Tag: ଓଡ଼ିଆ ଭାଷା

ନୂଆଦିଲ୍ଲୀ: ଦେଶ ସ୍ୱାଧୀନତାର ୭୫ ବର୍ଷ ପୂର୍ତ୍ତି ପାଳନ କରିବା ଉଦ୍ଦେଶ୍ୟରେ କେନ୍ଦ୍ର ସାହିତ୍ୟ ଏକାଡେମୀ ପକ୍ଷରୁ ‘ସାହିତ୍ୟୋତ୍ସବ’ କାର୍ଯ୍ୟକ୍ରମ ଅନୁଷ୍ଠିତ ହେଉଛି। ଗତକାଲି ଠାରୁ ନୂଆଦିଲ୍ଲୀରେ ଆରମ୍ଭ ହୋଇଥିବା ଏହି ଉତ୍ସବକୁ ଭାରତର ସବୁଠୁ ସମାବେଶୀ ସାହିତ୍ୟ ଉତ୍ସବ ବୋଲି ବିବେଚନା କରାଯାଉଛି।

ଏହି ଉତ୍ସବ ଉପଲକ୍ଷେ ରବିନ୍ଦ୍ର ଭବନ ଲନ୍‌ ଠାରେ ‘ଜନଜାତି ଲେଖକ ସମ୍ମିଳନୀ’ ଅନୁଷ୍ଠିତ ହୋଇଥିଲା, ଏଥିରେ ୨୪ଟି ଜନଜାତି ଭାଷାର ପ୍ରତିନିଧିତ୍ୱ ଦେଖିବାକୁ ମିଳିଥିଲା। ବିଶିଷ୍ଟ ବଲ୍‌ତି କବି ଅଖୋନେ ଅଜଗର ଅଲି ବଶରତ ଏହି ସମ୍ମିଳନୀକୁ ଉଦଘାଟନ କରିଥିଲେ।

ସାହିତ୍ୟ ଉତ୍ସବ ସନ୍ଧ୍ୟାରେ କପର୍ନିକସ୍‌ ମାର୍ଗସ୍ଥିତ କମନୀ ପ୍ରେକ୍ଷାଳୟ ଠାରେ ୨୪ ଜଣ ଲେଖକଙ୍କୁ ସମ୍ମାନଜନକ ‘କେନ୍ଦ୍ର ସାହିତ୍ୟ ଏକାଡେମୀ ପୁରସ୍କାର’ ପ୍ରଦାନ କରାଯାଇଥିଲା। ଓଡ଼ିଆ ଭାଷାରେ ବିଶିଷ୍ଟ କବି ତଥା ସାହିତ୍ୟିକ ଡକ୍ଟର ହୃଷିକେଶ ମଲ୍ଲିକ ପୁରସ୍କାର ଗ୍ରହଣ କରିଥିଲେ। ସାହିତ୍ୟ ଏକାଡେମୀର ସଭାପତି ଡକ୍ଟର ଚନ୍ଦ୍ରଶେଖର କମ୍ବାର ବିଜେତାମାନଙ୍କୁ ପୁରସ୍କାର ପ୍ରଦାନ କରିଥିଲେ। ପୁରସ୍କାର ବିତରଣ ସମାରୋହରେ ବିଶିଷ୍ଟ ମରାଠୀ ଲେଖକ ଡକ୍ଟର ଭାଲଚନ୍ଦ୍ର ନେମାଦେ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ।

