ନୂଆଦିଲ୍ଲୀ: ଟିମ ଇଣ୍ଡିଆର ପୂର୍ବତନ ତାରକା ଖେଳାଳି ଯୁବରାଜ ସିଂହ ଗୋଟିଏ ଓଭରରେ ୬ ଟି ଛକା ମାରିଥିଲେ। ଯୁବରାଜ ସିଂହଙ୍କ ଏହି ପାଳି ଲୋକଙ୍କ ମନରୁ ଏଯାଏଁ ଲିଭିନି। ଇଂଲଣ୍ଡ ବିରୋଧରେ ୨୦୦୭ ମସିହା ଟି-୨୦ ବିଶ୍ଵକପରେ ଯୁବରାଜ ସିଂହ ଏହି ରେକର୍ଡ କରିଥିଲେ। କିନ୍ତୁ ଯୁବରାଜଙ୍କ ବ୍ୟତୀତ ଏଭଳି ବିରଳ ରେକର୍ଡ ଆଉ ଜଣେ ଖେଳାଳି କରିଛନ୍ତି। ଆୟାରଲ୍ୟାଣ୍ଡର ଜନ ଗ୍ଳାସଙ୍କ ନାମ ଏହି ତାଲିକାରେ ଏବେ ଯୋଡି ହୋଇଯାଇଛି।
ଏକ ସ୍ଥାନୀୟ ଟୁର୍ଣ୍ଣାମେଣ୍ଟରେ ଜନ ଗ୍ଳାସ ଗୋଟିଏ ଓଭରରେ ୬ ଟି ଛକା ମାରିଥିଲେ। ଲଗାନ ବେଲି ଷ୍ଟିଲ୍ସ ଟି-୨୦ ଟ୍ରଫିର ଫାଇନାଲ ମ୍ୟାଚରେ ଜନ ଗ୍ଳାସ ଏହି କାରନାମା କରିଛନ୍ତି। କ୍ରେଗାଘୋ ବିରୋଧରେ ନଦର୍ଣ୍ଣ ଆୟାରିଶ କ୍ଲବ ବାଲିମେନା ପାଇଁ ଖେଳୁଥିବା ୨୧ ବର୍ଷୀୟ ଗ୍ଳାସ ଏହି ସଫଳତା ଲାଭ କରିଛନ୍ତି। ଫାଇନାଲ ମ୍ୟାଚର ଅନ୍ତିମ ଓଭରରେ ଗ୍ଳାସ ୬ ଟି ଛକା ମାରି ଦଳକୁ ବିଜୟ କରାଇଛନ୍ତି।
ଏହି ମ୍ୟାଚରେ ବାଲିମେନାକୁ ଅନ୍ତିମ ଓଭରରେ ଜିତିବା ପାଇଁ ୩୫ ରନ ଆବଶ୍ୟକ ହେଉଥିଲା। ଲଗାତର ୬ ଟି ଛକା ମାରି ଗ୍ଳାସ ଦଳକୁ ବିଜୟ କରାଇଥିଲେ। ସେ ଏହି ମ୍ୟାଚରେ ୮୭ ରନର ପାଳି ଖେଳିଥିଲେ।