ଚଣ୍ଡିଗଡ: ଅକ୍ଟୋବର ୩୦ ତାରିଖରେ ହରିୟାଣାର ଏଲନାବାଦ ବିଧାନସଭା ଆସନ ପାଇଁ ନିର୍ବାଚନ ହେବାକୁ ଯାଉଛି। କୃଷକଙ୍କ ଆନ୍ଦୋଳନକୁ ଦୃଷ୍ଟିରେ ରଖି ଏହି ନିର୍ବାଚନ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। କୃଷକ ଆନ୍ଦୋଳନରେ ଅଂଶଗ୍ରହଣ କରୁଥିବା ସମସ୍ତ ସଂଗଠନ ବିଜେପି-ଜେଜେପି ମିଳିତ ମଞ୍ଚକୁ ବିରୋଧ କରୁଛନ୍ତି। ଏହା ସହିତ ଏସକେଏମ ନେତା ରାକେଶ ଟିକାଏତ ଇଣ୍ଡିଆନ ନ୍ୟାସନାଲ ଲୋକ ଦଳ ଅଭୟ ଚୌଟାଲଙ୍କୁ ସମର୍ଥନ କରିବାକୁ ସଂକେତ ଦେଇଛନ୍ତି।
ବିଜେପି ପ୍ରାର୍ଥୀଙ୍କ ବିରୋଧରେ ପ୍ରଚାର କରିବା ପାଇଁ ରାକେଶ ଟିକାଏତ ଏବଂ ଏସକେଏମର ସମସ୍ତ ବଡ ନେତା ବୁଧବାର ଏଲନାବାଦରେ ପହଞ୍ଚିଥିଲେ। ଏହି ସମୟରେ ରାକେଶ ଟିକାଏତ କହିଛନ୍ତି ଯେ, ୬ ମାସ ପୂର୍ବେ ଜଣେ ବ୍ୟକ୍ତି ବ୍ୟାଗ ନେଇ ପଞ୍ଚାୟତକୁ ଯାଇଥିଲେ, ବର୍ତ୍ତମାନ ସେହି ବ୍ୟାଗ ଫେରାଇ ଦିଅନ୍ତୁ, ତାଙ୍କ ପାଖରେ ଥିବା ଜିନିଷ ଫେରାଇ ଦିଅନ୍ତୁ।
ତିନୋଟି କୃଷି ଆଇନ ରଦ୍ଦ ନକରିବା ଯାଏଁ କୃଷକଙ୍କ ଆନ୍ଦୋଳନ ଶେଷ ହେବ ନାହିଁ ବୋଲି ରାକେଶ ଟିକାଏତ ପୁଣି ଥରେ ସ୍ପଷ୍ଟ କରିଛନ୍ତି। ଏହା ସହିତ ରାକେଶ ଟିକାଏତ କହିଛନ୍ତି ଯେ, ଆସନ୍ତା ବର୍ଷ ମଧ୍ୟ ୟୁପି ନିର୍ବାଚନରେ କୃଷକ ସଂଗଠନ ବିଜେପିକୁ ବିରୋଧ କରିବ।
ଏଲନାବାଦ ବିଧାନସଭା ଆସନରେ ଆଇଏନଏଲଡି ପ୍ରାର୍ଥୀ ଅଭୟ ଚୌଟାଲ, କଂଗ୍ରେସ ପ୍ରାର୍ଥୀ ପୱନ ବେନିୱାଲ ଏବଂ ବିଜେପି ପ୍ରାର୍ଥୀ ଗୋବିନ୍ଦ କାଣ୍ଡାଙ୍କ ମଧ୍ୟରେ ପ୍ରତିଦ୍ବନ୍ତିତା ହେବ।