୁରକ୍ଷିତ ରଖାଯାଇଛି।ରାଜ୍ୟ ସରକାରଙ୍କ ଅପାରଗତା ଓ ଆୟୁଷ ପ୍ରତି ହୀନ ମାନ୍ୟତା ଯୋଗୁଁ ୨୦୦୨ ମସିହା ପରଠାରୁ ରାଜ୍ୟରେ ନୂତନ ଭାବେ ଆୟୁର୍ବେଦ ଓ ହୋମିଓପ୍ୟାଥିକ ଡ଼ିସ୍ପେନସାରୀ ସରକାର ଖୋଲି ନାହାଁନ୍ତି।
ରାଜ୍ୟରେ ସରକାରୀ ଉଦାସୀନତା ଯୋଗୁଁ ଆୟୁଷର ମାନ ହ୍ରାସ ପାଉଛି ବୋଲି ଓଡ଼ିଶା ଆୟୁଷ ବିକାଶ ପରିଷଦ ପକ୍ଷରୁ ସମ୍ପାଦକ ଡା ତ୍ରୈଲୋକ୍ୟ ନାଥ ମହାରଣା ଅଭିଯୋଗ କରିଛନ୍ତି। ରାଜ୍ୟରେ ଦଶ ହଜାରରୁ ଉର୍ଦ୍ଧ୍ବ ଡିଗ୍ରୀ ଧାରୀ ଆୟୁର୍ବେଦିକ ଓ ହୋମିଓପ୍ୟାଥିକ ଡାକ୍ତର ବେକାର ହୋଇ ସରକାରୀ ଚାକିରୀ ଅପେକ୍ଷା ରେ ରହି ବୟସ ଅତିକ୍ରାନ୍ତ କରିସାରିଲେଣି ସେମାନଙ୍କୁ ନିଯୁକ୍ତି ସୁଯୋଗ ମିଳି ପାରିନାହିଁ।
ସେହିଭଳି ପିଜି ଶିକ୍ଷା ପାଇଁ ପୁରୀ ଗୋପବନ୍ଧୁ ଆୟୁର୍ବେଦ ମହାବିଦ୍ୟାଳୟ ରେ ଥିବା ପାଞ୍ଚୋଟି ବିଭାଗ ରେ ଥିବା ୧୯ଟି ସିଟ, ବଲାଙ୍ଗୀର ଆୟୁର୍ବେଦ ମହାବିଦ୍ୟାଳୟର ଦୁଇ ଗୋଟି ବିଭାଗରେ ଥିବା ୧୦ଗୋଟି ସ୍ନାତକୋତ୍ତର ସିଟ ଓ ଚଳିତ ବର୍ଷ ବ୍ରହ୍ମପୁର କବିରାଜ ଅନନ୍ତ ତ୍ରିପାଠୀ ଶର୍ମା ଆୟୁର୍ବେଦ ମହାବିଦ୍ୟାଳୟ ରେ ଖୋଲା ଯାଇଥିବା ଚାରୋଟି ସ୍ନାତକୋତ୍ତର ସିଟ କୁ ବୃଦ୍ଧି କରିବାକୁ ଦାବୀ ରହିଛି,ରାଜ୍ୟରେ ପିଜି ଶିକ୍ଷକ ଙ୍କଘୋର ଅଭାବ ରୁ ବିଭିନ୍ନ କଲେଜରୁ କେନ୍ଦ୍ର ଆୟୁଷ ମନ୍ତ୍ରଣାଳୟ ସ୍ୱୀକୃତି ବାରମ୍ବାର ପ୍ରତ୍ୟାହାର କରୁଛି।
ରାଜ୍ୟର ସମସ୍ତ ହୋମିଓପ୍ୟାଥିକ ଓ ଆୟୁର୍ବେଦିକ କଲେଜରେ ଶିକ୍ଷା ଓ ପରବର୍ତ୍ତୀ ବ୍ୟବସ୍ଥା ବିପର୍ଯ୍ୟୟ ଆଡକୁ ଗତି କରୁଛି।ସେଥିଯୋଗୁଁ ରାଜ୍ୟର ସମସ୍ତ ସରକାରୀ ଆୟୁଷ କଲେଜରେ ପିଜି ସିଟ ବୃଦ୍ଧି ପାଇଲେ ଏହି ସମସ୍ୟା ଦୂର ହେବ ବୋଲି କୁହାଯାଇଛି।