Tag: କଂଗ୍ରେସ

ନୂଆଦିଲ୍ଲୀ: ହରିୟଣାର ମନୋହର ଲାଲ ଖଟ୍ଟର ସରକାର ବିରୋଧରେ କଂଗ୍ରେସ ଆଜି ଅନାସ୍ଥା ପ୍ରସ୍ତାବ ଆଣିଥିଲା। ଏହା ପୂର୍ବରୁ ଆଜି ଗୃହରେ ଏହି ପ୍ରସ୍ତାବ ଉପରେ ଆଲୋଚନା ହୋଇଥିଲା। ହେଲେ ଏହି ଅନାସ୍ଥା ପ୍ରସ୍ତାବରେ ସରକାରକୁ ବଡ ବିଜୟ ମିଳିଛି। ଏହି ଅନାସ୍ଥା ପ୍ରସ୍ତାବରେ ମନୋହର ଲାଲ ଖଟ୍ଟର ସରକାର ସମର୍ଥନରେ ୫୫ ଟି ଭୋଟ ପଡ଼ିଥିଲା।

ଆଜି ସକାଳ ୧୧ ଟାରେ ଅନାସ୍ଥା ପ୍ରସ୍ତାବ ଉପରେ ଆଲୋଚନା ହୋଇ ସରକାର ଉପରେ କଂଗ୍ରେସ ପକ୍ଷରୁ ଅନେକ ଅଭିଯୋଗ ଲଗାଯାଇଥିଲା। ଯାହାଫଳରେ ମୁଖ୍ୟମନ୍ତ୍ରୀ ଖଟ୍ଟର ଗୃହରେ ଉତ୍ତର ରଖିବା ସହ କଂଗ୍ରେସକୁ ସମାଲୋଚନା କରିଥିଲେ।

ନୂଆଦିଲ୍ଲୀ: କଂଗ୍ରେସ ହାତରୁ ଆଉ ଏକ ରାଜ୍ୟର ଶାସନ କ୍ଷମତା ଚାଲିଯାଇଛି। ପୁଡୁଚେରୀ ବିଧାନସଭାର ଅସ୍ଥାଭୋଟରେ ବହୁମତ ହାସଲ କରିବାରେ କଂଗ୍ରେସ ବିଫଳ ହୋଇଛି। ବିଧାନସଭା ବାଚସ୍ପତି ଏନେଇ ଘୋଷଣା କରିଛନ୍ତି। ଯାହାଫଳରେ ମୁଖ୍ୟମନ୍ତ୍ରୀରୁ ଭି. ନାରାୟଣ ସ୍ଵାମୀ ବିଦାୟ ହେବା ନିଶ୍ଚିତ ହୋଇଯାଇଛି।

ସୂଚନା ଯୋଗ୍ୟ ଯେ, ନାରାୟଣ ସରକାରଙ୍କୁ ଆସ୍ଥା ଭୋଟରେ ବହୁମତ ଲାଗି ୧୪ ଟି ଭୋଟ ଆବଶ୍ୟକ କରୁଥିଲା। କିନ୍ତୁ ସରକାରକୁ ମାତ୍ର ୧୨ ଜଣ ବିଧାୟକଙ୍କ ସମର୍ଥନ ମିଳିଥିଲା। ଏହା ପୂର୍ବରୁ ନାରାୟଣ ସ୍ଵାମୀ ଫ୍ଲୋର ଟେଷ୍ଟରେ ବହୁମତ ହାସଲ କରିବେ ବୋଲି ଦାବି କରୁଥିଲେ।

ତେବେ ଏହି ଫଳାଫଳ ପରେ କଂଗ୍ରେସକୁ ସମାଲୋଚନା କରିବାକୁ ବିଜେପିକୁ ସୁଯୋଗ ମିଳିଯାଇଛି। ବିଜେପି ନେତା ଅମୀତ ମାଲବୀୟ କହିଛନ୍ତି ଯେ, ରାହୁଲ ଗାନ୍ଧୀ ପୁଡୁଚେରୀ ଯାଇଥିଲେ। ସେଠାରେ ମଧ୍ୟ ତାଙ୍କ ସରକାର ଭାଙ୍ଗିଲା।