ପୁରସ୍କାର ବିଜେତାମାନଙ୍କ ମଧ୍ୟରେ ଅନୁରାଧା ଶର୍ମା ପୂଜାରୀ (ଅହମିୟା), ବ୍ରତ୍ୟ ବସୁ (ବଙ୍ଗଳା), ମୋଦାୟ ଗାହାୟ (ବୋଡୋ), ରାଜ ରାହି (ଡୋଗ୍ରୀ), ନମିତା ଗୋଖଲେ (ଇଂରାଜୀ), ଯଜ୍ଞେଶ ଦଭେ (ଗୁଜରାଟୀ), ଦୟା ପ୍ରକାଶ ସିହ୍ନା (ହିନ୍ଦୀ), ୱାଲି ମହମ୍ମଦ ଅସୀର କିସ୍ତୱାରୀ (କଶ୍ମିରୀ), ସଞ୍ଜୀବ ଭେରେଙ୍କର (କୋଙ୍କଣୀ), ଜଗଦୀଶ ପ୍ରସାଦ ମଣ୍ଡଳ (ମୈଥିଳୀ), ଜର୍ଜ ଓଣକ୍କର (ମାଲାୟଲମ), ଥୋକୋଚୋମ୍‌ ଇବୋହାନବୀ ସିଂ (ମଣିପୁରୀ), କୀରଣ ଗୌରବ (ମରାଠୀ), ଛବିଲାଲ ଉପାଧ୍ୟାୟ (ନେପାଳୀ), ହୃଷିକେଶ ମଲ୍ଲିକ (ଓଡ଼ିଆ), ଖାଲିଦ୍‌ ହୁସୈନ (ପଞ୍ଜାବୀ), ମୀଠେଶ ନିର୍ମୋହୀ (ରାଜସ୍ଥାନୀ), ନିରଞ୍ଜନ ହାଁସଦା (ସାନ୍ତାଳୀ), ଅର୍ଜ୍ଜୁନ ଚାୱଲା (ସିନ୍ଧୀ), ଅମ୍ବାଇ (ତାମିଲ), ଗୋରେତି ଭେଙ୍କନ୍ନା (ତେଲୁଗୁ), ଚନ୍ଦର ଭାନ୍‌ ଖୟାଲ (ଉର୍ଦ୍ଦୁ), ବିନ୍ଧେଶ୍ୱରୀ ପ୍ରସାଦ ମିଶ୍ରା ‘ବିନୟ’ (ସଂସ୍କୃତ) ସମ୍ମାନିତ ହୋଇଥିଲେ।

ଆସନ୍ତାକାଲି ପୂର୍ବାହ୍ନ ୧୦ଟାରେ ଏହି ୨୪ ଜଣ ପୁରସ୍କାର ବିଜେତାମାନଙ୍କୁ ନେଇ ରବୀନ୍ଦ୍ର ଭବନ ଲନ ଠାରେ ଏକ ଲେଖକ ସମ୍ମିଳନୀ ଆୟୋଜନ କରାଯିବ। ଏହି ସମ୍ମିଳନୀରେ ପୁରସ୍କାର ବିଜେତାମାନେ ସେମାନଙ୍କ ପୁରସ୍କାରପ୍ରାପ୍ତ ସୃଜନଶୀଳ ସର୍ଜନା ପଛରେ ରହିଥିବା ଅନୁଭୂତି ବାଣ୍ଟିବେ। ସେହିପରି ଆସନ୍ତାକାଲି ମଧ୍ୟ ‘‘୧୯୪୭ ମସିହା ପରଠାରୁ ଭାରତରେ ନାଟକର କ୍ରମବିକାଶ’’ ଉପରେ ଏକ ସଂଗୋଷ୍ଠୀ ଆୟୋଜନ କରାଯିବ। ଏହାକୁ ବିଶିଷ୍ଟ ମଞ୍ଚ ବ୍ୟକ୍ତିତ୍ୱ ଶ୍ରୀ ଭାନୁ ଭାରତୀ ଉଦଘାଟନ କରିବେ ଏବଂ ସାହିତ୍ୟ ଏକାଡେମୀ ସଭାପତି ଡକ୍ଟର ଚନ୍ଦ୍ରଶେଖର କମ୍ବାର ଏଥିରେ ଅଧ୍ୟକ୍ଷତା କରିବେ।

ଏହାପରେ ମାର୍ଚ୍ଚ ୧୩ରୁ ୧୫ ତାରିଖ ପର୍ଯ୍ୟନ୍ତ ‘‘ଭାରତର ସ୍ୱାଧୀନତା ଆନ୍ଦୋଳନରେ ସାହିତ୍ୟର ପ୍ରଭାବ’’ ଉପରେ ଏକ ତିନି ଦିନିଆ ସେମିନାର ଆୟୋଜନ କରାଯିବ। ମାର୍ଚ୍ଚ ୧୩ ତାରିଖରେ ବିଶିଷ୍ଟ ହିନ୍ଦୀ ଲେଖକ ତଥା ସାହିତ୍ୟ ଏକାଡେମୀ ସଦସ୍ୟ ଡକ୍ଟର ବିଶ୍ୱନାଥ ପ୍ରସାଦ ତିୱାରୀ ଏହାକୁ ଉଦଘାଟନ କରିବେ। ବିଶିଷ୍ଟ ଗବେଷକ ଡକ୍ଟର ହରୀଶ ତ୍ରିବେଦୀ ଦୀକ୍ଷାନ୍ତ ଭାଷଣ ଦେବେ। ସାରା ଦେଶରୁ ୪୨ ଜଣ ବିଶିଷ୍ଟ ଗବେଷକ ଏଥିରେ ଅଂଶଗ୍ରହଣ କରିବେ ଏବଂ ଭାରତର ସ୍ୱାଧୀନତା ଆନ୍ଦୋଳନରେ ସାହିତ୍ୟର ପ୍ରଭାବ ଉପରେ ସନ୍ଦର୍ଭ ଉପସ୍ଥାପନା କରିବେ।

