କଳାହାଣ୍ଡି (ଦୁଷ୍ମନ୍ତ କୁମାର ପଣ୍ଡା): କଳାହାଣ୍ଡି ଜିଲ୍ଲାର ଇନ୍ଦ୍ରାବତୀ ଯୋଜନାରେ ବାମ ମୁଖ୍ୟ କେନାଲରୁ ବାହାରିଥିବା ଗୁନଗୁନିଆ ଡିଷ୍ଟ୍ରିବ୍ୟୁଟାରୀ କେନାଲ ରାସ୍ତାର ମରାମତି କାର୍ଯ୍ୟ ରାତି ଅଧିଆ କରାଯାଉଥିବା ଦେଖା ଯାଇଛି। ସୋମବାର ସକାଳୁ କ୍ରଶର ଗୁଣ୍ଡ ମିଶା ଗେଟୀ ପକାଇ ଦେବା ପରେ ରୋଲର ବୁଲାଇ ଦିଆ ଯାଇ ଥୁକ ପାଳିଶ କରି ଦେଇଥିବା ଅଭିଯୋଗ ହେଉଛି।
ସୋମବାର ରାତି ରେ ପିଚୁ କାମ କରିବା ପାଇଁ ସବୁ ପ୍ରକାର ବ୍ୟବସ୍ଥା କରାଯାଇ ସନ୍ଧ୍ୟା ହେବା ପରେ ଅନ୍ଧାର ରାତି ୭ ଟା ସମୟରେ ହାଇୱା ଯୋଗେ ପିଚୁ ଅଣାଯାଇ ଉକ୍ତ ରାସ୍ତାରେ ପିଚୁ କାମ କରାଯାଇଥିବା ଅଭିଯୋଗ ହେଉଛି। ସ୍ଥାନୀୟ ଗ୍ରାମବାସୀ ଅଭିଯୋଗ କରିବା ପରେ ମଧ୍ୟ କାର୍ଯ୍ୟ ସ୍ଥଳରେ ବିଭାଗୀୟ ଯନ୍ତ୍ରୀ ମାନଙ୍କ ଉପସ୍ଥିତିରେ ଠିକାଦାର ଯେନତେନ ପ୍ରକାରେ ରାତି ଅଧିଆ କାମ ସାରି ଦେବାକୁ ବ୍ୟବସ୍ଥା କରୁଥିବା ପ୍ରକାଶ।
ଯନ୍ତ୍ରୀମାନଙ୍କ ଉପସ୍ଥିତିରେ ଠିକାଦାର ଏଭଳି ଭାବେ ରାତି ଅଧିଆ କାମ କରିବା ନିଶ୍ଚିତ ପକ୍ଷେ ନିମ୍ନ ମାନର ହୋଇଥାଇ ପାରେ ବୋଲି ଜନସାଧାରଣରେ ଅଭିଯୋଗ ହେଉଛି। ଏସମ୍ପର୍କରେ ରାଜ୍ୟ କ୍ଵାଲିଟି ନିୟନ୍ତ୍ରଣ ବିଭାଗ ଦ୍ବାରା ନିରପେକ୍ଷ ତଦନ୍ତ କରାଗଲେ ବହୁ ଗୋପନୀୟ ତଥ୍ୟ ପଦାକୁ ଆସି ପାରିବ ବୋଲି ସାଧାରଣରେ ମତ ପ୍ରକାଶ ପାଇଛି।