ନୂଆଦିଲ୍ଲୀ: ପେଟ୍ରୋଲ-ଡ଼ିଜେଲର ଦର ଦାମ ବୃଦ୍ଧି ଯୋଗୁଁ ସାଧାରଣ ଜନତା ଅସନ୍ତୋଷ ବ୍ୟକ୍ତ କରୁଛନ୍ତି। ମଧ୍ୟପ୍ରଦେଶ ରାଜଧାନୀ ଭୋପାଳରେ ଲଗାତର ଦ୍ଵିତୀୟ ଦିନ ପ୍ରିମିୟମ ପେଟ୍ରୋଲ ଦାମ ୧୦୦ ଟଙ୍କା ଉପରେ ବିକ୍ରି ହୋଇଛି। କେବଳ ମଧ୍ୟପ୍ରଦେଶରେ ଏନେଇ ଲୋକ ଅସନ୍ତୋଷ ବ୍ୟକ୍ତ କରୁନାହାନ୍ତି, ଦେଶରେ ଅନେକ ରାଜ୍ୟରେ ଏହାକୁ ବିରୋଧ କରାଯାଇ ଆନ୍ଦୋଳନ କରାଯାଉଛି। ଓଡିଶାରେ ଆଜି କଂଗ୍ରେସ ପକ୍ଷରୁ ଏନେଇ ୬ ଘଣ୍ଟିଆ ବନ୍ଦ ଡାକରା ଦିଆଯାଇଛି।

ହେଲେ ଆଜି ଦିଲ୍ଲୀରେ କଂଗ୍ରେସ ପକ୍ଷରୁ କେବଳ ଗ୍ୟାସ ସିଲିଣ୍ଡରର ବୃଦ୍ଧି ପ୍ରତିବାଦରେ ଏକ ସାମ୍ବାଦିକ ସମ୍ମିଳନୀ କରାଯାଇଛି। କଂଗ୍ରେସ ପ୍ରବକ୍ତା ସୁପ୍ରିୟା ଶ୍ରୀନେତ ଏହି ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ମୋଦୀ ସରକାର ଚାଷୀମାନଙ୍କ ସହ ବର୍ବରତା କରିବା ପାଇଁ ଅଣ୍ଟା ଭିଡିଛି। କିନ୍ତୁ ଏବେ ମୋଦୀ ସରକାର ଦେଶର ପ୍ରତ୍ୟେକ ଗୃହିଣୀ ଏବଂ ସାଧାରଣ ଜନତାଙ୍କ ଅଣ୍ଟା ଭାଙ୍ଗିବା ପାଇଁ ନିଷ୍ପତ୍ତି ନେଇଛି। କେନ୍ଦ୍ର ସରକାର ରୋଷେଇ ଘରେ ମଧ୍ୟ ନିଆଁ ଲଗାଇଦେଇଛି ବୋଲି ଶ୍ରୀମତୀ ଶ୍ରୀନେତ କହିଛନ୍ତି।

ଉଲ୍ଲେଖ ଯୋଗ୍ୟ ଯେ, ଗତ ୬ ଦିନ ଧରି ପେଟ୍ରୋଲ ଓ ଡିଜେଲ୍‌ ଦର ଲଗାତାର ବଢିଚାଲିଥିବା ବେଳେ ସରକାରୀ ତେଲ କମ୍ପାନି ଆଜି ପୁଣି ଏଲ୍‌ପିଜି ଗ୍ୟାସ ଦର ବୃଦ୍ଧି କରିଛନ୍ତି।। ୧୪.୨ କିଲୋ ବିଶିଷ୍ଟ ଏଲ୍‌ପିଜି ଦର ସିଲିଣ୍ଡର ପିଛା ୫୦ ଟଙ୍କା ବୃଦ୍ଧି କରିବାକୁ ଘୋଷଣା କରିଛନ୍ତି। ସୋମବାରଠାରୁ ଏହି ବର୍ଦ୍ଧିତ ଦର ଲାଗୁ ହେବ। ଓଡ଼ିଶାରେ ନୂଆ ଦର ୮୦୦ ଟଙ୍କା ଛୁଇଁବ ବୋଲି ଜଣାପଡ଼ିଛି। ଏହା ପୂର୍ବରୁ ଗତ ୪ ତାରିଖରେ ଏଲ୍‌ପିଜି ଦରରେ ୨୫ ଟଙ୍କା ବୃଦ୍ଧି କରାଯାଇଥିଲା।

ନୂଆଦିଲ୍ଲୀ: କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ଆଜି ସାମାଜିକ ଗଣମାଧ୍ୟମ ୱାରିୟର୍ସ ଟିମରେ ସାମିଲ ହେବା ପାଇଁ ଲୋକଙ୍କୁ ନିବେଦନ କରିଛନ୍ତି।

