Tag: ନରେନ୍ଦ୍ର ମୋଦୀ

ନୂଆଦିଲ୍ଲୀ: କାଶୀ ବିଶ୍ୱନାଥ ମନ୍ଦିରର ପୂର୍ବତନ ମହନ୍ତ ଡ. କୁଳପତି ତିୱାରୀଙ୍କ ନିଧନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗଭୀର ଶୋକ ପ୍ରକାଶ କରିଛନ୍ତି।

ଏକ୍ସରେ ପ୍ରଧାନମନ୍ତ୍ରୀ ପୋଷ୍ଟ କରିଛନ୍ତି:

“କାଶୀ ବିଶ୍ୱନାଥ ମନ୍ଦିରର ପୂର୍ବତନ ମହନ୍ତ ଡା. କୁଳପତି ତିୱାରୀଙ୍କ ପରଲୋକର ଦୁଃଖଦ ଖବର ପ୍ରାପ୍ତ ହେଲି। ଡା.କୁଳପତି ଜୀ ଦୀର୍ଘଦିନ ଧରି ଅନନ୍ୟ ଭାବରେ ବାବା ବିଶ୍ୱନାଥଙ୍କ ସେବା କରୁଥିଲେ ଏବଂ ଆଜି ବାବାଙ୍କ ଚରଣରେ ଲୀନ ହୋଇଯାଇଛନ୍ତି। ତାଙ୍କର ଶିବଲୋକ୍ୱନ କାଶୀ ପାଇଁ ଏକ ଅପୂରଣୀୟ କ୍ଷତି”।

ନୂଆଦିଲ୍ଲୀ: ଜରୁରୀକାଳୀନ ସ୍ଥିତି ଏବଂ ସେ ସମୟରେ ହୋଇଥିବା ଅତ୍ୟଧିକ ବଳପ୍ରୟୋଗକୁ ମାନ୍ୟବର ଲୋକସଭା ବାଚସ୍ପତି ନିନ୍ଦା କରିଥିବାରୁ ଏହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରଶଂସା କରିଛନ୍ତି।

ଶ୍ରୀ ମୋଦୀ ଏକ୍ସରେ କରିଥିବା ପୋଷ୍ଟରେ ଲେଖିଛନ୍ତି:

“ମୁଁ ଖୁସି ଯେ ମାନ୍ୟବର ବାଚସ୍ପତି ଜରୁରୀକାଳୀନ ସ୍ଥିତିକୁ ଦୃଢ଼ତାର ସହ ନିନ୍ଦା କରିଛନ୍ତି, ସେ ସମୟରେ ହୋଇଥିବା ଅତ୍ୟଧିକ ବଳପ୍ରୟୋଗକୁ ଗୁରୁତ୍ୱ ଦେଇଛନ୍ତି ଏବଂ କିପରି ଗଣତନ୍ତ୍ରକୁ ଦଳିମକଚି ଦିଆଯାଇଥିଲା ତାହା ଉଲ୍ଲେଖ କରିଛନ୍ତି। ସେ ସମୟରେ ପ୍ରଭାବିତ ହୋଇଥିବା ଲୋକମାନଙ୍କ ସମ୍ମାନରେ ନିରବତାର ସହ ଦଣ୍ଡାୟମାନ ହେବା ମଧ୍ୟ ଏଭ ଅଦ୍ଭୁତ ଭାବନା ଆଣିଛି।

ଜରୁରୀକାଳୀନ ସ୍ଥିତି ଆଜିକୁ ୫୦ ବର୍ଷ ତଳେ ଲାଗୁ ହୋଇଥିଲା, କିନ୍ତୁ ଆଜିର ଯୁବପିଢ଼ି ଏ ସମ୍ପର୍କରେ ଜାଣିବା ଜରୁରୀ, କାରଣ ସମ୍ବିଧାନକୁ ଦଳିମକଚି ଦେଲେ, ଜନସାଧାରଣଙ୍କ ମତକୁ ଚାପିଦିଆଗଲେ, ସଂସ୍ଥାଗତ ଢାଞ୍ଚାକୁ ନଷ୍ଟ କରିଦିଆଗଲେ କ’ଣ ହୁଏ ଏହା ତାହାର ଉପଯୁକ୍ତ ଉଦାହରଣ। ଏକଛତ୍ରବାଦ କ’ଣ ତାହା ଜରୁରୀକାଳୀନ ସ୍ଥିତି ସମୟରେ ହୋଇଥିବା ଘଟଣାରୁ ଜଣାପଡ଼େ”।

ଦିଲ୍ଲୀ: ବାଂଲାଦେଶ ପ୍ରଧାନମନ୍ତ୍ରୀ ଶେଖ୍ ହସିନା ଭାରତ ଗସ୍ତରେ ଆସୁଛନ୍ତି। ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଏକ ପ୍ରେସ ବାର୍ତ୍ତା କରିଛନ୍ତି। ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପ୍ରେସ ବାର୍ତ୍ତାରେ ବାଂଲାଦେଶ ପ୍ରଧାନମନ୍ତ୍ରୀ ଏବଂ ତାଙ୍କ ପ୍ରତିନିଧି ଦଳ ଉଦ୍ଦେଶ୍ୟରେ କଣ କହିଲେ ଆସନ୍ତୁ ଜାଣିବା।

ପ୍ରଧାନମନ୍ତ୍ରୀ ଶେଖ୍ ହସିନା ଜୀ ଏବଂ ତାଙ୍କପ୍ରତିନିଧି ଦଳକୁ ମୁଁ ହାର୍ଦ୍ଦିକ ସ୍ୱାଗତ ଜଣାଉଛି। ପ୍ରାୟ ଗତ ଏକ ବର୍ଷ ମଧ୍ୟରେ ଆମେ ୧୦ ଥର ସାକ୍ଷାତ କରିଛୁ। କିନ୍ତୁ ଆଜିର ବୈଠକ ହେଉଛି ସ୍ୱତନ୍ତ୍ର। କାରଣ ଆମ ସରକାରର ତୃତୀୟ ପାଳିରେ ପ୍ରଧାନମନ୍ତ୍ରୀ ଶେଖ୍ ହସିନା ଜୀ ଆମର ପ୍ରଥମ ରାଷ୍ଟ୍ର ଅତିଥି।

ବାଂଲାଦେଶ ଆମର ‘ପଡୋଶୀ ପ୍ରଥମ’ ନୀତି, ଆକ୍ଟ ଇଷ୍ଟ ନୀତି, ଭିଜନ ସାଗର ଏବଂ ଇଣ୍ଡୋ – ପାସିଫିକ୍ ଭିଜନ ସଙ୍ଗମ ସ୍ଥଳରେ ଅବସ୍ଥିତ । ଗତ ଏକ ବର୍ଷ ମଧ୍ୟରେ ଆମେ ଜନକଲ୍ୟାଣର ଅନେକ ଗୁରୁତ୍ୱପୂର୍ଣ୍ଣ ପ୍ରକଳ୍ପକୁ ଏକାଠି ସମ୍ପୂର୍ଣ୍ଣ କରିଛୁ । ଭାରତ ଓ ବାଂଲାଦେଶ ମଧ୍ୟରେ ଷଷ୍ଠ ସୀମାପାର ରେଳସଂଯୋଗ ଅଖାଉରା – ଅଗରତାଲା ମଧ୍ୟରେ ଆରମ୍ଭ ହୋଇଛି । ଖୁଲଣା – ମଙ୍ଗଳା ବନ୍ଦର ଦ୍ୱାରା ଭାରତର ଉତ୍ତର – ପୂର୍ବ ରାଜ୍ୟଗୁଡ଼ିକ ପାଇଁ କାର୍ଗୋ ସୁବିଧା ଆରମ୍ଭ ହୋଇଛି । ମଙ୍ଗଳା ବନ୍ଦରକୁ ପ୍ରଥମ ଥର ପାଇଁ ରେଳ ଯୋଗେ ସଂଯୋଗ କରାଯାଇଛି ।

୧୩୨୦ ମେଗାୱାଟ ମୈତ୍ରୀ ଥର୍ମାଲ ପାୱାର ପ୍ଲାଣ୍ଟର ଉଭୟ ୟୁନିଟ୍ ବିଦ୍ୟୁତ ଉତ୍ପାଦନ ଆରମ୍ଭ କରିଛନ୍ତି । ଦୁଇ ଦେଶ ମଧ୍ୟରେ ଭାରତୀୟ ଟଙ୍କାରେ ବାଣିଜ୍ୟ ଆରମ୍ଭ ହୋଇଛି । ଭାରତ ଓ ବାଂଲାଦେଶ ମଧ୍ୟରେ ଗଙ୍ଗା ନଦୀରେ ବିଶ୍ୱର ସବୁଠାରୁ ଲମ୍ବା ରିଭର କ୍ରୁଜ୍ ସଫଳତାର ସହ ସମ୍ପନ୍ନ ହୋଇଛି । ଭାରତ ଓ ବାଂଲାଦେଶ ମଧ୍ୟରେ ପ୍ରଥମ ସୀମାପାର ବନ୍ଧୁତା ପାଇପ୍ ଲାଇନ ସମ୍ପୂର୍ଣ୍ଣ ହୋଇଛି । ଭାରତୀୟ ଗ୍ରିଡ୍ ଦେଇ ନେପାଳରୁ ବାଂଲାଦେଶକୁ ବିଦ୍ୟୁତ୍ ରପ୍ତାନି ଶକ୍ତି କ୍ଷେତ୍ରରେ ଉପ – ଆଞ୍ଚଳିକ ସହଯୋଗର ପ୍ରଥମ ଉଦାହରଣ ପାଲଟିଛି । ଗୋଟିଏ ବର୍ଷରେ, ଏତେ ସଂଖ୍ୟକ ଅଞ୍ଚଳରେ ଏତେ ପରିମାଣର ପଦକ୍ଷେପ କାର୍ଯ୍ୟକାରୀ ହେବା ଆମ ସମ୍ପର୍କର ଗତି ଓ ବ୍ୟାପକତାକୁ ଦର୍ଶାଉଛି ।

ଆଜି ଆମେ ନୂତନ କ୍ଷେତ୍ରରେ ସହଯୋଗ ପାଇଁ ଏକ ଭବିଷ୍ୟତ ଦୃଷ୍ଟିକୋଣ ପ୍ରସ୍ତୁତ କରିଛୁ । ସବୁଜ ଭାଗିଦାରୀ, ଡିଜିଟାଲ ଭାଗିଦାରୀ, ସବୁଜ ଅର୍ଥନୀତି, ମହାକାଶ ଭଳି ଅନେକ କ୍ଷେତ୍ରରେ ସହଯୋଗ ପାଇଁ ହୋଇଥିବା ଚୁକ୍ତି ଦ୍ୱାରା ଉଭୟ ଦେଶର ଯୁବବର୍ଗ ଉପକୃତ ହେବେ । ଭାରତ – ବାଂଲାଦେଶ ‘ମୈତ୍ରୀ ସାଟେଲାଇଟ୍‌’ ଆମ ସମ୍ପର୍କକୁ ନୂଆ ଉଚ୍ଚତାକୁ ନେଇଯିବ । ଯୋଗାଯୋଗ, ବାଣିଜ୍ୟ ଏବଂ ସହଯୋଗ ଉପରେ ଆମେ ଲକ୍ଷ୍ୟ କେନ୍ଦ୍ରୀଭୂତ କରୁଛୁ । ଗତ ୧୦ ବର୍ଷ ମଧ୍ୟରେ ଆମେ ୧୯୬୫ ପୂର୍ବରୁ ଥିବା  ଯୋଗାଯୋଗକୁ ପୁନରୁଦ୍ଧାର କରିଛୁ । ଆମେ ବର୍ତ୍ତମାନ ଅଧିକ ଡିଜିଟାଲ ଏବଂ ଶକ୍ତି ସଂଯୋଗ ଉପରେ ଧ୍ୟାନ ଦେବୁ । ଏହାଦ୍ୱାରା ଉଭୟ ଦେଶର ଅର୍ଥନୀତିକୁ ପ୍ରୋତ୍ସାହନ ମିଳିବ । ଆମର ଅର୍ଥନୈତିକ ସମ୍ପର୍କକୁ ନୂତନ ଉଚ୍ଚତାକୁ ନେବା  ପାଇଁ ଉଭୟ ପକ୍ଷ ସିଇପିଏ (ସିପା) ଉପରେ ଆଲୋଚନା ଆରମ୍ଭ କରିବାକୁ ରାଜି  ହୋଇଛନ୍ତି । ବାଂଲାଦେଶର ସିରାଜଗଞ୍ଜ ଠାରେ ଏକ ଆଭ୍ୟନ୍ତରୀଣ କଣ୍ଟେନର ଡିପୋ ନିର୍ମାଣକୁ ଭାରତ ସମର୍ଥନ ଦେବ ।

ଭାରତ ଓ ବାଂଲାଦେଶକୁ ୫୪ଟି ନଦୀ ସଂଯୋଗ କରିଥାଏ । ବନ୍ୟା ପରିଚାଳନା, ଆଗୁଆ ଚେତାବନୀ ଏବଂ ପାନୀୟ ଜଳ ପ୍ରକଳ୍ପରେ ଆମେ ସହଯୋଗ କରି ଆସୁଛୁ । ୧୯୯୬ରେ ହୋଇଥିବା ଗଙ୍ଗା ଜଳ ଚୁକ୍ତିର ନବୀକରଣ ପାଇଁ ଆମେ ବୈଷୟିକ ସ୍ତରରେ ଆଲୋଚନା ଆରମ୍ଭ କରିବାକୁ ନିଷ୍ପତ୍ତି ନେଇଛୁ । ବାଂଲାଦେଶର ତିସ୍ତା ନଦୀର ସଂରକ୍ଷଣ ଓ ପରିଚାଳନା ନେଇ ଏକ ବୈଷୟିକ ଗୋଷ୍ଠୀ ଖୁବ୍ ଶୀଘ୍ର ବାଂଲାଦେଶ ଗସ୍ତ କରିବ।

ପ୍ରତିରକ୍ଷା ଉତ୍ପାଦନ ଠାରୁ ଆରମ୍ଭ କରି ସଶସ୍ତ୍ର ବାହିନୀର ଆଧୁନିକୀକରଣ ପର୍ଯ୍ୟନ୍ତ ପ୍ରତିରକ୍ଷା ସହଯୋଗକୁ ଆହୁରି ସୁଦୃଢ଼ କରିବା ପାଇଁ ଆମେ ବିସ୍ତୃତ ଆଲୋଚନା କରିଥିଲୁ । ଆତଙ୍କବାଦ ମୁକାବିଲା, ଉଗ୍ରବାଦ ଏବଂ ସୀମାର ଶାନ୍ତିପୂର୍ଣ୍ଣ ପରିଚାଳନା ଉପରେ ଆମର ସମ୍ପର୍କକୁ ସୁଦୃଢ଼ କରିବାକୁ ଆମେ ନିଷ୍ପତ୍ତି ନେଇଛୁ । ଭାରତ ମହାସାଗର ଅଞ୍ଚଳ ପାଇଁ ମଧ୍ୟ ଆମର ସମାନ ଦୃଷ୍ଟିକୋଣ ରହିଛି । ଭାରତ – ପ୍ରଶାନ୍ତ ମହାସାଗର ପଦକ୍ଷେପରେ ସାମିଲ ହେବା ପାଇଁ ବାଂଲାଦେଶର ନିଷ୍ପତ୍ତିକୁ ଆମେ ସ୍ୱାଗତ କରୁଛୁ । ବିମ୍‌ଷ୍ଟେକ ସମେତ ଅନ୍ୟ ଆଞ୍ଚଳିକ ଏବଂ ଅନ୍ତର୍ଜାତୀୟ ମଞ୍ଚରେ ମଧ୍ୟ ଆମେ ଆମର ସହଯୋଗ ଜାରି ରଖିବୁ ।

