Categories
ଆଜିର ଖବର ରାଜ୍ୟ ଖବର

କୋଲ ଇଣ୍ଡିଆ ଲିମିଟେଡ୍‌ର ୫୦ ବର୍ଷ ପୂର୍ତ୍ତି: ଏମ୍‌ସିଏଲ୍ ପକ୍ଷରୁ ହାଫ୍ ମାରାଥନ୍‌

ଭୁବନେଶ୍ୱର: କୋଲ ଇଣ୍ଡିଆର ୫୦ ବର୍ଷ ପୂର୍ତ୍ତି ଅବସରରେ ମହାନଦୀ କୋଲ ଫିଲ୍‌ଡ୍‌ସ ଲିମିଟେଡ୍ (ଏମ୍‌ସିଏଲ୍‌) ପକ୍ଷରୁ ‘କୋଲ ଇଣ୍ଡିଆ ଭୁବନେଶ୍ୱର ହାଫ୍ ମାରାଥନ’ ଭୁବନେଶ୍ୱରସ୍ଥିତ କଳିଙ୍ଗ ଷ୍ଟାଡିୟମ୍‌ଠାରେ ଆୟୋଜିତ ହୋଇଯାଇଛି। ଏଥିରେ ୨୧ କିମି ହାଫ୍ ମାରାଥନ, ୧୦ କିମି ରନ୍‌, ୫ କିମି ଏବଂ ୧.୫ କିମି ଫନ୍ ରନ୍ ବର୍ଗରେ ବିଭିନ୍ନ ବୟସ ବର୍ଗର ୫ ହଜାରରୁ ଊର୍ଦ୍ଧ୍ୱ ମାରାଥନ ଧାବକ ଏବଂ ଉତ୍ସାହୀ ପ୍ରତିଯୋଗୀମାନେ ଅଂଶଗ୍ରହଣ କରିଥିଲେ। ଯାହାର ପୁରସ୍କାର ରାଶି ୪୫.୩୪ ଲକ୍ଷ ଟଙ୍କା ରଖାଯାଇଥିଲା। ଗତ ୫ ଦଶନ୍ଧି ଧରି କୋଲ୍ ଇଣ୍ଡିଆ ଲିମିଟେଡ୍‌ର ସଫଳ ଓ ଅନନ୍ୟ ଯାତ୍ରାକୁ ସ୍ମରଣୀୟ କରିବା ପାଇଁ ଓଡ଼ିଶା ସରକାରଙ୍କର କ୍ରୀଡ଼ା ବିଭାଗର ସହଭାଗିତାରେ ଆୟୋଜିତ ଏହି ମାରାଥନ ଥିଲା ଏକ ଅଭିନବ ପ୍ରୟାସ।

ମାରାଥନ୍ କାର୍ଯ୍ୟକ୍ରମରେ ଓଡ଼ିଶା ଉପ-ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା, ରାଜସ୍ୱ ମନ୍ତ୍ରୀ ସୁରେଶ ପୂଜାରୀ, କ୍ରୀଡ଼ା ଓ ଯୁବ ବ୍ୟାପାର ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ବରଗଡ଼ ସାଂସଦ ପ୍ରଦୀପ ପୁରୋହିତ, ପାଲଲହଡ଼ା ବିଧାୟକ ଅଶୋକ ମହାନ୍ତି, ଛେଣ୍ଡିପଦା ବିଧାୟକ ଅଗସ୍ତି ବେହେରା, ଅନୁଗୁଳ ବିଧାୟକ ପ୍ରତାପ ଚନ୍ଦ୍ର ପ୍ରଧାନ, ତାଳଚେର ବିଧାୟକ ବ୍ରଜ କିଶୋର ପ୍ରଧାନ, ଓଡ଼ିଶା ମୁଖ୍ୟ ସଚିବ ମନୋଜ ଆହୁଜା(ଆଇଏଏସ), କୋଲ ଇଣ୍ଡିଆ ଅଧ୍ୟକ୍ଷ ପି ଏମ୍ ପ୍ରସାଦ, ଏମ୍‌ସିଏଲ୍ ମୁଖ୍ୟ ପରିଚାଳନା ନିର୍ଦ୍ଦେଶକ ଉଦୟ ଅନନ୍ତ କାଓଲେଙ୍କ ସମେତ କୋଲ୍ ଇଣ୍ଡିଆର ସଂଚାଳନା ନର୍ଦ୍ଦେର୍ଶକ ତଥା ଓଡ଼ିଶାର ବିଭିନ୍ନ ଜିଲ୍ଲାର ବରିଷ୍ଠ ଏମସିଏଲ୍ ଅଧିକାରୀମାନେ ଯୋଗ ଦେଇଥିଲେ।