ସୂଚନା ଅନୁଯାୟୀ କଂଗ୍ରେସ ଦଳ ସାମାଜିକ ଗଣମାଧ୍ୟମ ପ୍ଲାଟଫର୍ମରେ ନିଜକୁ ମଜବୁତ କରିବା ପାଇଁ ଯୋଜନା ଆରମ୍ଭ କରିଦେଇଛି। ସୋସିଆଲ ମିଡ଼ିଆ ୱାରିୟର୍ସ ଟିମରେ ସାମିଲ ହେବା ପାଇଁ ଟୋଲ ଫ୍ରି ନମ୍ବର ଜାରି କରାଯାଇଛି। ଏହି ଟିମରେ ହ୍ଵାଟ୍ସଅପ, ୱେବସାଇଟ, ଇମେଲ ଜରିଆରେ ମଧ୍ୟ ସାମିଲ ହୋଇପାରିବେ।

ସୋସିଆଲ ମିଡ଼ିଆ ୱାରିୟର୍ସ ଟିମକୁ ନେଇ ରାହୁଲ ଗାନ୍ଧୀ କହିଛନ୍ତି ଯେ, ଏହି ଟିମ ନ୍ୟାୟ ପାଇଁ ଲଢୁଥିବା ଯୋଦ୍ଧାଙ୍କ ଲାଗି। ଏହା ଘୃଣାର ସେନା ନାହିଁ। ଏହା ହିଂସାର ସେନା ନାହିଁ। ଏହା ସତ୍ୟର ସେନା ଅଟନ୍ତି। ଏଠାରେ ଏମିତି ସେନା ଅଛନ୍ତି ଯେଉଁମାନେ ଭାରତର ବିଚାରକୁ ରକ୍ଷାକରିପାରିବ।

ଆଜି ଦଳର ବରିଷ୍ଠ ନେତା ପବନ କୁମାର ବଂଶଲ , ପ୍ରବକ୍ତା ପବନ ଖେଡା ଏବଂ ସୋସିଆଲ ମିଡ଼ିଆ ବିଭାଗର ପ୍ରମୁଖ ରୋହନ ଗୁପ୍ତା ଏହି ଅଭିଯାନକୁ ଆରମ୍ଭ କରିଛନ୍ତି। ପ୍ରତ୍ୟେକ ସହରରେ ୫ ଲକ୍ଷ ସୋସିଆଲ ମିଡ଼ିଆ ୱାରିୟର୍ସ ପ୍ରସ୍ତୁତ କରିବା ପାଇଁ ଲକ୍ଷ୍ୟ ରଖାଯାଇଛି ବୋଲି ପବନ ବଂଶଲ କହିଛନ୍ତି। ଏମାନଙ୍କ ମାଧ୍ୟମରେ ଦେଶ ସମ୍ମୁଖରେ ମୁଦ୍ଦା ଉଠାଯିବ। ଏହାସହିତ ଏହି ଯୋଦ୍ଧାମାନଙ୍କ ମାଧ୍ୟମରେ ବିଚାର ଏବଂ ସିଦ୍ଧାନ୍ତ ଉପରେ ଆଲୋଚନା ହେବ।

ଏହି ଅବସରରେ ରୋହନ ଗୁପ୍ତା କହିଥିଲେ ଯେ, ଦେଶର ଗଣତାନ୍ତ୍ରିକ ସଂସ୍ଥାକୁ ଦବାଇ ଦିଆଯାଉଛିଏବଂ ସରକାର ବିରୋଧରେ ସ୍ଵର ଉତ୍ତୋଳନ କରୁଥିବା ଲୋକଙ୍କୁ ବର୍ବଦା କରିବାକୁ ଚେଷ୍ଟା କରାଯାଉଛି। ଏହାକୁ ବିରୋଧ କରିବା ସହ ଦେଶକୁ ବଞ୍ଚାଇବା କଂଗ୍ରେସର ଦାୟିତ୍ଵ ବୋଲି ସେ କହିଥିଲେ।

