ଭୁବନେଶ୍ୱର: କେନ୍ଦ୍ର ଶିକ୍ଷା ମନ୍ତ୍ରଣାଳୟ ଦ୍ୱାରା ପ୍ରସ୍ତୁତ ଜାତୀୟ ଶିକ୍ଷାନୀତି – ୨୦୨୦ ଓଡ଼ିଶାରେ କାର୍ଯ୍ୟକାରୀ କରାଯିବା ଦ୍ୱାରା ଶିକ୍ଷା ଜଗତରେ ଏକ ବୈପ୍ଲବିକ ପରିବର୍ତ୍ତନ ହେବ ବୋଲି ଶିକ୍ଷାବିତ୍ମାନେ ଆଶାପୋଷଣ କରିଛନ୍ତି ସତ୍ୟ କିନ୍ତୁ ଏହାର କୌଣସି ଢ଼ାଞ୍ଚାଗତ ପରିବର୍ତ୍ତନ ଓ ଆବଶ୍ୟକ ଭିତ୍ତିଭୂମି ନଯୋଗାଇ ଏହାକୁ ଲାଗୁ କରିବା ଦ୍ୱାରା ଓଡ଼ିଶାର ଶିକ୍ଷାକ୍ଷେତ୍ରରେ କି ସୁଫଳ ମିଳିବ ବୋଲି ଓଡ଼ିଶା ସ୍କୁଲ କଲେଜ ଶିକ୍ଷକ କର୍ମଚାରୀ ସମନ୍ୱୟ ସମିତିର ଆବାହକ ରଞ୍ଜନ କୁମାର ଦାଶ ଏକ ପ୍ରେସ୍ ଇସ୍ତାହାରରେ କହିଛନ୍ତି।
ପ୍ରକାଶଥାଉକି, ରାଜ୍ୟସରକାର ବିଦ୍ୟାଳୟ ପାଠ୍ୟକ୍ରମ ଓ ଶିକ୍ଷାଦାନକୁ ନୂତନ ୫+୩+୩+୪ ଢାଞ୍ଚାରେ ପୁନର୍ଗଠନ କରାଯିବା ନେଇ ଖସଡ଼ା ପ୍ରସ୍ତୁତ କରିଛନ୍ତି ଯେଉଁଥିରେ ପ୍ରାରମ୍ଭିକ ଶିକ୍ଷାକୁ ୫ ବର୍ଷ ରଖାଯାଇଛି। ବୟସର ବିଭିନ୍ନ ପର୍ଯ୍ୟାୟର ଶିକ୍ଷାର୍ଥୀଙ୍କ ବିକାଶର ଅଲଗା ଅଲଗା ଅବସ୍ଥା ଆଧାରରେ ସେମାନଙ୍କ ଆବଶ୍ୟକତା ଓ ଆଗ୍ରହକୁ ଉଚିତ୍ ଦୃଷ୍ଟି ଦିଆଯିବ। ଏଥିନିମନ୍ତେ ବିଦ୍ୟାଳୟ ଶିକ୍ଷାସ୍ତରରେ ଶିକ୍ଷାଦାନ, ଶିକ୍ଷଣ ସଂଗଠନ ଓ ପାଠ୍ୟକ୍ରମ ରୂପରେଖ ଢାଞ୍ଚାରେ ପରିଚାଳିତ ହେବ। ପ୍ରାରମ୍ଭ/ମୌଳିକ ପର୍ଯ୍ୟାୟ ଦୁଇ ଭାଗରେ ୩ ବର୍ଷ ଅଙ୍ଗନବାଡ଼ି / ପ୍ରାକ୍ ବିଦ୍ୟାଳୟ / ବାଲବାଟିକା (ବୟସ ୩-୬) ଏବଂ ୨ ବର୍ଷ ପ୍ରାଥମିକ ବିଦ୍ୟାଳୟରେ ପ୍ରଥମ ଓ ଦ୍ୱିତୀୟ ଶ୍ରେଣୀଯାଏ (ବୟସ ୬-୮) ରଖାଯାଇଛି।
ଏହାପରେ ଆରମ୍ଭ ହେବ ପ୍ରସ୍ତୁତି ପର୍ଯ୍ୟାୟ, ଯେଉଁଥିରେ ପିଲାଟି ତୃତୀୟରୁ ପଞ୍ଚମ ଶ୍ରେଣୀ ଯାଏ ପଢ଼ିବ। ଏହି ସମୟରେ ତାର ବୟସ ୮ ରୁ ୧୧ ବର୍ଷ ହୋଇଥିବ। ଏହାପରେ ଆରମ୍ଭ ହେବ ମଧ୍ୟ ପର୍ଯ୍ୟାୟ। ଏଥିରେ ପିଲାଟି ଷଷ୍ଠ ଶ୍ରେଣୀରୁ ଅଷ୍ଟମ ଶ୍ରେଣୀଯାଏ ପଢ଼ିବ (ବୟସ ୧୧ରୁ ୧୪ ବର୍ଷ)। ଏହାପରେ ମାଧ୍ୟମିକ ପର୍ଯ୍ୟାୟ ହେବ। ଯେଉଁଥିରେ ୪ ବର୍ଷ ଯାଏ ନବମରୁ ଦ୍ୱାଦଶ ଶ୍ରେଣୀଯାଏ ପଢ଼ିବ। ଏହି ସମୟରେ ପିଲାର ବୟସ ୧୪ରୁ ୧୮ ବର୍ଷ ହୋଇଥିବ।
