ନୂଆଦିଲ୍ଲୀ: ରାୱଲପିଣ୍ଡି ଟେଷ୍ଟରେ ପାକିସ୍ତାନକୁ ଇଂଲଣ୍ଡ ପରାସ୍ତ କରିଛି। ଏହି ମ୍ୟାଚ୍ରେ ପାକିସ୍ତାନକୁ ୭୪ ରନରେ ପରାଜୟର ସାମ୍ନା କରିବାକୁ ପଡିଛି। ଏହିପରି ଇଂଲଣ୍ଡ ଦଳ ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜରେ ୧-୦ ରେ ଆଗୁଆ ହୋଇଛି। ମ୍ୟାଚ୍ ଜିତିବା ପାଇଁ ପାକିସ୍ତାନକୁ ୩୪୨ ରନ୍ ଆବଶ୍ୟକ ଥିଲା, କିନ୍ତୁ ଘରୋଇ ଦଳ ୨୬୮ ରନ୍ ରେ ସମସ୍ତ ୱିକେଟ ହରାଇଥିଲା। ଏହିପରି ଭାବରେ ବେନ ଷ୍ଟୋକ୍ସଙ୍କ ଦଳ ୭୪ ରନରେ ମ୍ୟାଚ ଜିତିଥିଲା। ତେବେ ୨୨ ବର୍ଷ ପରେ ପାକିସ୍ତାନ ମାଟିରେ ଇଂଲଣ୍ଡ ଟେଷ୍ଟ ମ୍ୟାଚ ଜିତିଛି।
ପାକିସ୍ତାନ ପାଇଁ ଦ୍ୱିତୀୟ ଇନିଂସରେ ସାଉଦ ଶକିଲ ସର୍ବାଧିକ ରନ୍ ସଂଗ୍ରହ କରିଥିଲେ। ସେ ୧୫୯ ବଲରେ ୭୬ ରନର ଇନିଂସ ଖେଳିଥିଲେ। ଏଥି ସହିତ ଇମାମ-ଉଲ-ହକ ୪୮ ରନ ଯୋଗଦାନ କରିଥିଲେ। ମହମ୍ମଦ ରିଜୱାନ୍ ଏବଂ ଅଜହର ଅଲି ଯଥାକ୍ରମେ ୪୮ ଏବଂ ୪୦ ରନ୍ କରିଥିଲେ। ଏହା ବ୍ୟତୀତ ଅଧିକାଂଶ ପାକିସ୍ତାନୀ ବ୍ୟାଟ୍ସମ୍ୟାନ୍ ଶସ୍ତାରେ ପ୍ୟାଭିଲିୟନକୁ ଫେରିଥିଲେ। ବର୍ତ୍ତମାନ ଏହି ସିରିଜର ଦ୍ୱିତୀୟ ମ୍ୟାଚ୍ ଡିସେମ୍ବର ୯ ତାରିଖରେ ମୁଲତାନରେ ଖେଳାଯିବ।
ଇଂଲଣ୍ଡ ପାଇଁ ଅଲି ରବିନ୍ସନ୍ ଏବଂ ଜିମି ଆଣ୍ଡରସନ ସବୁଠାରୁ ସଫଳ ବୋଲର ଥିଲେ। ଅଲି ରବିନ୍ସନ୍ ଏବଂ ଜିମି ଆଣ୍ଡରସନ ୪-୪ ୱିକେଟ୍ ନେଇଥିଲେ। ଏହା ବ୍ୟତୀତ କ୍ୟାପଟେନ୍ ବେନ୍ ଷ୍ଟୋକ୍ସ ଏବଂ ଜ୍ୟାକ୍ ଲିଚ୍ ଙ୍କୁ ୧-୧ ସଫଳତା ମିଳିଥିଲା। ଓଲି ରବିନ୍ସନ୍ ୨୨ ଓଭରରେ ୫୦ ରନ୍ ଦେଇ ୪ ଟି ୱିକେଟ୍ ନେଇଥିଲେ। ଜିମି ଆଣ୍ଡରସନ୍ ୨୪ ଓଭରରେ ୩୬ ରନ୍ ଦେଇଥିବା ବେଳେ ୪ ଖେଳାଳିଙ୍କୁ ପାଭିଲିୟନ ରାସ୍ତା ଦେଖାଇଥିଲେ ।