ମାରାଥନ୍‌ରେ ସ୍ୱଳ୍ପ ବୟସ୍କଙ୍କ ଠାରୁ ଆରମ୍ଭ କରି ବୟସ୍କ ଧାବକଙ୍କ ପର୍ଯ୍ୟନ୍ତ ସମସ୍ତଙ୍କ ମଧ୍ୟରେ ଦେଖିବାକୁ ମିଳିଥିଲା ଫୂର୍ତ୍ତି, ଆଗ୍ରହ ଓ ଉତ୍ସାହ। କେବଳ କ୍ରୀଡ଼ାପ୍ରେମୀ ନୁହେଁ, ଶକ୍ତିର ସୁରକ୍ଷା ପରିଚାଳନା ଦାୟିତ୍ୱରେ କୋଲ ଇଣ୍ଡିଆର ଉଲ୍ଲେଖନୀୟ ଅବଦାନକୁ ସମ୍ମାନ ଜଣାଇବା ପାଇଁ ପ୍ରତିଯୋଗୀମାନେ ଏହି ମାରାଥନ୍‌ରେ ଭାଗ ନେଇଥିଲେ। ପ୍ରତିଯୋଗିତାର ବିଭିନ୍ନ ବର୍ଗ ତଥା ବୟସ ବର୍ଗ ଅନୁଯାୟୀ ବିଜେତାମାନଙ୍କୁ ପୁରସ୍କାର ପ୍ରଦାନ କରାଯାଇଥିଲା।

ଲୋକପ୍ରିୟ ବ୍ୟାଡ୍‌ମିଣ୍ଟନ୍ ତାରକା ତଥା ସ୍ପୋର୍ଟସ ଆଇକନ୍ ସାଇନା ନେହୱାଲ ଏହି କାର୍ଯ୍ୟକ୍ରମରେ ଆମ୍ବାସାଡର ଭାବେ ଯୋଗ ଦେଇ ନିଜର କ୍ରୀଡ଼ାଯାତ୍ରା ଅନୁଭୂତି ବର୍ଣ୍ଣନା କରିବା ସହ ଉତ୍ସାହୀ ପ୍ରତିଯୋଗୀମାନଙ୍କ ମନୋବଳ ବଢାଇଥିଲେ। ହାଫ୍ ମାରାଥନ୍‌ରେ ପଶ୍ଚିମବଙ୍ଗରୁ ଲିଲି ଦାଶ ଓ ଉତ୍ତର ପ୍ରଦେଶରୁ ପ୍ରିନ୍ସ କୁମାର ଯଥାକ୍ରମେ ମହିଳା ଓ ପୁରୁଷ ବର୍ଗରେ ବିଜେତା ହୋଇଥିଲେ। ଉପ-ମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ାଙ୍କ ସହ କାର୍ଯ୍ୟକ୍ରମ ଆମ୍ବାସାଡ଼ର ସାଇନା ନେହୱାଲ ଓ ପ୍ରମୁଖ ଅତିଥି ମାନେ ପୁରସ୍କାର ରାଶି ବିତରଣ କରିଥିଲେ।

କେବଳ କୋଲ୍ ଇଣ୍ଡିଆର ଉତ୍କର୍ଷର ଏହି ୫୦ ବର୍ଷକୁ ପାଳନ କରିବା ପାଇଁ ନୁହେଁ ବରଂ ଏକ ସୁସ୍ଥ ଜୀବନଶୈଳୀର ଗୁରୁତ୍ୱକୁ ଲୋକଙ୍କ ନିକଟରେ ପହଞ୍ଚାଇବା ଲକ୍ଷ୍ୟ ନେଇ ଏହି ମାରାଥନ ଆୟୋଜିତ ହୋଇଥିଲା। ଏଥିସହ ଏମ୍‌ସିଏଲ୍ ଏବଂ କୋଲ ଇଣ୍ଡିଆ ଲିମିଟେଡ୍ ସ୍ୱାସ୍ଥ୍ୟ ସଚେତନତା ନେଇ ସମଗ୍ର ଦେଶରେ ଲୋକଙ୍କୁ ସଜାଗ କରିଆସୁଛି ଏବଂ ଭବିଷ୍ୟତରେ ମଧ୍ୟ ଏହି ସଚେତନତାର ପ୍ରଚାର ପାଇଁ ପ୍ରତିଶ୍ରୁତିବଦ୍ଧ।