ନୂଆଦିଲ୍ଲୀ: ଟ୍ରାକ୍ଟର ପରେଡ଼ରେ ହିଂସା ଘଟଣା ପରେ ଦୁଇ କୃଷି ସଂଗଠନ ଆନ୍ଦୋଳନରୁ ଅଲଗା ହେବା ପାଇଁ ଘୋଷଣା କରିଛନ୍ତି। ସର୍ବପ୍ରଥମେ ରାଷ୍ଟ୍ରୀୟ କିଷାନ ମଜଦୂର ସଂଗଠନ ଏହି ଆନ୍ଦୋଳନରୁ ହଟିବା ନେଇ ଘୋଷଣା କରିଥିଲା। ଏହି ସଂଗଠନର ନେତା ବିଏମ ସିଂହ କଂଗ୍ରେସ ଟିକେଟରୁ ନିର୍ବାଚନ ଲଢିଥିଲେ ଏବଂ ମେନକା ଗାନ୍ଧୀଙ୍କ ସମ୍ପର୍କୀୟ ଭାଇ ଅଟନ୍ତି। ବିଏମ ସିଂହ ଦେଶର ଜଣେ ଧନୀ କୃଷକ ମଧ୍ୟରେ ଅନ୍ଯତମ। ସେ ୨୦୦୯ ଲୋକସଭା ନିର୍ବାଚନରେ ସମ୍ପତି ତାଲିକାରେ ୬୩୨ କୋଟି ଉଲ୍ଲେଖ କରିଥିଲେ। ବିଜେପିର ଆଇଟି ସେଲର ମୁଖ୍ୟ ଅମିତ ମାଲବୀୟ ଟୁଇଟ କରି ଏନେଇ ସୂଚନା ଦେଇଛନ୍ତି।

ସେ ତାଙ୍କର ଟୁଇଟରେ ଉଲ୍ଲେଖ କରିଛନ୍ତି ଯେ, ବିଏମ ସିଂହ ୨୦୦୪ ରେ ପିଲିଭିତରୁ କଂଗ୍ରେସ ଟିକେଟରେ ଭାରତୀୟ ଜଣା ପାର୍ଟିର ମେନକା ଗାନ୍ଧୀଙ୍କ ବିରୋଧରେ ଲଢିଥିଲେ। ଏହାସହିତ ୨୦୦୯ ରେ ମଧ୍ୟ ବରୁଣ ଗାନ୍ଧୀଙ୍କ ବିରୋଧରେ କଂଗ୍ରେସ ଟିକେଟରୁ ଲଢିଥିଲେ। ହେଲେ ସେ ଏହି ଲୋକସଭା ନିର୍ବାଚନରେ ଉଭୟ ଥର ପରାଜିତ ହୋଇଥିଲେ।

ନୂଆଦିଲ୍ଲୀ: ବିବାଦୀୟ ମନ୍ତବ୍ୟ ଦେବାରେ ବିଜେପି ସାଂସଦ ସାକ୍ଷୀ ମହାରାଜ ବେଶ୍ ଜଣାଶୁଣା। ଆଜି ପୁଣିଥରେ ନିଜ ବୟାନକୁ ନେଇ ବିବାଦ ଘେରକୁ ଆସିଛନ୍ତି। ସାଂସଦ ସାକ୍ଷୀ ମହାରାଜ ଏକ ମନ୍ତବ୍ୟରେ କହିଛନ୍ତି ଯେ, ନେତାଜୀଙ୍କୁ କଂଗ୍ରେସ ହିଁ ମାରିଛି। ଉନ୍ନାଓରେ ସୁଭାଷ ଚନ୍ଦ୍ର ବୋଷଙ୍କ ୧୨୫ତମ ଜୟନ୍ତୀ ଅବସରରେ ସେ ଏଭଳି ଏକ ବିବାଦୀୟ ମନ୍ତବ୍ୟ ଦେଇଛନ୍ତି।

ସାଂସଦ ନିଜ ବୟାନରେ କହିଛନ୍ତି ଯେ, କଂଗ୍ରେସ ପାର୍ଟି ହିଁ ସୁଭାଷ ଚନ୍ଦ୍ର ବୋଷଙ୍କୁ ମାରିଦେଇଛି। ଯଦି ସୁଭାଷ ଚନ୍ଦ୍ର ବୋଷ ବଞ୍ଚିଥାନ୍ତେ, ତେବେ ସେ ମହାତ୍ମା ଗାନ୍ଧି ଓ ପଣ୍ଡିତ ନେହୁରୁଙ୍କ ଠାରୁ ଅଧିକ ଲୋକପ୍ରିୟତା ହୋଇଥାନ୍ତେ। ନେତାଜୀଙ୍କ ଲୋକପ୍ରିୟତା ଆଗରେ କେହି ବି ତିଷ୍ଠି ପାରିନଥାନ୍ତେ। ଏକ ସାର୍ବଜନୀନ ସଭାରେ ଏପରି ବୟାନ ଦେଇଛନ୍ତି ବିଜେପି ସାଂସଦ ସାକ୍ଷୀ ମହାରାଜ।

