Categories
ଆଜିର ଖବର

ଟାଙ୍ଗୀ: ନକଲି ପୋଲିସ ଅଧିକାରୀକୁ ଗିରଫ କଲା କୁହୁଡି ଫାଣ୍ଡି ପୋଲିସ

ସୀତାରାମ ଅଗ୍ରୱାଲ

ଟାଙ୍ଗୀ: ଗାଡ଼ି ଚାଳକ ମାନଙ୍କଠାରୁ ଦାଦାବଟି ଆଦାୟ କରି ଜଣେ ନକଲି ପୋଲିସ ଗିରଫ ହୋଇଛନ୍ତି। ଟାଙ୍ଗୀ ଥାନା କୁହୁଡି ଫାଣ୍ଡି ଅଞ୍ଚଳରେ ଏଭଳି ଏକ ଘଟଣା ଘଟିଯାଇଛି।

ଫାଣ୍ଡି ଅଧିକାରୀ ନିରଞ୍ଜନ ରାଉତଙ୍କ ସୂଚନା ମୁତାବକ ଆଜି ସଂନ୍ଧ୍ୟାରେ ୧୬ ନମ୍ବର ଜାତୀୟ ରାଜପଥ କୟଥପଲା ଛକ ନିକଟରେ ଜଣେ ଯୁବକ ନିଜକୁ ପୋଲିସ ଇନ୍ସପେକ୍ଟର ପରିଚୟ ଦେଇ ବିଭିନ୍ନ ଅଟୋ ଏବଂ ଗାଡ଼ି ଚାଳକଙ୍କୁ ଅଟକାଇ ୫୦୦ ଟଙ୍କା ଲେଖାଏଁ ଦାଦାବଟି ଆଦାୟ କରୁଥିଲେ। ସେଥିରୁ ଜଣେ ଗାଡ଼ିଚାଳକଙ୍କର ସନ୍ଦେହ ହେବାରୁ ସେ ସମ୍ପୃକ୍ତ ବ୍ୟକ୍ତିଙ୍କୁ ପୋଲିସ ସମ୍ବନ୍ଧୀୟ ଏକାଧିକ ପ୍ରଶ୍ନ ପଚାରିଥିଲେ। କିନ୍ତୁ ସମ୍ପୃକ୍ତ ଯୁବକଜଣଙ୍କ ଉତ୍ତର ଦେବାକୁ ବିଫଳ ହେବାରୁ ସ୍ଥାନୀୟ ଜନସାଧାରଣ ମାନେ ତାଙ୍କୁ ଅଟକ ରଖି ତୁରନ୍ତ କୁହୁଡି ଫାଣ୍ଡି ଅଧିକାରୀଙ୍କୁ ଜଣାଇଥିଲେ।

ଫାଣ୍ଡି ଅଧିକାରୀ ଘଟଣାସ୍ଥଳରେ ପହଁଚି ତଦନ୍ତ କରିବାରୁ ଯୁବକ ଜଣକ ନକଲି ପୋଲିସ ଅଧିକାରୀ ବୋଲି ଜାଣିପାରିଥିଲେ। ଯୁବକଙ୍କ ନାମ ସନ୍ତୋଷ ବିଶ୍ୱାଳ(୩୫) ଏବଂ ତାଙ୍କ ଘର ଗଞ୍ଜାମ ଜିଲ୍ଲା ଶେରଗଡ ଅଞ୍ଚଳରେ। ନିକଟରେ ସେ ଏକ ଅପରାଧିକ ମାମଲାରେ ଜଡିତ ଥାଇ ଶେରଗଡ଼ ଜେଲ ଯାଇ ଜାମିନ ରେ ଆସିଥିବାର ଫାଣ୍ଡି ଅଧିକାରୀ କହିଛନ୍ତି।

ଏ ନେଇ ସ୍ଥାନୀୟ ଜନସାଧାରଣ ଏକ ଲିଖିତ ଅଭିଯୋଗ ଦେବାରୁ ଟାଙ୍ଗୀ ଥାନାରେ କେସ ନମ୍ବର ୨୪୯/୨୧ ରେ ଏକ ମାମଲା ରୁଜୁ କରାଯାଇ ତଦନ୍ତ ଜାରି ରହିଛି ବୋଲି ଫାଣ୍ଡି ଅଧିକାରୀ ଶ୍ରୀ ରାଉତ ସୂଚନା ଦେଇଛନ୍ତ।