ଆମର ମିଳିତ ସଂସ୍କୃତି ଏବଂ ଲୋକମାନଙ୍କ ମଧ୍ୟରେ ସ୍ଫୁର୍ତ୍ତିଶୀଳ ଭାବବିନିମୟ ହେଉଛି ଆମ ସମ୍ପର୍କର ମୂଳଦୁଆ । ଆମେ ବୃତ୍ତି, ପ୍ରଶିକ୍ଷଣ ଏବଂ ଦକ୍ଷତା ବୃଦ୍ଧି କରିବାକୁ ନିଷ୍ପତ୍ତି ନେଇଛୁ । ଚିକିତ୍ସା ପାଇଁ ବାଂଲାଦେଶରୁ ଭାରତକୁ ଆସୁଥିବା ଲୋକମାନଙ୍କ ପାଇଁ ଭାରତ ଇ – ମେଡିକାଲ ଭିସା ସୁବିଧା ଆରମ୍ଭ କରିବ । ବାଂଲାଦେଶର ଉତ୍ତର – ପଶ୍ଚିମ ଅଞ୍ଚଳର ଲୋକଙ୍କ ସୁବିଧା ପାଇଁ ଆମେ ରଙ୍ଗପୁରରେ ଏକ ନୂତନ ଆସିଷ୍ଟାଣ୍ଟ ହାଇକମିଶନ ଖୋଲିବାକୁ ନିଷ୍ପତ୍ତି ନେଇଛୁ । ଆଜି ସନ୍ଧ୍ୟାରେ ଖେଳାଯିବାକୁ ଥିବା କ୍ରିକେଟ ୍ ବିଶ୍ୱକପ୍ ମ୍ୟାଚ୍ ପାଇଁ ମୁଁ ଉଭୟ ଦଳକୁ ଶୁଭେଚ୍ଛା ଜଣାଉଛି ।

ବାଂଲାଦେଶ ହେଉଛ ଭାରତର ବୃହତ୍ତମ ବିକାଶ ସହଯୋଗୀ ଏବଂ ଆମେ ବାଂଲାଦେଶ ସହ ଆମର ସମ୍ପର୍କକୁ ଉଚ୍ଚ ପ୍ରାଥମିକତା ଦେଉଛୁ । ବଙ୍ଗବନ୍ଧୁଙ୍କର ଏକ ସ୍ଥିର, ସମୃଦ୍ଧ ଏବଂ ପ୍ରଗତିଶୀଳ ବାଂଲାଦେଶର ସ୍ୱପ୍ନକୁ ସାକାର କରିବା ପାଇଁ ମୁଁ ଭାରତର ପ୍ରତିବଦ୍ଧତାକୁ ଦୋହରାଉଛି । ୨୦୨୬ରେ ବାଂଲାଦେଶ ବିକାଶଶୀଳ ରାଷ୍ଟ୍ର ହେବାକୁ ଯାଉଛି । “ସୋନାର ବଙ୍ଗଳା”କୁ ନେତୃତ୍ୱ ଦେଇଥିବାରୁ ମୁଁ ପ୍ରଧାନମନ୍ତ୍ରୀ ଶେଖ୍ ହସିନାଙ୍କୁ ଅଭିନନ୍ଦନ ଜଣାଉଛି ।ମୋର ବିଶ୍ୱାସ ଯେ ଆମେ ସମସ୍ତେ ମିଶି ‘ ବିକଶିତ ଭାରତ ୨୦୪୭’ ଏବଂ ‘ସ୍ମାର୍ଟ ବାଂଲାଦେଶ ୨୦୪୧’ର ସଂକଳ୍ପକୁ ବାସ୍ତବ ରୂପ ଦେବୁ।

ନୂଆଦିଲ୍ଲୀ: ଜାମ୍ମୁ କାଶ୍ମୀରର ଶ୍ରୀନଗର ସ୍ଥିତ ଡାଲ ହ୍ରଦରେ ଅନ୍ତର୍ଜାତୀୟ ଯୋଗ ଦିବସ ଅବସରରେ ଯୋଗ ପ୍ରେମୀଙ୍କ ସହ ଉଠାଇଥିବା ସେଲଫିକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶେୟାର କରିଛନ୍ତି।

ପ୍ରଧାନମନ୍ତ୍ରୀ ଏକ୍ସରେ ପୋଷ୍ଟ କରିଛନ୍ତି:

“ଶ୍ରୀନଗରରେ ଯୋଗ ସେଲଫି ପୋଷ୍ଟ କଲି! ଡାଲ ହ୍ରଦରେ ଥିବା ଉତ୍ସାହର ତୁଳନା ନାହିଁ।’’

ନୂଆଦିଲ୍ଲୀ: ବୈଦେଶିକ ବ୍ୟାପାର ସଦନ କମିଟିର ଅଧ୍ୟକ୍ଷ ମାଇକେଲ୍‌ ମ୍ୟାକକଲ୍‌ଙ୍କ ନେତୃତ୍ୱରେ ସାତ ଜଣିଆ ସଦସ୍ୟ ବିଶିଷ୍ଟ ଆମେରିକୀୟ କଂଗ୍ରେସର ପ୍ରତିନିଧି ଦଳ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସାକ୍ଷାତ କରିଛି।

ପ୍ରତିନିଧି ଦଳର ଅନ୍ୟ ସଦସ୍ୟମାନଙ୍କ ମଧ୍ୟରେ ନେନ୍ସି ପାଲୋସୀ, ପ୍ରତିନିଧି ଗ୍ରେଗରୀ ମିକ୍ସ, ପ୍ରତିନିଧି ମେରିଏନେଟ୍‌ ମିଲର-ମିକ୍ସ, ପ୍ରତିନିଧି ନିକୋଲ ମ୍ୟାଲିୟୋଟାକିସ, ପ୍ରତିନିଧି ଅମରୀଶ ବାବୁଲାଲ ‘‘ଅମୀ ବେରା’’ ଏବଂ ପ୍ରତିନିଧି ଜିମ୍‌ ମ୍ୟାକଗବର୍ଣ୍ଣ ସାମିଲ ଥିଲେ।

ପ୍ରତିନିଧି ଦଳର ସଦସ୍ୟମାନେ ପ୍ରଧାନମନ୍ତ୍ରୀ ମୋଦୀଙ୍କୁ ତୃତୀୟ ଥର ଲଗାତାର ଐତିହାସିକ ଭାବେ ନିର୍ବାଚିତ ହେବା ପାଇଁ ଶୁଭେଚ୍ଛା ଜଣାଇଥିଲେ।

ସେମାନେ ଭାରତରେ ନିକଟରେ ଅନୁଷ୍ଠିତ ହୋଇଥିବା ସବୁଠୁ ବଡ଼ ଗଣତାନ୍ତ୍ରିକ ପ୍ରକ୍ରିୟାର ବ୍ୟାପକତା, ନିରପେକ୍ଷତା ଓ ପାରଦର୍ଶିତାକୁ ଗଭୀର ଭାବେ ପ୍ରଶଂସା କରିଥିଲେ।

ପ୍ରତିନିଧି ଦଳ ଭାରତ-ଆମେରିକା ସମ୍ପର୍କକୁ ସବୁଠୁ ଗୁରୁତ୍ୱପୂର୍ଣ୍ଣ ବୋଲି ଅଭିହିତ କରିବା ସହିତ ବ୍ୟବସାୟ, ନୂଆ ଓ ଉଦୀୟମାନ ପ୍ରଯୁକ୍ତି, ପ୍ରତିରକ୍ଷା, ନାଗରିକ ସମ୍ପର୍କ ସମେତ ସବୁ କ୍ଷେତ୍ରରେ ବ୍ୟାପକ ରଣନୀତିକ ବୈଶ୍ୱିକ ଭାଗିଦାରୀକୁ ଆହୁରି ଗଭୀର କରିବା ଉପରେ ସେମାନଙ୍କର ଦୃଢ଼ ସମର୍ଥନ ବ୍ୟକ୍ତ କରିଥିଲେ।

ଭାରତ-ଆମେରିକା ସମ୍ପର୍କକୁ ଆଗକୁ ବଢ଼ାଇବାରେ ଆମେରିକା କଂଗ୍ରେସର ଲଗାତାର ଓ ଦ୍ୱିପାକ୍ଷିକ ସମର୍ଥନ ଦ୍ୱାରା ନିର୍ବାହ କରାଯାଇଥିବା ଗୁରୁତ୍ୱପୂର୍ଣ୍ଣ ଭୂମିକା ଉପରେ ପ୍ରଧାନମନ୍ତ୍ରୀ ଆଲୋକପାତ କରିଥିଲେ। ଏହା ସହଭାଗୀ ଗଣତାନ୍ତ୍ରିକ ମୂଲ୍ୟବୋଧ, ଆଇନର ଶାସନ ପ୍ରତି ସମ୍ମାନ ଓ ନାଗରିକଙ୍କ ମଧ୍ୟରେ ମଜବୁତ ସମ୍ପର୍କ ଉପରେ ଆଧାରିତ। ସେ ବିଶ୍ୱ କଲ୍ୟାଣ ପାଇଁ ଦ୍ୱିପାକ୍ଷିକ ସମ୍ପର୍କକୁ ଆହୁରି ମଜବୁତ କରିବାର ପ୍ରତିବଦ୍ଧତାକୁ ଦୋହରାଇଥିଲେ।

ପ୍ରଧାନମନ୍ତ୍ରୀ ବିଗତ ବର୍ଷ ଜୁନ ମାସରେ ଆମେରିକାକୁ ନିଜର ସରକାରୀ ଗସ୍ତ ସମୟରେ ଦ୍ୱିତୀୟ ଥର ପାଇଁ ଆମେରିକୀୟ କଂଗ୍ରେସର ମିଳିତ ଅଧିବେଶନକୁ ସମ୍ବୋଧିତ କରିବାର ସୁଯୋଗ ମିଳିବା ଘଟଣାର ସ୍ମରଣ କରିଥିଲେ।

ନୂଆଦିଲ୍ଲୀ: ବିଶ୍ୱ ସିକଲ୍ ସେଲ୍ ଦିବସ ୨୦୨୪ ପାଳନ ଅବସରରେ ଆଦିବାସୀ ବ୍ୟାପାର ମନ୍ତ୍ରଣାଳୟ ଏବଂ ଏହାର ବୌଦ୍ଧିକ ସହଯୋଗୀ ଦିଲ୍ଲୀ ଏମ୍ସର ବିର୍ସା ମୁଣ୍ଡା କେନ୍ଦ୍ର ପକ୍ଷରୁ ନୂଆଦିଲ୍ଲୀଠାରେ ରକ୍ତ ଶିକୁଳି ରୋଗ ବା ସିକଲ୍ ସେଲ୍ ଡିଜିଜ୍ (ଏସସିଡି) ଉପରେ ସଚେତନତା ସୃଷ୍ଟି ପାଇଁ ଏକ ଜାତୀୟ ସମ୍ମିଳନୀ ଆୟୋଜନ କରାଯାଇଛି। ଏହି ରୋଗ ସମ୍ପର୍କରେ ସଚେତନତା ସୃଷ୍ଟି କରିବା ଏବଂ ଏସସିଡିର ଆନ୍ତର୍ଜାତିକ ସଂକ୍ରମଣକୁ ରୋକିବା ପାଇଁ କାର୍ଯ୍ୟକ୍ରମରେ ବିଶେଷଜ୍ଞଙ୍କ ଏକ ଗୋଷ୍ଠୀ ଏକାଠି ହୋଇଥିଲେ। ଏଥିରେ କେନ୍ଦ୍ର ଆଦିବାସୀ ବ୍ୟାପାର ମନ୍ତ୍ରୀ ଜୁଏଲ ଓରାମ ଓ ଆଦିବାସୀ ବ୍ୟାପାର ରାଷ୍ଟ୍ରମନ୍ତ୍ରୀ ଡି.ଡି.ଉଇକେ ଉପସ୍ଥିତ ଥିଲେ।

ଏହି ଦିବସରେ ଦେଶର ୧୭ଟି ରାଜ୍ୟର ୩୪୦ରୁ ଅଧିକ ଉଚ୍ଚ ଏସସିଡି-ସଂକ୍ରମଣ ଥିବା ଜିଲ୍ଲାରେ ୨ ସପ୍ତାହ ବ୍ୟାପୀ ସଚେତନତା ସୃଷ୍ଟି ଏବଂ ସ୍କ୍ରିନିଂ ଅଭିଯାନର ଶୁଭାରମ୍ଭ କରାଯାଇଥିଲା। ଏହି ଅଭିଯାନର ପ୍ରଥମ ଦିନରେ, ପ୍ରାୟ ୧୫,୦୦୦ ସ୍ୱାସ୍ଥ୍ୟ ଶିବିର ସମେତ ବିଭିନ୍ନ ରାଜ୍ୟରେ ୨୫,୦୦୦ରୁ ଅଧିକ କାର୍ଯ୍ୟକ୍ରମ ଆୟୋଜନ କରାଯାଇଥିଲା ଯେଉଁଥିରେ ପାଖାପାଖି ୧୧ ଲକ୍ଷ ଲୋକ ଅଂଶଗ୍ରହଣ କରିଥିଲେ। ଏହି ବିଶାଳ ଅଭିଯାନରେ ପାଖାପାଖି ୪.୬ ଲକ୍ଷ ଲୋକଙ୍କୁ କାଉନସେଲିଂ କରାଯାଇଥିଲା, ପ୍ରାୟ ୧.୫୩ ଲକ୍ଷ ଲୋକଙ୍କର ସ୍କ୍ରିନିଂ କରାଯାଇଥିଲା ଏବଂ ୧.୬୪ ଲକ୍ଷରୁ ଅଧିକ ଏସସିଡି କାର୍ଡ ବଣ୍ଟନ କରାଯାଇଥିଲା।

