Tag: କଟକ

ନୂଆଦିଲ୍ଲୀ: ଆଜାଦିର ଅମୃତ ମହୋତ୍ସବ ଏବଂ ନେତାଜୀଙ୍କ ୧୨୬ତମ ଜୟନ୍ତୀ ଉପଲକ୍ଷେ ସିଆରପିଏଫ୍ ଏବଂ ଆଇଟିବିପି ପକ୍ଷରୁ ଓଡିଶା ସରକାରଙ୍କ ସହଯୋଗରେ ଐତିହାସିକ ନଗରୀ କଟକରେ ବିଭିନ୍ନ କାର୍ଯ୍ୟକ୍ରମ ଆୟୋଜିତ ହୋଇଛି। ଏହି ଐତିହାସିକ ନଗରୀରେ ନେତାଜୀ ସୁଭାଷ ଚନ୍ଦ୍ର ବୋଷ ଜନ୍ମଲାଭ କରିବା ସହିତ ନିଜର କୈଶୋର ସମୟ ମଧ୍ୟ ଅତିବାହିତ କରିଥିଲେ।

ସକାଳେ ନେତାଜୀଙ୍କ ଜନ୍ମସ୍ଥାନ ଓଡିଆ ବଜାରରୁ ଏକ ବିରାଟ ରାଲି ବାହାରି କିମ୍ବଦନ୍ତୀ ପୁରୁଷ ବିଜୁ ପଟ୍ଟନାୟକଙ୍କ ଜନ୍ମସ୍ଥାନ ତୁଳସୀପୁର ଆନନ୍ଦ ଭବନକୁ ଯାଇଥିଲା। ଏଥିରେ ସିଆର୍ପିଏଫ, ଆଇଟିବିପି, ଓଡିଶା ପୁଲିସର ସଦସ୍ୟଗଣ ଛାତ୍ରଛାତ୍ରୀ, ଏବଂ ଜନସାଧାରଣ ବହୁ ସଂଖ୍ୟାରେ ଯୋଗ ଦେଇଥିଲେ। ଏହି ଅବସରରେ ଏକ ସାଇକେଲ ର୍ୟାଲି ମଧ୍ୟ ଆୟୋଜିତ ହୋଇଥିଲା। କଟକ ମହାନଗର ନିଗମ ମେୟର ସୁବାସ ଚନ୍ଦ୍ର ସିଂହ ଏହାକୁ ଉଦ୍ଘାଟନ କରିଥିଲେ। ଏହି କାର୍ଯ୍ୟକ୍ରମରେ କଟକ ଜିଲ୍ଲାପାଳ ଭବାନୀଶଙ୍କର ଚୟନୀ, ସିଆରପିଏଫ ଓ ଆଇଟିବିପିର ଅଧିକାରୀଗଣ ଉପସ୍ଥିତ ଥିଲେ।

ଷ୍ଟିୱାର୍ଟ ସାଇନ୍ସ କଲେଜ ପରିସରରେ ଏହି ଅବସରରେ ଏକ ରକ୍ତଦାନ ଶିବିର ଆୟୋଜିତ ହୋଇଥିଲା। ଏହାଛଡା ନେତାଜୀ ପାଠ ପଢିଥିବା ରେଭେନ୍ସା କଲେଜିଏଟ୍ ସ୍କୁଲ ପରିସରରେ ବୃକ୍ଷରୋପଣ ମଧ୍ୟ କରାଯାଇଥିଲା। ନେତାଜୀଙ୍କ ବୀରତ୍ୱ ଓ ଆଜାଦ ହିନ୍ଦ୍ ଫୌଜର ସାହାସକୁ ସ୍ମରଣ କରିବା ପାଇଁ ସହିଦଭବନରେ ବିଭିନ୍ନ ପ୍ରକାର ଅସ୍ତ୍ରଶସ୍ତ୍ର ମଧ୍ୟ ପ୍ରଦର୍ଶିତ ହୋଇଥିଲା। ଏହି ସବୁ ଅସ୍ତ୍ରଶସ୍ତ୍ର ମଧ୍ୟରେ ଥିଲା ସିଜିଆର୍ଏଲ୍, ଅଟୋମେଟିକ୍ ଗ୍ରେଜେଡ୍ ଲଞ୍ଚର, ୮୧ ଏମ୍ଏମ୍ ମୋର୍ଟାସ୍, ୭.୬୨ଏମ୍ମ୍ ଏମ୍ଏମ୍ଜି, ୭.୬୨ଏମ୍ଏମ୍ ସ୍ନାଇପର, ଘାତକ ରାଇଫଲ, ଓୟାରଲେସ୍ କମ୍ୟୁନିକେସନ ସିଷ୍ଟମ ଆଦି ଅନ୍ତର୍ଭୁକ୍ତ।

ଏହାଛଡା ନେତାଜୀଙ୍କ ଜୀବନୀ ଓ କାର୍ଯ୍ୟ ଉପରେ ଏକ ଡାକଟିକଟ ପ୍ରଦର୍ଶନୀ ଓ ଏକ କବିତା ପାଠୋତ୍ସବ ଆୟୋଜିତ ହୋଇଥିଲା। ସନ୍ଧ୍ୟାରେ ସହିଦମାନଙ୍କ ପରିବାରର ସଦସ୍ୟଙ୍କୁ ସମ୍ମାନୀତ କରାଯିବା ସହିତ ଦେଶାତ୍ମବୋଧକ କାର୍ଯ୍ୟକ୍ରମର ଆୟୋଜନ କରାଯାଇଥିଲା।
କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଆଜାଦି କି ଅମୃତ ମହୋତ୍ସବ ଆଇକନିକ୍ ଇଭେଣ୍ଟସ୍ ସପ୍ତାହ ଚଳିତ ଜାନୁୟାରୀ ୧୭ରୁ ୨୩ ତାରିଖ ପର୍ଯ୍ୟନ୍ତ ପାଳିତ ହେଉଛି।