ସେ ଆହୁରି ମଧ୍ୟ କହିଛନ୍ତି ଯେ, ନେତାଜୀଙ୍କ ସ୍ଲୋଗାନ ଥିଲା “ମୋତେ ରକ୍ତଦିଅ, ମୁଁ ସ୍ୱାଧୀନତା ଦେବି”। ଇଂରେଜମାନେ ମାଗୁ ମାଗୁ ସ୍ୱାଧୀନତା ଦେଇ ଦେଇନଥାନ୍ତେ। ସ୍ୱାଧୀନତା ପାଇଁ ଅନେକ ଶହୀଦ ହୋଇଛନ୍ତି।’

ନୂଆଦିଲ୍ଲୀ: କୃଷି ଆଇନକୁ ବିରୋଧ କରି ଆଜି କଂଗ୍ରେସ ଦେଶବ୍ୟାପୀ ଆନ୍ଦୋଳନ କରୁଛି। କଂଗ୍ରେସ ପକ୍ଷରୁ ଆଜି କୃଷକ ଅଧିକାର ଦିବସ ମଧ୍ୟ ପାଳନ କରାଯାଉଛି।

ଏହି ପ୍ରରିପ୍ରେକ୍ଷୀରେ କଂଗ୍ରେସ ସଡକ ଠାରୁ ସାମାଜିକ ଗଣମାଧ୍ୟମ ପର୍ଯ୍ୟନ୍ତ ସବୁଠାରେ ବିରୋଧ କରିବା ଆରମ୍ଭ କରିଦେଇଛି। କଂଗ୍ରେସ ନେତା ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀଙ୍କ ନେତୃତ୍ବରେ ଆଜି ଦିଲ୍ଲୀ ରାଜଭବନ ଘେରାଉ କରିଛି।

ଏହି ବିରୋଧ ଲାଗି କଂଗ୍ରେସ ପ୍ରଦେଶ ସଭାପତି ଅଜୟ କୁମାର ଲଲ୍ଲୁ, ଏମଏଲସି ଦୀପକ ସିଂହ, ଦିଲପ୍ରୀତ ସିଂହ ପ୍ରମୁଖ ବହୁ ନେତାଙ୍କୁ ଦିଲ୍ଲୀ ପୋଲିସ ଗିରଫ କରିଛି।

ନୂଆଦିଲ୍ଲୀ: ଆଉ କିଛି ମାସ ପରେ ୫ ଟି ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଆସାମ, ପଶ୍ଚିମବଙ୍ଗ, କେରଳ, ତାମିଲନାଡୁ ଓ ପୁଡୁଚେରୀରେ ବିଧାନସଭା ନିର୍ବାଚନ ହେବାକୁ ଯାଉଛି। ଏନେଇ କଂଗ୍ରେସ ତାହାର ପ୍ରସ୍ତୁତି ଆରମ୍ଭ କରିଦେଇଛି। ତେବେ କଂଗ୍ରେସ ଏହି ୫ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳ ଲାଗି ନିର୍ବାଚନ ପର୍ଯ୍ଯବେକ୍ଷକ ତାଲିକା ଘୋଷଣା କରିଛି।

ନିର୍ବାଚନ ଅଭିଯାନ ପରିଚାଳନା ଓ ସମନ୍ୱୟ ଲାଗି ଅନେକ ବରିଷ୍ଠ ରାଜନୀତିଜ୍ଞଙ୍କୁ ପର୍ଯ୍ୟବେକ୍ଷକ ନିଯୁକ୍ତ କରାଯାଇଛି। ଦଳର ସାଧାରଣ ସମ୍ପାଦକ କେ.ସି. ବେଣୁଗୋପାଳଙ୍କ ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଛି।

କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧି ବରିଷ୍ଠ ପର୍ଯ୍ୟବେକ୍ଷକଙ୍କୁ ନିଯୁକ୍ତ କରିଥିବା ଓ ସେମାନେ ରାଜ୍ୟ ପ୍ରଭାରୀଙ୍କ ସହ ସମନ୍ୱୟ ରକ୍ଷା କରି କାମ କରିବେ ବୋଲି ଏହି ବିଜ୍ଞପ୍ତିରେ ପ୍ରକାଶ କରାଯାଇଛି।

ନିର୍ବାଚନ ପର୍ଯ୍ୟବେକ୍ଷକ ହେଲେ:

୧-ଆସାମ: ଛତିଶଗଡ ମୁଖ୍ୟମନ୍ତ୍ରୀ ଭୂପେଶ ବାଘେଲ ବରିଷ୍ଠ ନେତା ମୁକୁଲ ୱାସିନିକ ଓ ସକିଲ ଅହମ୍ମଦ ଖାନ

୨-କେରଳ: ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲୋତ, ବରିଷ୍ଠ ନେତା ଲୁଇଜିନୋ ଫ୍ଲେରିଓ ଏବଂ ଜି.ପରମେଶ୍ୱର

୩-ପଶ୍ଚିମବଙ୍ଗ: ବରିଷ୍ଠ ନେତା ବି.କେ. ହରିପ୍ରସାଦ, ପଞ୍ଜାବ ରାଜ୍ୟ ସରକାରଙ୍କ ମନ୍ତ୍ରୀ ବିଜୟ ଇନ୍ଦର ସିଂଘଲା ଓ ଝାଡ଼ଖଣ୍ଡ ସରକାରଙ୍କ ମନ୍ତ୍ରୀ ଆଲମଗୀର ଆଲମ

୪-ତାମିଲନାଡୁ ଓ ପୁଡୁଚେରୀ: ବରିଷ୍ଠ କଂଗ୍ରେସ ନେତା ବୀରପ୍ପା ମୋଇଲୀ, ଏମ.ଏମ. ପଲ୍ଲମ ରାଜୁ ଓ ମହାରାଷ୍ଟ୍ର ସରକାରଙ୍କ ମନ୍ତ୍ରୀ ନିତୀନ ରାଉତ।

ନୂଆଦିଲ୍ଲୀ: କଂଗ୍ରେସର ବରିଷ୍ଠ ନେତା ମୋତିଲାଲ ଭୋରାଙ୍କ ପରଲୋକ ହୋଇଯାଇଛି । 93 ବର୍ଷ ବୟସରେ ସୋମବାର ଦିନ ତାଙ୍କର ମୃତ୍ୟୁ ହୋଇଛି ।  ଦିଲ୍ଲୀ ଫୋର୍ଟିସ୍‌ ଏସକର୍ଟ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁବରଣ କରିଛନ୍ତି ମୋତିଲାଲ ।  କାଲି ତାଙ୍କର ଜନ୍ମଦିନ ଥିବାବେଳେ ଆଜି ସମସ୍ତଙ୍କୁ ଛାଡି ଚାଲିଯାଇଛନ୍ତି ମୋତିଲାଲ୍‌ ।

ଦୁଇ ଦିନ ପୂର୍ବରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ଏହା ପୂର୍ବରୁ ସେ କୋଭିଡ୍‌ରେ ସଂକ୍ରମିତ ହୋଇଥିଲେ । ତେବେ ସେ କରୋନାରୁ ସୁସ୍ଥ ହୋଇଯାଇଥିଲେ ।

ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ରୂପେ ରହିଥିବା ମୋତିଲାଲ୍‌ ଉତ୍ତରପ୍ରଦେଶର ରାଜ୍ୟପାଳ ଭାବେ ମଧ୍ୟ କାର୍ଯ୍ୟ କରିଥିଲେ । ଗାନ୍ଧି ପରିବାରର ନିକଟତର ଥିବା ମୋତିଲାଲ୍‌ ଦୀର୍ଘ ସମୟ ଧରି କଂଗ୍ରେସର କୋଷାଧ୍ୟକ୍ଷ ଦାୟିତ୍ବ ସମ୍ଭାଳି ଥିଲେ ।  2018 ମସିହାରେ ମୋତିଲାଲଙ୍କ ବୟସକୁ ଦେଖି ରାହୁଲ୍‌ ଗାନ୍ଧି କୋଷାଧ୍ୟକ୍ଷର ଦାୟିତ୍ବ ଅହମ୍ମଦ ପଟେଲ୍‌ଙ୍କୁ ଦେଇଥିଲେ । ନିକଟରେ ଅହମ୍ମଦ ପଟେଲଙ୍କ ମଧ୍ୟ ନିଧନ ହୋଇଛି ।

