ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: କ୍ରିକେଟ୍ ବେଟିଂର ବେତାଜ ବାଦ୍ଶାହା କୁହାଯାଉଥିବା ଲାଲା ଆଚାରୀ ଗିରଫ ହେବା ପରେ କ୍ରିକେଟ୍ ବୁକିମାନଙ୍କ ମଧ୍ୟରେ ଛନକା ପଶିବା ସହ ସେମାନଙ୍କୁ ଧରିବା ପାଇଁ ପୋଲିସ୍ ସେବେଠାରୁ ଜାଲ ବିଛାଇ ଥିଲା। ଏହି କ୍ରମରେ ଅନ୍ୟ ଜଣେ ଆଇପିଏଲ୍ ବୁକି ବିଶାଲ ଅଗ୍ରୱାଲ୍କୁ ପୋଲିସ୍ ଭୁବନେଶ୍ୱର ଏୟାରପୋର୍ଟରୁ ଗିରଫ କରିଛି। କିଛିଦିନ ହେଲା ପୋଲିସ୍ ବିଶାଲକୁ ଖୋଜୁଥିବାବେଳେ ଆଜି ସେ ଭୁବନେଶ୍ୱରରୁ ହାଇଦ୍ରାବାଦ୍ ପଳାଇ ଯାଉଥିବା ସମୟରେ ଧରିଥିଲେ।
ଏନେଇ ଗୋଷାଣିନୂଆଗଁ ଥାନାରେ ୧୪୧/୨୯.୧୦.୨୦୨୦ ୟୁ/ଏସ୍ ୨୯୪ଏ/୪୨୦/୧୨୦ବି/୩୪ଆଇପିସି ଆର୍/ଡ଼ବ୍ଲ୍ୟୁ ସେକ୍ସନ୍ ୪/୫ ବେନିଂ ଆକ୍ଟରେ ଗୋଟିଏ ଟିମ୍ ଭୁବନେଶ୍ୱରରୁ ଆଣିବା ପାଇଁ ଯାଇଛନ୍ତି। ଏହାସହ ବିଶାଲ୍କୁ ପଚରାଉଚରା ପରେ ଅନ୍ୟ ଅଭିଯୁକ୍ତ ଅଜିତ କୁମାର ବରାଡ଼ ଓରଫ୍ ବାଦଲକୁ ପୋଲିସ୍ ଗୋପାଳପୁର ଜଙ୍କସନ ନିକଟକୁ ଗିରଫ କରିଛି। ସେ ମଧ୍ୟ ଏକ ମାରୁତି ବିଜ୍ରା (ଓଡ଼ି ୦୭ ଏଇ ୨୪୪୨)ରେ ହାଇଦ୍ରାବାଦ୍ ଚାଲିଯିବାକୁ ବସିଥିବାବେଳେ ପୋଲିସ୍ ଧରିଥିଲା। ଏହାସହ ତା ନିକଟରୁ ୧ ଲକ୍ଷ ୯୫ହଜାର ୫୦୦ ଟଙ୍କା, ୭ଟି ମୋବାଇଲ୍ ଫୋନ୍, କାର୍, ଏଟିଏମ୍ କାର୍ଡ଼, ଆଇ କାର୍ଡ଼କୁ ମଧ୍ୟ ପୋଲିସ୍ ଜବତ କରିଛି।
ଏହି ଦୁଇଜଣକୁ ମିଶାଇଲେ ବର୍ତ୍ତମାନ ସୁଦ୍ଧା କ୍ରିକେଟ୍ ବେଟିଂ ଅଭିଯୋଗରେ ପୋଲିସ୍ ୪ ଜଣ ଅଭିଯୁକ୍ତକ୍ତୁ ଗିରଫ କରିସାରିଲାଣି। ବର୍ତ୍ତମାନ ଛୋଟ ମୋଟ ବୁକିମାନେ ଅଣ୍ଡରଗ୍ରାଉଣ୍ଡ ହୋଇଯାଇଥିବାବେଳେ ସେମାନଙ୍କୁ ମଧ୍ୟ ଧରାଯିବ ବୋଲି ଅତିରିକ୍ତ ଏସ୍ପି ପ୍ରଭାତ ରାଉତରାୟ ସୂଚନା ଦେଇଛନ୍ତି।