ଭାରତ ସ୍ୱାଧୀନତାର ୭୫ବର୍ଷ ପୂର୍ତ୍ତି ପାଳନ ଅବସରରେ ଏସବୁ କାର୍ଯ୍ୟକ୍ରମ ଦେଶର ବିଭିନ୍ନ ଭାଗରେ ଆୟୋଜିତ ହେଉଛି। ଏଥିରେ ନେତାଜୀ ସୁଭାଷ ବୋଷଙ୍କ ଜୀବନୀ ଏବଂ ଦେଶର ସ୍ୱାଧୀନତା ଆନ୍ଦୋଳନକୁ ତାଙ୍କର ଅବଦାନ ସମ୍ପର୍କରେ ବିଭିନ୍ନ କାର୍ଯ୍ୟକ୍ରମ ସ୍ଥାନ ପାଇଛି।
ଏହି କାର୍ଯ୍ୟକ୍ରମର ଭବ୍ୟ ଉଦ୍ଯାପନ ଉତ୍ସବ ଚଳିତମାସ ୨୩ତାରିଖ (୨୩ଜାନୁୟାରୀ ୨୦୨୩)ରେ ଆଣ୍ଡାମାନ ନିକୋବର ଦ୍ୱୀପର ପୋର୍ଟ ବ୍ଲେୟାରଠାରେ ଅନୁଷ୍ଠିତ ହେବ। ଏଥିରେ ସ୍ୱରାଷ୍ଟ୍ରମନ୍ତ୍ରୀ ଶ୍ରୀ ଅମିତ ଶାହା ମୁଖ୍ୟ ଅତିଥିଭାବେ ଯୋଗଦେବେ।

ଭୁବନେଶ୍ବର: ସ୍ୱାଧୀନତାର ଅମୃତ ମହୋତ୍ସବ ଏବଂ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ୧୨୬ତମ ଜନ୍ମବାର୍ଷିକୀ ଉପଲକ୍ଷେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ୧୭ରୁ ୨୩ ଜାନୁଆରୀ ୨୦୨୩ ପର୍ଯ୍ୟନ୍ତ ଦେଶର ବିଭିନ୍ନ ସ୍ଥାନରେ ଆଇକନିକ ସପ୍ତାହ ପାଳନ କରାଯାଉଛି। ଜାନୁଆରୀ ୨୦ ତାରିଖରେ ନେତାଜୀଙ୍କ ଜନ୍ମସ୍ଥାନ ଐତିହାସିକ କଟକ ସହରରେ ବିଭିନ୍ନ କାର୍ଯ୍ୟକ୍ରମ ଆୟୋଜିତ ହେବ। ସିଆରପିଏଫ, ଆଇଟିବିପି ଏବଂ ରାଜ୍ୟ ସରକାରଙ୍କ ମିଳିତ ଆନୁକୁଲ୍ୟରେ ନେତାଜୀଙ୍କ ସ୍ମୃତିଚାରଣ ଉଦ୍ଦେଶ୍ୟରେ ଏକାଧିକ କାର୍ଯ୍ୟକ୍ରମ ଆୟୋଜନ ଲାଗି ଯୋଜନା ପ୍ରସ୍ତୁତ କରାଯାଇଛି।

ଆସନ୍ତା ୨୦ ତାରିଖ ସକାଳ ସାଢ଼େ ୬ଟାରୁ ସାଢ଼େ ୭ଟା ପର୍ଯ୍ୟନ୍ତ ହାଇକୋର୍ଟ ଠାରୁ ନେତାଜୀ ସୁଭାଷ ଚନ୍ଦ୍ର ବୋଷଙ୍କ ଜନ୍ମସ୍ଥାନ ପର୍ଯ୍ୟନ୍ତ ପ୍ରଭାତ ଫେରି କାର୍ଯ୍ୟକ୍ରମ ଆୟୋଜନ କରାଯିବ। ଏଥିରେ ସିଆରପିଏଫ, ଆଇଟିବିପି ଏବଂ ସ୍କୁଲ ଛାତ୍ରଛାତ୍ରୀ ସାମିଲ ହେବେ।  ସେହିପରି ସକାଳ ସାଢ଼େ ୭ଟା ଠାରୁ ସାଢ଼େ ୮ଟା ପର୍ଯ୍ୟନ୍ତ ହାଇକୋର୍ଟରୁ ନେତାଜୀଙ୍କ ଜନ୍ମସ୍ଥାନ ପର୍ଯ୍ୟନ୍ତ ଗଣଦୌଡ଼ ଆୟୋଜନ କରାଯିବ। ଏଥିରେ ମଧ୍ୟ ସିଆରପିଏଫ ଓ ଆଇଟିବିପି ଯବାନ, ସାଧାରଣ ନାଗରିକ ଓ ସ୍କୁଲ ଛାତ୍ରଛାତ୍ରୀମାନେ ଅଂଶଗ୍ରହଣ କରିବେ। ଏହାଛଡ଼ା ସମାନ ସ୍ଥାନରେ ସକାଳ ସାଢ଼େ୯ଟାରୁ ସାଢ଼େ ୧୦ଟା ପର୍ଯ୍ୟନ୍ତ ସାଇକେଲ ରାଲି ଆୟୋଜନ କରାଯିବ।