Categories
ଅପରାଧ ଆଜିର ଖବର ରାଜ୍ୟ ଖବର

ଦୁଇ ନକଲି ପୋଲିସ ଅଧିକାରୀ ଗିରଫ: ଡକାୟତୀ ଉଦ୍ୟମ ପଣ୍ଡ, ପୋଲିସ ପୋଷାକ ଅସ୍ତ୍ରଶସ୍ତ୍ର ଜବତ

କନ୍ଧମାଳ: କନ୍ଧମାଳ ଜିଲ୍ଲା ବାଲିଗୁଡା ଥାନା ପୋଲିସ ରାତ୍ରୀକାଳୀନ ପାଟ୍ରୋଲିଙ୍ଗ ବେଳେ ଡକାୟତୀ ଉଦ୍ୟମ କରୁଥିବା କଟକ ଅଂଚଳର ଦୁଇଜଣ ନକଲି ପୋଲିସ ଅଧିକାରୀଙ୍କୁ ଗିରଫ କରିଛି। ସେମାନଙ୍କଠାରୁ ପୋଲିସ ପୋଷାକ ସମେତ ନକଲି ପିସ୍ତଲ ଏବଂ ଅନ୍ୟାନ୍ୟ ମାରଣାସ୍ତ୍ର ଜବତ କରିଛି।

ସୂଚନା ଅନୁସାରେ ଶୁକ୍ରବାର ରାତିରେ ପୋଲିସ ପାଟ୍ରୋଲିଙ୍ଗ ବେଳେ ବାଲିଗୁଡା ଥାନା ପୋଲିସ ବାଲିଗୁଡା ଖଡଗ ନଦୀ ନିକଟରେ କିଛି ସନ୍ଦିଗ୍ଧ ଲୋକଙ୍କୁ ଦେଖିବାପରେ ସେମାନଙ୍କ ପିଛାକରିଥିଲା। ପୋଲିସକୁ ଦେଖି ସେମାନେ ସେଠାରୁ ଦୌଡି ପଳାଇବାକୁ ଚେଷ୍ଟା କରିବାବେଳେ ପୋଲିସ ସେମାନଙ୍କୁ କାବୁ କରିଥିଲା। ସେମାନେ ପୋଲିସ ଏସ.ଆଇ ପୋଷାକରେ ନିଜକୁ ସଜାଇ ସ୍ଥାନୀୟ କିଛି ଲୋକଙ୍କ ସହଯୋଗରେ ସେହି ବାଟ ଦେଇ ଯାଉଥିବା ଲୋକଙ୍କଠାରୁ ଡକାୟତୀ କରିବାକୁ ମସୁଧା କରୁଥିଲେ।

ପୋଲିସ ସେମାନଙ୍କୁ ଗିରଫ କରିବା ସହିତ ସେମାନଙ୍କଠାରୁ ନକଲି ପୋଲିସ ପୋଷାକ, ଗୋଟିଏ ମାରୁତୀ ସ୍ୱିଫଟ୍ ଡିଜାୟାର(ଓଡି-୦୫-୬୮୬୬), ଲୁହା ରଡ, ନକଲି ପିସ୍ତଲ, ପୋଲିସ ଟୋପି ସମେତ ବିଭିନ୍ନ ମାରଣାସ୍ତ୍ର ଜବତ କରିଛି।

ତେବେ ଘଟଣା ସ୍ଥଳରୁ ଆଉ ୩ ଜଣ ଫେରାର ହୋଇଯାଇଛନ୍ତି। ଗିରଫ ଅଭିଯୁକ୍ତ ମାନେ କଟକ ଜିଲ୍ଲା ଚଣ୍ଡି ଛକ ଅଂଚଳର ବୋଲି ଜଣାପଡିଛି। ପୋଲିସ ଏହି ସଂକ୍ରାନ୍ତରେ ଏକ ମାମଲା ୪୬/୨୧ ରୁଜ୍ଜୁ କରି ସେମାନଙ୍କୁ କୋର୍ଟ ଚାଲାଣ କରିଥିବା ଜଣାପଡିଛି।