ସେଭଳି ସରକାରୀ ଭାବେ ଥିବା ପୁରାତନ ଭୁବନେଶ୍ୱର ଡାକ୍ତର ଅଭିର୍ଣ୍ଣ ଚନ୍ଦ୍ର ହୋମିଓପ୍ୟାଥିକ ମେଡିକାଲ କଲେଜ, ରାଉଲକେଲା ଉତ୍କଳମଣୀ ହୋମିଓପ୍ୟାଥିକ ମେଡ଼ିକାଲ କଲେଜ ଆଣ୍ଡ ହସ୍ପିଟାଲ, ସମ୍ବଲପୁର ଓଡିଶା ମେଡିକାଲ କଲେଜ ଅଫ ହୋମିଓପ୍ୟାଥିକ ଆଣ୍ଡ ରିସର୍ଚ୍ଚ ଓ ବ୍ରହ୍ମପୁର ବିଜୁ ପଟ୍ଟନାୟକ ହୋମିଓପ୍ୟାଥିକ ମେଡିକାଲ କଲେଜ ଆଣ୍ଡ ହସ୍ପିଟାଲ ରେ ଶିକ୍ଷା ବ୍ୟବସ୍ଥା କହିଲେ ନ ସରେ।
ସମସ୍ତ କଲେଜରେ ରେ ଆବଶ୍ୟକ ଭିତ୍ତିଭୂମି ଓ ମାନଵ ସମ୍ବଳ ଅଭାବରୁ ପ୍ରତ୍ୟେକ କଲେଜରେ ମାତ୍ର ୩୦ ଟି ବ୍ୟାଚଳର ଅଫ ହୋମିଓପ୍ୟାଥିକ ମେଡ଼ିସିନ ଆଣ୍ଡ ସର୍ଜରୀ ବା ବି .ଏଚ .ଏମ. ଏସ ସ୍ନାତକ ଡିଗ୍ରୀ ସିଟ ରେ ଚଳିତ ବର୍ଷ ଆଡ଼ମିସନ ହେବ, କେବଳ ଭୁବନେଶ୍ୱର ଅଭିର୍ଣ୍ଣ ଚନ୍ଦ୍ର ହୋମିଓପ୍ୟାଥିକ କଲେଜରେ ୬୦ଟି ସ୍ନାତକ ଏବଂ ପୂର୍ବରୁ ଥିବା୧୨ଗୋଟି ପିଜି ସିଟ କମି ଏବେ ଚାରୋଟି ପିଜି ସିଟ ଥିବା ବେଳେ ଆଉ ତିନୋଟି କଲେଜରେ ହୋମିଓପ୍ୟାଥିକ ରେ ସ୍ନାତକୋତ୍ତର ଡିଗ୍ରୀ ପଢିବା ପାଇଁ ରାଜ୍ୟ ସରକାର ଏ ପର୍ଯ୍ୟନ୍ତ ସୁଯୋଗ ସୃଷ୍ଟି କରିନାହାନ୍ତି।
ସେହି ଭଳି ବେସରକାରୀ ଭାବେ ଗଢ଼ି ଉଠିଥିବା ବାରିପଦା ମୟୁରଭଞ୍ଜ ହୋମିଓପ୍ୟାଥିକ ମେଡିକାଲ କଲେଜ ଆଣ୍ଡ ହସ୍ପିଟାଲ ଓ କଟକ ମେଡିକାଲ କଲେଜ ଓ ହୋମିଓପ୍ୟାଥି ଏବେ ଧ୍ବଂସ ସ୍ତୁପରେ ପରିଣତ ହୋଇଛି।
ରାଜ୍ୟରେ ଆୟୁଷ ଶିକ୍ଷା ଲାଭ କରିବାକୁ ଯାଉଥିବା ଛାତ୍ର ଛାତ୍ରୀ ନିଟ ପରୀକ୍ଷାରେ କୃତ କାର୍ଯ୍ୟ ହୋଇ ରାର୍ଙ୍କକାର୍ଡ ପାଇ ଓ ଓଡ଼ିଶାର ଜେଇ ମାଧ୍ୟମରେ ଚୟନ ପକ୍ରିୟା ଦେଇ ଶେଷରେ ଓଡିଶାରେ ବିଭିନ୍ନ ଆୟୁର୍ବେଦିକ ଓ ହୋମିଓପ୍ୟାଥିକ କଲେଜରେ ପଢିବା ପାଇଁ କୃତ କାଯ୍ୟ ହୋଇପାରିବେ।