ଅନ୍ୟପକ୍ଷରେ ଖୋର୍ଦ୍ଧାସ୍ଥିତ ଆଇଟିବିପି ଶିବିର ଏବଂ ଭୁବନେଶ୍ବରସ୍ଥିତ ସିଆରପିଏଫ ଗ୍ରୁପ କେନ୍ଦ୍ର ଠାରେ ବୃକ୍ଷରୋପଣ କାର୍ଯ୍ୟକ୍ରମ ଆୟୋଜନ କରାଯିବ। କଟକ ଷ୍ଟିୱ।ର୍ଟ କଲେଜ ପରିସରରେ ସକାଳ ୧୦ଟାରୁ ୧୧ଟା ପର୍ଯ୍ୟନ୍ତ ରକ୍ତଦାନ ଶିବିର ଆୟୋଜନ କରାଯିବ। ଅପରାହ୍ନ ୫ଟାରେ କଟକ ସାରଳା ଭବନ ପରିସରରେ ଆଇଟିବିପି ଏବଂ ସିଆରପିଏଫ ପକ୍ଷରୁ ସହିଦଙ୍କ ପରିବାର ବର୍ଗଙ୍କୁ ସମ୍ବର୍ଦ୍ଧନା କାର୍ଯ୍ୟକ୍ରମ ଆୟୋଜନ କରାଯିବ। ଏଠାରେ ସାଢ଼େ ୫ଟାରେ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯିବ।  କଟକର ନେତାଜୀ ଜନ୍ମସ୍ଥାନ ସଂଗ୍ରହାଳୟରେ ଡାକ ଟିକଟ ପ୍ରଦର୍ଶନୀ ଏବଂ ନେତାଜୀଙ୍କ ଜୟନ୍ତୀ ଉପରେ ଡାକ ଟିକଟ ଉନ୍ମୋଚନ କରାଯିବ। ସେହିପରି ଯୁଦ୍ଧାସ୍ତ୍ର ପ୍ରଦର୍ଶନୀ ମଧ୍ୟ ଆୟୋଜନ କରାଯିବ। କଟକସ୍ଥିତ ଓଡ଼ିଶା ସାହିତ୍ୟ ଏକାଡେମୀ ଠାରେ କବିତା ପାଠୋତ୍ସବ ଅନୁଷ୍ଠିତ ହେବ।

ଚଳିତ ବର୍ଷ ନେତାଜୀ ଜୟନ୍ତୀ ସମାରୋହକୁ ଜନଭାଗିଦାରୀ ମାଧ୍ୟମରେ ଦେଶବ୍ୟାପୀ ବ୍ୟାପକ ଆକାରରେ ଆୟୋଜନ କରିବା ଲାଗି ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଯୋଜନା କରାଯାଇଛି । ଏହି କାର୍ଯ୍ୟକ୍ରମରେ ଅଧିକରୁ ଅଧିକ ଜନସାଧାରଣ ସାମିଲ ହେବାକୁ ମନ୍ତ୍ରଣାଳୟ ପକ୍ଷରୁ ଆହ୍ବାନ କରାଯାଇଛି।

ଭୁବନେଶ୍ୱର: ଭୁବନେଶ୍ୱର ଓ କଟକ ଦ୍ୱେିତ ମହାନଗରରେ ଜିଓ ଟ୍ରୁ-୫ଜି ସେବା ଆରମ୍ଭ ସହିତ ଭୁବନେଶ୍ୱର ସ୍ଥିତ ଶିକ୍ଷା ଓ ଅନୁସନ୍ଧାନ ବିଶ୍ୱବିଦ୍ୟାଳୟ ପରିସରରେ ଡିଜିଟାଲ କମ୍ୟୁନିକେସନ ନେଇ ଆୟୋଜିତ ଦୁଇଦିନିଆ ପ୍ରଦର୍ଶନୀରେ ଜିଓ ଏକ ସ୍ୱତନ୍ତ୍ର ଲାଇଭ୍ ୫ଜି ଏକ୍ସପେରିଏନ୍ସ ଜୋନ୍ ସ୍ଥାପନ କରିଛି, ଯାହା ବହୁସଂଖ୍ୟକ ଛାତ୍ରଛାତ୍ରୀ, ଯୁବବର୍ଗଙ୍କ ସହିତ ବିଭିନ୍ନ କ୍ଷେତ୍ରରୁ ବହୁ ସଂଖ୍ୟକ ବୃତିଧାରୀଙ୍କୁ ଆକୃଷ୍ଟ କରୁଛି। ଜିଓ ସ୍ୱାସ୍ଥ୍ୟସେବା କ୍ଷେତ୍ରରେ ଜିଓ କମ୍ୟୁନିଟି କ୍ଲିନିକ ମେଡିକାଲ କିଟ୍‌, ଶିକ୍ଷା, କ୍ଲାଉଡ ଗେମିଙ୍ଗ, ସ୍ମାର୍ଟ ଅଫିସ, ସ୍ମାର୍ଟ ସିଟି ଏବଂ ବୈପ୍ଳବିକ ଏଆର-ଭିଆର୍ ଉପକରଣ, ଜିଓ ଗ୍ଲାସ୍ ଆଦିରେ ୫ଜିର ଅନ୍ତର୍ନିବେଶୀ ଫାଇଦା ସମ୍ପର୍କରେ ଲାଇଭ୍ ପ୍ରଦର୍ଶନ କରିଛି। ଏହି ଫାଇଦାଗୁଡିକ ଓଡ଼ିଶାର ଜନସାଧାରଣଙ୍କ ଜୀବନରେ ରୂପାନ୍ତରଣକାରୀ ପରିବର୍ତନ ଆଣିବ।