ବିଶିଷ୍ଟ ଲେଖକ ଦେବେନ୍ଦ୍ର ମେୱାରୀ ‘‘୧୯୪୭ ପରଠାରୁ ଭାରତୀୟ ଭାଷା ଉପରେ କଳ୍ପନା ଓ ବିଜ୍ଞାନର ପ୍ରଭାବ’ ଉପରେ ଏକ ସଂଗୋଷ୍ଠୀକୁ ସେହିଦିନ ଉଦଘାଟନ କରିବେ। ଏହି ଅବସରରେ ଜଗଦଗୁରୁ ରାମାନନ୍ଦାଚାର୍ଯ୍ୟ ସ୍ୱାମୀ ରାମଭଦ୍ରାଚାର୍ଯ୍ୟଙ୍କୁ ସାହିତ୍ୟ ଏକାଡେମୀ ସଭାପତି ସମ୍ମାନଜନକ ସାହିତ୍ୟ ଏକାଡେମୀ ଫେଲୋଶିପ୍‌ ସମ୍ମାନରେ ସମ୍ମାନିତ କରିବେ।

୧୪ ତାରିଖରେ ‘‘ଗଣମାଧ୍ୟମ ଓ ସାହିତ୍ୟ’’ ଉପରେ ଏକ ଆଲୋଚନା କାର୍ଯ୍ୟକ୍ରମ ଅନୁଷ୍ଠିତ ହେବ। ଆକାଶବାଣୀର ମହାନିର୍ଦ୍ଦେଶକ ଭେଣୁଧର ରେଡ୍ଡୀ ଏହାକୁ ଉଦଘାଟନ କରିବେ। ବିଶିଷ୍ଟ ମରାଠୀ ଲେଖକ ବିଶ୍ୱାସ ପାଟିଲଙ୍କ ଅଧ୍ୟକ୍ଷତାରେ ଅନୁଷ୍ଠିତ ହେବାକୁ ଥିବା ଏହି କାର୍ଯ୍ୟକ୍ରମରେ ଦୈନିକ ଜାଗରଣର ସାହିତ୍ୟ ସମ୍ପାଦକ ଶ୍ରୀ ରାଜେନ୍ଦ୍ର ରାଓ ସମ୍ମାନିତ ଅତିଥି ଭାବେ ଯୋଗଦେବେ। ଏହି ଦିନ ‘‘ତୃତୀୟଲିଙ୍ଗ କବି ସମ୍ମିଳନୀ’’, ‘‘ପୂର୍ବୋତ୍ତରୀ : ଉତ୍ତର ପୂର୍ବ ଏବଂ ଉତ୍ତରାଞ୍ଚଳ ଲେଖକ ସମ୍ମିଳନୀ’’ ମଧ୍ୟ ଆୟୋଜିତ ହେବ। ଏଥିରେ ବିଶିଷ୍ଟ ଲେଖକ ଓ ସାହିତ୍ୟିକ ମାନେ ଅଂଶଗ୍ରହଣ କରିବେ।

ପ୍ରତ୍ୟେକ ଦିନ ଏକାଡେମୀ ପକ୍ଷରୁ ଏକ ପୁସ୍ତକ ମେଳା ସକାଳ ୧୦ଟା ଠାରୁ ସନ୍ଧ୍ୟା ୭ଟା ପର୍ଯ୍ୟନ୍ତ ଆୟୋଜନ କରାଯାଉଛି।

