Tag: ଥାନା ଅଧିକାରୀ

ଛତ୍ରପୁର: ଗଞ୍ଜାମ ଜିଲ୍ଲା ପୁଲିସ ବିଭାଗରେ ଛୋଟ ଧରଣର ଅଦଳ ବଦଳ ହୋଇଛି। ୭ ଟି ଥାନାରେ ନୂତନ ଥାନା ଅଧିକାରୀ ଆସିବେ। ଖଲ୍ଲିକୋଟ ଥାନା ଅଧିକାରୀ ନରେଶ କୁମାର ସାହୁ ଙ୍କୁ ଗଞ୍ଜାମ ଆରକ୍ଷୀ ମୁଖ୍ୟାଳୟ କୁ ବଦଳି ହୋଇଥିବା ବେଳେ ତାଙ୍କ ସ୍ଥାନରେ ଗଞ୍ଜାମ ଆରକ୍ଷୀ ମୁଖ୍ୟାଳୟ ରେ ଥିବା ରମେଶ କୁମାର ପ୍ରଧାନ ଦାୟିତ୍ୱ ନେବେ।

ସେହିପରି ଗାଙ୍ଗପୁର ଥାନା ଅଧିକାରୀ ରାଜେଶ କୁମାର ସାହୁ ଙ୍କୁ ପୁରୁଷୋତ୍ତମପୁର ଥାନା କୁ ବଦଳି,ଗଞ୍ଜାମ ଆରକ୍ଷୀ ମୁଖ୍ୟାଳୟ ରେ ଥିବା ସନ୍ତୋଷ କୁମାର ବେହେରା ଙ୍କୁ ବଡ଼ଗଡ଼ ବଦଳି, ବଡ଼ଗଡ଼ ଥାନା ଅଧିକାରୀ ସନ୍ଧ୍ୟାରାଣୀ ସିଂହଙ୍କୁ ଗଞ୍ଜାମ ଆରକ୍ଷୀ ମୁଖ୍ୟାଳୟ, କବିସୂର୍ଯ୍ୟନଗର ଥାନା ଅଧିକାରୀ ସୁଧୀର କୁମାର ସାହୁଙ୍କୁ ସୋରଡ଼ା, ସୋରଡ଼ା ଥାନା ଅଧିକାରୀ ଅନିଲ କୁମାର ପରିଡାଙ୍କୁ ବେଗୁନିଆପଡା, ବୁଗୁଡ଼ା ଥାନା ଅଧିକାରୀ ପ୍ରଭାତ ରଞ୍ଜନ ମହାନ୍ତିଙ୍କୁ କବିସୂର୍ଯ୍ୟନଗର, ବେଗୁନିଆପଡା ଥାନା ଅଧିକାରୀ ସମୀର କୁମାର ରାଉତଙ୍କୁ ଗଞ୍ଜାମ ଆରକ୍ଷୀ ମୁଖ୍ୟାଳୟ, ଗଞ୍ଜାମ ଆରକ୍ଷୀ ମୁଖ୍ୟାଳୟର ସୀତାଂଶୁ ଶେଖର ମାନ୍ଧାତାଙ୍କୁ ବୁଗୁଡ଼ା ଥାନା ଅଧିକାରୀ ଭାବେ ବଦଳି ହୋଇଛି।

ସମସ୍ତ ଅଧିକାରୀ ମାନେ ତୁରନ୍ତ ନୂତନ ସ୍ଥାନରେ ଯୋଗ ଦେବା ପାଇଁ ଗଞ୍ଜାମ ଏସପି ଶୁଭେନ୍ଦୁ କୁମାର ପାତ୍ର ନିର୍ଦ୍ଦେଶ ଦେଇଛନ୍ତି।

ବୌଦ୍ଧ: ବୌଦ୍ଧ ଜିଲ୍ଲା ହରଭଙ୍ଗା ଥାନା ଅଧିକାରୀ ପୁଷ୍ପଲତା ରାଉତରାୟ ବ୍ରହ୍ମପୁର ଭିଜିଲାନ୍ସ ବିଭାଗ କର୍ମଚାରୀଙ୍କ ଦ୍ବାରା ଧରାପଡ଼ି ଫୁଲବାଣୀ ଥାନାରେ ଅଟକ ଅଛନ୍ତି।