ପ୍ରଦର୍ଶିତ ହୋଇଥିବା କେତେକ ୫ଜି ବ୍ୟବହାରିକ ପ୍ରୟୋଗ ସମ୍ପର୍କରେ ସଂକ୍ଷିପ୍ତ ବର୍ଣ୍ଣନା:

ଜିଓ ଟ୍ରୁ-୫ଜି ସ୍ପିଡ ଟେଷ୍ଟ: ଜିଓ ଟ୍ରୁ-୫ଜି ଏକ୍ସପେରିଏନ୍ସ ଜୋନ୍ ରେ ଲାଇଭ୍ ସ୍ପିଡ ଟେଷ୍ଟ ଜରିଆରେ ଜିଓ ଉଚ୍ଚ ବ୍ୟାଣ୍ଡୱିଡ୍‌ଥ ଏବଂ ଲୋ ଲାଟେନ୍ସି ପ୍ରଦର୍ଶନ କରିଛି ଏବଂ ସେଥିରେ ହାରାହାରି ୫ଜି ସ୍ପିଡ ୧.୫ ଜିବିପିଏସ୍ ରହିଛି।

ସ୍ୱାସ୍ଥ୍ୟଯତ୍ନ- ଗୋଟିଏ ବ୍ୟାଗ୍‌ରେ କ୍ଲିନିକ: ଜିଓ ଟ୍ରୁ ୫ଜି ସମର୍ଥିତ ଗୋଷ୍ଠୀ କ୍ଳିନିକଗୁଡିକ ସୀମିତ ସ୍ୱାସ୍ଥ୍ୟଯତ୍ନ ସୁବିଧା ଉପଲବ୍ଧ ହେଉଥିବା ଅଂଚଳଗୁଡିକୁ ‘କ୍ଲିନିକ ଇନ୍ ଏ ବ୍ୟାଗ୍‌’ ପ୍ଲାଟଫର୍ମ ଜରିଆରେ ପାରାମେଡିକ୍ସ ଉପଯୋଗରେ ଗୁଣାତ୍ମକ ସ୍ୱାସ୍ଥ୍ୟଯତ୍ନ ପ୍ରଦାନକାରୀ ସ୍ପେଶାଲିଷ୍ଟମାନଙ୍କୁ ଉପଲବ୍ଧ କରାଇବ ଅଥବା ଆଶା କର୍ମୀମାନେ ଷ୍ଟେଥୋସ୍କୋପ, ଇସିଜି ମେସିନ, ଗ୍ଲୁକୋଜ ମନିଟର, ଇଏନଟି ପ୍ରୋବ୍ ଭଳି ଉପକରଣ ଗୋଟିଏ ବ୍ୟାଗ୍ ରେ ଧରି ଦୂରଦୂରାନ୍ତରେ ଥିବା ରୋଗୀଙ୍କ ନିକଟରେ ପହଁଚିବେ ଏବଂ ଉକ୍ତ ପରୀକ୍ଷା ତଥ୍ୟକୁ ବାସ୍ତବକାଳୀନ ଭିତିରେ ଜିଓ ଟ୍ରୁ-୫ଜି ଜରିଆରେ ଯେକୌଣସି ସ୍ଥାନରେ ଥିବା ଜଣେ ସ୍ପେଶାଲିଷ୍ଟ ଡାକ୍ତରଙ୍କୁ ଅବଗତ ଦିଆଯାଇପାରିବ। ତାହାସହିତ ଏକ କ୍ଳିନିକ ମ୍ୟାନେଜମେଂଟ ପ୍ଲାଟଫର୍ମ ରହିଛି ଯେଉଁଥିରେ ସମସ୍ତ ଗୁରୁତ୍ୱପୂର୍ଣ୍ଣ ତଥ୍ୟ, ଇଏମଆର୍‌, ରୋଗୀ ଦେଖାକରିବା ସମୟ ଏବଂ ଅନ୍ୟାନ୍ୟ ବିସ୍ତୃତ ବିବରଣୀ ସ୍ଥାନପାଇବ, ଯେଉଁଗୁୂଡିକ ଯେକୌଣସି ସ୍ୱାସ୍ଥ୍ୟସେବା କ୍ଲିନିକ ଦକ୍ଷତାର ସହିତ କାର୍ଯ୍ୟକାରିତା ନିମନ୍ତେ ନିତାନ୍ତ ଆବଶ୍ୟକ।

ସ୍ଥାନ ଏବଂ ଜନସଂଖ୍ୟା ନିର୍ବିଶେଷରେ ଜନସାଧାରଣଙ୍କୁ ଉତମ ସ୍ୱାସ୍ଥ୍ୟସେବା ପହଁଚାଇବା କ୍ଷେତ୍ରରେ ସଫଳତା ହାସଲ ଦିଗରେ ଏହା ଏକ ବିଶାଳ ପ୍ରୟାସ ହୋଇଛି।

କ୍ଲାଉଡ ଗେମିଙ୍ଗ: ଜିଓ ଟ୍ରୁ ୫ଜିର ଅତ୍ୟନ୍ତ ସ୍ୱଳ୍ପ ଲାଟେନ୍ସି ଏବଂ ଉଚ୍ଚ ବ୍ୟାଣ୍ଡୱିଡ୍‌ଥ ବଳରେ ଗେମର୍‌ମାନେ ଏଣିକି ଜିଓକ୍ଳାଉଡ ଗେମିଙ୍ଗରେ ଓଟିଟି ଅନୁରୂପ ସେବା ପାଇପାରିବେ, ଯେଉଁଠାରେ ସେମାନେ ଯେକୌଣସି ସ୍ଥାନରେ ଥାଇ ବ୍ୟୟବହୁଳ ହାର୍ଡୱେର ଆବଶ୍ୟକ ନକରି ଅଥବା ବ୍ୟୟବହୁଳ ଗେମ୍ ଟାଇଟଲ୍ ପୃଥକ ଭାବରେ ଖରିଦ ନକରି ଉଚ୍ଚ ମାନର ଗେମ୍‌ର ସୁଯୋଗ ନେବାକୁ ସମର୍ଥ ହେବେ।

ସ୍ମାର୍ଟ ଅଫିସ: ଜିଓ ଟ୍ରୁ-୫ଜି କନେକ୍ଟିଭିଟି  ଏବଂ ଜିଓ ଏୟାରଫାଇବର ବଳରେ ପରିଚାଳିତ ହେଉଥିବା କାର୍ଯ୍ୟାଳୟଗୁଡିକ ଜିଓ ଏୟାରଫାଇବର, କ୍ଲାଉଡ ପିସି, ଭିଡିଓ ଟେଲିଫୋନି ଏବଂ ଡିଜିଟାଲ ସାଇନେଜ୍ ଭଳି ସହଜ ଏବଂ ଓୟାରଲେସ୍ ପ୍ଲଗ୍ ଆଣ୍ଡ ପ୍ଲେ ସମାଧାନ ବଳରେ ଅଧିକ ସ୍ମାର୍ଟ ହେବାକୁ ଯାଉଛି।

ସ୍ମାର୍ଟ ମିଟରିଂ ଆଣ୍ଡ ସ୍ମାର୍ଟ ଲାଇଟିଂ: ଜିଓ ଟ୍ରୁ-୫ଜି ରିଅଲ ଡାଟା ପ୍ରୋସେସିଂ, ସିଫ୍ଟ ଟୁ ଏଜ୍ କ୍ଳାଉଡ ଦିଗରେ ସହାୟକ ହେବା ସହିତ ବିବିଧ ଉପକରଣରେ ଏକାଧିକ ଷ୍ଟ୍ରିମିଂକୁ ସମର୍ଥ କରାଇବ। ଏଥିସହିତ ସ୍ଥାପନା କ୍ଷେତ୍ରରେ କୌଣସି ସୀମା ନରଖି ପାରମ୍ପରିକ କେବଲିଂ ଠାରୁ ସିସିଟିଭିର ଦ୍ରୁତ ମୁତୟନକୁ ୫ଜି ସମର୍ଥ କରାଇବ।

ଜିଓ-ଗ୍ଲାସ ଏଆର-ଭିଆର୍ ଡିଭାଇସ: ଜିଓ-ଗ୍ଲାସ୍ ବ୍ୟବହାରକାରୀଙ୍କୁ ଜିଓ ଟ୍ରୁ-୫ଜି ବଳରେ ସଶକ୍ତ ଭାରତର ପ୍ରଥମ ମିଶ୍ରିତ ରିଅଲିଟି ଜିଓ ଗ୍ଲାସ୍ ସହିତ ଶିକ୍ଷା ଆହରଣର ଭବିଷ୍ୟତ ସମ୍ପର୍କରେ ଅନୁଭୂତି ହାସଲ ପାଇଁ ସମର୍ଥ କରାଇବ।

ପରିବର୍ଦ୍ଧିତ ରିଅଲିଟିକୁ ବ୍ୟବହାର କରି ସ୍କୁଲଗୁଡିକ ଏଣିକି ଏକ ‘୩ଡି ରିଅଲିଟି ଲାବ୍‌’ ସ୍ଥାପନ କରିପାରିବେ ଯେଉଁଥିରେ ସମସ୍ତ ଛାତ୍ରଛାତ୍ରୀ ସେମାନଙ୍କ ପାଠ୍ୟକ୍ରମରୁ ବିଷୟଗୁଡିକୁ ଜିଓ ଗ୍ଲାସ୍ ପିନ୍ଧି ଦେଖିପାରିବେ। ଏହାକୁ ସୁଯୋଗ ନେବାପାଇଁ ରହିଥିବା ଏକ ବିକଳ୍ପ ମଧ୍ୟରେ ଜଣେ ଶିକ୍ଷକ ଏକମାତ୍ର ଜିଓ ଗ୍ଲାସ ପରିଧାନ କରି ୩ଡି ବିଷୟବସ୍ତୁକୁ ନେଇ ଭାବ ବିନିମୟ କରିବେ ଏବଂ ପରେ ତାହାକୁ ୨ଡି ପରଦାରେ ପ୍ରସାରଣ କରାଯାଇ ଜିଓ ଟ୍ରୁ ୫ଜିରେ ଇଂଟରନେଟ ଜରିଆରେ ୨ଡିରେ ସ୍କୁଲଗୁଡିକ ସହିତ ସହଭାଗିତା କରାଯାଇପାରିବ। ଜିଓ ଏକ୍ସପେରିଏନ୍ସ ଜୋନ୍‌ରେ ଆଜି ଅନେକ ଛାତ୍ରଛାତ୍ରୀ ଏବଂ ବୃତିଧାରୀ ଜିଓ-ଗ୍ଲାସ୍ ଏଆର-ଭିଆର୍‌  ପରିଧାନ କରି ଏହାର ଅନୁଭୂତି ଲାଭ କରିଥିଲେ।

