ଭୁବନେଶ୍ବର: ଦୀର୍ଘ ବର୍ଷ ଧରି ନିଷ୍କ୍ରିୟ ହୋଇପଡିଥିବା ଓଡିଶା କଂଗ୍ରେସ ଏବେ ତାହାର ଦମ ଦେଖାଇଛି। ଯାହା ଆଜି ଭୁବନେଶ୍ବରର ରାଜରାସ୍ତାରେ ହଜାର ହଜାର କଂଗ୍ରେସ ନେତା ଓ କର୍ମି ଏକାଠି ହୋଇ ବିଜେପି ସରକାରଙ୍କୁ ନାକରେ ପାଣି ପିଆଇ ଦେଇଛନ୍ତି। ଭୁବନେଶ୍ବରର ପିଏମଜି ଛକ ପାଲଟି ଯାଇଥିଲା ରଣକ୍ଷେତ୍ର। କଂଗ୍ରେସ କର୍ମି ଉଗ୍ରରୂପ ଧାରଣ କରି ବିଧାନସଭା ଆଡକୁ ଅଗ୍ରସର ହେବା ବେଳେ ପୋଲିସ ସେମାନଙ୍କୁ ଅଟକାଇ ଥିଲା। ଫଳରେ ଉଭୟଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ଆରମ୍ଭ ହୋଇଥିଲା ଚେୟାର ଫିଙ୍ଗା।
ଆଜି କଂଗ୍ରେସର ଏପରି ପଦକ୍ଷେପକୁ ନେଇ ସାରା ରାଜ୍ୟର ରାଜନୀତି ବେଶ ଚଳଚଞ୍ଚଳ ହୋଇ ଉଠିଥିଲା। ପୁରା ଗଣମାଧ୍ୟମ କଂଗ୍ରେସର ଏହି ଆନ୍ଦୋଳନ ଉପରେ ତୀକ୍ଷ୍ଣ ନଜର ରଖିଥିଲା। ଆଜି ସକାଳୁ କଂଗ୍ରେସର ବରିଷ୍ଠ ନେତାଙ୍କ ସହିତ ଶତାଧିକ କର୍ମି ରାମମନ୍ଦିର ଛକରେ ଏକାଠି ହୋଇ ଏକ ଶୋଭାଯାତ୍ରାରେ ବାହାରି ଥିଲେ। ଏହାପୂର୍ବରୁ ହଜାରହଜାର ସମର୍ଥକ ଗାନ୍ଧୀ ମାର୍ଗରେ ଏକାଠି ହୋଇଥିଲେ। ଫଳରେ ଗାନ୍ଧୀ ମାର୍ଗ ପୁରା ଲୋକାରଣ୍ୟ ହୋଇପଡିଥିଲା।
ଏହାପରେ ସେଠାରେ ଆରମ୍ଭ ହୋଇଥିଲା ସଭା। ମଞ୍ଚ ଉପରେ ମହିଳାମାନଙ୍କୁ ବସିବାର ଅଧିକାର ଦିଆଯାଇଥିଲା। ତଳେ ସମସ୍ତ ନେତାମାନେ ଆସନ ଗ୍ରହଣ କରିଥିଲେ। ଜଣଜଣଙ୍କୁ ମଞ୍ଚ ଉପରକୁ ଡାକି ଭାଷଣ ଦେବା ପାଇଁ ଅନୁରୋଧ କରାଯାଉଥିଲା। ନିରଞ୍ଜନ ପଟ୍ଟନାୟକ, ଜୟଦେବ ଜେନା, ମହମ୍ମଦ ମୋକିମ, ତାରା ବାହିନୀପତି ପ୍ରମୁଖ ଭାଷଣ ପ୍ରଦାନ କରୁଥିଲେ। ଏହି ଭିତରେ ପ୍ରସାଦ ହରିଚନ୍ଦନ ତାଙ୍କ ଭାଷଣ ଦେଉଥିବା ବେଳେ କର୍ମିମାନେ ମଞ୍ଚ ପାରି ହୋଇ ବିଧାନସଭା ଆଡକୁ ମାଡି ଚାଲିଥିଲେ।
ପୋଲିସ ତରଫରୁ ବିଭିନ୍ନ ସ୍ଥାନରେ ବାରିକେଟ କରାଯାଇଥିଲା। କର୍ମିମାନେ ପ୍ରଥମ ବାରିକେଟ ଭାଙ୍ଗି ଆଗକୁ ମାଡି ଚାଲିଲେ। ପୋଲିସ ଅଟକାଇଥିଲେ ମଧ୍ୟ କେହି ଶୁଣି ନ ଥିଲେ। ଏହାପରେ ସେମାନେ ଦ୍ବିତୀୟ ବାରିକେଟ ମଧ୍ୟ ଭାଙ୍ଗି ଦେଇଥିଲେ। ଏହିପରି ରାସ୍ତାରେ ଥିବା ଗୋଟିଏ ପରେ ଗୋଟିଏ ବାରିକେଟ ଭାଙ୍ଗି ଶେଷ ବାରିକେଟ ବେଳକୁ ପୋଲିସ ନୟାନ୍ତ ହୋଇଯାଇଥିଲା।
ପୋଲିସ ଘେର ଭାଙ୍ଗି ଧସାଇ ପଶିବା ପାଇଁ ଜଣେ କର୍ମି ଚେଷ୍ଠା କରୁଥିବା ବେଳେ ଜଣେ ମହିଳା ପୋଲିସ ତାଙ୍କୁ ଲାଠିରେ ପେଲି ଦେଇଥିଲେ। ଏହାପରେ ଆରମ୍ଭ ହୋଇଯାଇଥିଲା ଧସ୍ତାଧସ୍ତି। ଫଳରେ ପରିସ୍ଥିତି ଅଣଆୟତ ହୋଇଯାଇଥିଲା। ଯାହାଫଳରେ ପୋଲିସ ଲାଠି ଚାର୍ଯ୍ୟ ଆରମ୍ଭ କରିଦେଇଥିଲା। କର୍ମିମାନେ ଛତ୍ରଭଙ୍ଗ ଦେଇ ମଞ୍ଚ ପାଖରେ ପଡିଥିବା ଚେୟାର ସବୁ ପୋଲିସ ଉପରକୁ ଫିଙ୍ଗିବା ଆରମ୍ଭ କରିଥିଲେ।
ପୋଲିସ ଓ କଂଗ୍ରେସ କର୍ମିଙ୍କ ମଧ୍ୟରେ କିଛି ସମୟ ଧରି ଯୁଦ୍ଧ ଚାଲିବା ପରେ ପାଣିମାଡ ଆରମ୍ଭ କରାଯାଇଥିଲା। ଏହାପରେ ପୋଲିସ ଲୁହବୁହା ବାଷ୍ପ ପ୍ରୟୋଗ କରିଥିଲା। ଏହାଦ୍ବାର କର୍ମିମାନେ ମଇଦାନ ଖାଲି କରିବାକୁ ବାଧ୍ୟ ହୋଇଥିଲେ। ମଞ୍ଚ ପାଖରେ ଥିବା କଂଗ୍ରେସ ସଭାପତି ଭକ୍ତ ଦାସଙ୍କ ସମେତ ବହୁ ନେତାଙ୍କୁ ପୋଲିସ ଘେରିଯାଇ ଗିରଫ କରିଥିଲା।