ଘଟଣାରୁ ପ୍ରକାଶ ଯେ, ମହାନଦୀ ସୁରୁଣ୍ଡି ବାଲିଘାଟର ଲିଜ୍ ଧାରୀ ଶରତ ବେହେରାଙ୍କୁ ଥାନା ଅଧିକାରୀ ପୁଷ୍ପଲତା କୌଣସି କାରଣରୁ ଏକ ଲକ୍ଷ ଟଙ୍କା ଲାଞ୍ଚ ମାଗିଥିଲେ। ତଦନୁଯାୟୀ ଶରତ ବ୍ରହ୍ମପୁର ଭିଜିଲାନ୍ସ ବିଭାଗକୁ ଅବଗତ କରାଇବା ପରେ ବିଭାଗ ପକ୍ଷରୁ ଆଜି ଶରତଙ୍କ ଠାରୁ ଥାନା ଅଧିକାରୀ ନଗଦ ଏକ ଲକ୍ଷ ଟଙ୍କା ଲାଞ୍ଚ ଗ୍ରହଣ କରୁଥିଲାବେଳେ ଭିଜିଲାନ୍ସ କର୍ମଚାରୀ ଚଢ଼ାଉ କରି ଥାନା ଅଧିକାରୀଙ୍କ ଠାରୁ ଲାଞ୍ଚ ଟଙ୍କା ଜବତ କରି ଏକ ମକଦ୍ଦମା ରୁଜୁ କରି ଫୁଲବାଣୀ ଥାନାରେ ଅଟକ ରଖି ପଚରାଉଚରା କରୁଛି।

ଭୁବନେଶ୍ୱର: ନୀଳଗିରିରେ ସାମ୍ବାଦିକ ଲୋକନାଥ ଦଳେଇଙ୍କୁ ଆକ୍ରୋଶମୂଳକ ଗିରଫ ଓ ନିର୍ଯ୍ୟାତନା ସହ ଅମାନବୀୟ ବ୍ୟବହାରକୁ ନେଇ ଉତ୍କଳ ସାମ୍ବାଦିକ ସଂଘର ଏକ ପ୍ରତିନିଧି ମଣ୍ଡଳୀ ପୋଲିସ୍ ଡ଼ିଜି ଅନିଲ୍ କୁମାର ବଂଶଲଙ୍କୁ ଭେଟି ପ୍ରତିବାଦ ଜଣାଇଛି। ଉତ୍କଳ ସାମ୍ବାଦିକ ସଂଘର ରାଜ୍ୟ ସଭାପତି ବିଭୂତି ଭୂଷଣ କରଙ୍କ ନେତୃତ୍ୱରେ ଭୁବନେଶ୍ୱର ସାମ୍ବାଦିକ ସଂଘର ସଭାପତି ପ୍ରତାପ ଚନ୍ଦ୍ର ପ୍ରଧାନ, ରାଜ୍ୟ କାର୍ଯ୍ୟକାରିଣୀ ସଦସ୍ୟ ଲିଙ୍ଗରାଜ ସାହୁ, ଜିତେନ୍ଦ୍ର କୁମାର ମହାନ୍ତି, ସତ୍ୟଜିତ ସେଣ ପ୍ରମୁଖ ଡ଼ିଜିଙ୍କ ସହ ଆଲୋଚନା କାଳରେ କହିଥିଲେ କି, ସାମ୍ବାଦିକ ଶ୍ରୀ ଦଳେଇଙ୍କୁ ଚିକିତ୍ସାଧିନ ଅବସ୍ଥାରେ ଗୋଡ଼ରେ ବେଡ଼ି ବନ୍ଧାଯିବା ଘଟଣାରେ କାର୍ଯ୍ୟରତ ହାବିଲଦାରଙ୍କୁ ନିଲମ୍ବନ କରାଯିବା ଯଥାର୍ଥ ନୁହେଁ। ବିନା କୌଣସି ଉପରିସ୍ଥ ଅଧିକାରୀଙ୍କ ନିର୍ଦ୍ଦେଶରେ ଏପରି ବେଆଇନ୍ କାର୍ଯ୍ୟ ହାବିଲଦାର ସମ୍ପାଦିତ କରିପାରିବେ ନାହିଁ। ନିଜ ପ୍ରତିକ୍ରିୟାରେ ଡିଜି କହିଥିଲେ ଯେ, ଘଟଣାର ପୁଙ୍ଖାନୁପୁଙ୍ଖ ତଦନ୍ତ ପାଇଁ ଡ଼ିଏସ୍‌ପିଙ୍କୁ ଦାୟିତ୍ୱ ଦିଆଯାଇଛି। ପ୍ରାଥମିକ ପର୍ଯ୍ୟାୟରେ ଏହି ଘଟଣାରେ ହାବିଲଦାରଙ୍କୁ ନିଲମ୍ବନ କରାଯାଇଛି। ତଦନ୍ତ ରିପୋର୍ଟ ଆସିବା ପରେ ଦୋଷୀ ଅଧିକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶ୍ରୀ ବଂଶଲ ପ୍ରତିଶ୍ରୁତି ଦେଇଥିଲେ।