ସମ୍ମିଳନୀର ଉଦଘାଟନୀ ଅଧିବେଶନ ପରେ ଗଣମାଧ୍ୟମକୁ ସମ୍ବୋଧିତ କରି ଶ୍ରୀ ଓରାମ ଆଶ୍ୱାସନା ଦେଇଥିଲେ ଯେ ତୃଣମୂଳ ସ୍ତରରେ ସମନ୍ୱିତ ପ୍ରୟାସ ମାଧ୍ୟମରେ ଦେଶବ୍ୟାପୀ ସଚେତନତା ସୃଷ୍ଟି ଏବଂ ସ୍କ୍ରିନିଂ ଅଭିଯାନ ଆରମ୍ଭ କରି ଭାରତରୁ ସିକେଲ୍ ସେଲ୍ ରୋଗର ମୂଳୋତ୍ପାଟନ ପାଇଁ ସରକାର ପ୍ରତିଶ୍ରୁତିବଦ୍ଧ।

ଶ୍ରୀ ଜୁଏଲ ଓରାମ ଗୁଜରାଟରେ ଏସସିଡି ନିରାକରଣ ପାଇଁ କାର୍ଯ୍ୟ କରିବାର ତାଙ୍କର ଅଭିଜ୍ଞତାକୁ ମନେ ପକାଇଥିଲେ । ବିଶେଷ କରି ପ୍ରଭାବିତ ଆଦିବାସୀ ଅଞ୍ଚଳରେ ଏହି ରୋଗ ବିଷୟରେ ସଚେତନତା ସୃଷ୍ଟି କରିବା ପାଇଁ ବିଭିନ୍ନ ମନ୍ତ୍ରଣାଳୟ ଓ ବିଭାଗ ସହାୟତାରେ ସାମଗ୍ରିକ ଭାବରେ କାର୍ଯ୍ୟ କରିବା ଉପରେ ସେ ଗୁରୁତ୍ୱାରୋପ କରିଥିଲେ । ଜାତୀୟ ସିକଲ୍ ସେଲ୍ ରକ୍ତହୀନତା ନିରାକରଣ ଅଭିଯାନରେ ଶୀର୍ଷ ବିଶେଷଜ୍ଞ ଓ ଡାକ୍ତରମାନେ ଯୋଗଦାନ ଦେବେ, କିନ୍ତୁ ତୃଣମୂଳ ସ୍ତରର କର୍ମଚାରୀଙ୍କ ଯୋଗଦାନ ଦ୍ୱାରା ହିଁ ସଫଳତା ସମ୍ଭବ ହେବ ବୋଲି ମନ୍ତ୍ରୀ ଉଲ୍ଲେଖ କରିଥିଲେ।

ସ୍ୱାସ୍ଥ୍ୟ ସେବା ପ୍ରତି ମାନବୀୟ ଆଭିମୁଖ୍ୟ ଏବଂ ବିଶେଷ କରି ଯୁବବର୍ଗଙ୍କ ମଧ୍ୟରେ ଏହି ରୋଗ ବିଷୟରେ ସଚେତନତା ସୃଷ୍ଟି କରିବାର ଗୁରୁତ୍ୱ ଉପରେ ରାଷ୍ଟ୍ରମନ୍ତ୍ରୀ ଉଇକେ ଜୋର ଦେଇଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦକ୍ଷ ନେତୃତ୍ୱରେ ୨୦୪୭ ସୁଦ୍ଧା ଭାରତ ନିଶ୍ଚିତ ଭାବରେ ଦେଶରୁ ସିକେଲ ସେଲ୍ ରୋଗ କୁ ଦୂର କରିବାରେ ସଫଳତା ହାସଲ କରିବ ବୋଲି ସେ ବିଶ୍ୱାସ ବ୍ୟକ୍ତ କରିଥିଲେ।

ଉଦଘାଟନୀ ଅଧିବେଶନରେ ଆଦିବାସୀ ବ୍ୟାପାର ସଚିବ ଶ୍ରୀ ବିଭୁ ନାୟାର କହିଥିଲେ ଯେ ଜାତୀୟ ସିକଲ୍ ସେଲ୍ ଆନିମିଆ ନିରାକରଣ ଅଭିଯାନ ଅଧୀନରେ କରାଯାଇଥିବା ପରୀକ୍ଷା ଅନୁଯାୟୀ ସ୍କ୍ରିନିଂ ହୋଇଥିବା ଲୋକଙ୍କ ମଧ୍ୟରୁ ୧୦% ସିକଲ୍ ସେଲ୍ ଟ୍ରେଟ୍ ବାହକ ଏବଂ ୧% ସିକଲ୍ ସେଲ୍ ରୋଗଗ୍ରସ୍ତ ବୋଲି ଜଣାପଡ଼ିଛି। ଅଧିକ ମାମଲା ଚିହ୍ନଟ କରିବା ଏବଂ ଆବଶ୍ୟକ ହସ୍ତକ୍ଷେପ ପ୍ରଦାନ କରିବା ପାଇଁ ମନ୍ତ୍ରଣାଳୟ ଅଧିକ ପରୀକ୍ଷା କରିବାକୁ ଯୋଜନା କରିଛି। ଅତିରିକ୍ତ ସଚିବ (ଆଦିବାସୀ ବ୍ୟାପାର) ଡ. ନବଲ ଜିତ୍ କପୁର ୨୦୪୭ ସୁଦ୍ଧା ଏସସିଡି ଉଚ୍ଛେଦ ପାଇଁ ୧୦ ବର୍ଷର ରୋଡ୍ ମ୍ୟାପ୍ ସମ୍ପର୍କରେ ଉପସ୍ଥିତ ଲୋକଙ୍କୁ ଅବଗତ କରାଇଥିଲେ। ଏମ୍ସର ନିର୍ଦ୍ଦେଶକ ପ୍ରଫେସର ଏମ୍ ଶ୍ରୀନିବାସ ଅଂଶଗ୍ରହଣକାରୀଙ୍କୁ ଅବଗତ କରାଇଥିଲେ ଯେ ବିର୍ସା ମୁଣ୍ଡା କେନ୍ଦ୍ର କେବଳ ଏସସିଡିର ସ୍କ୍ରିନିଂ ପାଇଁ ସମର୍ପିତ ନୁହେଁ ବରଂ ଏହା ରୋଗ ବିରୋଧରେ ଲଢ଼ିବା ପାଇଁ ଲୋକଙ୍କୁ ସଶକ୍ତ କରିବା ପାଇଁ ପ୍ରଶିକ୍ଷଣ ମଧ୍ୟ ପ୍ରଦାନ କରିଥାଏ ।

ଏହି ସମ୍ମିଳନୀରେ ଭାରତରେ ସିକଲ୍ ସେଲ୍ ରୋଗ ମୁକାବିଲାର ଆହ୍ୱାନ ଉପରେ ଏକ ପ୍ୟାନେଲ ଆଲୋଚନା ହୋଇଥିଲା, ଯେଉଁଥିରେ ଆଦିବାସୀ ବ୍ୟାପାର ମନ୍ତ୍ରଣାଳୟର ବରିଷ୍ଠ ଅଧିକାରୀ ଏବଂ ଏମ୍ସର ହେମାଟୋଲୋଜି ବିଭାଗ ଏବଂ ଏସସିଡି ଉପରେ ଗବେଷଣାରେ ନିୟୋଜିତ ଅନ୍ୟ ପ୍ରମୁଖ ଅନୁଷ୍ଠାନର ସ୍ୱାସ୍ଥ୍ୟ ବିଶେଷଜ୍ଞମାନେ ସାମିଲ ଥିଲେ।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିହାରର ରାଜଗିରଠାରେ ନାଲନ୍ଦା ବିଶ୍ୱବିଦ୍ୟାଳୟର ନୂତନ କ୍ୟାମ୍ପସକୁ ଉଦଘାଟନ କରିଛନ୍ତି। ଭାରତ ଓ ପୂର୍ବ ଏସିଆ ଶିଖର ସମ୍ମିଳନୀ (ଇଏଏସ୍) ଦେଶଗୁଡ଼ିକର ମିଳିତ ସହଯୋଗରେ ଏହି ବିଶ୍ୱବିଦ୍ୟାଳୟ ସାକାର ରୂପ ନେଇଛି। ଉଦଘାଟନୀ ଉତ୍ସବରେ ୧୭ଟି ଦେଶର ମିଶନ ମୁଖ୍ୟଙ୍କ ସମେତ ଅନେକ ବିଶିଷ୍ଟ ବ୍ୟକ୍ତି ଯୋଗ ଦେଇଥିଲେ। ପ୍ରଧାନମନ୍ତ୍ରୀ ଏକ ଚାରା ରୋପଣ ମଧ୍ୟ କରିଥିଲେ।

ତୃତୀୟ ଥର ପାଇଁ ପ୍ରଧାନମନ୍ତ୍ରୀ ଭାବେ ଶପଥ ଗ୍ରହଣ କରିବାର ୧୦ ଦିନ ମଧ୍ୟରେ ନାଳନ୍ଦା ଗସ୍ତକୁ ନେଇ ଶ୍ରୀ ମୋଦୀ ଆନନ୍ଦ ପ୍ରକାଶ କରିବା ସହ ଏହା ଭାରତର ବିକାଶଯାତ୍ରା ଦିଗରେ ଏକ ସକାରାତ୍ମକ ସଙ୍କେତ ବୋଲି ଜନସାଧାରଣଙ୍କୁ ସମ୍ବୋଧିତ କରି କହିଥିଲେ। ଏଥିପାଇଁ ସେ ସମସ୍ତଙ୍କୁ ଧନ୍ୟବାଦ ଜଣାଇଥିଲେ। ‘‘ନାଳନ୍ଦା କେବଳ ଏକ ନାମ ନୁହେଁ, ଏହା ଏକ ପରିଚୟ ଓ ସମ୍ମାନ। ନାଳନ୍ଦା ହେଉଛି ମୂଳ ଆଧାର, ଏହା ହେଉଛି ମନ୍ତ୍ର। ନାଳନ୍ଦା ଏକ ସତ୍ୟର ଘୋଷଣା କରୁଛି ଏବଂ ତାହା ହେଉଛି ନିଆଁରେ ପୁସ୍ତକ ଜଳିଥିଲେ ମଧ୍ୟ ଜ୍ଞାନ ନଷ୍ଟ ହୋଇପାରିବ ନାହିଁ’’ ବୋଲି ପ୍ରଧାନମନ୍ତ୍ରୀ କହିଥିଲେ। ନୂତନ ନାଳନ୍ଦା ବିଶ୍ୱବିଦ୍ୟାଳୟ ପ୍ରତିଷ୍ଠା ଭାରତର ସୁବର୍ଣ୍ଣ ଯୁଗର ଶୁଭାରମ୍ଭ କରିବ ବୋଲି ସେ ଜୋର ଦେଇ କହିଥିଲେ।

ପ୍ରଧାନମନ୍ତ୍ରୀ କହିଥିଲେ ଯେ ନାଳନ୍ଦାର ପ୍ରାଚୀନ ଭଗ୍ନାବଶେଷ ନିକଟରେ ଏହାର ପୁନରୁଦ୍ଧାର ଭାରତର ସାମର୍ଥ୍ୟକୁ ବିଶ୍ୱ ଆଗରେ ପରିଚିତ କରାଇବ କାରଣ ଏହା ବିଶ୍ୱକୁ କହିବ ଯେ ଦୃଢ଼ ମାନବିକ ମୂଲ୍ୟବୋଧ ଥିବା ରାଷ୍ଟ୍ରମାନେ ଇତିହାସକୁ ପୁନରୁଦ୍ଧାର କରି ଏକ ଉନ୍ନତ ବିଶ୍ୱ ସୃଷ୍ଟି କରିବାକୁ ସକ୍ଷମ।

ଶ୍ରୀ ମୋଦୀ ଗୁରୁତ୍ୱାରୋପ କରି କହିଥିଲେ ଯେ ନାଲନ୍ଦା ବିଶ୍ୱ, ଏସିଆ ଏବଂ ଅନେକ ଦେଶର ଐତିହ୍ୟକୁ ବହନ କରୁଛି ଏବଂ ଏହାର ପୁନରୁଦ୍ଧାର କେବଳ ଭାରତୀୟତା ଦିଗର ପୁନରୁଦ୍ଧାରରେ ସୀମିତ ନୁହେଁ । ଆଜିର ଉଦଘାଟନୀ ଉତ୍ସବରେ ଏତେ ସଂଖ୍ୟକ ଦେଶର ଉପସ୍ଥିତିରୁ ଏହା ସ୍ପଷ୍ଟ ହେଉଛି ବୋଲି କହି ସେ ନାଳନ୍ଦା ପ୍ରକଳ୍ପରେ ବନ୍ଧୁ ରାଷ୍ଟ୍ରମାନଙ୍କ ଅବଦାନକୁ ସ୍ୱୀକାର କରିଥିଲେ। ନାଳନ୍ଦାରେ ପ୍ରତିଫଳିତ ହେଉଥିବା ଏହାର ଗୌରବ ଫେରାଇ ଆଣିବା ପାଇଁ ବିହାରବାସୀଙ୍କ ସଂକଳ୍ପକୁ ମଧ୍ୟ ସେ ପ୍ରଶଂସା କରିଥିଲେ।

ଏକଦା ନାଳନ୍ଦା ଭାରତର ସଂସ୍କୃତି ଓ ପରମ୍ପରାର ଜୀବନ୍ତ କେନ୍ଦ୍ର ଥିଲା ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ, ‘‘ନାଳନ୍ଦାର ଅର୍ଥ ହେଉଛି ଜ୍ଞାନ ଓ ଶିକ୍ଷାର ନିରନ୍ତର ପ୍ରବାହ ଏବଂ ଏହା ହେଉଛି ଶିକ୍ଷା ପ୍ରତି ଭାରତର ଆଭିମୁଖ୍ୟ ଓ ଚିନ୍ତାଧାରା। ଶିକ୍ଷା ସୀମା ଠାରୁ ଊର୍ଦ୍ଧ୍ବରେ। ଏହା ମୂଲ୍ୟବୋଧ ଓ ବିଚାର ସୃଷ୍ଟି କରିବା ସହିତ ଏହାକୁ ଆକାର ଦେଇଥାଏ। ପ୍ରଧାନମନ୍ତ୍ରୀ କହିଥିଲେ ଯେ ପ୍ରାଚୀନ ନାଳନ୍ଦା ବିଶ୍ୱବିଦ୍ୟାଳୟରେ ଛାତ୍ରଛାତ୍ରୀମାନେ ସେମାନଙ୍କ ପରିଚୟ ଏବଂ ଜାତୀୟତା ନିର୍ବିଶେଷରେ ନାମ ଲେଖାଇଥିଲେ । ନବନିର୍ମିତ ନାଳନ୍ଦା ବିଶ୍ୱବିଦ୍ୟାଳୟ ପରିସରରେ ସେହି ପ୍ରାଚୀନ ପରମ୍ପରାକୁ ଆଧୁନିକ ରୂପରେ ସୁଦୃଢ଼ କରିବା ଉପରେ ସେ ଗୁରୁତ୍ୱାରୋପ କରିଥିଲେ। ନାଳନ୍ଦା ବିଶ୍ୱବିଦ୍ୟାଳୟରେ ୨୦ରୁ ଅଧିକ ଦେଶର ଛାତ୍ରଛାତ୍ରୀ ଅଧ୍ୟୟନ କରୁଥିବାରୁ ପ୍ରଧାନମନ୍ତ୍ରୀ ଆନନ୍ଦ ପ୍ରକାଶ କରିଥିଲେ ଏବଂ ଏହା ‘ବସୁଧୈବ କୁଟୁମ୍ବକମ୍’ର ଉତ୍ତମ ଉଦାହରଣ ବୋଲି କହିଥିଲେ ।

