ଭୁବନେଶ୍ୱର: କାଶ୍ମୀର ଉପତ୍ୟକାର ଯୁବବର୍ଗ ଏକ ବିକଶିତ ଭାରତର ନିର୍ମାତା ହୁଅନ୍ତୁ ବୋଲି ରାଜ୍ୟପାଳ ଡ. ହରି ବାବୁ କମ୍ଭମ୍ପାଟି ଆହ୍ୱାନ ଜଣାଇଛନ୍ତି । ଆଜି ରାଜଭବନର ନ୍ୟୁ ଅଭିଷେକ ହଲଠାରେ ପଂଚମ କାଶ୍ମୀର ଯୁବ ବିନିମୟ କାର୍ଯ୍ୟକ୍ରମରେ କାଶ୍ମୀର ଉପତ୍ୟକାରୁ ଆସିଥିବା ଯୁବ ପ୍ରତିନିଧିମାନେ ରାଜ୍ୟପାଳଙ୍କ ସହ ଭାବ ବିନିମୟ କରିବା ଅବସରରେ ରାଜ୍ୟପାଳ ଏହି ଆହ୍ୱାନ ଜଣାଇଛନ୍ତି ।
କାଶ୍ମୀରର ଯୁବ ପ୍ରତିନିଧିମାନଙ୍କୁ ଉଦ୍ବୋଧନ ଦେଇ ରାଜ୍ୟପାଳ କହିଥିଲେ ଯେ ଏହି ଯୁବ ବିନିମୟ କାର୍ଯ୍ୟକ୍ରମ ଜାତୀୟ ସଂହତିକୁ ସୁଦୃଢ଼ କରିବା ଏବଂ ବିଭିନ୍ନ ଅଂଚଳର ଯୁବପୀଢ଼ିଙ୍କ ମଧ୍ୟରେ ବୁଝାମଣା ଓ ସଦ୍ଭାବ ବୃଦ୍ଧି କରିବା ପାଇଁ ଆମ ଦେଶର ପ୍ରତିବଦ୍ଧତା ସୂଚାଉଛି । ଏହା ମଧ୍ୟ “ଏକ ଭାରତ – ଶ୍ରେଷ୍ଠ ଭାରତ” ଭାବନାକୁ ପ୍ରତିଫଳିତ କରୁଛି ଯାହା ବିଭିନ୍ନ ରାଜ୍ୟର ଯୁବ ବର୍ଗ ମଧ୍ୟରେ ଏକତା, ସାଂସ୍କୃତିକ ବିନିମୟ ଏବଂ ପାରସ୍ପରିକ ବୁଝାମଣାର ବନ୍ଧନକୁ ମଜବୁତ କରୁଛି ।
ଭାରତରେ ଥିବା ବିବିଧ ସୌନ୍ଦର୍ଯ୍ୟ ଓ ସୁଯୋଗକୁ କାଶ୍ମୀରର ଯୁବ ବର୍ଗ ଅନୁସନ୍ଧାନ କରୁଥିବା ଜାଣି ରାଜ୍ୟପାଳ ଖୁସି ପ୍ରକଟ କରିଥିଲେ । ରାଜ୍ୟପାଳ କାଶ୍ମୀରର ଯୁବ ପ୍ରତିନିଧିମାନଙ୍କୁ ସମ୍ବୋଧିତ କଲାବେଳେ କହିଥିଲେ ଯେ ଯୁବ ନେତୃତ୍ୱ ଓ ସେମାନଙ୍କର ସଶକ୍ତିକରଣ ହେଉଛି ଏକ ଶକ୍ତିଶାଳୀ ରାଷ୍ଟ୍ରର ମୂଳଦୁଆ । ଭାରତ ସରକାର ଦକ୍ଷତା ବିକାଶ, ଶିକ୍ଷା, ନିଯୁକ୍ତି ସୁଯୋଗ, କ୍ରୀଡ଼ା ଏବଂ ଉଦ୍ୟୋଗ ମାଧ୍ୟମରେ କାଶ୍ମୀର ଯୁବକଯୁବତୀମାନଙ୍କୁ ସଶକ୍ତ କରିବା ପାଇଁ ଅନେକ ପଦକ୍ଷେପ ନେଇଛନ୍ତି, ଯାହାକି ସେମାନଙ୍କର ଭବିଷ୍ୟତ ଗଠନ କରିବାରେ ସହାୟକ ହେଉଛି ।
“ପୃଥିବୀର ସ୍ୱର୍ଗ” ଭାବେ ଗୌରବ ବହନ କରେ କାଶ୍ମୀର । କାଶ୍ମୀରର ଯୁବବର୍ଗ ଏହାର ଐତିହ୍ୟ ବହନ କରୁଛନ୍ତି । ମନୋରମ ଉପତ୍ୟକା, ନୈସର୍ଗିକ ସୌନ୍ଦର୍ଯ୍ୟ, ସମୃଦ୍ଧ ସାଂସ୍କୃତିକ ଐତିହ୍ୟ ଏବଂ ପ୍ରତିଭାବାନ ଯୁବପୀଢ଼ି ପାଇଁ କାଶ୍ମୀର ଜଣାଶୁଣା ବୋଲି ରାଜ୍ୟପାଳ କହିବା ସହିତ ସେମାନଙ୍କର ଶକ୍ତି, ଦୃଢ଼ ସଂକଳ୍ପ ଏବଂ ନବସୃଜନ ଭାରତର ଭବିଷ୍ୟତକୁ ଗଢ଼ିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ବୋଲି କହିଥିଲେ ।