ଜାତୀୟ ଶିକ୍ଷାନୀତି ୨୦୨୦ରେ ଆଦ୍ୟ ଶୈଶବ ଯତ୍ନ ଓ ଶିକ୍ଷାକୁ ଗୁରୁତ୍ୱ ଦିଆଯିବ ଅର୍ଥାତ୍ ଶିକ୍ଷାର ମୂଳଦୁଆକୁ ଗୁରୁତ୍ୱ ମିଳିବ। ସମସ୍ତ ପର୍ଯ୍ୟାୟରେ ଅଭିଜ୍ଞତାଭିତ୍ତିକ ଶିକ୍ଷଣ ପ୍ରଣୟନ କରାଯିବ। ଏଥିରେ କାର୍ଯ୍ୟଭିତ୍ତିକ ଶିକ୍ଷଣ, କଳା ସମନ୍ୱିତ, କ୍ରୀଡ଼ା ସମନ୍ୱିତ ଶିକ୍ଷା, ଗଳ୍ପ ଆଧାରିତ ଶିକ୍ଷାଦାନକୁ ବ୍ୟବହାର କରାଯିବ। ଶ୍ରେଣୀଗୃହ ଶିକ୍ଷାଦାନ ପ୍ରକ୍ରିୟା ଦକ୍ଷତା ଭିତ୍ତିକ ଶିକ୍ଷାକୁ ଅଗ୍ରସର କରାଯିବ। ସ୍ଥାନୀୟ ବିଷୟବସ୍ତୁ ଓ ପ୍ରସଙ୍ଗ ସହ ଜାତୀୟ ପାଠ୍ୟପୁସ୍ତକକୁ ନେଇ ପାଠ୍ୟକ୍ରମ ପ୍ରସ୍ତୁତ କରାଯିବ।
ମୁଖସ୍ତିକରଣ ପରିବର୍ତ୍ତେ ଗଠନମୂଳକ ଶିକ୍ଷଣ ଉପରେ ହୋଇଥିବା ଗୁରୁତ୍ୱ ଆଧାରରେ ପାଠ୍ୟପୁସ୍ତକର ପରିବର୍ତ୍ତନ ହେବ। ଅଙ୍ଗନବାଡ଼ି କେନ୍ଦ୍ରରେ ଯେଉଁ ପିଲାମାନ ତିନି ବର୍ଷରୁ ଛଅ ବର୍ଷ ଯାଏ ପାଠ ପଢ଼ିବେ ସେମାନଙ୍କର ଦକ୍ଷତା ଓ ମୂଳଦୁଆକୁ ଦୃଢ଼ କରିବା ପାଇଁ ଏହି ଅଙ୍ଗନବାଡ଼ି କେନ୍ଦ୍ର ଗୁଡ଼ିକର ଭିତ୍ତିଭୂମି, ନିଜସ୍ୱ ଗୃହ ଓ ଶିକ୍ଷାଦାନ ବ୍ୟବସ୍ଥାର ପରିବର୍ତ୍ତନ କରାଗଲେ ହିଁ ଏହି ଜାତୀୟ ଶିକ୍ଷାନୀତି ସଫଳ ହୋଇପାରିବ।
ସମସ୍ତ ସରକାରୀ ବିଦ୍ୟାଳୟ ଓ ନୂତନଅନୁଦାନ ପ୍ରାପ୍ତ ବିଦ୍ୟାଳୟ ନିମନ୍ତେ ଯେଉଁ ଯେଉଁ ସୁବିଧା ଉପଲବ୍ଧ ତାହାକୁ ସମତୁଲ ନକରି ଜାତୀୟ ଶିକ୍ଷାନୀତି ୨୦୨୦ ଲାଗୁ କରିବା କେତେଦୂର ଫଳପ୍ରଦ ହେବ ତାହା ଏବେ ସନ୍ଦେହର ବଳୟ ଭିତରେ। ବିଭିନ୍ନ ବିଦ୍ୟାଳୟଗୁଡ଼ିକରୁ ଅବସରପରେ ଶୂନ୍ୟ ପଡ଼ୁଥିବା ପଦବୀଗୁଡ଼ିକର ନିଯୁକ୍ତିର ବ୍ୟବସ୍ଥା ସୃଷ୍ଟି କରାଗଲେ ଶିକ୍ଷାଦାନ ବାଧାପ୍ରାପ୍ତ ହେବନାହିଁ। ସବୁବର୍ଗର ବିଦ୍ୟାଳୟମାନଙ୍କ ମଧ୍ୟରେ ଏବଂ ସବୁ ଛାତ୍ରଛାତ୍ରୀମାନଙ୍କ ମଧ୍ୟରେ ବୈଷମ୍ୟତା ଦୂର କରି ସମସ୍ତଙ୍କ ପାଇଁ ସମାନ ସୁବିଧା ଯୋଗାଇଦେଲେ ଏବଂ ବିଭିନ୍ନ ବିଦ୍ୟାଳୟଗୁଡ଼ିକର ବ୍ୟବସ୍ଥାରେ ପରିବର୍ତ୍ତନ କରାଗଲେ ଜାତୀୟ ଶିକ୍ଷାନୀତି ଅଧିକ ଫଳପ୍ରଦ ହେବ ନଚେତ୍ ଆଗମୀ ଦିନରେ ନୂତନ ଅନୁଦାନ ପ୍ରାପ୍ତ ବିଦ୍ୟାଳୟଗୁଡ଼ିକ ଭାଙ୍ଗିଯିବ। ଏହାଛଡ଼ା ଆହୁରି ଅନେକ ସମସ୍ୟା ଯଥା- ସେହିପରି ୨୦୦ରୁ ଊର୍ଦ୍ଧ୍ୱ ବିଦ୍ୟାଳୟ ଓ ଅନେକ ମହାବିଦ୍ୟାଳୟ ଏବେ ସୁଦ୍ଧା ଅନୁଦାନ ପରିସରଭୁକ୍ତ ହୋଇପାରି ନାହାଁନ୍ତି। ପ୍ରଥମେ ସରକାର ସେହି ବିଦ୍ୟାଳୟ ମହାବିଦ୍ୟାଳୟଗୁଡ଼ିକୁ ଅନୁଦାନ ପ୍ରଦାନ କରିବା ଉଚିତ୍।
ଏପରି ସ୍ଥଳେ ନୂତନ ଶିକ୍ଷାନୀତି ୨୦୨୦ କେତେ ଫଳପ୍ରଦ ହେବ ତାହା ବରିଷ୍ଠ ନାଗରିକ, ବୁଦ୍ଧିଜୀବୀ ଓ ଶିକ୍ଷାବିତ୍ ମହଲରେ ପ୍ରଶ୍ନବାଚୀ ସୃଷ୍ଟି କରିଛି।
ଶିକ୍ଷାବ୍ୟବସ୍ଥାର ଢାଞ୍ଚାଗତ ପରିବର୍ତ୍ତନ ଘଟିବାକୁ ଯାଉଥିବା ବେଳେ ବିଦ୍ୟାଳୟର ଭିତ୍ତିଭୂମି, ଶିକ୍ଷକ ସମସ୍ୟା ପ୍ରତି ଦୃଷ୍ଟି ଦେବାକୁ ମାନବ୍ୟର ରାଜ୍ୟସରକାରଙ୍କୁ ମିଳିତ ସମନ୍ୱୟ ସମିତିର ନେତୃମଣ୍ଡଳୀ ସର୍ବଶ୍ରୀ ସମନ୍ୱୟ ସମିତିର ଆବାହକ ରଞ୍ଜନ କୁମାର ଦାଶଙ୍କ ସମେତ ସମନ୍ୱୟ ସମିତିର ସଭାପତି ସୁକାନ୍ତ କୁମାର ବେହେରା, ଅକ୍ଷୟ କୁମାର ମିଶ୍ର, ବିକ୍ରମ କୁମାର ଦାସ, ପ୍ରମୋଦ କୁମାର ହୋତା, ହରେକୃଷ୍ଣ ପାଣିଗ୍ରାହୀ, ଗରୁଡ଼ ଚନ୍ଦ୍ର ସାହୁ, ରଞ୍ଜନ କୁମାର ପଣ୍ଡା, ଏମ୍.ଏ.କାସିମ୍ ବେଗ୍, ପ୍ରଶାନ୍ତ କୁମାର ପତି, କଳିଙ୍ଗ କେଶରୀ ପ୍ରଧାନ, ସୁରେଶ ଚନ୍ଦ୍ର ଦାସ, ରାଜା ଓସିମ୍, ନୀଳମଣି ପୁରୋହିତ, ବ୍ରଜ କିଶୋର ବିଶ୍ୱାଳ, ଅଶୋକ କୁମାର ମହାପାତ୍ର, ଶଙ୍କର କୁମାର ସୁବୁଦ୍ଧି, ରାଜଲକ୍ଷ୍ମୀ ବେହେରା, ଜୟନ୍ତୀ ବଳ, ମାଣିକେଶ୍ୱର ସ୍ୱାଇଁ, ରମାକାନ୍ତ ମହାପାତ୍ର, ପ୍ରଦୀପ କୁମାର ମଙ୍ଗରାଜ, ନବକୁମାର ପଣ୍ଡା ଏବଂ ମଧୁସୂଦନ ଦେ ପ୍ରମୁଖ ସରକାରଙ୍କୁ ଅନୁରୋଧ ଜଣାଇଛନ୍ତି।