ଶିକ୍ଷାକୁ ମାନବ କଲ୍ୟାଣର ଏକ ଉପକରଣ ଭାବରେ ଗ୍ରହଣ କରିବାର ଭାରତୀୟ ପରମ୍ପରା ଉପରେ ପ୍ରଧାନମନ୍ତ୍ରୀ ଆଲୋକପାତ କରିଥିଲେ । ଆଗାମୀ ଅନ୍ତର୍ଜାତୀୟ ଯୋଗ ଦିବସ ବିଷୟରେ ଉଲ୍ଲେଖ କରି ସେ କହିଲେ ଯେ, ଯୋଗ ଦିବସ ଏକ ଅନ୍ତର୍ଜାତୀୟ ଉତ୍ସବରେ ପରିଣତ ହୋଇଛି । ଯୋଗର ଏତେ ମାତ୍ରାରେ ବିକାଶ ସତ୍ତ୍ୱେ ଭାରତରେ କେହି ଯୋଗ ଉପରେ ଏକଛତ୍ରବାଦ ପ୍ରକାଶ କରିନାହାଁନ୍ତି । ସେହିଭଳି ଭାରତ ଆୟୁର୍ବେଦକୁ ସମଗ୍ର ବିଶ୍ୱ ସହ ବାଣ୍ଟିଛି ବୋଲି ସେ କହିଥିଲେ । ଦୀର୍ଘସ୍ଥାୟିତ୍ବ ପ୍ରତି ଭାରତର ନିଷ୍ଠା ଉପରେ ମଧ୍ୟ ପ୍ରଧାନମନ୍ତ୍ରୀ ମୋଦୀ ଆଲୋକପାତ କରିଥିଲେ ଏବଂ କହିଥିଲେ ଯେ, ଭାରତରେ ଆମେ ପ୍ରଗତି ଏବଂ ପରିବେଶକୁ ଏକାଠି କରିଛୁ । ଏହା ଭାରତକୁ ମିଶନ ଲାଇଫ୍‌ ଏବଂ ଅନ୍ତର୍ଜାତୀୟ ସୌର ମେଣ୍ଟ ଭଳି ପଦକ୍ଷେପ ପ୍ରଦାନ କରିବାକୁ ଅନୁମତି ଦେଇଥିଲା । ସେ କହିଛନ୍ତି ଯେ ନାଲନ୍ଦା କ୍ୟାମ୍ପସ ଏହାର ଅଗ୍ରଣୀ ଅଙ୍ଗାରକାମ୍ଳ ମୁକ୍ତ ଶକ୍ତି, ଶୂନ୍ୟ ଅଙ୍ଗାରକାମ୍ଳ ନିର୍ଗମନ, ଜଳ ଅପଚୟ ମୁକ୍ତ ଏବଂ ବର୍ଜ୍ୟମୁକ୍ତ ମଡେଲ ସହିତ ଦୀର୍ଘସ୍ଥାୟୀତ୍ବର ଭାବନାକୁ ଆଗକୁ ବଢ଼ାଇବ ।

ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ ଯେ ଶିକ୍ଷାର ବିକାଶ ଅର୍ଥନୀତି ଏବଂ ସଂସ୍କୃତିର ଚେରକୁ ଗଭୀର କରିଥାଏ । ବିକଶିତ ଦେଶଗୁଡ଼ିକର ବୈଶ୍ୱିକ ଅଭିଜ୍ଞତା ଓ ଅନୁଭୂତିରୁ ଏହା ପ୍ରମାଣିତ ହେଉଛି। ୨୦୪୭ ସୁଦ୍ଧା ଏକ ବିକଶିତ ରାଷ୍ଟ୍ର ରେ ପରିଣତ ହେବା ଲକ୍ଷ୍ୟ ରେ କାର୍ଯ୍ୟ କରୁଥିବା ଭାରତ ଏହାର ଶିକ୍ଷା ବ୍ୟବସ୍ଥାରେ ପରିବର୍ତ୍ତନ ଆଣିଛି ବୋଲି ପ୍ରଧାନମନ୍ତ୍ରୀ କହିଥିଲେ । ସେ ଆହୁରି ମଧ୍ୟ କହିଛନ୍ତି ଯେ ‘‘ମୋର ଲକ୍ଷ୍ୟ ହେଉଛି ଭାରତ ବିଶ୍ୱ ପାଇଁ ଶିକ୍ଷା ଓ ଜ୍ଞାନର କେନ୍ଦ୍ର ରେ ପରିଣତ ହେଉ । ମୋର ଲକ୍ଷ୍ୟ ହେଉଛି ଭାରତକୁ ପୁଣି ଥରେ ବିଶ୍ୱର ସବୁଠାରୁ ପ୍ରମୁଖ ଜ୍ଞାନ କେନ୍ଦ୍ର ଭାବରେ ସ୍ୱୀକୃତି ମିଳିବା ଉଚିତ ।’’ ଏକ କୋଟିରୁ ଅଧିକ ପିଲାଙ୍କ ପାଇଁ ଅଟଳ ଟିଙ୍କରିଂ ଲ୍ୟାବ୍, ଚନ୍ଦ୍ରଯାନ ଏବଂ ଗଗନଯାନ ଦ୍ୱାରା ସୃଷ୍ଟି ହୋଇଥିବା ବିଜ୍ଞାନ ପ୍ରତି ଆଗ୍ରହ ଏବଂ ଷ୍ଟାର୍ଟଅପ୍ ଇଣ୍ଡିଆ ଭଳି ପଦକ୍ଷେପ ବିଷୟରେ ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ। ରେକର୍ଡ ସଂଖ୍ୟକ ପେଟେଣ୍ଟ ଏବଂ ଗବେଷଣା ପତ୍ର ଦାଖଲ ଏବଂ ୧ ଲକ୍ଷ କୋଟି ଟଙ୍କାର ଗବେଷଣା ପାଣ୍ଠି ବ୍ୟବସ୍ଥା।

ପ୍ରଧାନମନ୍ତ୍ରୀ ବିଶ୍ୱର ସବୁଠାରୁ ଉନ୍ନତ ଗବେଷଣା ଭିତ୍ତିକ ଉଚ୍ଚଶିକ୍ଷା ବ୍ୟବସ୍ଥା ସହିତ ସବୁଠାରୁ ବ୍ୟାପକ ଏବଂ ସମ୍ପୂର୍ଣ୍ଣ ଦକ୍ଷତା ବିକାଶ ବ୍ୟବସ୍ଥା ସୃଷ୍ଟି କରିବା ପାଇଁ ସରକାରଙ୍କ ପ୍ରୟାସ ଉପରେ ଆଲୋକପାତ କରିଥିଲେ । ବିଶ୍ୱ ମାନ୍ୟତାରେ ଭାରତର ବିଶ୍ୱବିଦ୍ୟାଳୟଗୁଡ଼ିକର ଉନ୍ନତ ପ୍ରଦର୍ଶନ ବିଷୟରେ ମଧ୍ୟ ସେ ଉଲ୍ଲେଖ କରିଥିଲେ। ବିଗତ ୧୦ ବର୍ଷ ମଧ୍ୟରେ ଶିକ୍ଷା ଏବଂ ଦକ୍ଷତା ବିକାଶ କ୍ଷେତ୍ରରେ ସାମ୍ପ୍ରତିକ ଉପଲବ୍ଧି ଉପରେ ଆଲୋକପାତ କରି ପ୍ରଧାନମନ୍ତ୍ରୀ ଉଲ୍ଲେଖ କରିଥିଲେ ଯେ ଭାରତୀୟ ଶିକ୍ଷାନୁଷ୍ଠାନ ସଂଖ୍ୟା କ୍ୟୁଏସ୍ ରେଙ୍କିଙ୍ଗରେ ୯ରୁ ୪୬ ଏବଂ ଟାଇମ୍ସ ହାୟର ଏଜୁକେସନ ଇମ୍ପାକ୍ଟ ରେଙ୍କିଙ୍ଗରେ ୧୩ରୁ ୧୦୦କୁ ବୃଦ୍ଧି ପାଇଛି । ବିଗତ ୧୦ ବର୍ଷ ମଧ୍ୟରେ ଭାରତରେ ପ୍ରତି ସପ୍ତାହରେ ଗୋଟିଏ ବିଶ୍ୱବିଦ୍ୟାଳୟ ପ୍ରତିଷ୍ଠା ହୋଇଛି, ପ୍ରତିଦିନ ଗୋଟିଏ ନୂଆ ଆଇଟିଆଇ ପ୍ରତିଷ୍ଠା ହୋଇଛି, ପ୍ରତି ତିନି ଦିନରେ ଗୋଟିଏ ଅଟଳ ଟିଙ୍କରିଂ ଲ୍ୟାବ ଖୋଲାଯାଇଛି ଏବଂ ପ୍ରତିଦିନ ଦୁଇଟି ନୂତନ କଲେଜ ପ୍ରତିଷ୍ଠା କରାଯାଇଛି ବୋଲି ପ୍ରଧାନମନ୍ତ୍ରୀ ସୂଚନା ଦେଇଥିଲେ । ସେ ଆହୁରି ମଧ୍ୟ କହିଛନ୍ତି ଯେ ଭାରତରେ ଆଜି ୨୩ଟି ଆଇଆଇଟି ରହିଛି, ଆଇଆଇଏମ୍ ସଂଖ୍ୟା ୧୩ରୁ ୨୧କୁ ବୃଦ୍ଧି ପାଇଛି ଏବଂ ଏମ୍ସ ସଂଖ୍ୟା ପ୍ରାୟ ତିନି ଗୁଣ ବୃଦ୍ଧି ପାଇ ୨୨ରେ ପହଞ୍ଚିଛି। ‘‘୧୦ ବର୍ଷ ମଧ୍ୟରେ ମେଡିକାଲ କଲେଜ ସଂଖ୍ୟା ମଧ୍ୟ ପ୍ରାୟ ଦ୍ୱିଗୁଣିତ ହୋଇଛି’’, ବୋଲି ସେ କହିଥିଲେ। ଶିକ୍ଷା କ୍ଷେତ୍ରରେ ସଂସ୍କାର ବିଷୟରେ ସୂଚନା ପ୍ରଦାନ କରି ପ୍ରଧାନମନ୍ତ୍ରୀ ନୂତନ ଶିକ୍ଷାନୀତି ବିଷୟରେ ଉଲ୍ଲେଖ କରିଥିଲେ ଏବଂ କହିଥିଲେ ଯେ ଏହା ଭାରତର ଯୁବବର୍ଗଙ୍କ ସ୍ୱପ୍ନକୁ ଏକ ନୂତନ ଦିଗ ଦେଇଛି । ଭାରତୀୟ ଏବଂ ବିଦେଶୀ ବିଶ୍ୱବିଦ୍ୟାଳୟଗୁଡ଼ିକର ସହଯୋଗ ଏବଂ ଡିକିନ୍ ଏବଂ ଓଲଙ୍ଗୋଙ୍ଗ ଭଳି ଅନ୍ତର୍ଜାତୀୟ ବିଶ୍ୱବିଦ୍ୟାଳୟର ନୂତନ କ୍ୟାମ୍ପସ ଖୋଲିବା ବିଷୟରେ ମଧ୍ୟ ଶ୍ରୀ ମୋଦୀ ଉଲ୍ଲେଖ କରିଥିଲେ । ଏସବୁ ପ୍ରୟାସ ଦ୍ୱାରା ଭାରତୀୟ ଛାତ୍ରଛାତ୍ରୀମାନେ ଉଚ୍ଚଶିକ୍ଷା ପାଇଁ ଭାରତର ଶ୍ରେଷ୍ଠ ଶିକ୍ଷାନୁଷ୍ଠାନ ହାସଲ କରୁଛନ୍ତି। ଏହା ମଧ୍ୟ ଆମର ମଧ୍ୟବିତ୍ତଙ୍କ ପାଇଁ ଅର୍ଥ ସଞ୍ଚୟ କରୁଛି ବୋଲି ପ୍ରଧାନମନ୍ତ୍ରୀ କହିଥିଲେ ।

ନିକଟରେ ପ୍ରମୁଖ ଭାରତୀୟ ଅନୁଷ୍ଠାନଗୁଡ଼ିକର ଗ୍ଲୋବାଲ କ୍ୟାମ୍ପସ୍ ଖୋଲିବା ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ ନାଲନ୍ଦା ପାଇଁ ସମାନ ଆଶା ବ୍ୟକ୍ତ କରିଥିଲେ ।

ଭାରତର ଯୁବବର୍ଗଙ୍କ ଉପରେ ବିଶ୍ୱର ନଜର ରହିଛି ବୋଲି ପ୍ରଧାନମନ୍ତ୍ରୀ କହିଥିଲେ । ‘‘ଭାରତ ହେଉଛି ଭଗବାନ ବୁଦ୍ଧଙ୍କ ଦେଶ ଏବଂ ଗଣତନ୍ତ୍ରର ଜନନୀ । ସାରା ଦୁନିଆ ଆଜି ଭାରତ ସହ କାନ୍ଧରେ କାନ୍ଧ ମିଳାଇ ଚାଲିବାକୁ ଚାହୁଁଛି”, ସେ କହିଥିଲେ । ପ୍ରଧାନମନ୍ତ୍ରୀ ଆହୁରି କହିଥିଲେ, ଯେତେବେଳେ ଭାରତ ‘ଏକ ପୃଥିବୀ, ଏକ ପରିବାର ଏବଂ ଏକ ଭବିଷ୍ୟତ’ କଥା କହୁଛି, ସେତେବେଳେ ବିଶ୍ୱ ଏହା ସହିତ ଛିଡ଼ା ହୋଇଛି। ଭାରତ ଯେତେବେଳେ ‘ଏକ ସୂର୍ଯ୍ୟ, ଗୋଟିଏ ବିଶ୍ୱ, ଗୋଟିଏ ଗ୍ରିଡ୍’ କଥା କହୁଛି, ସେତେବେଳେ ଏହାକୁ ବିଶ୍ୱ ପାଇଁ ଭବିଷ୍ୟତର ମାର୍ଗ ବୋଲି ବିବେଚନା କରାଯାଉଛି । ଭାରତ ଯେତେବେଳେ ‘ଏକ ବିଶ୍ୱ ଏକ ସ୍ୱାସ୍ଥ୍ୟ’ ବିଷୟରେ କହୁଛି, ସେତେବେଳେ ବିଶ୍ୱ ଏହାର ମତକୁ ସମ୍ମାନ ଦେଉଛି ଓ ଗ୍ରହଣ କରୁଛି। ନାଳନ୍ଦା ମାଟି ବିଶ୍ୱ ଭାଇଚାରାର ଏହି ଭାବନାକୁ ଏକ ନୂଆ ଦିଗ ଦେଇପାରିବ । ତେଣୁ ନାଳନ୍ଦାର ଛାତ୍ରଛାତ୍ରୀଙ୍କ ଦାୟିତ୍ୱ ଆହୁରି ଅଧିକ ବୃଦ୍ଧି ପାଇଛି ବୋଲି ପ୍ରଧାନମନ୍ତ୍ରୀ ମୋଦୀ କହିଛନ୍ତି।