ନୂଆଦିଲ୍ଲୀ: ଆଜାଦୀ କା ଅମୃତ ମହୋତ୍ସବ କାର୍ଯ୍ୟକ୍ରମର ଅଂଶବିଶେଷ ଭାବେ ପିଏମ ଯୁବା ମେଣ୍ଟରଶିପ୍‌ ବା ପ୍ରଶିକ୍ଷଣ ଯୋଜନା ଅଧୀନରେ ସାରା ଦେଶରୁ ଚୟନ କରାଯାଇଥିବା ୭୫ ଜଣ ଶ୍ରେଷ୍ଠ ଯୁବ ଲେଖକଙ୍କ ନାମ ଘୋଷଣା କରାଯାଇଛି। ଏହି ଲେଖକମାନଙ୍କୁ ଚୟନ କରିବା ଲାଗି କେନ୍ଦ୍ର ଶିକ୍ଷା ମନ୍ତ୍ରଣାଳୟ ଅଧୀନ ରାଷ୍ଟ୍ରୀୟ ପୁସ୍ତକ ନ୍ୟାସ (ଏନବିଟି) ପକ୍ଷରୁ ‘ଭାରତର ଜାତୀୟ ଆନ୍ଦୋଳନ’ ଶୀର୍ଷକ ଏକ ସର୍ବଭାରତୀୟ ପ୍ରତିଯୋଗିତା ଆୟୋଜନ କରାଯାଇଥିଲା। ଏହି ପ୍ରତିଯୋଗିତା ମାଧ୍ୟମରେ ଏକ ବୃତ୍ତି ତଥା ପ୍ରଶିକ୍ଷଣ (ସ୍କଲାରଶିପ କମ୍‌ ମେଣ୍ଟରଶିପ) ଯୋଜନା ପାଇଁ ଲେଖକମାନଙ୍କୁ ଚୟନ କରାଯାଇଛି।

ଉଲ୍ଲେଖନୀୟ ବିଷୟ ହେଉଛି, ଏହି ୭୫ ଜଣ ଶ୍ରେଷ୍ଠ ଯୁବ ଲେଖକଙ୍କ ମଧ୍ୟରେ ୩ ଜଣ ଓଡ଼ିଆ ଲେଖକ ଅଛନ୍ତି। ସେମାନେ ହେଲେ– ଅନିନ୍ଦ୍ୟ ନାରାୟଣ ସିଂ, ଦିଲେଶ୍ବର ରଣା, ଓମ ପ୍ରିୟଦର୍ଶୀ ଛୋଟରାୟ।

ମାଇଁ ଗଭ ଓ ରାଷ୍ଟ୍ରୀୟ ପୁସ୍ତକ ନ୍ୟାସ, ଭାରତ ପ୍ଲାଟଫର୍ମ ଜରିଆରେ ଜୁନ ପହିଲାରୁ ଜୁଲାଇ ୩୧ ତାରିଖ ମଧ୍ୟରେ ସର୍ବଭାରତୀୟ ପ୍ରତିଯୋଗିତା ଆୟୋଜନ କରାଯାଇଥିଲା। ସାରା ଦେଶରୁ ତଥା ବିଦେଶରେ ଥିବା ଭାରତୀୟ ସମୁଦାୟଙ୍କ ପକ୍ଷରୁ ୨୨ଟି ସାମ୍ବିଧାନିକ ଭାଷା ଓ ଇଂରାଜୀରେ ପାଖାପାଖି ୧୬ ହଜାର ଆବେଦନ ପ୍ରାପ୍ତ ହୋଇଥିଲା। ବିଶେଷଜ୍ଞମାନଙ୍କ ଏକାଧିକ ପ୍ୟାନେଲ ସମସ୍ତ ପୁସ୍ତକ ପ୍ରସ୍ତାବକୁ ପଢ଼ିଥିଲେ ଏବଂ ଏସବୁର ତ୍ରିସ୍ତରୀୟ ଯାଞ୍ଚ କରାଯାଇଥିଲା।

