ନୂଆଦିଲ୍ଲୀ: ଗତକାଲି ହଠାତ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କେନ୍ଦ୍ର ମନ୍ତ୍ରୀମଣ୍ଡଳରେ ଅଦଳବଦଳ କରିଛନ୍ତି। ଏ ନେଇ ପୂର୍ବରୁ କୌଣସି ସଙ୍କେତ ନ ଥିଲା। ହେଲେ ହଠାତ ରାଷ୍ଟ୍ରପତି ଭବନରୁ ବିଜ୍ଞପ୍ତି ପ୍ରକାଶ ପାଇଲା ଯେ ଆଇନ ମନ୍ତ୍ରୀପଦରୁ ହଟିଛନ୍ତି କିରଣ ରିଜିଜୁ। ଏହାକୁ ନେଇ ଦିଲ୍ଲୀ ଗଣ ମାଧ୍ୟମ ମଧ୍ୟ କୌଣସି ସୁରାକ ପାଇପାରିଲା ନାହିଁ।
କିରଣ ରିଜିଜୁଙ୍କୁ ଆଇନ ପରି ଏକ ଗୁରୁତ୍ବପୂର୍ଣ୍ଣ ବିଭାଗରୁ ହଟାଇ କମ ଗୁରୁତ୍ବ ଥିବା ଆର୍ଥ ସାଇନସ ବିଭାଗର ମନ୍ତ୍ରୀ କରାଗଲା। ଏହି ବିଭାଗଟି ବହୁ ପୂର୍ବରୁ ମନ୍ତ୍ରୀ ଜିତେନ୍ଦ୍ର ସିଂଙ୍କ ପାଖରେ ଥିଲା। ଜିତେନ୍ଦ୍ର ସିଂଙ୍କ ପାଖରେ ପାଞ୍ଚୋଟି ବିଭାଗ ରହିଛି। ସେଥିରୁ ଗୋଟିଏ ବିଭାଗର ମନ୍ତ୍ରୀ ହେଲେ ରିଜିଜୁ।
ତେବେ ରିଜିଜୁଙ୍କୁ ମନ୍ତ୍ରୀ ଆଇନ ମନ୍ତ୍ରୀରୁ ହଟାଇବାର କାରଣ ଗୋଟିଏ ବୋଲି ସମସ୍ତେ ସନ୍ଦେହ ପ୍ରକାଶ କରିଛନ୍ତି। ତାହା ହେଲା ବିଚାରପତିଙ୍କ ସହିତ ତାଙ୍କର ମତଭେଦ। ବିଶେଷ କରି କଲେଜିୟମ ବ୍ୟବସ୍ଥାକୁ ନେଇ ସେ ଅସନ୍ତୁଷ୍ଠ ଥିଲେ। ଫଳରେ ସେ ଯେତେବେଳେ କୌଣସି ସଭାକୁ ଯାଆନ୍ତି ସେଠାରେ ସେ ବିଚାରପତିଙ୍କୁ ପରୋକ୍ଷରେ ସମାଲୋଚନା କରନ୍ତି। ଯାହାକୁ ନେଇ ପ୍ରଧାନମନ୍ତ୍ରୀ ଅସନ୍ତୋଷ ପ୍ରକାଶ କରି ପଦକ୍ଷେପ ଗ୍ରହଣ କଲେ।
ରିଜିଜୁଙ୍କୁ ବଦଳ ହେବା ଘଟଣା ଗଣମାଧ୍ୟମ କାହିଁକି ମନ୍ତ୍ରୀ ମଣ୍ଡଳର ଅନ୍ୟ ସଦସ୍ୟମାନେ ମଧ୍ୟ ଅବଗତ ନ ଥିଲେ। ସେମାନେ ମଧ୍ୟ ଏହାର ସାମାନ୍ୟତମ ଗନ୍ଧ ବାରିପାରି ନ ଥିଲେ। ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରୁ ଚିଠି ରାଷ୍ଟ୍ରପତି ଭବନକୁ ଗଲା। ସେଠାରୁ ବିଜ୍ଞପ୍ତି ପ୍ରକାଶ ପରେ ସମସ୍ତେ ଅବଗତ ହେଲେ। ତେଣୁ ଏହା ଏକ ଗୁପ୍ତ ମିଶନ ଭାବେ ଗ୍ରହଣ କରି ପଦକ୍ଷେପ ନିଆଯାଇଛି।
ରିଜିଜୁଙ୍କ ଉପରେ ପଦକ୍ଷେପ ପରେ କେନ୍ଦ୍ର ମନ୍ତ୍ରୀ ମଣ୍ଡଳରେ ଅନେକ ମନ୍ତ୍ରୀ ବର୍ତ୍ତମାନ ଛାନିଆ ହୋଇଯାଇଛନ୍ତି। କାରଣ କାହାର ପାଳି କେତେବେଳେ ପଡିଯିବ ସେ ନେଇ ସେମାନେ ସନ୍ଦେହ ଘେରରେ। ମୁଖ୍ୟତଃ ଯେଉଁ ମନ୍ତ୍ରୀମାନଙ୍କର ଭଲ ଦକ୍ଷତା ନାହିଁ ଏବଂ ଦଳକୁ ଉପରକୁ ନେବା ପାଇଁ କୌଣସି ପଦକ୍ଷେପ ନେଉ ପାରୁ ନାହାଁନ୍ତି ସେମାନେ ଭୟଭୀତ। ବାହାରକୁ କେହି କିଛି କହୁ ନ ଥିଲେ ମଧ୍ୟ ଆଉ କେତେକ ମନ୍ତ୍ରୀଙ୍କ ଉପରେ ଖଣ୍ଡା ଝୁଲୁଥିବାର ଜଣାପଡିଛି।
