ଭୁବନେଶ୍ବର, ଛତିଶଗଡରେ ବର୍ତ୍ତମାନ କରୋନା ପରିସ୍ଥିତି ସଂଗୀନ ହୋଇ ଉଠିଛି। ଏପରି ପରିସ୍ଥିତିରେ ଛତିଶଗଡ ଓଡିଶା ମଧ୍ୟରେ ଚଳାଚଳ କରୁଥିବା ସ୍ବତନ୍ତ୍ର ଟ୍ରେନକୁ ବନ୍ଦ କରାଯାଉ। ଏପରି ଏକ ଚିଠି ରାଜ୍ୟ ସରକାର କେନ୍ଦ୍ର ଗୃହ ବିଭାଗକୁ ଲେଖିଛନ୍ତି। ଅନ୍ତତଃ 15 ଦିନ ପାଇଁ ଟ୍ରେନ ଚଳାଚଳକୁ ବନ୍ଦ କରିବା ପାଇଁ ମୁଖ୍ୟ ଶାସନ ସଚିବ ସୁରେଶ ମହାପାତ୍ର ଏହି ଚିଠି ଲେଖିଛନ୍ତି।
କେନ୍ଦ୍ର ଗୃହ ସଚିବଙ୍କୁ ଲେଖିଥିବା ଏହି ଚିଠିରେ ଉଲ୍ଲେଖ କରାଯାଇଛି ଯେ, ଛତିଶଗଡ ସହିତ ଲୋକମାନେ ଯିବାଆସିବା କରିବା ଦ୍ବାରା ଓଡିଶାରେ ସଂକ୍ରାମିତ ସଂଖ୍ୟା ବୃଦ୍ଧି ପାଉଛି। ବିଶେଷ କରି ପଡୋଶୀ ଜିଲ୍ଲାଗୁଡିକରେ ଏହି ସଂଖ୍ୟା ବୃଦ୍ଧି ପାଉଛି ବୋଲି କୁହାଯାଇଛି। ସେଥିପାଇଁ ଓଡିଶା ମଧ୍ୟରେ ଚଳାଚଳ କରୁଥିବା ସ୍ବତନ୍ତ୍ର ଟ୍ରେନକୁ ବନ୍ଦ କରାଯାଉ ବୋଲି ମୁଖ୍ୟ ସଚିବ ଅନୁରୋଧ କରିଛନ୍ତି। ବର୍ତ୍ତମାନ ଛତିଶଗଡ ଓଡିଶା ମଧ୍ୟରେ 18ଟି ସ୍ବତନ୍ତ୍ର ଟ୍ରେନ ଯାତାୟତ କରୁଛି।