Categories
ଆଜିର ଖବର ଜାତୀୟ ଖବର

ଏସ୍‌ଇସିଏଲ ଏବଂ ଏମ୍‌ସିଏଲ ଦ୍ୱାରା ତାପଜ ବିଦ୍ୟୁତ ପ୍ଲାଣ୍ଟ ସ୍ଥାପନ ପାଇଁ ଇକ୍ୟୁଟି ନିବେଶକୁ ମଞ୍ଜୁର କଲା କ୍ୟାବିନେଟ୍‌

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଆର୍ଥିକ ବ୍ୟାପାର ସଂକ୍ରାନ୍ତ କ୍ୟାବିନେଟ୍‌ କମିଟି ଆଜି ଦୁଇଟି ତାପଜ ବିଦ୍ୟୁତ ପ୍ଲାଣ୍ଟ ପ୍ରତିଷ୍ଠା ପାଇଁ ଇକ୍ୟୁଟି ନିବେଶ ପ୍ରସ୍ତାବକୁ ମଞ୍ଜୁର କରିଛି। ପ୍ରଥମ ପ୍ରକଳ୍ପ ଭାବେ ସାଉଥ୍‌ ଇଷ୍ଟର୍ଣ୍ଣ କୋଲ୍‌ଫିଲ୍ଡସ୍‌ ଲିମିଟେଡ୍‌ (ଏସଇସିଏଲ) ଏବଂ ଏମପିପିଜିସିଏଲର ଯୌଥ ଉଦ୍ୟୋଗ ଆକାରରେ ୧×୬୬୦ ମେଗାୱାଟ୍‌ ତାପଜ ବିଦ୍ୟୁତ ପ୍ଲାଣ୍ଟ ପ୍ରତିଷ୍ଠା କରାଯିବ। ମହାନଦୀ ବେସିନ୍‌ ପାୱାର୍‌ ଲିମିଟେଡ୍‌ (ଏମବିପିଏଲ) ଜରିଆରେ ମହାନଦୀ କୋଲ୍‌ ଫିଲ୍ଡସ୍‌ ଲିମିଟେଡ୍‌ (ଏମସିଏଲ) ପକ୍ଷରୁ ସୁନ୍ଦରଗଡ଼ ଜିଲ୍ଲାରେ ୨x୮୦୦ ମେଗାୱାଟ୍‌ କ୍ଷମତା ବିଶିଷ୍ଟ ତାପଜ ବିଦ୍ୟୁତ ପ୍ଲାଣ୍ଟ ପ୍ରତିଷ୍ଠା କରାଯିବାର ପ୍ରସ୍ତାବ ରହିଛି। ଏମବିପିଏଲ୍‌ ହେଉଛି ଏମସିଏଲର ଏକ ସହଯୋଗୀ କମ୍ପାନୀ।

ଏସଇସିଏଲ, ଏମସିଏଲ ଏବଂ ସିଆଇଏଲ୍‌ ଦ୍ୱାରା ଇକ୍ୟୁଟି ନିବେଶ ପ୍ରସ୍ତାବକୁ ଆର୍ଥିକ ବ୍ୟାପାର ସଂକ୍ରାନ୍ତ କ୍ୟାବିନେଟ୍‌ କମିଟି ନିମ୍ନ ମତେ ମଞ୍ଜୁର କରିଛି:

(କ).   ମଧ୍ୟପ୍ରଦେଶ ଅନୁପ୍ପୁର ଜିଲ୍ଲା ଚାଚାଇ ଗ୍ରାମରେ ଅମରକଣ୍ଟକ ତାପଜ ବିଦ୍ୟୁତ କେନ୍ଦ୍ର ଠାରେ ଏସଇସିଏଲ ଏବଂ ଏମପିପିଜିସିଏଲର ଯୌଥ ଉଦ୍ୟୋଗ ଜରିଆରେ ପ୍ରସ୍ତାବିତ ୧×୬୬୦ ମେଗାୱାଟ୍‌ ସୁପର୍‌ କ୍ରିଟିକାଲ ତାପଜ ବିଦ୍ୟୁତ କେନ୍ଦ୍ର ସ୍ଥାପନ ପାଇଁ ଆନୁମାନିକ ୫,୬୦୦ କୋଟି ଟଙ୍କାର ପ୍ରକଳ୍ପ ପୁଞ୍ଜିବ୍ୟୟ (±୨୦%ର ଶୁଦ୍ଧତା) ସହିତ ୭୦:୩୦ ଋଣ-ଇକ୍ୟୁଟି ଅନୁପାତ ଏବଂ ୪୯% ଇକ୍ୟୁଟୀ ନିବେଶକୁ ବିଚାର କରି ଏସଇସିଏଲ୍‌ ଦ୍ୱାରା ଯୌଥ ଉଦ୍ୟୋଗ କମ୍ପାନୀରେ ୮୨୩ କୋଟି (± 20%) ଟଙ୍କାର ଇକ୍ୟୁଟି ପୁଞ୍ଜି ନିବେଶ।

(ଖ).   ଏମବିପିଏଲ୍‌ ଜରିଆରେ ଆନୁମାନିକ ୧୫,୯୪୭ କୋଟି ଟଙ୍କା (±୨୦% ସଠିକତା) ର ପ୍ରକଳ୍ପ ପୁଞ୍ଜିବ୍ୟୟ ସହିତ ଓଡ଼ିଶାର ସୁନ୍ଦରଗଡ଼ ଜିଲ୍ଲାରେ ପ୍ରସ୍ତାବିତ ୨×୮୦୦ ମେଗାୱାଟ୍‌ ସୁପର୍‌ କ୍ରିଟିକାଲ ତାପଜ ବିଦ୍ୟୁତ କେନ୍ଦ୍ର ପାଇଁ ଏମସିଏଲ ଦ୍ୱାରା ୪,୭୮୪ କୋଟି ଟଙ୍କା (±୨୦%)ର ଇକ୍ୟୁଟି ପୁଞ୍ଜିନିବେଶ।

(ଗ). ୨×୮୦୦ ମେଗାୱାଟ୍‌ ସୁପର-କ୍ରିଟିକାଲ୍‌ ତାପଜ ବିଦ୍ୟୁତ ପ୍ଲାଣ୍ଟ ପ୍ରତିଷ୍ଠା ପାଇଁ  ଏମସିଏଲର ଏସପିଭି ଏମବିପିଏଲକୁ ଅନୁମତି।

(ଘ).  ଉପରୋକ୍ତ ପ୍ରକାରରେ ବିନ୍ଦୁ (କ) ଠାରେ ଏସଇସିଏଲ-ଏମପିପିଜିସିଏଲର ଯୌଥ ଉଦ୍ୟୋଗରେ ସିଆଇଏଲ୍‌ ଦ୍ୱାରା ନିଜ ମୋଟ୍‌ ମୂଲ୍ୟର ୩୦% ଠାରୁ ଅଧିକ ଇକ୍ୟୁଟି ନିବେଶ ଏବଂ ଉପରୋକ୍ତ ପ୍ରକାରରେ ବିନ୍ଦୁ (ଖ) ଭଳି ଏମସିଏଲ୍‌ର ଶତପ୍ରତିଶତ ମାଲିକାନାରେ ଥିବା ସହାୟକ କମ୍ପାନୀ ଏମବିପିଏଲ୍ ଦ୍ୱାରା ଇକ୍ୟୁଟି ନିବେଶ (୪,୭୮୪ କୋଟି ଟଙ୍କା ± 20%)।

ବିଶ୍ୱର ସର୍ବବୃହତ କୋଇଲା ଖଣି କମ୍ପାନି କୋଲ୍ ଇଣ୍ଡିଆ ଲିମିଟେଡ୍ (ସିଆଇଏଲ୍) ଦେଶକୁ ଶସ୍ତା ବିଜୁଳି ଯୋଗାଇବା ଉଦ୍ଦେଶ୍ୟରେ ଏହାର ସହାୟକ ସଂସ୍ଥା ଜରିଆରେ ଦୁଇଟି ପିଟ୍ ହେଡ୍ ତାପଜ ବିଦ୍ୟୁତ ପ୍ଲାଣ୍ଟ ସ୍ଥାପନ କରିବ –