ଏହି ଚୟନ ପକ୍ରିୟା ମାଧ୍ୟମରେ କେନ୍ଦ୍ର କୋଟା ବା ଏନ. ଆର. ଆଇ କୋଟା ଶତକଡା୧୫ପ୍ରତିଶତ ଥିବା ବେଳେ ଓ ରାଜ୍ୟର ବା ଷ୍ଟେଟ ର ଶତକଡ଼ା୮୫ପ୍ରତିଶତ ରିଜର୍ଭ ରହିଛି।
ରାଜ୍ୟରେ ଦୀର୍ଘ ଦିନ ଧରି ଆୟୁଷ ଶିକ୍ଷା ବ୍ୟବସ୍ଥା ଓ ଆୟୁଷ ନିଯୁକ୍ତି ପ୍ରତି ରାଜ୍ୟ ସରକାର ଉପେକ୍ଷିତ କରିଛନ୍ତି ବୋଲି ଓଡ଼ିଶା ଆୟୁଷ ବିକାଶ ପରିଷଦ ପକ୍ଷରୁ କୁହାଯାଇଛି।ବାରମ୍ବାର ଦାବୀ ପରେ ରାଜ୍ୟ ସରକାର ଙ୍କ ସ୍ୱାସ୍ଥ୍ୟ ବିଭାଗ ଓ ରାଜ୍ୟ ଆୟୁଷ ନିର୍ଦେଶକ ଙ୍କ କାର୍ଯ୍ୟାଳୟ ଚୁପ ରହିବା ସମସ୍ତଙ୍କୁ ଆଶ୍ଚର୍ଯ୍ୟ କରୁଛି,ତୁରନ୍ତ ରାଜ୍ୟ ସରକାର ଆୟୁଷ ଶିକ୍ଷା ଓ ନିଯୁକ୍ତି ପାଇଁ ଗୁରୁତ୍ୱ ଦେଇ ନୂତନ ସୁଯୋଗ ସୃଷ୍ଟି କରିବା କୁ ଦାବୀ ହୋଇଛି।
ବର୍ତ୍ତମାନ ରାଜ୍ୟ ସରକାର ରାଜ୍ୟର ସମସ୍ତ ଏଲୋପାଥୀ ହାଉସ ସର୍ଜନଙ୍କ ଷ୍ଟାଇପେଣ୍ଡ ୫୦ ପ୍ରତିଶତ ବୃଦ୍ଧି କରିଥିବା ବେଳେ ଆୟୁଷ ସର୍ଜନଙ୍କ ପକ୍ଷେ ଚୁପ ରହିଛନ୍ତି। ଏଲୋପାଥୀ ହାଉସ ସର୍ଜନ୨୮ ହଜାର ପାଉଥିଲେ ଏବେ ସେମାନଙ୍କ ଷ୍ଟାଇପେଣ୍ଡ ୪୨ ହଜାର କରାଯାଇଛି।
ଗତ୨୫ ତାରିଖ ଠାରୁ ଏସବୁ ଦାବୀ ନେଇ ରାଜ୍ୟର ଚାରୋଟି ସରକାରୀ ହୋମିଓପ୍ୟାଥିକ ଓ ତିନୋଟି ଆୟୁର୍ବେଦିକ ମହାବିଦ୍ୟାଳୟ ର ସମସ୍ତ ହାଉସ ସର୍ଜନ, ଛାତ୍ର ଛାତ୍ରୀ କଳାବ୍ୟାଚ ପରିଧାନ କରି ଆନ୍ଦୋଳନ କୁ ଚାଲୁ ରଖିଥିବା ବେଳେ ଆସନ୍ତା ୩୧ ଗୁରୁବାରଠାରୁ ରାଜ୍ୟର ସମସ୍ତ ଆୟୁର୍ବେଦ ଓ ହୋମିଓପ୍ୟାଥିକ କଲେଜର ସମସ୍ତ ଛାତ୍ରଛାତ୍ରୀ ଅନିର୍ଦ୍ଦିଷ୍ଟ କାଳ ପାଇଁ ଶ୍ରେଣୀ ବର୍ଜନ କରିକୁ ଅଲ ଓଡ଼ିଶା ଆୟୁଷ ଛାତ୍ର ସଂଙ୍ଗଠନ ନିଷ୍ପତ୍ତି ନେଇଛନ୍ତି।