ଅପରପକ୍ଷରେ ସଂଘ ତରଫରୁ ଚେତାବନୀ ଦିଆଯାଇଛି କି, ଯଦି ସମ୍ପୃକ୍ତ ଥାନା ଅଧିକାରୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ପୂର୍ବକ ଯଥାଶୀଘ୍ର ନିଲମ୍ବନ କରାନଯାଏ, ତେବେ ରାଜ୍ୟବ୍ୟାପୀ ସଂଘ ପକ୍ଷରୁ ଦୃଢ ଆନ୍ଦୋଳନ ଗଢିଉଠିବ। ଏଠାରେ ପ୍ରକାଶଯୋଗ୍ୟ ଯେ, ଆଜି ସମଗ୍ର ରାଜ୍ୟରେ ସଂଘର ବିଭିନ୍ନ ଜିଲ୍ଲା ଶାଖା ପକ୍ଷରୁ ଥାନା ଅଧିକାରୀଙ୍କ ବିରୁଦ୍ଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଦାବି କରି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ମାରକପତ୍ର ପ୍ରଦାନ କରାଯାଇଛି।

ଗଞ୍ଜାମ: ଚର୍ଚ୍ଚାରେ ଗଞ୍ଜାମ ଜିଲ୍ଲା ଧରାକୋଟ ଥାନା ଆଇଆଇସି ଉମାକାନ୍ତ ସାହୁ। ଥାନା ପରିସରକୁ ସରସ ସୁନ୍ଦର କରିବା ସହ ନାଗରିକମାନଙ୍କ ସହ ପୋଲିସର ସମ୍ପର୍କ ସୁଦୃଢ କରିବା ପାଇଁ ହାତକୁ ନେଇଛନ୍ତି ଏକାଧିକ ପଦକ୍ଷେପ। ଉମାକାନ୍ତ ସାହୁ ଗତବର୍ଷ ଡିସେମ୍ବର ୯ ତାରିଖରେ ଧରାକୋଟ ଆଇଆଇସି ଭାବେ ଦାଇତ୍ୱ ଗ୍ରହଣ କରିଛନ୍ତି। ତେବେ ମାତ୍ର ୩ ମାସ ମଧ୍ୟରେ ଥାନାର ରୁପରେଖ ବଦଳାଇଦେଇଛନ୍ତି।

ଥାନାରେ ବ୍ୟାପକ ପରିବର୍ତ୍ତନ ଦେଖିବାକୁ ମିଳିଛି। ସାଧରଣତଃ ଥାନାକୁ ଯିବା ପାଇଁ ନାଗରିକ ମାନେ ଭୟ କରୁଥିବା ବେଳେ ଧରାକୋଟ ଥାନା ପରିସରକୁ ଛୁଟୁଛି ବର୍ତ୍ତମାନ ନାଗରିକଙ୍କ ସୁଅ। ତେବେ ଥାନାକୁ ଅଭିଯୋଗ ଉଦ୍ଦେଶ୍ୟରେ ନାଇଁ ମନୋରଞ୍ଜନ ଉଦ୍ଦେଶ୍ୟରେ ଯାଉଛନ୍ତି ନାଗରିକ ମାନେ।