(କ). ମଧ୍ୟପ୍ରଦେଶର ଅନୁପପୁର ଜିଲ୍ଲାର ଚଚାଇ ଗ୍ରାମର ଅମରକଣ୍ଟକ ତାପଜ ବିଦ୍ୟୁତ ଷ୍ଟେସନରେ ଏସଇସିଏଲ ଏବଂ ମଧ୍ୟପ୍ରଦେଶ ବିଦ୍ୟୁତ ଉତ୍ପାଦନ କମ୍ପାନୀ ଲିମିଟେଡ (ଏମପିପିଜିସିଏଲ) ମଧ୍ୟରେ ଜେଭି ମାଧ୍ୟମରେ ୧×୬୬୦ ମେଗାୱାଟ ସୁପରକ୍ରିଟିକାଲ କୋଇଲା ଭିତ୍ତିକ ତାପଜ ବିଦ୍ୟୁତ ପ୍ଲାଣ୍ଟ (ଟିପିପି);

(ଖ). ଏମସିଏଲ୍‌ର ସମ୍ପୂର୍ଣ୍ଣ ମାଲିକାନାରେ ଥିବା ସହାୟକ ସଂସ୍ଥା ‘ମହାନଦୀ ବେସିନ୍ ପାୱାର ଲିମିଟେଡ୍’ (ଏମ୍‌ବିପିଏଲ୍) ଜରିଆରେ ଓଡ଼ିଶାର ସୁନ୍ଦରଗଡ଼ ଜିଲ୍ଲାରେ ୨×୮୦୦ ମେଗାଓ୍ଵାଟ୍ ସୁପରକ୍ରିଟିକାଲ ତାପଜ ବିଦ୍ୟୁତ ପ୍ଲାଣ୍ଟ ସ୍ଥାପନ।

Categories
ଆଜିର ଖବର ଜାତୀୟ ଖବର

୨୦୨୨ – ୨୩ରେ ଓଡିଶାରେ ଦୁଇଟି ଇକୋ – ପାର୍କ ସ୍ଥାପନ କରିଛି ଏମ୍‌ସିଏଲ୍

ନୂଆଦିଲ୍ଲୀ: କୋଇଲା / ଲିଗ୍‌ନାଇଟ୍ ପିଏସ୍‌ୟୁଗୁଡ଼ିକ ଗତ ୫ ବର୍ଷ ମଧ୍ୟରେ ୧୫ଟି ଇକୋ- ପାର୍କ ସ୍ଥାପନ କରିଛନ୍ତି । ଇକୋ ପାର୍କ ପାଇଁ ସରକାର କୌଣସି ପାଣ୍ଠି ଆବଣ୍ଟନ କରି ନାହାନ୍ତି। ଇକୋ- ପାର୍କର ପ୍ରତିଷ୍ଠା, ରକ୍ଷଣାବେକ୍ଷଣ ଏବଂ ଯତ୍ନ ବାବଦରେ ସମ୍ପୃକ୍ତ କୋଇଲା / ଲିଗ୍‌ନାଇଟ୍ ପିଏସ୍‌ୟୁ ଗୁଡ଼ିକ ଅର୍ଥ ଯୋଗାଉଛନ୍ତି।

୨୦୨୨-୨୩ରେ ଓଡ଼ିଶା ଏମସିଏଲ୍ ପକ୍ଷରୁ ଦୁଇଟି ଇକୋ ପାର୍କକୁ ସମ୍ପୂର୍ଣ୍ଣ କରାଯାଇଥିଲା। ଚନ୍ଦ୍ରଶେଖର ଆଜାଦ ଇକୋ ପାର୍କକୁ  ୩୮୭ ଦିନରେ ସମ୍ପୂର୍ଣ୍ଣ କରାଯାଇଥିବା ବେଳେ ସେଥି ପାଇଁ ୨୭୮ ଲକ୍ଷ ଟଙ୍କା ଆବଂଟିତ ହୋଇଥିଲା।  ଉତ୍କଳ ଉପବନ ଇକୋ – ପାର୍କ ପାଇଁ  ଏମସିଏଲ ୧୬୮ ଲକ୍ଷ ଟଙ୍କା ଆବଂଟିତ କରିଥିବା ବେଳେ ଏହାକୁ  ୨୭୦ ଦିନରେ ସମ୍ପୂର୍ଣ୍ଣ କରିଥିଲା।  ଆଗକୁ ୬୦୦ ଲକ୍ଷ ଟଙ୍କାର ଆନୁମାନିକ ପାଣ୍ଠି ସହିତ ଏମ୍‌ସିଏଲ୍ ଜଗନ୍ନାଥ ବାଟିକା ଇକୋ – ପାର୍କ ସ୍ଥାପନ କରିବା ପାଇଁ ସ୍ଥିର କରିଛି।

