ଚେନ୍ନାଇ: ଆଜି ତାମିଲନାଡୁର ତିରୁବନ୍ନାମାଲାଇ ଜିଲ୍ଲାରେ ଗ୍ୟାସ ସିଲିଣ୍ଡର ବିସ୍ଫୋରଣ ହେବା ପରେ କାନ୍ଥ ଭୁଷୁଡି ଦୁଇ ମହିଳା ଏବଂ ଜଣେ ଆଠ ବର୍ଷର ବାଳକଙ୍କର ମୃତ୍ୟୁ ଘଟିଥିବା ବେଳେ ଚାରି ଜଣ ଆହତ ହୋଇଛନ୍ତି।
ପୋଲିସର ସୂଚନାନୁସାରେ, ମୁକ୍ତାବାଇ ନାମକ ଜନୈକ ମହିଳାଙ୍କ ଘରେ ସିଲିଣ୍ଡରରୁ ଗ୍ୟାସ ଲିକ୍ ହେଉଥିଲା। କିନ୍ତୁ ଲିକେଜକୁ ଅନୁଭବ ନକରି ସେ ଚୁହ୍ଲାରେ ନିଆଁ ସଂଯୋଗ କରିଦେଇଥିଲେ। ଫଳରେ ସିଲିଣ୍ଡରରେ ନିଆଁ ଲାଗି ବିସ୍ଫୋରଣ ହୋଇଥିଲା। ବିସ୍ଫୋରଣର ପ୍ରଭାବ ଏତେ ଭୟଙ୍କର ଥିଲା ଯେ, ଘରର ଦୁଇଟି କାନ୍ଥ ଭୁଷୁଡି ପଡିଥିଲା। ଗୋଟିଏ କାନ୍ଥ ଜାନକିରାମ ଏବଂ ତାଙ୍କ ପରିବାର ଉପରେ ପଡିଥିବା ବେଳେ ଆଉ ଗୋଟିଏ କାନ୍ଥ ପଡ଼ୋଶୀ ଉପରେ ପଡିଥିଲା।
ପୋଲିସର ସୂଚନାନୁସାରେ, ଜାନକୀରାମଙ୍କ ପତ୍ନୀ କାମାକ୍ଷୀ, ପୁଅ ହେମନ୍ତ ଏବଂ ମୁକ୍ତାବାଇର ଅନ୍ୟ ପଡ଼ୋଶୀ ଚନ୍ଦ୍ରମାଲଙ୍କ ମୃତ୍ୟୁ ଘଟିଛି। ଅନ୍ୟପକ୍ଷରେ ଜାନକିରାମ ଆହତ ଓ ତାଙ୍କ ପୁଅ ସୁରେଶ ଆହତ ହୋଇଥିବାବେଳେ ମୁକ୍ତାବଇ ଏବଂ ତାଙ୍କ ଝିଅ ମୀରା ଗୁରୁତର ଆହତ ହୋଇଛନ୍ତି। ଏହି ଘଟଣାକୁ ସମବେଦନା ଜଣାଇ ତାମିଲନାଡୁ ମୁଖ୍ୟମନ୍ତ୍ରୀ କେ ପଲାନିସ୍ୱାମୀ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଲେଖାଏଁ, ଗୁରୁତର ଆହତଙ୍କ ପାଇଁ ୧ ଲକ୍ଷ ଟଙ୍କା ଏବଂ ସାମାନ୍ୟ ଆହତଙ୍କ ପାଇଁ ୫୦ ହଜାର ଟଙ୍କା ସହାୟତା ରାଶି ଘୋଷଣା କରିଛନ୍ତି।