ଜିଓ ଗ୍ଲାସ୍ ଛାତ୍ରଛାତ୍ରୀଙ୍କର ଏକାଗ୍ରତାରେ ବୃଦ୍ଧି ଘଟାଇବା ସହିତ ଶିକ୍ଷାଜାରି ରଖିବା ହାର ୩୦%ରୁ ଅଧିକ ବଜାୟ ରଖୁଛି। ଶିକ୍ଷକମାନେ ବିହେଭିଅରାଲ୍ ଆନାଲିଟିକ୍ସ ଜରିଆରେ ଛାତ୍ରଛାତ୍ରୀଙ୍କ ଶିକ୍ଷାହାସଲ ଯାତ୍ରା ଉପରେ ଦୃଷ୍ଟି ରଖିପାରିବେ, ୩ଡି ବିଷୟବସ୍ତୁ ନିୟନ୍ତ୍ରଣ କରିପାରିବେ ଏବଂ ଟାବ୍‌ଲେଟରେ ଅଳ୍ପକିଛି କ୍ଲିକ୍ କରି ଶିକ୍ଷା ଆହରଣ ଯାତ୍ରାକୁ ଗେମିଫାଏ କରିପାରିବେ। ଛାତ୍ରଛାତ୍ରୀ ୩ଡି ବିଷୟବସ୍ତୁ ସହିତ ସେମାନଙ୍କର ଭାବ ବିନିମୟ କରିପାରିବେ ଏବଂ ସେମାନଙ୍କ ନିଜସ୍ୱ ଗତିରେ ବିଭିନ୍ନ ଚିନ୍ତାଧାରା ଅନୁଧ୍ୟାନ କରିପାରିବେ, ଯାହା ସେମାନଙ୍କୁ ଅଧିକ ଭଲଭାବରେ ଶିକ୍ଷାଗ୍ରହଣ ଏବଂ ତାହା ଦୀର୍ଘକାଳ ମନେରଖିବାରେ ସହାୟକ ହେଉଛି।

କେବଳ ଜିଓର ଷ୍ଟାଣ୍ଡଆଲୋନ୍ ଟ୍ରୁ-୫ଜି ନେଟୱର୍କ ତାହାର ହାଇ ବ୍ୟାଣ୍ଡୱିଡ୍‌ଥ ଏବଂ ଲୋ ଲାଟେନ୍ସିକୁ ନେଇ ଭାରତରେ ପ୍ରତିଟି ସ୍କୁଲ ଏବଂ ପ୍ରତ୍ୟେକ ଛାତ୍ରକୁ ଉଚ୍ଚ ଗୁଣମାନ, ଭାବ ବିନିମୟକାରୀ, ୩ଡି ଶିକ୍ଷା ଆହରଣ ବିଷୟବସ୍ତୁ ଯୋଗାଇ ଦେଇପାରିବ।

କଟକ: ପୂର୍ବତଟ ରେଳପଥର ମହାପ୍ରବନ୍ଧକ ରୂପ ନାରାୟଣ ସୁନକର ଆଜି କଟକ ଷ୍ଟେସନ ନିରୀକ୍ଷଣ କରିଛନ୍ତି। ଏହି ସମୟରେ ସେ ଚାଲୁରହିଥିବା ବିଭିନ୍ନ କାର୍ଯ୍ୟ ସମୀକ୍ଷା କରିଥିବାବେଳେ ଏହାର ପ୍ରକଳ୍ପ ସମ୍ବନ୍ଧୀୟ କାର୍ଯ୍ୟ ସମ୍ବନ୍ଧରେ ଅବଗତ ହୋଇଛନ୍ତି।

ଏହା ସହିତ ଶ୍ରୀ ସୁନକର ଭୁବନେଶ୍ୱର -କଟକ ରେଳ ସେକ୍ସନ ନିରୀକ୍ଷଣ କରି ନିରାପତ୍ତା ସମ୍ବନ୍ଧୀୟ ଏବଂ ରେଳ ଚଳାଚଳ ଟ୍ରାଫିକ ସମ୍ବନ୍ଧୀୟ କାର୍ଯ୍ୟ ସମୀକ୍ଷା କରିଥିଲେ।

କଟକ ଷ୍ଟେସନ ନିରୀକ୍ଷଣ ସମୟରେ ଶ୍ରୀ ସୁନକର ଯାତ୍ରୀ ପରିସେବା କାର୍ଯ୍ୟ ସହିତ ଅନ୍ୟାନ ପ୍ରକଳ୍ପ କାର୍ଯ୍ୟ ଗୁଡିକର ସମୀକ୍ଷା କରି ଏହା ସମ୍ବନ୍ଧରେ ଗୁରୁତ୍ୱାରୋପ କରିଥିଲେ ଏବଂ ଏହାର ଶିଘ୍ର ସମ୍ପାଦନ ପାଇଁ ଅଧିକାରୀ ମାନଙ୍କୁ ପରାମର୍ଶ ଦେଇଥିଲେ।

ରେଳ ମନ୍ତ୍ରୀ ଅଶ୍ବିନୀ ବୈଷ୍ଣବ ଓଡ଼ିଶାରେ ରେଳ ପ୍ରକଳ୍ପ ଓ ଭିତ୍ତିଭୂମି ବିକାଶ ପାଇଁ ଗୁରୁତ୍ୱାରୋପ କରୁଥିବାବେଳେ ନିଜେ ଏହାର ଅଗ୍ରଗତି ସମ୍ବନ୍ଧରେ ନିୟମିତ ସମୀକ୍ଷା କରୁଛନ୍ତି। କଟକ ରେଳ ଷ୍ଟେସନର ବିକାଶ କାର୍ଯ୍ୟ ଶ୍ରୀ ବୈଷ୍ଣବଙ୍କ ଓଡ଼ିଶାରେ ରେଳ ପ୍ରକଳ୍ପ ସମୀକ୍ଷା ମଧ୍ୟରୁ ଅନ୍ୟତମ ଅଟେ।