ନାଳନ୍ଦାର ଛାତ୍ରଛାତ୍ରୀ ଓ ଅଧ୍ୟାପକମାନଙ୍କୁ ଭାରତର ଭବିଷ୍ୟତ ବୋଲି ଅଭିହିତ କରି ପ୍ରଧାନମନ୍ତ୍ରୀ ଅମୃତ କାଳର ଆଗାମୀ ୨୫ ବର୍ଷର ଗୁରୁତ୍ୱ ଉପରେ ଆଲୋକପାତ କରିଥିଲେ । ଏହା ସହ ନାଳନ୍ଦାର ‘ନାଳନ୍ଦା ମାର୍ଗ’ ଏବଂ ମୂଲ୍ୟବୋଧକୁ ସାଙ୍ଗରେ ନେବାକୁ ଆହ୍ୱାନ ଦେଇଥିଲେ । ଶ୍ରୀ ମୋଦୀ ସେମାନଙ୍କୁ ଅନୁସନ୍ଧିତ୍ସୁ, ସାହସୀ, ଏବଂ ସର୍ବୋପରି ନାଳନ୍ଦାର ମୂଳ ବାର୍ତ୍ତା ଦୟଳୁ ହେବାକୁ ପରାମର୍ଶ ଦେବା ସହ ସମାଜରେ ସକାରାତ୍ମକ ପରିବର୍ତ୍ତନ ଆଣିବା ଲାଗି ସେମାନଙ୍କୁ କହିଥିଲେ ।

ନାଳନ୍ଦାର ଜ୍ଞାନ ମାନବ ଜାତିକୁ ଦିଗଦର୍ଶନ ଦେବ ଏବଂ ଆଗାମୀ ଦିନରେ ଯୁବପିଢ଼ି ସମଗ୍ର ବିଶ୍ୱର ନେତୃତ୍ୱ ନେବେ ବୋଲି ପ୍ରଧାନମନ୍ତ୍ରୀ ବିଶ୍ୱାସ ପ୍ରକଟ କରିଥିଲେ । ‘‘ମୁଁ ବିଶ୍ୱାସ କରେ ଯେ ନାଲନ୍ଦା ବିଶ୍ୱ ଉଦ୍ଦେଶ୍ୟ ପାଇଁ ଏକ ଗୁରୁତ୍ୱପୂର୍ଣ୍ଣ କେନ୍ଦ୍ର ରେ ପରିଣତ ହେବ’’, ପ୍ରଧାନମନ୍ତ୍ରୀ ଶେଷରେ କହିଥିଲେ ।

ଏହି ଅବସରରେ ବିହାର ରାଜ୍ୟପାଳ ଶ୍ରୀ ରାଜେନ୍ଦ୍ର ଆର୍ଲେକର, ବିହାର ମୁଖ୍ୟମନ୍ତ୍ରୀ ଶ୍ରୀ ନୀତୀଶ କୁମାର, କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରୀ ଡ. ସୁବ୍ରମଣ୍ୟମ ଜୟଶଙ୍କର, କେନ୍ଦ୍ର ବୈଦେଶିକ ବ୍ୟାପାର ରାଷ୍ଟ୍ରମନ୍ତ୍ରୀ ଶ୍ରୀ ପବିତ୍ର ମାର୍ଗେରିଟା, ବିହାରର ଉପମୁଖ୍ୟମନ୍ତ୍ରୀ ଶ୍ରୀ ବିଜୟ କୁମାର ସିହ୍ନା ଓ ଶ୍ରୀ ସମ୍ରାଟ ଚୌଧୁରୀ, ନାଳନ୍ଦା ବିଶ୍ୱବିଦ୍ୟାଳୟର କୁଳାଧିପତି ପ୍ରଫେସର ଅରବିନ୍ଦ ପନଗରିଆ ଏବଂ ନାଳନ୍ଦା ବିଶ୍ୱବିଦ୍ୟାଳୟର କୁଳପତି ପ୍ରଫେସର ଅଭୟ କୁମାର ସିଂଙ୍କ ସମେତ ବହୁ ମାନ୍ୟଗଣ୍ୟ ବ୍ୟକ୍ତି ଉପସ୍ଥିତ ଥିଲେ ।

ନାଳନ୍ଦା ବିଶ୍ୱବିଦ୍ୟାଳୟ

ନାଳନ୍ଦା ବିଶ୍ୱବିଦ୍ୟାଳୟ କ୍ୟାମ୍ପସରେ ୪୦ଟି ଶ୍ରେଣୀଗୃହ ସହିତ ଦୁଇଟି ଶିକ୍ଷା ବ୍ଲକ ରହିଛି ଯେଉଁଥିରେ ମୋଟ ୧୯୦୦ ଲୋକ ବସିବାର କ୍ଷମତା ରହିଛି । ଏଥିରେ ୩୦୦ ଆସନ ବିଶିଷ୍ଟ ଦୁଇଟି ଅଡିଟୋରିୟମ୍, ପାଖାପାଖି ୫୫୦ ଛାତ୍ରଛାତ୍ରୀଙ୍କ କ୍ଷମତା ବିଶିଷ୍ଟ ଏକ ଛାତ୍ରବାସ ଏବଂ ଏକ ଅନ୍ତର୍ଜାତୀୟ କେନ୍ଦ୍ର, ୨୦୦୦ ଲୋକଙ୍କ ବସିବା ପାଇଁ ଏକ ଆମ୍ଫିଥିଏଟର, ଏକ ଫେକଲ୍ଟି କ୍ଲବ୍ ଏବଂ ଏକ ସ୍ପୋର୍ଟସ କମ୍ପ୍ଲେକ୍ସ ସମେତ ଅନ୍ୟାନ୍ୟ ସୁବିଧା ରହିଛି।

ଏହି କ୍ୟାମ୍ପସ ହେଉଛି ଏକ ଅଙ୍ଗାରକାମ୍ଳ ଓ ବର୍ଜ୍ୟ ମୁକ୍ତ ସବୁଜ କ୍ୟାମ୍ପସ। ସୌର ପ୍ଲାଣ୍ଟ, ଘରୋଇ ଓ ପାନୀୟ ଜଳ ବିଶୋଧନ ପ୍ଲାଣ୍ଟ, ବର୍ଜ୍ୟ ଜଳର ପୁନଃବ୍ୟବହାର ପାଇଁ ଜଳ ପୁନଃଚକ୍ରଣ ପ୍ଲାଣ୍ଟ, ୧୦୦ ଏକର ବିଶିଷ୍ଟ ଜଳାଶୟ ଏବଂ ଅନ୍ୟାନ୍ୟ ପରିବେଶ ଅନୁକୂଳ ସୁବିଧା ସହିତ ଏହା ଆତ୍ମନିର୍ଭରଶୀଳ ହୋଇପାରିଛି ।

ବିଶ୍ୱବିଦ୍ୟାଳୟର ଇତିହାସ ସହ ଗଭୀର ସମ୍ପର୍କ ରହିଛି । ପ୍ରାୟ ୧୬୦୦ ବର୍ଷ ପୂର୍ବେ ସ୍ଥାପିତ ମୂଳ ନାଳନ୍ଦା ବିଶ୍ୱବିଦ୍ୟାଳୟ ବିଶ୍ୱର ପ୍ରଥମ ଆବାସିକ ବିଶ୍ୱବିଦ୍ୟାଳୟ ଭାବେ ବିବେଚନା କରାଯାଏ । ୨୦୧୬ରେ ନାଳନ୍ଦାର ଭଗ୍ନାବଶେଷକୁ ଜାତିସଂଘର ଐତିହ୍ୟ ସ୍ଥଳ ଭାବେ ଘୋଷଣା କରାଯାଇଥିଲା।

ନୂଆଦିଲ୍ଲୀ: ନିର୍ବାଚନ ପାଇଁ ବନ୍ଦ ରହିଥିବା ମନ୍‌ କୀ ବାତ୍‌ କାର୍ଯ୍ୟକ୍ରମର ଆଗାମୀ ଅଧ୍ୟାୟ ଖୁବ୍‌ଶୀଘ୍ର ପ୍ରସାରଣ ହେବାକୁ ଯାଉଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଖୁସି ବ୍ୟସ୍ତ କରିଛନ୍ତି। ଆକାଶବାଣୀରେ ଆସନ୍ତା ୩୦ ଜୁନ୍‌ ରବିବାର ଦିନ ମନ୍‌ କୀ ବାତ୍‌ କାର୍ଯ୍ୟକ୍ରମର ପ୍ରସାରଣ କରାଯିବ ବୋଲି ସେ ସୂଚନା ଦେଇଛନ୍ତି।

ମନ୍‌ କୀ ବାତ୍‌ର ୧୧୧ତମ ଅଧ୍ୟାୟ ପାଇଁ ବିଚାର ଓ ମତାମତ ଦେବାକୁ ଶ୍ରୀ ମୋଦୀ ଜନସାଧାରଣଙ୍କୁ ନିବେଦନ କରିଛନ୍ତି। ସାଧାରଣ ନାଗରିକ ମାଇଁ ଗଭ୍‌ ଓପନ ଫୋରମ, ନମୋ ଆପ୍‌ ରେ ନିଜର ମତାମତ ଲେଖିପାରିବେ କିମ୍ବା ୧୮୦୦୧୧୭୮୦୦ ନମ୍ବରରେ ନିଜର ବାର୍ତ୍ତା ରେକର୍ଡିଂ କରିପାରିବେ।

ଶ୍ରୀ ମୋଦୀ ସାମାଜିକ ଗଣମାଧ୍ୟମ ଏକ୍ସରେ ପୋଷ୍ଟକରି ଲେଖିଛନ୍ତି,

‘‘ନିର୍ବାଚନ କାରଣରୁ କିଛି ମାସର ବ୍ୟବଧାନ ପରେ #MannKiBaat ଫେରୁଛି। ଚଳିତ ମାସର କାର୍ଯ୍ୟକ୍ରମ ୩୦ ଜୁନ୍‌,  ରବିବାର ପ୍ରସାରିତ ହେବ। ସେଥିପାଇଁ ମୁଁ ପାଇଁ ବିଚାର ଓ ମତାମତ ଦେବାକୁ ନିବେଦନ କରିଛି। ଆପଣ ମାଇଁ ଗଭ୍‌ ଓପନ ଫୋରମ, ନମୋ ଆପ୍‌ ରେ ନିଜର ମତାମତ ଲେଖିପାରିବେ କିମ୍ବା ୧୮୦୦୧୧୭୮୦୦ ନମ୍ବରରେ ନିଜର ବାର୍ତ୍ତା ରେକର୍ଡିଂ କରିପାରିବେ।’’

ବାରାଣସୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଉତ୍ତର ପ୍ରଦେଶର ବାରାଣସୀଠାରେ ଆୟୋଜିତ କୃଷକ ସମ୍ମାନ ସମ୍ମିଳନୀକୁ ସମ୍ବୋଧିତ କରିବା ସହ ପ୍ରାୟ ୯.୨୬ କୋଟି ହିତାଧିକାରୀ କୃଷକଙ୍କୁ ୨୦,୦୦୦ କୋଟି ରୁ ଅଧିକ ଟଙ୍କାର ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି (ପିଏମ-କିଷାନ)ର ସପ୍ତଦଶ କିସ୍ତି ପ୍ରତ୍ୟକ୍ଷ ଲାଭ ହସ୍ତାନ୍ତର ମାଧ୍ୟମରେ ହସ୍ତାନ୍ତର କରିଛନ୍ତି। ଏହି କାର୍ଯ୍ୟକ୍ରମରେ ସେ ସ୍ୱୟଂ ସହାୟକ ଗୋଷ୍ଠୀର ୩୦ ହଜାରରୁ ଅଧିକ ମହିଳାଙ୍କୁ କୃଷି ସଖୀ ଭାବେ ପ୍ରମାଣପତ୍ର ପ୍ରଦାନ କରିଥିଲେ। ବୈଷୟିକ ଜ୍ଞାନକୌଶଳ ଜରିଆରେ ସାରା ଦେଶର କୃଷକଙ୍କୁ ଏହି କାର୍ଯ୍ୟକ୍ରମ ସହ ଯୋଡାଯାଇଥିଲା।

ସଭାକୁ ସମ୍ବୋଧିତ କରି ପ୍ରଧାନମନ୍ତ୍ରୀ ଏହି ନିର୍ବାଚନ ମଣ୍ଡଳୀରୁ ଲୋକସଭା ନିର୍ବାଚନ ଜିତିବା ପରେ ପ୍ରଥମ ଥର ପାଇଁ କାଶୀବାସୀଙ୍କୁ ଶୁଭେଚ୍ଛା ଜଣାଇଥିଲେ । ଲଗାତାର ତୃତୀୟ ଥର ପାଇଁ ତାଙ୍କୁ ଚୟନ କରିଥିବାରୁ ଶ୍ରୀ ମୋଦୀ ସେମାନଙ୍କୁ ଧନ୍ୟବାଦ ଜଣାଇଛନ୍ତି। ‘‘ବର୍ତ୍ତମାନ ମା’ ଗଙ୍ଗା ମଧ୍ୟ ମୋତେ ପୋଷ୍ୟ ଭାବେ ଗ୍ରହଣ କରିଥିବା ପରି ମନେ ହେଉଛି ଏବଂ ମୁଁ କାଶୀ ପାଇଁ ସ୍ଥାନୀୟ ବାସିନ୍ଦା ହୋଇପାରିଛି’’, କୃତଜ୍ଞତା ପ୍ରକାଶ କରି ପ୍ରଧାନମନ୍ତ୍ରୀ ମୋଦୀ କହିଛନ୍ତି।