ରାଜନୀତିକୁ ଆସିବା ପୂର୍ବରୁ ମୋତିଲାଲ୍‌ ଜଣେ ସାମ୍ବାଦିକ ରୂପେ କାର୍ଯ୍ୟ କରୁଥିଲେ। ଦୀର୍ଘ ସମୟ ଧରି ମୋତିଲାଲ୍‌ କଂଗ୍ରେସ ଦଳର ସଙ୍ଗଠନରେ କାମ କରିଥିଲେ । 1970 ମସିହାରେ କଂଗ୍ରେସରେ ସାମିଲ୍‌ ହୋଇଥିଲେ ଭୋରା । 1972 ମସିହାରେ କଂଗ୍ରେସ ଟିକେଟରେ ବିଧାୟକ ହୋଇଥିଲେ ମୋତିଲାଲ୍‌ । ଏହାପରେ 1977 ଓ 1980ରେ ମଧ୍ୟ ସେ ବିଧାୟକ ରୂପେ ନିର୍ବାଚିତ ହୋଇଥିଲେ । ଅଜୁର୍ନ ସିଂହ କ୍ୟାବିନେଟ୍‌ରେ ସେ ପ୍ରଥମ ଉଚ୍ଚ ଶିକ୍ଷା ବିଭାଗରେ ରାଜ୍ୟ ମନ୍ତ୍ରୀ ରୂପେ କାର୍ଯ୍ୟ କରିଥିଲେ । 1981-84 ମସିହାରେ ସେ ମଧ୍ୟପ୍ରଦେଶର ରାଜ୍ୟ ସଡକ ପରିବହନ ନିଗମର ଚେୟାରମ୍ୟାନ୍‌ ରହିଥିଲେ ।

1985 ମସିହା ଫେବୃଆରୀ 13 ତାରିଖରେ ମୋତିଲାଲ୍‌ ମଧ୍ୟପ୍ରଦେଶର ମୁଖ୍ୟମନ୍ତ୍ରୀ ହୋଇଥିଲେ । 1988 ମସିହାରେ ସେ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ଫେବୃଆରୀ 14 1988 ମସିହାରେ ମୋତିଲାଲ ସ୍ବାସ୍ଥ୍ୟ, ପରିବାର କଲ୍ୟାଣ ଏବଂ ବେସାମରିକ ବିମାନ ଚଳାଚଳ ମନ୍ତ୍ରଣାଳୟର ଦାୟିତ୍ୱ ଗ୍ରହଣ କରିଥିଲେ।ଗାନ୍ଧି ପରିବାରର ବିଶ୍ବସ୍ତ ମୋତିଲାଲ୍‌ 1993 ମସିହାରେ ଉତ୍ତର ପ୍ରଦେଶର ରାଜ୍ୟପାଳ ଦାୟିତ୍ବ ସମ୍ଭାଳି ଥିଲେ।

ସୂଚନାଯୋଗ୍ୟ, 2019 ନିର୍ବାଚନରେ କଂଗ୍ରେସର ବିପୁଳ ପରାଜୟ ପରେ ରାହୁଲ୍‌ ଗାନ୍ଧି ଅଧ୍ୟକ୍ଷ ପଦରୁ ଇସ୍ତଫା ଦେବା ପରେ ନୂତନ ଅଧ୍ୟକ୍ଷ ରୂପେ ମୋତିଲାଲ ଭୋରାଙ୍କ ନାମ ବେଶ୍‌ ଚର୍ଚ୍ଚାକୁ ଆସିଥିଲା । ତେବେ ଶେଷରେ ସୋନିଆ ଗାନ୍ଧି କଂଗ୍ରେସ ଦଳର ଅନ୍ତରୀଣ ଅଧ୍ୟକ୍ଷା ରୂପେ ଦାୟିତ୍ବ ତୁଲାଉଛନ୍ତି । (ଏଜେନ୍ସି)