ଭୁବନେଶ୍ବର: “ଗୋଟିଏ ଷ୍ଟେସନ୍ ଗୋଟିଏ ଉତ୍ପାଦ” ଯୋଜନା ସ୍ଥାନୀୟ କାରିଗର, କୁମ୍ଭକାର, ବୁଣାକାର/ହ୍ୟାଣ୍ଡଲୁମ୍ ବୁଣାକାର, ଆଦିବାସୀ ମାନଙ୍କର ଜୀବିକା ବୃଦ୍ଧି ତଥା କଲ୍ୟାଣ ଉଦ୍ଦେଶ୍ୟରେ ଭାରତ ସରକାର ନିକଟରେ ବଜେଟରେ ଘୋଷଣା କରିଥିଲେ। ଏହି ଯୋଜନା ଅଧୀନରେ ରେଳ ଷ୍ଟେସନରେ ସ୍ଥାନୀୟ କାରିଗରମାନଙ୍କୁ ସେହି ନିର୍ଦ୍ଦିଷ୍ଟ ଅଞ୍ଚଳ ସମ୍ବନ୍ଧୀୟ ପ୍ରସିଦ୍ଧ ସ୍ଥାନୀୟ ଉତ୍ପାଦଗୁଡିକ ପ୍ରଦର୍ଶନ ଏବଂ ବିକ୍ରୟ ପାଇଁ ଷ୍ଟଲ୍ ଯୋଗାଇ ଦିଆଯାଉଛି।  ଲକ୍ଷ୍ୟ ହେଉଛି ରେଳ ଷ୍ଟେସନକୁ ଏକ ପ୍ରମୋସନାଲ୍ ହବ୍ ଏବଂ ଏକ ସ୍ଥାନୀୟ ଉତ୍ପାଦ ପାଇଁ ପ୍ରଦର୍ଶନ ଗନ୍ତବ୍ୟସ୍ଥଳ କରିବା, ଯାହା ଦ୍ଵାରା ସ୍ଥାନୀୟ ଶିଳ୍ପଗୁଡିକ ଏକ ପ୍ରମୁଖ ଉତ୍ସ ହେବ।

ଗୋଟିଏ ଷ୍ଟେସନ ଗୋଟିଏ ପ୍ରଡକ୍ଟ ଯୋଜନା ଅଧୀନରେ ଖୋର୍ଦ୍ଧା ରୋଡ଼ ମଣ୍ଡଳ ଦ୍ଵାରା ଓଡ଼ିଶା ଗ୍ରାମୀଣ ବିକାଶ ଏବଂ ମାର୍କେଟିଂ ସୋସାଇଟି (ORMAS) ର ସମନ୍ୱୟ ରେ ଭୁବନେଶ୍ୱର ଏବଂ କଟକ ରେଳ ଷ୍ଟେସନରେ ଦୁଇଟି ବିକ୍ରି ଷ୍ଟଲ ଉନ୍ମୋଚନ କରାଯାଇଛି।
ବର୍ତ୍ତମାନ ଯାତ୍ରୀମାନେ ଭୁବନେଶ୍ୱର ରେଳ ଷ୍ଟେସନରେ ଖୋର୍ଦ୍ଧା ଜିଲ୍ଲାର ପ୍ରସିଦ୍ଧ “ବେଲ୍ ମେଟାଲ୍ ପ୍ରଡକ୍ଟ” ଏବଂ କଟକ ରେଳ ଷ୍ଟେସନରେ କଟକ ଜିଲ୍ଲାର ପ୍ରସିଦ୍ଧ “ସିଲଭର ଫିଲିଗ୍ରି ହ୍ୟାଣ୍ଡିକ୍ରାଫ୍ଟ ଏବଂ ହ୍ୟାଣ୍ଡଲୁମ୍ ଉତ୍ପାଦ” ପାଇପାରିବେ। ଯାତ୍ରୀମାନେ କୌଣସି ମଧ୍ୟସ୍ଥିଙ୍କୁ ଜଡିତ ନକରି ସିଧାସଳଖ କାରିଗରମାନଙ୍କଠାରୁ ଏହି ଉତ୍ପାଦ କ୍ରୟ କରିପାରିବେ।

ଏହାପୂର୍ବରୁ, ଖୋର୍ଦ୍ଧା ରୋଡ଼ ମଣ୍ଡଳ ଦ୍ଵାରା ପୁରୀ ରେଳ ଷ୍ଟେସନରେ ଓଡ଼ିଶାର ପ୍ରସିଦ୍ଧ ହସ୍ତତନ୍ତ “ପଟାଚିଟ୍ରା” ଏବଂ “ପିପିଲି ଆପ୍ଲିକ୍” କୁ ଏକ ଷ୍ଟେସନ୍ ଏକ ପ୍ରଡକ୍ଟ ଯୋଜନା ଅଧୀନରେ ପ୍ରୋତ୍ସାହିତ କରିବା ପାଇଁ ପୁରୀ ରେଳ ଷ୍ଟେସନରେ ଗୋଟିଏ ଷ୍ଟଲ୍ ଖୋଲା ଯାଇଥିଲା।  ଖୋର୍ଦ୍ଧା ରୋଡ଼ ମଣ୍ଡଳ ର ୭୮ ରେଳ ଷ୍ଟେସନରେ ଏକ ଷ୍ଟେସନ୍ ଏକ ପ୍ରଡକ୍ଟ ଷ୍ଟଲ୍ ପାଇଁ ଆବେଦନ ନିମନ୍ତ୍ରଣ ପାଇଁ ଖୋର୍ଦ୍ଧା ରୋଡ ରେଳ ମଣ୍ଡଳ ବିଭିନ୍ନ ସୋସିଆଲ୍ ମିଡିଆ ପ୍ଲାଟଫର୍ମ ମାଧ୍ୟମରେ ବିଜ୍ଞପ୍ତି ଜାରି କରିଛି।