ପ୍ରଧାନମନ୍ତ୍ରୀ ଆହୁରି କହିଥିଲେ ଯେ, ଅଷ୍ଟାଦଶ ଲୋକସଭା ପାଇଁ ନିକଟରେ ଶେଷ ହୋଇଥିବା ସାଧାରଣ ନିର୍ବାଚନ ଭାରତୀୟ ଗଣତନ୍ତ୍ରର ବିଶାଳତା, ସାମର୍ଥ୍ୟ, ବ୍ୟାପକତା ଏବଂ ମୂଳଦୁଆର ପ୍ରତୀକ ଏବଂ ଏହା ଭାରତକୁ ବିଶ୍ୱ ସମ୍ମୁଖରେ ସ୍ୱତନ୍ତ୍ର ଭାବେ ଉପସ୍ଥାପନ କରିଛି । ଏହି ନିର୍ବାଚନରେ ୬୪ କୋଟିରୁ ଅଧିକ ଲୋକ ଭୋଟ୍ ଦେଇଥିଲେ ବୋଲି ଉଲ୍ଲେଖ କରି ପ୍ରଧାନମନ୍ତ୍ରୀ କହିଥିଲେ ଯେ ଏତେ ବଡ଼ ଧରଣର ନିର୍ବାଚନ ଅନ୍ୟ କେଉଁଠି ହୁଏ ନାହିଁ, ଯେଉଁଥିରେ ନାଗରିକଙ୍କ ଏତେ ବଡ଼ ଭାଗିଦାରୀ ଦେଖିବାକୁ ମିଳେ। ନିକଟରେ ଇଟାଲୀରେ ଅନୁଷ୍ଠିତ ଜି-୭ ଶିଖର ସମ୍ମିଳନୀକୁ ତାଙ୍କର ଗସ୍ତ ବିଷୟରେ ମନେ ପକାଇ ପ୍ରଧାନମନ୍ତ୍ରୀ ଦର୍ଶାଇଥିଲେ ଯେ ଭାରତରେ ଭୋଟରଙ୍କ ସଂଖ୍ୟା ସମସ୍ତ ଜି-୭ ରାଷ୍ଟ୍ରର ଭୋଟରଙ୍କ ସଂଖ୍ୟା ଠାରୁ ଦେଢ଼ ଗୁଣ ଅଧିକ ଏବଂ ୟୁରୋପୀୟ ସଂଘର ସମସ୍ତ ସଦସ୍ୟ ରାଷ୍ଟ୍ରରେ ଭୋଟରଙ୍କ ସଂଖ୍ୟାଠାରୁ ଅଢ଼େଇ ଗୁଣ ଅଧିକ। ପ୍ରଧାନମନ୍ତ୍ରୀ ମୋଦୀ ୩୧ କୋଟିରୁ ଅଧିକ ମହିଳା ଭୋଟରଙ୍କ ଅଧିକ ସଂଖ୍ୟାରେ ଅଂଶଗ୍ରହଣ ଉପରେ ଆଲୋକପାତ କରିଥିଲେ । ଆମ ଦେଶରେ ବିଶ୍ୱର ସର୍ବାଧିକ ସଂଖ୍ୟକ ମହିଳା ଭୋଟର ଥିବା ବିଷୟରେ ଉଲ୍ଲେଖ କରିଥିଲେ । ସେ ଆହୁରି ମଧ୍ୟ କହିଥିଲେ ଯେ ଏହା ଆମେରିକାର ସମ୍ପୂର୍ଣ୍ଣ ଜନସଂଖ୍ୟାର ନିକଟତର। ଭାରତର ଗଣତନ୍ତ୍ରର ଶକ୍ତି ଏବଂ ସୌନ୍ଦର୍ଯ୍ୟ କେବଳ ସମଗ୍ର ବିଶ୍ୱକୁ ଆକର୍ଷିତ କରେ ନାହିଁ ବରଂ ଏହାର ପ୍ରଭାବ ମଧ୍ୟ ପକାଇଥାଏ ବୋଲି ଶ୍ରୀ ମୋଦୀ କହିଛନ୍ତି। ଗଣତନ୍ତ୍ରର ଏହି ପର୍ବରେ ଅଂଶଗ୍ରହଣ କରି ଏହାକୁ ସଫଳ କରିଥିବାରୁ ପ୍ରଧାନମନ୍ତ୍ରୀ ବାରାଣସୀବାସୀଙ୍କୁ ଧନ୍ୟବାଦ ଜଣାଇଛନ୍ତି। ପ୍ରଧାନମନ୍ତ୍ରୀ ମୋଦୀ କୃତଜ୍ଞତା ଜ୍ଞାପନ କରି କହିଛନ୍ତି, ବାରାଣସୀର ଲୋକମାନେ କେବଳ ଜଣେ ସାଂସଦଙ୍କୁ ନୁହେଁ ବରଂ ପ୍ରଧାନମନ୍ତ୍ରୀଙ୍କୁ ନିର୍ବାଚିତ କରିଛନ୍ତି ।

ତୃତୀୟ ଥର ପାଇଁ ଏକ ନିର୍ବାଚିତ ସରକାରକୁ ଫେରାଇ ଆଣିବାର ନିର୍ବାଚନୀ ଜନାଦେଶକୁ ଅଭୂତପୂର୍ବ ବୋଲି ଦର୍ଶାଇ ପ୍ରଧାନମନ୍ତ୍ରୀ କହିଥିଲେ ଯେ ବିଶ୍ୱ ଗଣତନ୍ତ୍ର ମଧ୍ୟରେ ଏହା ଏକ ବିରଳ ସଫଳତା। ‘‘୬୦ ବର୍ଷ ତଳେ ଭାରତରେ ଏଭଳି ହ୍ୟାଟ୍ରିକ୍ ହୋଇଥିଲା’’, ପ୍ରଧାନମନ୍ତ୍ରୀ କହିଥିଲେ। ସେ ଆହୁରି କହିଥିଲେ, ‘‘ଯୁବଆକାଂକ୍ଷା ଏତେ ଅଧିକ ଥିବା ଭାରତ ଭଳି ଦେଶରେ ଯଦି କୌଣସି ସରକାର ୧୦ ବର୍ଷର ଶାସନ ପରେ କ୍ଷମତାକୁ ଫେରିଯାଏ, ତେବେ ଏହା ଏକ ବିରାଟ ବିଜୟ ଏବଂ ବିଶାଳ ଆସ୍ଥା ଭୋଟ । ଆହୁରି ଆପଣମାନଙ୍କ ଏହି ବିଶ୍ୱାସ ମୋର ସବୁଠାରୁ ବଡ ପୁଞ୍ଜି ଏବଂ ଦେଶକୁ ନୂତନ ଉଚ୍ଚତାରେ ପହଞ୍ଚାଇବା ପାଇଁ ମୋତେ ଉତ୍ସାହିତ କରିଥାଏ।’’

ବିକଶିତ ଭାରତର ସ୍ତମ୍ଭ ଭାବରେ ସେ କୃଷକ, ନାରୀଶକ୍ତି, ଯୁବକ ଏବଂ ଗରିବମାନଙ୍କୁ ଗୁରୁତ୍ୱ ଦେଉଛନ୍ତି ବୋଲି ପ୍ରଧାନମନ୍ତ୍ରୀ ଦୋହରାଇଥିଲେ ଏବଂ ମନେ ପକାଇଥିଲେ ଯେ ସରକାର ଗଠନ ପରେ  ପ୍ରଥମ ନିଷ୍ପତ୍ତି କୃଷକ ଏବଂ ଗରିବ ପରିବାର ଉପରେ ଆଧାରିତ ଥିଲା । ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ୩ କୋଟି ଅତିରିକ୍ତ ପରିବାରକୁ ସାମିଲ କରିବା କିମ୍ବା ପିଏମ କିଷାନ ସମ୍ମାନ ନିଧିର କିସ୍ତି ସମ୍ପର୍କରେ ନିଆଯାଇଥିବା ଏଭଳି ନିଷ୍ପତ୍ତି ଲୋକମାନଙ୍କୁ ସାହାଯ୍ୟ କରିବ ବୋଲି ପ୍ରଧାନମନ୍ତ୍ରୀ କହିଛନ୍ତି ।

ପ୍ରଧାନମନ୍ତ୍ରୀ କାର୍ଯ୍ୟକ୍ରମ ସ୍ଥଳରେ ଉପସ୍ଥିତ ଏବଂ ବୈଷୟିକ ଜ୍ଞାନକୌଶଳ ମାଧ୍ୟମରେ ଏହି କାର୍ଯ୍ୟକ୍ରମ ସହ ଯୋଡ଼ି ହୋଇଥିବା କୃଷକମାନଙ୍କୁ ଶୁଭେଚ୍ଛା ଜଣାଇବା ସହ କୋଟି କୋଟି ଚାଷୀଙ୍କ ଆକାଉଣ୍ଟରେ ୨୦ ହଜାର କୋଟି ଟଙ୍କା ଜମା ହୋଇଥିବା ଉଲ୍ଲେଖ କରିଥିଲେ । ୩ କୋଟି ‘ଲଖପତି ଦିଦି’ ସୃଷ୍ଟି ଦିଗରେ ଏକ ଦୃଢ଼ ପଦକ୍ଷେପ ଭାବେ କୃଷି ସଖୀ କାର୍ଯ୍ୟକ୍ରମ ଆରମ୍ଭ କରାଯାଇଛି ବୋଲି ସେ କହିଥିଲେ। ଏହି ପଦକ୍ଷେପ ଦ୍ୱାରା ହିତାଧିକାରୀ ମହିଳାଙ୍କ ପାଇଁ ସମ୍ମାନପୂର୍ଣ୍ଣ ଆୟ ଏବଂ ସୁଯୋଗ ସୁନିଶ୍ଚିତ ହେବ ବୋଲି ପ୍ରଧାନମନ୍ତ୍ରୀ କହିଥିଲେ ।

ପିଏମ କିଷାନ ସମ୍ମାନ ନିଧି ବିଶ୍ୱର ସର୍ବବୃହତ ପ୍ରତ୍ୟକ୍ଷ ଲାଭ ହସ୍ତାନ୍ତର ଯୋଜନା ଭାବରେ ଉଭା ହୋଇଛି ବୋଲି ପ୍ରଧାନମନ୍ତ୍ରୀ କହିଥିଲେ । ସେ ଆହୁରି କହିଥିଲେ, କୋଟି କୋଟି କୃଷକଙ୍କ ବ୍ୟାଙ୍କ ଆକାଉଣ୍ଟରେ ୩.୨୫ ଲକ୍ଷ କୋଟି ରୁ ଅଧିକ ଟଙ୍କା ହସ୍ତାନ୍ତର କରାଯାଇଛି। କେବଳ ବାରାଣସୀର ଚାଷୀ ପରିବାରଗୁଡ଼ିକୁ ୭୦୦ କୋଟି ଟଙ୍କା ସ୍ଥାନାନ୍ତର କରାଯାଇଛି । ଯୋଗ୍ୟ ହିତାଧିକାରୀଙ୍କ ପାଖରେ ଏହାର ଲାଭ ପହଞ୍ଚାଇବାରେ ପ୍ରଯୁକ୍ତିର ବ୍ୟବହାରକୁ ପ୍ରଧାନମନ୍ତ୍ରୀ ପ୍ରଶଂସା କରିଥିଲେ। ଏଥିସହି ବିକଶିତ ଭାରତ ସଂକଳ୍ପ ଯାତ୍ରାକୁ ଶ୍ରେୟ ମଧ୍ୟ ଦେଇଥିଲେ ଯାହା ୧ କୋଟିରୁ ଅଧିକ କୃଷକଙ୍କୁ ପିଏମ୍ କିଷାନ ଯୋଜନାରେ ନିଜକୁ ପଞ୍ଜୀକରଣ କରାଇବାରେ ସକ୍ଷମ କରିଥିଲା । ସେ ଆହୁରି ମଧ୍ୟ କହିଛନ୍ତି ଯେ ସୁଲଭତା ବୃଦ୍ଧି ପାଇଁ ନିୟମକୁ ସରଳୀକରଣ କରାଯାଇଛି। ଯେତେବେଳେ ଉଦ୍ଦେଶ୍ୟ ଏବଂ ବିଶ୍ୱାସ ସଠିକ ସ୍ଥାନରେ ଥାଏ, କୃଷକଙ୍କ କଲ୍ୟାଣ ସମ୍ବନ୍ଧୀୟ କାର୍ଯ୍ୟ ଦ୍ରୁତ ଗତିରେ ହୁଏ ବୋଲି ଶ୍ରୀ ମୋଦୀ କହିଥିଲେ ।

ଏକବିଂଶ ଶତାବ୍ଦୀରେ ଭାରତକୁ ବିଶ୍ୱର ତୃତୀୟ ବୃହତ୍ତମ ଅର୍ଥବ୍ୟବସ୍ଥାରେ ପରିଣତ କରିବାରେ କୃଷି ଇକୋସିଷ୍ଟମର ଭୂମିକା ଉପରେ ଆଲୋକପାତ କରି ପ୍ରଧାନମନ୍ତ୍ରୀ ମୋଦୀ ଡାଲି ଏବଂ ତୈଳବୀଜ କ୍ଷେତ୍ରରେ ଆତ୍ମନିର୍ଭରଶୀଳତା ପାଇଁ ବିଶ୍ୱସ୍ତରୀୟ ଦୃଷ୍ଟିକୋଣ ଏବଂ ତତ୍ପରତାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ । କୃଷି ରପ୍ତାନିକାରୀ ହେବାର ଆବଶ୍ୟକତା ଉପରେ ମଧ୍ୟ ସେ ଜୋର ଦେଇଥିଲେ । ସେ ଉଲ୍ଲେଖ କରିଥିଲେ ଯେ ଏହି ଅଞ୍ଚଳର ସ୍ଥାନୀୟ ଉତ୍ପାଦଗୁଡିକ ଏକ ବିଶ୍ୱ ବଜାର ପାଇପାରୁଛନ୍ତି । ଏକ ଜିଲ୍ଲା ଏକ ଉତ୍ପାଦ ଯୋଜନା ତଥା ପ୍ରତ୍ୟେକ ଜିଲ୍ଲାରେ ରପ୍ତାନି ହବ୍ ମାଧ୍ୟମରେ ରପ୍ତାନିକୁ ପ୍ରୋତ୍ସାହନ ମିଳୁଛି । କୃଷି କ୍ଷେତ୍ରରେ ମଧ୍ୟ ଜିରୋ ଡିଫେକ୍ଟ-ଜିରୋ ଇଫେକ୍ଟ ମନ୍ତ୍ର ଉପରେ ଗୁରୁତ୍ୱାରୋପ କରି ସେ କହିଥିଲେ, “ମୋର ସ୍ୱପ୍ନ ହେଉଛି ଯେ ସମଗ୍ର ବିଶ୍ୱର ପ୍ରତ୍ୟେକ ଡାଇନିଂ ଟେବୁଲରେ ଅତି କମରେ ଗୋଟିଏ ଭାରତୀୟ ଖାଦ୍ୟ ଉତ୍ପାଦ ରହିବା ଉଚିତ୍ ।’’ ସେ ଆହୁରି ମଧ୍ୟ କହିଛନ୍ତି ଯେ କିଷାନ ସମୃଦ୍ଧି କେନ୍ଦ୍ର ମାଧ୍ୟମରେ ବାଜରା, ଔଷଧୀୟ ଉତ୍ପାଦ ଏବଂ ପ୍ରାକୃତିକ କୃଷିକୁ ସମର୍ଥନ କରିବା ପାଇଁ ଏକ ବିଶାଳ ନେଟୱାର୍କ ସୃଷ୍ଟି କରାଯାଉଛି ।