ଶିକ୍ଷା, ଉଦ୍ୟୋଗ, ଶାସନ କିମ୍ବା ସମାଜସେବା କ୍ଷେତ୍ରରେ ଯୁବପୀଢ଼ି ଦକ୍ଷତା ବିକାଶ କରି ଦେଶ ନିର୍ମାଣରେ ମହତ୍ୱପୂର୍ଣ୍ଣ ଭୂମିକା ନିଭାଇବାକୁ ରାଜ୍ୟପାଳ ଆହ୍ୱାନ ଜଣାଇଥିଲେ । ରାଜ୍ୟପାଳ କହିଥିଲେ ଯେ ନେହେରୁ ଯୁବ କେନ୍ଦ୍ର ସଂଗଠନ ବିଭିନ୍ନ ଅଂଚଳର ଯୁବବର୍ଗଙ୍କୁ ସଂଯୋଗ କରିବାରେ ଏବଂ ନେତୃତ୍ୱ ବିକାଶକୁ ପ୍ରୋତ୍ସାହିତ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି । ଏହି କ୍ରମରେ କାଶ୍ମୀର ଯୁବ ପ୍ରତିନିଧିମାନଙ୍କ ଓଡ଼ିଶା ଭ୍ରମଣ ସେମାନଙ୍କୁ ଓଡ଼ିଶାର ସଂସ୍କୃତି, ସମୃଦ୍ଧ ଐତିହ୍ୟ ଓ ପରଂପରା ଏବଂ ବିକାଶ ଯାତ୍ରାକୁ ଦେଖିବା ଓ ବୁଝିବା ସହିତ ଅଭିଜ୍ଞତା ବାଂଟିବାର ସୁଯୋଗ ପ୍ରଦାନ କରିବ ବୋଲି କହିଥିଲେ ।
ଏହି ଅବସରରେ ରାଜ୍ୟପାଳ ଡ. ହରି ବାବୁ କମ୍ଭମ୍ପାଟି ଯୁବ ପ୍ରତିନିଧିମାନଙ୍କୁ ଶୁଭେଚ୍ଛା ଜଣାଇ ଏହି କାର୍ଯ୍ୟକ୍ରମ କେବଳ ଜ୍ଞାନ ଏବଂ ଅଭିଜ୍ଞତା ପ୍ରଦାନ କରିବ ନାହିଁ ବରଂ ଜୀବନବ୍ୟାପୀ ବନ୍ଧୁତା ଏବଂ ଅର୍ଥପୂର୍ଣ୍ଣ ସଂଯୋଗ ଗଠନ କରିବାରେ ସହାୟକ ହେବ ବୋଲି କହିଥିଲେ ।
ପ୍ରାରମ୍ଭରେ ରାଜ୍ୟପାଳଙ୍କ ପ୍ରମୁଖ ଶାସନ ସଚିବ ଏନ୍ବିଏସ୍ ରାଜପୁତ ସ୍ୱାଗତ ଭାଷଣ ପ୍ରଦାନ କରିବା ସହ ଅତିଥି ପ୍ରତିନିଧିମାନଙ୍କର ଓଡ଼ିଶା ପରିଦର୍ଶନ ସମୟରେ ଫଳପ୍ରଦ ଓ ସୁଖଦ ରହଣୀ କାମନା କରିଥିଲେ । କାଶ୍ମୀରର ଯୁବ ପ୍ରତିନିଧିମାନେ ସେମାନଙ୍କର ଓଡ଼ିଶା ଭ୍ରମଣର ଅନୁଭୂତି ବାଂଟି ଓଡ଼ିଶାର କଳା, ସଂସ୍କୃତି, ଜୀବନଶୈଳୀ, ଆତିଥେୟତା ଏବଂ ଓଡ଼ିଶାବାସୀଙ୍କ ଭଲ ପାଇବା ଗୁଣର ଉଚ୍ଚ ପ୍ରଶଂସା କରିଥିଲେ ।
ଏହି ଅବସରରେ କାଶ୍ମୀର ଯୁବ ପ୍ରତିନିଧିମାନେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ । ଓଡ଼ିଶା ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ସୌଜନ୍ୟରେ ମଧ୍ୟ ସାଂସ୍କୃତିକ କାର୍ଯ୍ୟକ୍ରମ ପରିବେଷିତ ହୋଇଥିଲା ଯାହା ଦେଖି ଅତିଥି ପ୍ରତିନିଧିମାନେ ଓଡ଼ିଶା ସଂସ୍କୃତିର ଉଚ୍ଚ ପ୍ରଶଂସା କରିଥିଲେ ।