ଖୋର୍ଦ୍ଧା ରୋଡ଼ର ମଣ୍ଡଳ ରେଳ ପ୍ରବନ୍ଧକ ରିଙ୍କେଶ ରାୟ ଯାତ୍ରୀମାନଙ୍କୁ ଷ୍ଟଲଗୁଡିକର ସୁବିଧା ନେବାକୁ ଏବଂ ରେଳ ଷ୍ଟେସନରେ ସ୍ଥାନୀୟ ଉତ୍ପାଦର ସାମଗ୍ରୀ ଗୁଡ଼ିକ ଦେଖିବାକୁ ଅନୁରୋଧ କରିଛନ୍ତି। ସେ ସ୍ଥାନୀୟ କାରିଗର, କୁମ୍ଭକାର, ବୁଣାକାର, ଆଦିବାସୀମାନଙ୍କୁ ଷ୍ଟେସନ ଗୁଡ଼ିକ ରେ ନିଜର ଷ୍ଟଲ ଖୋଲିବା ପାଇଁ ଆବେଦନ କରିବାକୁ ଅନୁରୋଧ କରିଛନ୍ତି।

କଟକ: ସେ ହେଉଛନ୍ତି କଟକର ଡେପୁଟି ମେୟର। ତାଙ୍କ ନାମ ହେଲା ଦମୟନ୍ତି ମାଝି। ସେ କଟକ ଜଗତପୁର ବସ୍ତିରେ ରହୁଛନ୍ତି। ଗତକାଲି ତାଙ୍କ ଘରେ ଇଡକୋ ତରଫରୁ ନୋଟିସ ମରାଯାଉଛି। ସେଥିରେ ଉଲ୍ଲେଖ ରହିଛି ଯେ, ତାଙ୍କ ଘର ଉଚ୍ଛେଦ କରାଯିବ। ବସ୍ତି ଉଚ୍ଛେଦ ପକ୍ରିୟାରେ ତାଙ୍କ ଘର ମଧ୍ୟ ସାମିଲ ରହିଛି।

ଏପରି ନୋଟିସ ପାଇବା ପରେ କଟକ ରାଜନୀତି ବେଶ ସରଗରମ ହୋଇପଡିଛି। ଦମୟନ୍ତି କମ ବୟସରେ ତାଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଡେପୁଟି ମେୟର କରିଛନ୍ତି। ଅଳ୍ପ ଦିନ ତଳେ ସେ ଶପଥ ନେଇଛନ୍ତି। ଏପରି ପରିସ୍ଥିତିରେ ଇଡକୋ ତରଫରୁ ଏହି ନୋଟିସ ଆସିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।

ତେବେ ଏହି ପରିସ୍ଥିତିକୁ ଥଣ୍ଡା କରିବା ପାଇଁ କଟକ ମେୟର ସୁବାସ ସିଂ ସାମାନ୍ୟ ପାଣି ଢାଳିଛନ୍ତି। ସେ କହିଛନ୍ତି ଯେ, ବସ୍ତି ଉଚ୍ଛେଦକୁ ଆମେ ଘୋର ବିରୋଧ କରୁ। ଡେପୁଟି ମେୟର ଏବଂ ସେହି ବସ୍ତିର ଘର କିପରି ସୁରକ୍ଷିତ ରହିବ ସେ ନେଇ ଆମର ଆଲୋଚନା ଜାରୀ ରହିଛି।

ଭୁବନେଶ୍ବର: ପଞ୍ଚାୟତ ନିର୍ବାଚନ ସହିତ ରାଜ୍ୟରେ ପୌର ନିର୍ବାଚନ ପାଇଁ ମଧ୍ୟ ପ୍ରକ୍ରିୟା ଆରମ୍ଭ ହୋଇଯାଇଛି। ସେଥିପାଇଁ ରାଜ୍ୟରେ ମହାନଗର ନିଗମର ମେୟର ପଦବୀ ପାଇଁ ସଂରକ୍ଷଣ ତାଲିକା ପ୍ରକାଶ ପାଇଛି। ଭୁବନେଶ୍ୱର ମହାନଗର ନିଗମର ମେୟର ପଦବୀକୁ ମହିଳାଙ୍କ ପାଇଁ ସଂରକ୍ଷିତ ରଖାଯାଇଥିବାବେଳେ କଟକ ମହାନଗର ନିଗମର ମେୟର ପଦବୀକୁ ଅଣସଂରକ୍ଷିତ ଓ ବ୍ରହ୍ମପୁର ମହାନଗର ନିଗମର ମେୟର ପଦବୀକୁ ମହିଳାଙ୍କ ପାଇଁ ସଂରକ୍ଷିତ ରଖାଯାଇଛି। ତେବେ ଆଜି ଏନେଇ ଗେଜେଟ୍ ବିଜ୍ଞପ୍ତି ଜାରି ହେବା ସହ ଏହା ଉପରେ ଆପତ୍ତି-ଅଭିଯୋଗ ଥିଲେ ୧୫ଦିନ ମଧ୍ୟରେ ପୌର ନିର୍ଦ୍ଦେଶକଙ୍କ କାର୍ଯ୍ୟାଳୟକୁ ଜଣାଇବାକୁ କୁହାଯାଇଛି।