ଇକୋ- ପାର୍କ ଗୁଡ଼ିକର ରାଜ୍ୟଭିତ୍ତିକ ଏବଂ ବର୍ଷ ଅନୁଯାୟୀ ବିବରଣୀ, ସମ୍ପୂର୍ଣ୍ଣ ସମୟର ବିବରଣୀ, କୋଇଲା / ଲିଗ୍‌ନାଇଟ୍ ପିଏସ୍‌ୟୁଗୁଡ଼ିକ ଦ୍ୱାରା ଆବଣ୍ଟିତ ପାଣ୍ଠିର ପ୍ରାରମ୍ଭିକ ପରିମାଣ ଏବଂ ଆବଶ୍ୟକ ଅତିରିକ୍ତ ପାଣ୍ଠି ସଂଲଗ୍ନ ପତ୍ର -୧ରେ ପ୍ରଦାନ କରାଯାଇଛି।

କୋଇଲା/ ଲିଗ୍‌ନାଇଟ୍ ପିଏସ୍‌ୟୁଗୁଡ଼ିକ ଦ୍ୱାରା ନୂତନ ଇକୋ- ପାର୍କ ପାଇଁ ଆନୁମାନିକ ପାଣ୍ଠିର ବିବରଣୀ ସଂଲଗ୍ନ ପତ୍ର -୨ରେ ପ୍ରଦାନ କରାଯାଇଛି।

ନିକଟସ୍ଥ ଅଞ୍ଚଳର ମନୋରଞ୍ଜନ ଉଦ୍ଦେଶ୍ୟରେ କୋଇଲା/ ଲିଗ୍‌ନାଇଟ୍ ପିଏସ୍‌ୟୁଗୁଡ଼ିକ ଦ୍ୱାରା ଇକୋ-ପାର୍କ ବିକଶିତ କରା ଯାଇଥିଲା ଏବଂ ଏହି ଇକୋ – ପାର୍କରୁ ଆୟ ହୋଇଥିବା କୌଣସି ରାଜସ୍ୱ ଖଣି ଅଞ୍ଚଳର ବିକାଶରେ ଖର୍ଚ୍ଚ କରାଯାଏ ନାହିଁ। ତେବେ ଖଣି ପର୍ଯ୍ୟଟନକୁ ପ୍ରୋତ୍ସାହନ ଦେବା ପାଇଁ ଛତିଶଗଡ଼ର ଏସଇସିଏଲର କେନାପଡ଼ା ଇକୋ ପାର୍କ ସ୍ଥାନୀୟ ସ୍ୱୟଂ ସହାୟକ ଗୋଷ୍ଠୀ ଦ୍ୱାରା ପରିଚାଳିତ ଓ ରକ୍ଷଣାବେକ୍ଷଣ କରାଯାଏ। ଏହି ସ୍ୱୟଂ ସହାୟକ ଗୋଷ୍ଠୀମାନେ ସେମାନଙ୍କ ଜୀବିକା ପାଇଁ କେନାପଡ଼ା ଇକୋ ପାର୍କର ଭାସମାନ ରେଷ୍ଟୁରାଣ୍ଟ,  ମତ୍ସ୍ୟ ଚାଷ  ଓ ବୋଟିଂ ସୁବିଧାରୁ ମଧ୍ୟ ଅର୍ଥ ରୋଜଗାର କରୁଛନ୍ତି।

କେନ୍ଦ୍ର କୋଇଲା, ଖଣି ଓ ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ବୁଧବାର ଦିନ ଲୋକସଭାରେ ଏକ ଲିଖିତ ଉତ୍ତରରେ ଏହି ସୂଚନା ଦେଇଛନ୍ତି।