ବହୁ ସଂଖ୍ୟକ ମହିଳାଙ୍କ ଉପସ୍ଥିତି ବିଷୟରେ ଉଲ୍ଲେଖ କରି ପ୍ରଧାନମନ୍ତ୍ରୀ କୃଷି କ୍ଷେତ୍ରରେ ସେମାନଙ୍କର ଗୁରୁତ୍ୱ ଓ ସମର୍ଥନ ଉପରେ ଆଲୋକପାତ କରିଥିଲେ । ମହିଳାଙ୍କ ଅବଦାନକୁ ବଢ଼ାଇବା ପାଇଁ କୃଷିର ପରିସରକୁ ବିସ୍ତାର କରିବା ସମ୍ପର୍କରେ ସେ ସୂଚନା ପ୍ରଦାନ କରିଥିଲେ । ଡ୍ରୋନ ଦିଦି କାର୍ଯ୍ୟକ୍ରମ ଭଳି କୃଷି ସଖୀ କାର୍ଯ୍ୟକ୍ରମ ଏହି ଦିଗରେ ଏକ ପଦକ୍ଷେପ ବୋଲି ପ୍ରଧାନମନ୍ତ୍ରୀ ଆଲୋକପାତ କରି କହିଥିଲେ । ଆଶା କର୍ମୀ ଏବଂ ବ୍ୟାଙ୍କ ସଖୀ ଭାବରେ ମହିଳାମାନଙ୍କ ଅବଦାନ ଉପରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ ଦେଶ ବର୍ତ୍ତମାନ କୃଷି ସଖୀ ଭାବରେ ସେମାନଙ୍କ ଦକ୍ଷତା ଦେଖିବ । ପ୍ରଧାନମନ୍ତ୍ରୀ ମୋଦୀ ସ୍ୱୟଂ ସହାୟକ ଗୋଷ୍ଠୀମାନଙ୍କୁ କୃଷି ସଖୀ ଭାବରେ ୩୦,୦୦୦ରୁ ଅଧିକ ପ୍ରମାଣପତ୍ର ପ୍ରଦାନ କରିବା ବିଷୟରେ ଉଲ୍ଲେଖ କରିଥିଲେ । ସେ ସୂଚନା ଦେଇଥିଲେ ଯେ, ବର୍ତ୍ତମାନ ୧୧ଟି ରାଜ୍ୟରେ ଚାଲିଥିବା ଏହି ଯୋଜନା ଦେଶର ହଜାର ହଜାର ସ୍ୱୟଂ ସହାୟକ ଗୋଷ୍ଠୀ ସହିତ ଯୋଡ଼ି ହେବ ଏବଂ ୩ କୋଟି ଲକ୍ଷପତି ଦିଦି ସୃଷ୍ଟି କରିବାରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ।

କାଶୀ ଏବଂ ପୂର୍ବାଞ୍ଚଳର କୃଷକମାନଙ୍କ ପ୍ରତି କେନ୍ଦ୍ର ଏବଂ ରାଜ୍ୟ ସରକାରଙ୍କ ନିଷ୍ଠା ଉପରେ ପ୍ରଧାନମନ୍ତ୍ରୀ ଆଲୋକପାତ କରିଥିଲେ । ବନାସ ଦୁଗ୍ଧ ସଂକୁଳ, ପେରିସେବଲ କାର୍ଗୋ ସେଣ୍ଟର ଏବଂ ସମନ୍ୱିତ ପ୍ୟାକେଜିଂ ହାଉସ୍ ବିଷୟରେ ସେ ସୂଚନା ଦେଇଥିଲେ । ପ୍ରଧାନମନ୍ତ୍ରୀ କହିଥିଲେ, ବନାସ ଡାଏରୀ ବନାରସ ଏବଂ ଏହାର ଆଖପାଖ ଅଞ୍ଚଳର କୃଷକ ଏବଂ ଗୋପାଳକମାନଙ୍କ ଭାଗ୍ୟ ବଦଳାଇ ଦେଇଛି । ଏବେ ଏହି ଦୁଗ୍ଧ କାରଖାନା ଦୈନିକ ପ୍ରାୟ ୩ ଲକ୍ଷ ଲିଟର କ୍ଷୀର ସଂଗ୍ରହ କରୁଛି। କେବଳ ବନାରସର ୧୪ ହଜାରରୁ ଅଧିକ ଗୋପାଳକ ପରିବାର ଏହି ଦୁଗ୍ଧ ଉତ୍ପାଦନ ସଂସ୍ଥାରେ ପଞ୍ଜୀକୃତ ହୋଇଛନ୍ତି। ଏବେ ବନାସ ଡାଏରୀ ଆଗାମୀ ଦେଢ଼ ବର୍ଷ ମଧ୍ୟରେ କାଶୀର ଆଉ ୧୬ ହଜାର ଗୋପାଳକଙ୍କୁ ଯୋଡିବାକୁ ଯାଉଛି । ବନାସ ଡାଏରୀ ଆସିବା ପରେ ବନାରସର ଅନେକ ଦୁଗ୍ଧ ଉତ୍ପାଦକଙ୍କ ଆୟ ୫ ଲକ୍ଷ ଟଙ୍କା ପର୍ଯ୍ୟନ୍ତ ବୃଦ୍ଧି ପାଇଛି ।

ମତ୍ସ୍ୟ ଚାଷୀଙ୍କ ଆୟରେ ଉନ୍ନତି ଆଣିବା ପାଇଁ ସରକାରଙ୍କ ଦ୍ୱାରା କରାଯାଇଥିବା କାର୍ଯ୍ୟ ଉପରେ ଆଲୋକପାତ କରି ପ୍ରଧାନମନ୍ତ୍ରୀ ଶ୍ରୀ ମୋଦୀ ମତ୍ସ୍ୟ ସମ୍ପଦା ଯୋଜନା ଏବଂ କିଷାନ କ୍ରେଡିଟ୍ କାର୍ଡର ଲାଭ ବିଷୟରେ ଉଲ୍ଲେଖ କରିଥିଲେ । ବାରାଣସୀରେ ମାଛ ଚାଷ ସହ ଜଡ଼ିତ ଲୋକଙ୍କୁ ସହାୟତା କରିବା ପାଇଁ ପ୍ରାୟ ୭୦ କୋଟି ଟଙ୍କା ବ୍ୟୟରେ ଚନ୍ଦୌଲିରେ ଏକ ଆଧୁନିକ ମାଛ ବଜାର ନିର୍ମାଣ କରାଯାଇଥିବା ସେ ସୂଚନା ଦେଇଥିଲେ।

ବାରାଣସୀରେ ପ୍ରଧାନମନ୍ତ୍ରୀ ସୂର୍ଯ୍ୟଘର ମୁଫ୍ତ ବିଜୁଳି ଯୋଜନା ସମୃଦ୍ଧ ହେଉଥିବାରୁ ପ୍ରଧାନମନ୍ତ୍ରୀ ଖୁସି ବ୍ୟକ୍ତ କରିଥିଲେ । ଏହି ଯୋଜନାରେ ପ୍ରାୟ ୪୦ ହଜାର ସ୍ଥାନୀୟ ଲୋକ ପଞ୍ଜୀକରଣ କରିଥିବା ବେଳେ ୨୫୦୦ ଘରକୁ ସୋଲାର ପ୍ୟାନେଲ ମିଳିସାରିଛି ଏବଂ ୩ ହଜାର ଘର ପାଇଁ କାମ ଚାଲିଛି ବୋଲି ସେ ସୂଚନା ଦେଇଛନ୍ତି। ଏହା ଦ୍ୱାରା ଶୂନ୍ୟ ବିଜୁଳି ବିଲର ଦ୍ୱିଗୁଣିତ ଲାଭ ଏବଂ ହିତାଧିକାରୀ ପରିବାରକୁ ଅତିରିକ୍ତ ଆୟ ମିଳୁଛି।

ବାରାଣାସୀରେ ଯୋଗାଯୋଗକୁ ଆଗକୁ ବଢ଼ାଇବା ଏବଂ ଗାଁ ନିକଟରେ ପହଞ୍ଚିବା ଦିଗରେ ଗତ ୧୦ ବର୍ଷ ମଧ୍ୟରେ ହୋଇଥିବା କାର୍ଯ୍ୟ ସମ୍ପର୍କରେ ଆଲୋକପାତ କରି ପ୍ରଧାନମନ୍ତ୍ରୀ କହିଥିଲେ ଯେ, ବାରାଣାସୀରେ ଦେଶର ପ୍ରଥମ ସିଟି ରୋପୱେ ପ୍ରକଳ୍ପ ଶେଷ ପର୍ଯ୍ୟାୟରେ ପହଞ୍ଚିଛି। ଗାଜିପୁର, ଆଜମଗଡ଼ ଏବଂ ଜୌନପୁର ସହରକୁ ସଂଯୋଗ କରୁଥିବା ରିଂ ରୋଡ୍ କାମ ସରିଛି । ଫୁଲଓ୍ଵାରିଆ ଏବଂ ଚୌକାଘାଟରେ ଫ୍ଲାଏଓଭର ନିର୍ମାଣ ସମ୍ପୂର୍ଣ୍ଣ ହୋଇଛି । କାଶୀ, ବାରାଣସୀ ଏବଂ କ୍ୟାଣ୍ଟ ରେଳ ଷ୍ଟେସନକୁ ନୂଆ ରୂପ ମିଳିଛି । ବବତପୁର ବିମାନବନ୍ଦରରୁ ବିମାନ ଚଳାଚଳ ଦ୍ୱାରା ବିମାନ ଯାତ୍ରା ଓ ବ୍ୟବସାୟ ସହଜ ହୋଇଛି । ଗଙ୍ଗା ଘାଟର ବିକାଶ, ବନାରସ ହିନ୍ଦୁ ବିଶ୍ୱବିଦ୍ୟାଳୟରେ ନୂତନ ସୁବିଧା, ସହରର କୁଣ୍ଡଗୁଡିକର ନବୀକରଣ ଏବଂ ବାରଣସୀର ବିଭିନ୍ନ ସ୍ଥାନରେ ନୂତନ ବ୍ୟବସ୍ଥା ବିକଶିତ କରାଯାଉଛି । ପ୍ରଧାନମନ୍ତ୍ରୀ ଆହୁରି ମଧ୍ୟ କହିଥିଲେ, ଯେ କାଶୀରେ କ୍ରୀଡ଼ା ଭିତ୍ତିଭୂମିର ବିକାଶ ଏବଂ ନୂତନ ଷ୍ଟାଡିୟମ ଯୁବବର୍ଗଙ୍କ ପାଇଁ ନୂତନ ସୁଯୋଗ ସୃଷ୍ଟି କରୁଛି ।

ଜ୍ଞାନର ରାଜଧାନୀ ଭାବରେ କାଶୀର ଖ୍ୟାତିକୁ ସ୍ମରଣ କରି ପ୍ରଧାନମନ୍ତ୍ରୀ କହିଥିଲେ, ଗୋଟିଏ ଐତିହ୍ୟ ସହର କିଭଳି ଆଧୁନିକ ସହରୀ ବିକାଶର ଏକ ନୂଆ ଗାଥା ଲେଖିପାରିବ ତାହା  ବାରାଣସୀ ସମଗ୍ର ବିଶ୍ୱକୁ ଶିଖାଇ ଦେଇଛି । କାଶୀରେ ବିକାଶର ମନ୍ତ୍ର ତଥା ଐତିହ୍ୟ ସବୁଠି ଦେଖିବାକୁ ମିଳୁଛି। ଆଉ ଏହି ବିକାଶ କେବଳ କାଶୀ ପାଇଁ ଲାଭଦାୟକ ନୁହେଁ । ସମଗ୍ର ପୂର୍ବାଞ୍ଚଳରୁ ଯେଉଁ ପରିବାରମାନେ ସେମାନଙ୍କ କାମ ଏବଂ ଆବଶ୍ୟକତା ପାଇଁ କାଶୀକୁ ଆସନ୍ତି, ସେମାନେ ମଧ୍ୟ ଏହି ସବୁ କାର୍ଯ୍ୟରୁ ବହୁତ ସାହାଯ୍ୟ ପାଉଛନ୍ତି ବୋଲି ପ୍ରଧାନମନ୍ତ୍ରୀ ମୋଦୀ କହିଥିଲେ। ବାବା ବିଶ୍ୱନାଥଙ୍କ ଆଶୀର୍ବାଦରେ କାଶୀର ବିକାଶର ଏହି ନୂଆ ଗାଥା ନିରବଚ୍ଛିନ୍ନ ଭାବେ ଜାରି ରହିବ ବୋଲି ଶ୍ରୀ ମୋଦୀ ଶେଷରେ କହିଛନ୍ତି।

ଏହି ଅବସରରେ ଉତ୍ତରପ୍ରଦେଶ ରାଜ୍ୟପାଳ ଶ୍ରୀମତୀ ଆନନ୍ଦୀବେନ ପଟେଲ, ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ, କେନ୍ଦ୍ର କୃଷି ଓ କୃଷକ କଲ୍ୟାଣ ମନ୍ତ୍ରୀ ଶିବରାଜ ସିଂ ଚୌହାନ, କେନ୍ଦ୍ର କୃଷି ଓ କୃଷକ କଲ୍ୟାଣ ରାଷ୍ଟ୍ରମନ୍ତ୍ରୀ ଭଗୀରଥ ଚୌଧୁରୀ, ଉତ୍ତର ପ୍ରଦେଶର ଉପମୁଖ୍ୟମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ଏବଂ ବ୍ରଜେଶ ପାଠକ ଏବଂ ଉତ୍ତର ପ୍ରଦେଶ ସରକାରଙ୍କ ମନ୍ତ୍ରୀମାନେ ଉପସ୍ଥିତ ଥିଲେ।

ପୃଷ୍ଠଭୂମି

ତୃତୀୟ ଥର ପାଇଁ ପ୍ରଧାନମନ୍ତ୍ରୀ ଭାବେ ଶପଥ ନେବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କୃଷକ କଲ୍ୟାଣ ଦିଗରେ ସରକାରଙ୍କ ପ୍ରତିବଦ୍ଧତାକୁ ପ୍ରତିଫଳିତ କରି ପ୍ରଧାନମନ୍ତ୍ରୀ କିଷାନ ନିଧିର ସପ୍ତଦଶ କିସ୍ତି ହସ୍ତାନ୍ତର କରିବା ପାଇଁ ତାଙ୍କର ପ୍ରଥମ ଫାଇଲରେ ସ୍ୱାକ୍ଷର କରିଥିଲେ। ଏହି ପ୍ରତିଶ୍ରୁତିକୁ ଜାରି ରଖି ପ୍ରଧାନମନ୍ତ୍ରୀ ପ୍ରତ୍ୟକ୍ଷ ଲାଭ ହସ୍ତାନ୍ତର ମାଧ୍ୟମରେ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି (ପିଏମ-କିଷାନ) ଅଧୀନରେ ପ୍ରାୟ ୯.୨୬ କୋଟି ହିତାଧିକାରୀ କୃଷକଙ୍କୁ ୨୦,୦୦୦ କୋଟି ଟଙ୍କାରୁ ଅଧିକ ମୂଲ୍ୟର ସପ୍ତଦଶ କିସ୍ତି ହସ୍ତାନ୍ତର କରିଛନ୍ତି। ବର୍ତ୍ତମାନ ସୁଦ୍ଧା ୧୧ କୋଟିରୁ ଅଧିକ ଯୋଗ୍ୟ କୃଷକ ପରିବାର ପିଏମ୍-କିଷାନ ଯୋଜନାରେ ୩.୦୪ ଲକ୍ଷ କୋଟି ଟଙ୍କାରୁ ଅଧିକ ଲାଭ ପାଇଛନ୍ତି।