ନୂଆଦିଲ୍ଲୀ : କ୍ଷମତାକୁ ଆସିଲେ ପ୍ରଥମେ ନୂତନ କୃଷି ବିଲକୁ ଉଚ୍ଛେଦ କରିବେ ବୋଲି ମତ ଦେଇଛନ୍ତି ପୂର୍ବତନ କଂଗ୍ରେସ ସଭାପତି ରାହୁଲ ଗାନ୍ଧୀ ଏବଂ ସୋନିଆ ଗାନ୍ଧୀ । କୃଷି ବିରୋଧୀ ଏହି ଆଇନକୁ ସର୍ବପ୍ରଥମେ ଉଚ୍ଛେଦ କରାଯିବ ବୋଲି ଉଭୟ ପ୍ରକାଶ କରିଛନ୍ତି । ବିଜେପି ସରକାରଙ୍କ ପକ୍ଷରୁ ଏହି ବିଲ ଲାଗୁ କରାଯାଇଥିବା ବେଳେ ଦେଶବ୍ୟାପୀ ଚାଷୀଙ୍କ ପକ୍ଷରୁ ଏହାକୁ ବିରୋଧ କରାଯାଉଛି। କ୍ଷମତାକୁ ଫେରି ପ୍ରଥମେ ଏହି ବିଲକୁ ଉଚ୍ଛେଦ କରି କୃଷକ ମାନଙ୍କୁ ପୁରସ୍କୃତ କରିବୁ ବୋଲି ଉଭୟ ନେତା କହିଛନ୍ତି ।

ଶୁକ୍ରବାର କଂଗ୍ରେସ ମୁଖପାତ୍ର ରଣଦୀପ ସୁର୍ଜେୱାଲା ଗଣମାଧ୍ୟମ ଅଧିକାରୀଙ୍କୁ ଏହି ସୂଚନା ଦେଇଛନ୍ତି । ସେ କହିଥିଲେ କୃଷକଙ୍କ ବିରୋଧରେ ରହିଥିବା ତିନି ଆଇନକୁ ଉଚ୍ଛେଦ କରିବାକୁ ଉଭୟ ସୋନିଆ ଏବଂ ରାହୁଲ ପ୍ରାଥମିକତା ଦେଉଛନ୍ତି । ଏହି ଆଇନକୁ କଂଗ୍ରେସ ଆରମ୍ଭରୁ ବିରୋଧ କରି ଆସୁଛି । ଏହି ଆଇନକୁ ବିରୋଧ କରିବା କାରଣରୁ କଂଗ୍ରେସ ସାଂସଦ ମାନଙ୍କୁ ନିଲମ୍ବନ ମଧ୍ୟ କରାଯାଇଛି । କଂଗ୍ରେସ ଶାସିତ ରାଜ୍ୟ ମାନଙ୍କରେ ମଧ୍ୟ ଚାଷୀ ମାନେ ଏହି ଆଇନ ଦ୍ୱାରା ପ୍ରଭାବିତ ହୋଇ ନାହାନ୍ତି ।

ଚାଷୀ ମାନଙ୍କ ସ୍ୱାର୍ଥରକ୍ଷା ପାଇଁ କଂଗ୍ରେସ ଶାସିତ ରାଜ୍ୟ ମାନଙ୍କରେ ଏକ ସ୍ୱତନ୍ତ୍ର ଆଇନ ପ୍ରଣୟନ କରାଯାଇଛି । ତେଣୁ କେନ୍ଦ୍ରରେ କ୍ଷମତାକୁ ଆସିଲେ ସମସ୍ତ ରାଜ୍ୟ ମାନଙ୍କ ପାଇଁ ଏହି ଆଇନର ପ୍ରଣୟନ କରାଯିବ । କୃଷି ଏବଂ କୃଷକ କୌଣସି ରାଜନୈତିକ ଦଳର ନୁହନ୍ତି । ଏମାନେ ଦେଶର ମେରୁଦଣ୍ଡ ଏବଂ ପ୍ରତ୍ୟେକ ଦଳକୁ ଏମାନେ ଖାଦ୍ୟ ଶସ୍ୟ ଯୋଗାଇଥାନ୍ତି । ତେଣୁ ଏମାନଙ୍କ ଅଭିଯୋଗ ଶୁଣାଯିବା ଉଚିତ ବୋଲି ସୁର୍ଜେୱାଲା ମତ ଦେଇଛନ୍ତି । ଉଲ୍ଲେଖଯୋଗ୍ୟ ଯେ, ନୂତନ କୃଷି ବିଲକୁ ବିରୋଧ କରି ୬ଟି ରାଜ୍ୟର ଚାଷୀ ଦିଲ୍ଲୀ ଅଭିମୁଖେ ଯାତ୍ରାରେ ବାହାରିଛନ୍ତି।