ଏଠାରେ ଉଲ୍ଲେଖ ଯୋଗ୍ୟ ଯେ, ୩୧ ଜାନୁଆରୀ ୨୦୨୧ରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ନିଜର ମାସିକ ରେଡିଓ କାର୍ଯ୍ୟକ୍ରମ ମନ କୀ ବାତରେ କହିଥିଲେ : ‘‘ଆମର ସ୍ବାଧୀନତା ସଂଗ୍ରାମୀ, ସେମାନଙ୍କ ସହ ଜଡ଼ିତ ଘଟଣାବଳୀ ଏବଂ ନିଜ ନିଜ କ୍ଷେତ୍ରରେ ସ୍ବାଧୀନତା ସଂଗ୍ରାମର ବୀରତ୍ବ ଗାଥା ସମ୍ପର୍କରେ ଲେଖିବା ଲାଗି ମୁଁ ମୋ ଯୁବ ବନ୍ଧୁମାନଙ୍କୁ ଆହ୍ବାନ କରୁଛି।’’ ଏହାପରେ କାର୍ଯ୍ୟକାରୀ ସଂସ୍ଥା ଭାବେ ଭାରତୀୟ ରାଷ୍ଟ୍ରୀୟ ପୁସ୍ତକ  ନ୍ୟାସକୁ  ସାଥୀରେ ନେଇ ଭାରତ ସରକାରଙ୍କ ଶିକ୍ଷା ମନ୍ତ୍ରଣାଳୟ ପକ୍ଷରୁ ଯୁବ ଲେଖକମାନଙ୍କ ପାଇଁ ପିଏମ-ଯୁବା ମେଣ୍ଟରଶିପ ଯୋଜନା ଆରମ୍ଭ କରାଯାଇଥିଲା।

ଚୟନ କରାଯାଇଥିବା ୭୫ ଜଣ ଲେଖକଙ୍କ ମଧ୍ୟରୁ ୩୮ ଜଣ ପୁରୁଷ ଏବଂ ୩୭ ଜଣ ମହିଳା ଲେଖକ ଥିଲେ। ଆହୁରି ଦୁଇ ଜଣ ଲେଖକଙ୍କ ବୟସ ୧୫ ବର୍ଷରୁ କମ ହୋଇଥିବା ବେଳେ ୧୬ ଜଣ ଲେଖକଙ୍କ ବୟସ ୧୫-୨୦ ବର୍ଷ ମଧ୍ୟରେ ଏବଂ ୩୨ ଜଣ ଲେଖକଙ୍କ ବୟସ ୨୧-୨୫ ବର୍ଷ ମଧ୍ୟରେ ହୋଇଥିବା ବେଳେ ୨୫ ଜଣ ଲେଖକଙ୍କ ବୟସ  ୨୬-୩୦ ବର୍ଷ ମଧ୍ୟରେ ରହିଛି।

ଚୟନ କରାଯାଇଥିବା ଲେଖକମାନଙ୍କୁ ଛଅ ମାସ ବ୍ୟାପୀ ପ୍ରଶିକ୍ଷଣ କାର୍ଯ୍ୟକ୍ରମରେ ସାମିଲ କରାଯିବ। ଏଥିରେ ସେମାନଙ୍କୁ ଆଜାଦୀ କା ଅମୃତ ମହାତ୍ସବ ଯୋଜନାର ଅଂଶବିଶେଷ ଭାବେ ନିଜର ପୁସ୍ତକ ପ୍ରସ୍ତାବଗୁଡ଼ିକୁ ସମ୍ପୂର୍ଣ୍ଣ ପୁସ୍ତକ ଆକାରରେ ପ୍ରକାଶ କରିବା ଲାଗି ରାଷ୍ଟ୍ରୀୟ ପୁସ୍ତକ ନ୍ୟାସ, ଭାରତ ପକ୍ଷରୁ ବିଶିଷ୍ଟ ଲେଖକ ଏବଂ ସମ୍ପାଦକୀୟ ଦଳ ଦ୍ବାରା ଗବେଷଣା ଓ ସମ୍ପାଦକୀୟ ସମର୍ଥନ ଯୋଗାଇ ଦିଆଯିବ। ସେମାନଙ୍କର ପ୍ରକାଶିତ ପୁସ୍ତକ ପରବର୍ତ୍ତୀ ଅବସ୍ଥାରେ ଅନ୍ୟ ଭାରତୀୟ ଭାଷାରେ ପ୍ରକାଶ କରାଯିବ।

ଏହି ପ୍ରଶିକ୍ଷଣ କାର୍ଯ୍ୟକ୍ରମ ସମୟରେ, ବଛା ହୋଇଥିବା ଲେଖକମାନଙ୍କୁ ଛଅ ମାସ ପାଇଁ ମାସିକ ୫୦,୦୦୦ ଟଙ୍କା ଲେଖାଏଁ ବୃତ୍ତି ଯୋଗାଇ ଦିଆଯିବ। ଆହୁରି, ଲେଖକମାନଙ୍କୁ ସେମାନଙ୍କର ପୁସ୍ତକ ପ୍ରକାଶିତ ହେବା ପରେ ୧୦ ପ୍ରତିଶତ ରୟାଲିଟୀ ପ୍ରଦାନ କରାଯିବ।