ପ୍ରଧାନମନ୍ତ୍ରୀ ଶ୍ରୀ ମୋଦୀ ସ୍ୱୟଂ ସହାୟକ ଗୋଷ୍ଠୀର ୩୦,୦୦୦ରୁ ଅଧିକ ମହିଳାଙ୍କୁ କୃଷି ସଖୀ ଭାବରେ ପ୍ରମାଣପତ୍ର ମଧ୍ୟ ପ୍ରଦାନ କରିଥିଲେ। କୃଷି ସଖୀ ସମନ୍ୱୟ କାର୍ଯ୍ୟକ୍ରମ (କେଏସସିପି)ର ଲକ୍ଷ୍ୟ ହେଉଛି, କୃଷି ସଖୀ ଭାବରେ ଗ୍ରାମୀଣ ମହିଳାଙ୍କ ସଶକ୍ତୀକରଣ ମାଧ୍ୟମରେ ଗ୍ରାମୀଣ ଭାରତକୁ ରୂପାନ୍ତରିତ କରିବା। କୃଷି ସଖୀମାନଙ୍କୁ ପାରା-ସମ୍ପ୍ରସାରଣ ଶ୍ରମିକ ଭାବରେ ତାଲିମ ଏବଂ ପ୍ରମାଣପତ୍ର ପ୍ରଦାନ କରିବା ମଧ୍ୟ ଯୋଜନାର ଉଦ୍ଦେଶ୍ୟ। ଏହି ପ୍ରମାଣପତ୍ର ପାଠ୍ୟକ୍ରମ ‘ଲଖପତି ଦିଦି’ କାର୍ଯ୍ୟକ୍ରମର ଉଦ୍ଦେଶ୍ୟ ସହିତ ମଧ୍ୟ ସମନ୍ୱିତ।

ନୂଆଦିଲ୍ଲୀ: ଆମେରିକାର ଜାତୀୟ ସୁରକ୍ଷା ପରାମର୍ଶଦାତା (ଏନଏସଏ) ଜେକ୍ ସୁଲିଭାନ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସାକ୍ଷାତ କରିଛନ୍ତି।

ଏନଏସଏ ସୁଲିଭାନ୍ ଦ୍ୱିପାକ୍ଷିକ ସହଯୋଗର ବିଭିନ୍ନ କ୍ଷେତ୍ରରେ ଅଗ୍ରଗତି ବିଷୟରେ ପ୍ରଧାନମନ୍ତ୍ରୀଙ୍କୁ ଅବଗତ କରାଇଥିଲେ, ବିଶେଷକରି ସେମିକଣ୍ଡକ୍ଟର, ଆର୍ଟିଫିସିଆଲ ଇଣ୍ଟେଲିଜେନ୍ସ, ଟେଲିକମ, ପ୍ରତିରକ୍ଷା, ଗୁରୁତ୍ୱପୂର୍ଣ୍ଣ ଖଣିଜ ପଦାର୍ଥ, ମହାକାଶ ଆଦି ଗୁରୁତ୍ୱପୂର୍ଣ୍ଣ ଏବଂ ଉଦୀୟମାନ ପ୍ରଯୁକ୍ତି ବିଦ୍ୟା ଉପରେ ପଦକ୍ଷେପ (ଆଇସିଇଟି) ଅଧୀନରେ ଅଗ୍ରଗତି ବିଷୟରେ ସେ ଆଲୋଚନା କରିଥିଲେ।

ସମସ୍ତ କ୍ଷେତ୍ରରେ ବଢୁଥିବା ଦ୍ୱିପାକ୍ଷିକ ଭାଗିଦାରୀର ଗତି ଓ ବ୍ୟାପକତା ଏବଂ ପାରସ୍ପରିକ ସ୍ୱାର୍ଥର ଆଞ୍ଚଳିକ ଏବଂ ବିଶ୍ୱସ୍ତରୀୟ ପ୍ରସଙ୍ଗ ଉପରେ ସହମତି ତଥା ସମନ୍ୱୟ ଉପରେ ପ୍ରଧାନମନ୍ତ୍ରୀ ସନ୍ତୋଷ ବ୍ୟକ୍ତ କରିଥିଲେ।

ଜି-୭ ଶିଖର ସମ୍ମିଳନୀ ଅବସରରେ ରାଷ୍ଟ୍ରପତି ବାଇଡେନଙ୍କ ସହ ତାଙ୍କର ନିକଟରେ ହୋଇଥିବା ସକାରାତ୍ମକ ବାର୍ତ୍ତାଳାପକୁ ପ୍ରଧାନମନ୍ତ୍ରୀ ସ୍ମରଣ କରିଥିଲେ। ବୈଶ୍ୱିକ ମଙ୍ଗଳ ପାଇଁ ବ୍ୟାପକ ବୈଶ୍ୱିକ ରଣନୀତିକ ଭାଗିଦାରୀକୁ ସୁଦୃଢ଼ କରିବା ଏବଂ ନୂତନ କାର୍ଯ୍ୟକାଳରେ ଏହାକୁ ଅଧିକ ଉଚ୍ଚତାରେ ପହଞ୍ଚାଇବା ପାଇଁ ପ୍ରଧାନମନ୍ତ୍ରୀ ପ୍ରତିବଦ୍ଧତାକୁ ଦୋହରାଇଥିଲେ।

ନୂଆଦିଲ୍ଲୀ: କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ଅମିତ ଶାହଙ୍କ ଅଧ୍ୟକ୍ଷତାରେ ସୋମବାର ନୂଆଦିଲ୍ଲୀରେ ମଣିପୁର ସୁରକ୍ଷା ସ୍ଥିତିର ସମୀକ୍ଷା ପାଇଁ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି। ଏହି ବୈଠକରେ ସ୍ଥଳସେନା ମୁଖ୍ୟ ଜେନେରାଲ ମନୋଜ ପାଣ୍ଡେ, କେନ୍ଦ୍ର ଗୃହ ସଚିବ, ଗୁଇନ୍ଦା ବ୍ୟୁରୋ (ଆଇବି)ର ନିର୍ଦ୍ଦେଶକ, ସ୍ଥଳସେନା (ନାମାଙ୍କିତ) ମୁଖ୍ୟ ଲେଫ୍ଟନାଣ୍ଟ ଜେନେରାଲ ଉପେନ୍ଦ୍ର ଦ୍ୱିବେଦୀ, ମଣିପୁର ସରକାରଙ୍କ ସୁରକ୍ଷା ପରାମର୍ଶଦାତା, ଆସାମ ରାଇଫଲ୍ସର ମହାନିର୍ଦ୍ଦେଶକ, ମଣିପୁର ମୁଖ୍ୟ ଶାସନ ସଚିବ, ପୁଲିସ ମହାନିର୍ଦ୍ଦେଶକ (ଡିଜିପି) ଏବଂ ସେନା ଓ ଗୃହ ମନ୍ତ୍ରଣାଳୟର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।

କେନ୍ଦ୍ର ଗୃହମନ୍ତ୍ରୀ ଅମିତ ଶାହ ମଣିପୁରର ସୁରକ୍ଷା ସ୍ଥିତିର ସାମଗ୍ରିକ ସମୀକ୍ଷା କରିଥିଲେ ଏବଂ ମଣିପୁରରେ ଆଉ ଯେପରି ହିଂସାକାଣ୍ଡ ନ ଘଟେ ତାହା ସୁନିଶ୍ଚିତ କରିବାକୁ ନିର୍ଦ୍ଦେଶ ଦେଇଥିଲେ। ମଣିପୁରରେ ଶାନ୍ତି ଫେରାଇ ଆଣିବା ପାଇଁ କେନ୍ଦ୍ରୀୟ ବାହିନୀର ରଣନୀତିକ ମୁତୟନ ଉପରେ ଗୃହମନ୍ତ୍ରୀ ଗୁରୁତ୍ୱାରୋପ କରିଥିଲେ। ଆବଶ୍ୟକ ପଡ଼ିଲେ କେନ୍ଦ୍ର ସୁରକ୍ଷାବଳ ସଂଖ୍ୟା ବୃଦ୍ଧି କରାଯିବ ବୋଲି ସେ କହିଛନ୍ତି। ହିଂସାକାରୀଙ୍କ ବିରୋଧରେ ଆଇନ ଅନୁଯାୟୀ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଗୃହମନ୍ତ୍ରୀ ନିର୍ଦ୍ଦେଶ ଦେଇଛନ୍ତି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଭାରତ ସରକାର ମଣିପୁରର ସମସ୍ତ ନାଗରିକଙ୍କ ସୁରକ୍ଷା ସୁନିଶ୍ଚିତ କରିବାକୁ ସମ୍ପୂର୍ଣ୍ଣ ପ୍ରତିଶ୍ରୁତିବଦ୍ଧ ବୋଲି କେନ୍ଦ୍ର ଗୃହ ମନ୍ତ୍ରୀ କହିଥିଲେ। ବିଶେଷ କରି ଖାଦ୍ୟ, ପାଣି, ଔଷଧ ଓ ଅନ୍ୟାନ୍ୟ ମୌଳିକ ସୁବିଧାର ଉପଯୁକ୍ତ ଉପଲବ୍ଧତା ନେଇ ଶ୍ରୀ ଅମିତ ଶାହ ରିଲିଫ୍ କ୍ୟାମ୍ପର ସ୍ଥିତିର ସମୀକ୍ଷା କରିଥିଲେ। ବିସ୍ଥାପିତଙ୍କ ପାଇଁ ଉପଯୁକ୍ତ ସ୍ୱାସ୍ଥ୍ୟ ଓ ଶିକ୍ଷା ସୁବିଧା ତଥା ସେମାନଙ୍କ ଥଇଥାନ ସୁନିଶ୍ଚିତ କରିବାକୁ ଗୃହମନ୍ତ୍ରୀ ମଣିପୁରର ମୁଖ୍ୟ ଶାସନ ସଚିବଙ୍କୁ ନିର୍ଦ୍ଦେଶ ଦେଇଥିଲେ।

ସେଠାରେ ଲାଗି ରହିଥିବା ଜାତିଆଣ ସଂଘର୍ଷର ସମାଧାନ ପାଇଁ ସମନ୍ୱିତ ଆଭିମୁଖ୍ୟର ଗୁରୁତ୍ୱ ଉପରେ ଗୃହମନ୍ତ୍ରୀ ଜୋର ଦେଇଥିଲେ। ସେ କହିଥିଲେ ଯେ ଗୃହ ମନ୍ତ୍ରଣାଳୟ ଉଭୟ ଗୋଷ୍ଠୀ, ମୈତୀ ଏବଂ କୁକିମାନଙ୍କ ସହ କଥାବାର୍ତ୍ତା କରିବ, ଯାହାଦ୍ୱାରା ଜାତିଗତ ବିଭେଦକୁ ଯଥାଶୀଘ୍ର ଦୂର କରାଯାଇପାରିବ। ରାଜ୍ୟରେ ସୁରକ୍ଷା ସ୍ଥିତି ସୁଦୃଢ଼ କରିବା ପାଇଁ ଭାରତ ସରକାର ମଣିପୁର ସରକାରଙ୍କୁ ସକ୍ରିୟ ଭାବେ ସହଯୋଗ କରି ଆସୁଛନ୍ତି।

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପଶ୍ଚିମବଙ୍ଗ ରେଳ ଦୁର୍ଘଟଣାରେ ପ୍ରାଣ ହରାଇଥିବା ଲୋକଙ୍କ ପ୍ରତି ଗଭୀର ଶୋକ ପ୍ରକାଶ କରିଛନ୍ତି। କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ଘଟଣାସ୍ଥଳକୁ ଯାଇଥିବା ବେଳେ କ୍ଷତିଗ୍ରସ୍ତଙ୍କୁ ସହାୟତା କରିବା ପାଇଁ ଉଦ୍ଧାର କାର୍ଯ୍ୟ ଜାରି ରହିଛି ବୋଲି ପ୍ରଧାନମନ୍ତ୍ରୀ ଆଶ୍ୱାସନା ଦେଇଛନ୍ତି। ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ତରଫରୁ ପ୍ରଧାନମନ୍ତ୍ରୀ ଜାତୀୟ ରିଲିଫ ପାଣ୍ଠି (ପିଏମଏନଆରଏଫ)ରୁ ପ୍ରତ୍ୟେକ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଲେଖାଏଁ ଏବଂ ଆହତଙ୍କୁ ୫୦ ହଜାର ଟଙ୍କା ଲେଖାଏଁ ଅନୁକମ୍ପାମୂଳକ ସହାୟତା ଘୋଷଣା କରାଯାଇଛି।

ପ୍ରଧାନମନ୍ତ୍ରୀ ଏକ୍ସରେ ପୋଷ୍ଟ କରିଛନ୍ତି;

‘‘ପଶ୍ଚିମବଙ୍ଗରେ ଘଟିଥିବା ରେଳ ଦୁର୍ଘଟଣା ଦୁଃଖଦାୟକ। ଯେଉଁମାନେ ନିଜ ପ୍ରିୟଜନଙ୍କୁ ହରାଇଛନ୍ତି ସେମାନଙ୍କ ପ୍ରତି ସମବେଦନା ଜଣାଉଛି। ଆହତମାନେ ଯଥାଶୀଘ୍ର ସୁସ୍ଥ ହୁଅନ୍ତୁ ବୋଲି ପ୍ରାର୍ଥନା କରୁଛି। ଅଧିକାରୀଙ୍କ ସହ କଥା ହୋଇ ସ୍ଥିତି ଅନୁଧ୍ୟାନ କରିଛି। କ୍ଷତିଗ୍ରସ୍ତଙ୍କୁ ସାହାଯ୍ୟ କରିବା ପାଇଁ ଉଦ୍ଧାର କାର୍ଯ୍ୟ ଜାରି ରହିଛି। ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ ମଧ୍ୟ ଘଟଣାସ୍ଥଳକୁ ଯାଇଛନ୍ତି।’’

ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଏକ୍ସରେ ପୋଷ୍ଟ କରାଯାଇଛି;

‘‘ପଶ୍ଚିମବଙ୍ଗରେ ରେଳ ଦୁର୍ଘଟଣାରେ ମୃତକଙ୍କ ପରିବାରକୁ ପିଏମଏନଆରଏଫରୁ ୨ ଲକ୍ଷ ଟଙ୍କା ଲେଖାଏଁ ଅନୁକମ୍ପାମୂଳକ ସହାୟତା ଦିଆଯିବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଘୋଷଣା କରିଛନ୍ତି । ଆହତଙ୍କୁ ୫୦ ହଜାର ଟଙ୍କା ଲେଖାଏଁ ଦିଆଯିବ।’’