ଖବର ମୁତାବକ ଧରାକୋଟ ଥାନାକୁ ପୂର୍ବରୁ ବହୁତ କମ ଅଭିଯୋଗକାରି ଆସୁଥିଲେ।  ତେବେ ପୋଲିସ ଭୟରେ ହେଉ କିମ୍ବା ଅନ୍ୟ କେଉଁ କାରଣରୁ ହେଉ ଜନସାଧାରଣଙ୍କ ବିଶ୍ୱାସଭାଜନ ହେଇପାରୁନଥିଲା ପୋଲିସ। ଶ୍ରୀ ସାହୁ ଉକ୍ତ ବିଷୟକୁ ଗମ୍ଭୀରତାର ସହ ନେଇ ଥାନା ପରିସରରେ ଏକ ଶିଶୁ ଉଦ୍ୟାନ ଏବଂ ମୁକ୍ତାକାଶ ବ୍ୟାୟାମ କେନ୍ଦ୍ର ନିଜ ପ୍ରଚେଷ୍ଟାରେ ପ୍ରତିଷ୍ଠା କରାଇଛନ୍ତି। ଯାହା ଫଳରେ ବର୍ତ୍ତମାନ ପ୍ରତ୍ୟେକ ଦିନ ଥାନାରେ ଜନସାଧାରଣଙ୍କ ଭିଡ଼ ଜମୁଛି। ଛୋଟ ଶିଶୁ ଠୁ ନେଇ ବରିଷ୍ଠ ନାଗରିକମାନେ ନିର୍ଭୟର ସହ ଥାନାକୁ ଆସୁଛନ୍ତି ଏବଂ ନିଜ ଅଭିଯୋଗ ମଧ୍ୟ ପଞ୍ଜିକୃତ କରାଉଛନ୍ତି। ଏତତ ବ୍ୟତୀତ ଥାନା ପରିସରରେ ସୁନ୍ଦର ବଗିଚା, ବ୍ୟାଟମିଣ୍ଟନ କୋର୍ଟ ନିର୍ମାଣ, କାନ୍ଥ ଲିଖନ, ଆଲୋକୀକରଣ ଏବଂ ସୌନ୍ଦ୍ୟର୍ଜକରଣ କରାଇଛନ୍ତି ଉକ୍ତ ଅଧିକାରୀ। ସମଗ୍ର ଗଞ୍ଜାମ ଜିଲ୍ଲାରେ ଆଇଆଇସି ଶ୍ରୀ ସାହୁଙ୍କ ଉକ୍ତ ପଦକ୍ଷେପକୁ ଭୂୟାଁସୀ ପ୍ରଶଂସା କରାଯାଉଛି।

ସୂଚନା ଥାଉକି ଶ୍ରୀ ସାହୁ ଏହା ପୁର୍ବରୁ ଖୋର୍ଦ୍ଧା ଜିଲ୍ଲା ଜଙ୍କିଆ ଥାନା ଏବଂ ନାଚୁଣୀ ଫାଣ୍ଡିରେ ଫାଣ୍ଡି ଅଧିକାରୀ ଭାବେ କାର୍ଯ୍ୟରତ ଥିଲେ। ନାଚୁଣୀ ଫାଣ୍ଡିକୁ ଏକ ଆଦର୍ଶ ଫାଣ୍ଡି ଭାବେ ଗଢ଼ିତୋଳିଥିବା ହେତୁ ସେ ତତ୍କାଳୀନ ଖୋର୍ଦ୍ଧା ଏସପିଙ୍କୁ ଠାରୁ ପ୍ରଶଂସାପତ୍ର ମଧ୍ୟ ପାଇଥିଲେ। ତେବେ ଧରାକୋଟ ଥାନାରେ ଜନତା ଏବଂ ପୋଲିସ ମଧ୍ୟରେ ସମ୍ପର୍କ ବଢାଇବା ସହ ଆଇଆଇସି ଜନତାଙ୍କ ଆସ୍ଥାଭାଜନ ହେଉଥିବାର ପରିଲକ୍ଷିତ ହେଉଛି।